ഗതാഗതം സുഗമമാക്കാനുള്ള നടപടികള്‍ സ്വീകരിച്ചതായും ടോള്‍ പിരിക്കാന്‍ അനുവദിക്കണമെന്നും കേന്ദ്ര സര്‍ക്കാറിന് വേണ്ടി ഹാജരായ സോളിസിറ്റര്‍ ജനറല്‍ തുഷാര്‍ മേത്ത വാദിച്ചിരുന്നു. 65 കിലോമീറ്റര്‍ പാതയില്‍ അഞ്ച് കിലോമീറ്റര്‍ മാത്രമാണ് പ്രശ്‌നങ്ങളുണ്ടായിരുന്നതെന്നും ഇതിന്റെ പേരില്‍ ടോള്‍ വിലക്കിയത് മറ്റ് ദേശീയപാതകളുടെ കാര്യത്തിലും ബാധകമാവുകയാണെന്നും സോളിസിറ്റര്‍ ജനറല്‍ അറിയിച്ചു.

അതേസമയം ആമ്പല്ലൂര്‍, മുരിങ്ങൂര്‍ മേഖലയില്‍ മാത്രമാണ് നിലവില്‍ പ്രശ്‌നമുള്ളതെന്നായിരുന്നു തൃശൂര്‍ ജില്ല കലക്ടറുടെ വിശദീകരണം. ഇക്കാര്യത്തില്‍ വെള്ളിയാഴ്ച ഉത്തരവ് പുറപ്പെടുവിക്കാമെന്ന് കോടതി വ്യക്തമാക്കി. നിലവിലെ പ്രശ്‌നങ്ങള്‍ പരിഹരിക്കാന്‍ ദേശീയപാത അതോറിറ്റിക്ക് അടിയന്തരമായി നിര്‍ദേശം നല്‍കാന്‍ ജില്ല കലക്ടറോട് കോടതി നിര്‍ദേശിച്ചു. തൃശൂര്‍ ഡി.സി.സി പ്രസിഡന്റ് ജോസഫ് ടാജറ്റ്, ഷാജി കോടങ്കണ്ടത്ത്, നിയുക്ത യൂത്ത് കോണ്‍ഗ്രസ് സംസ്ഥാന പ്രസിഡന്റ് ഒ.ജെ. ജനീഷ് തുടങ്ങിയവര്‍ നല്‍കിയ ഹരജികളാണ് കോടതിയുടെ പരിഗണനയിലുള്ളത്.