tour – Chandrika Daily

ഹിറ്റായി കെഎസ്ആര്‍ടിസി ടൂര്‍ പാക്കേജുകള്‍; രണ്ട് വര്‍ഷത്തിനിടെ ഒന്നര കോടി വരുമാനം

Chandrika Web — Wed, 02 Aug 2023 09:59:10 +0000

സൂപ്പര്‍ ഹിറ്റായി കെ.എസ്.ആര്‍ടി.സിയുടെ ടൂര്‍ പാക്കേജുകള്‍. മലപ്പുറം ജില്ലയില്‍ നിന്നും ടൂര്‍ പാക്കേജിലൂടെ രണ്ട് വര്‍ഷത്തിനിടെ ഒന്നര കോടി രൂപയുടെ വരുമാനമാണ് സ്വന്തമാക്കിയത്. 2021 ഒക്ടോബര്‍ 31ന് മൂന്നാര്‍ യാത്രയിലൂടെയാണ് വിനോദയാത്രക്ക് കെഎസ്ആര്‍ടിസി തുടക്കം കുറിച്ചത്. തുടങ്ങിയത് മുതല്‍ ഇതുവരെ മൂന്നാര്‍ വിനോദയാത്ര മുടങ്ങിയിട്ടില്ല. വിനോദയാത്ര നടത്തുന്നതിന് കെ.എസ്.ആര്‍.ടി.സിക്ക് ആശയം ലഭിച്ചതും മലപ്പുറത്ത് നിന്നായിരുന്നു. മലപ്പുറം ജില്ലയിലെ വിവിധ ഡിപ്പോകളില്‍ നിന്നായി ഇക്കാലയളവില്‍ 502 യാത്രകളാണ് നടത്തിയത്. മലപ്പുറം മുതല്‍ കാസര്‍ഗോഡ് വരെയുള്ള നോര്‍ത്ത് സോണില്‍ വിനോദയാത്രയിലൂടെ ഇക്കാലയളവില്‍ എട്ട് കോടിയുടെ വരുമാനമാണ് ലഭിച്ചത്. മലപ്പുറം, പാലക്കാട് ജില്ലകളാണ് കൂടുതല്‍ യാത്ര നടത്തിയത്.

ചുരുങ്ങിയ ചെലവില്‍ സുരക്ഷിതമായ യാത്ര ചെയ്യാമെന്നതാണ് കെഎസ്ആര്‍ടിസി ആകര്‍ഷണം. മലപ്പുറം ഡിപ്പോയില്‍ നിന്നുമുള്ള മൂന്നാര്‍, മലക്കപ്പാറ യാത്രകള്‍ ഇതുവരെ മുടങ്ങിയിട്ടില്ല. മാമലക്കണ്ടം വഴിയാണ് മൂന്നാര്‍ യാത്ര നടത്തുന്നതെന്നത് കൂടുതല്‍ പേരെ ആകര്‍ഷിക്കുന്നുണ്ട്. കാടിനെ അറിഞ്ഞുള്ള കൂടുതല്‍ യാത്രകളും മലപ്പുറത്ത് നിന്നും തുടക്കം കുറിച്ചിട്ടുണ്ട്. സൈലന്റ് വാലി ദേശീയോദ്യാനത്തിലേക്ക് ആരംഭിച്ച പുതിയ യാത്രയും സഞ്ചാരികള്‍ക്കിടയില്‍ ഹിറ്റാണ്. പറമ്പികുളം കടുവാ സങ്കേതത്തിലേക്കും നെല്ലിയാമ്പതിയിലേക്കുമുള്ള യാത്രക്കും ഉടന്‍ തുടക്കം കുറിക്കും. കേരളത്തിലെ ഏത് വിനോദ സഞ്ചാര കേന്ദ്രങ്ങളിലേക്കും ആവശ്യനുസരണം പാക്കേജുകളും കെഎസ്ആര്‍ടിസി നടത്തുന്നുണ്ട്.

നെഹ്‌റുട്രോഫി വള്ളംകളി കാണാന്‍

നെഹ്‌റു ട്രോഫി വള്ളംകളി കാണാന്‍ യാത്ര സൗകര്യമൊരുക്കി കെഎസ്ആര്‍ടിസി. ഓഗസ്റ്റ് 12ന് പുലര്‍ച്ച പുറപ്പെട്ട് വൈകീട്ട് തിരികെ വരുന്ന രീതിയിലാണ് യാത്ര ക്രമീകരിച്ചിട്ടുള്ളത്. വള്ളംകളി കാണുന്നതിനുള്ള ഗാലറി ടിക്കറ്റും കെഎസ്ആര്‍ടിസി നല്‍കും. സഞ്ചാരികള്‍ക്ക് ആവശ്യാനുസരണം 500, 1000 രൂപയുടെ ടിക്കറ്റ് തിരഞ്ഞെടുക്കാം. കൂടുതല്‍ വിവരങ്ങള്‍ക്ക് ഫോണ്‍ 9446389823, 9995726885

കുറുവ ദ്വീപ് തുറന്നു: നിയന്ത്രണങ്ങളില്‍ ഇളവില്ല

chandrika — Mon, 03 Dec 2018 12:27:32 +0000

കാട്ടിക്കുളം: കാലവര്‍ഷത്തെ തുടര്‍ന്ന് മെയ് 31 ന് അടച്ച കുറുവ ദ്വീപ് വിനോദ സഞ്ചാരികള്‍ക്കായി തുറന്നു. എന്നാല്‍ മുമ്പുണ്ടായിരുന്ന നിയന്ത്രണങ്ങളില്‍ ഇളവ് വരുത്താതെ പ്രവേശിപ്പിക്കാവുന്ന ആളുകളുടെ എണ്ണം 950 ആയി കുറച്ച് കൊണ്ടാണ് ആറുമാസത്തിന് ശേഷം ദ്വീപ് തുറന്നത്. 2017 ഡിസംമ്പര്‍ 16നാണ് വനം വകുപ്പ് കര്‍ശന നിയന്ത്രണങ്ങള്‍ ഏര്‍പ്പെടുത്തി കൊണ്ട് ദ്വീപ് തുറന്നത്.
പാല്‍വെളിച്ചം പാക്കം ഭാഗങ്ങളിലൂടെ ആകെ 400 പേര്‍ക്ക് മാത്രം പ്രവേശനം നല്‍കാന്‍ പാടുള്ളു എന്ന ഉത്തരവ് പ്രകാരമാണ് ദ്വീപ് തുറന്നത്. ഇത് വ്യാപക പ്രതിഷേധങ്ങള്‍ക്കിടയാക്കിയിരുന്നു.
കൂടാതെ നിത്യേന നിരവധി സഞ്ചാരികള്‍ ദ്വീപ് സന്ദര്‍ശിക്കാനാകാതെ നിരാശയോടെ മടങ്ങുകയും ചെയ്തിരുന്നു. ദ്വീപിനെ ആശ്രയിച്ച് കഴിയുന്ന നിരവധി പേര്‍ക്ക് തീരുമാനം കനത്ത തിരിച്ചടിയായി മാറുകയും ചെയ്തിരുന്നു. ഇതിനെ തുടര്‍ന്ന് നോര്‍ത്ത് വയനാട് ഡി എഫ് ഒ ഓഫീസിന് മുമ്പില്‍ എം എല്‍ എ യുടെ അനിശ്ചിതകാല സമരം, ദ്വീപിലേക്ക് ബഹുജന മാര്‍ച്ച് തുടങ്ങിയ ശക്തമായ പ്രക്ഷോഭ പരിപാടികള്‍ അരഞ്ഞേറുകയും ഭരണകക്ഷിയിലെ ഘടകകക്ഷികളായ സി.പി.എമ്മും, സി.പി.ഐ യും തമ്മില്‍ രൂക്ഷമായ അഭിപ്രായ ഭിന്നത ഉടലെടുക്കുകയും ചെയ്തിരുന്നു. കേരളത്തിലെ പ്രധാന വിനോദസഞ്ചാര കേന്ത്രങ്ങളില്‍ ഒന്നാണ് കുറുവ ദ്വീപ്.
ദ്വീപ് അടച്ച സമയങ്ങളില്‍ ജില്ലാ ടൂറിസം പ്രമോഷന്‍ കൗണ്‍സില്‍ ചങ്ങാട സവാരി ഏര്‍പ്പെടുത്തിയിരുന്നു. ഇത് ദ്വീപ് സന്ദര്‍ശിക്കാന്‍ കഴിയാത്ത വിനോദ സഞ്ചാരികള്‍ക്ക് ഏറെ അനുഗ്രഹമായി മാറിയിരുന്നു.

ട്രാന്‍സിറ്റ് യാത്രക്കാര്‍ക്ക് ദോഹാ സന്ദര്‍ശനം: ഡിസ്‌ക്കവര്‍ ഖത്തര്‍ പദ്ധതി വിപുലീകരിക്കുന്നു

chandrika — Thu, 08 Feb 2018 04:06:33 +0000

ദോഹ: ട്രാന്‍സിറ്റ് യാത്രക്കാര്‍ക്ക് ഏറ്റവും മികച്ച സന്ദര്‍ശനനാനുഭവം പ്രദാനം ചെയ്യുന്നതിനായി ഖത്തര്‍ എയര്‍വേയ്‌സിന്റെ ഡിസ്‌ക്കവര്‍ ഖത്തര്‍ പദ്ധതി വിപുലീകരിക്കുന്നു. ഖത്തര്‍ ടൂറിസം അതോറിറ്റിയുമായി സഹകരിച്ചാണിത്.
ഖത്തര്‍ മുഖേന യാത്രചെയ്യുന്ന ട്രാന്‍സിറ്റ് യാത്രക്കാര്‍ക്ക് നഗരസന്ദര്‍ശനത്തിനും മരുഭൂമിയില്‍ പര്യടനം നടത്തുന്നതിനും മുന്‍കൂട്ടി ബുക്ക് ചെയ്യാനാകും. സന്ദര്‍ശന ടൂറില്‍ കൂടുതല്‍ വിഭാഗങ്ങള്‍, സ്ഥലങ്ങള്‍, സേവനങ്ങള്‍ ഉള്‍പ്പെടുത്തിയിട്ടുണ്ട്. ട്രാന്‍സിറ്റ് യാത്രക്കാരെ ആകര്‍ഷിക്കുന്നതിനായി ഡിസ്‌കവര്‍ ഖത്തര്‍ പദ്ധതിയില്‍ മരുഭൂമി സവാരി, നഗരയാത്ര, കലയും സംസ്‌കാരവും പൈതൃകവും പ്രതിഫലിക്കുന്ന കത്താറ കള്‍ച്ചറല്‍ വില്ലേജ് സന്ദര്‍ശനം, പരമ്പരാഗത ആഭരണങ്ങള്‍, കരകൗശല ഉത്പന്നങ്ങള്‍, സുഗന്ധദ്രവ്യങ്ങള്‍ എന്നിവയ്ക്കായുള്ള സൂഖ് വാഖിഫ്, ഷോപ്പുകളിലും റസ്റ്റോറന്റുകളിലും ഷോപ്പിങ് നടത്തുന്നതിനായി പേള്‍ ഖത്തര്‍,ഖത്തര്‍ മ്യൂസിയംസ്, ആര്‍ട് ഗ്യാലറി സന്ദര്‍ശനം, മ്യൂസിയം ഓഫ് ഇസ്‌ലാമിക് ആര്‍ട്ട് പാര്‍ക്ക്, മോണ്‍സ്റ്റര്‍ ബസുകളോ ആഡംബര 4-4 വാഹനങ്ങലോ ഉപയോഗിച്ചുള്ള സീലൈന്‍ ബീച്ച് സന്ദര്‍ശനം, മീസൈദ് മണല്‍യാത്ര, ഹോട്ടല്‍ ബുക്കിങ് എന്നിവയെല്ലാം ഉള്‍പ്പെടുത്തിയിട്ടുണ്ട്. പുതിയതായി ദോഹ നഗര സ്ന്ദര്‍ശനം, മോണ്‍സ്റ്റര്‍ ബസ് ഡിസേര്‍ട്ട് എക്‌സ്പീരിയന്‍സ്, സ്വകാര്യ മരുഭൂസവാരി, സ്റ്റോപ്പ് ആന്റ് ഷോപ്പ് തുടങ്ങിയവ ഉള്‍പ്പെടുത്തിയിട്ടുണ്ട്.
താല്‍പര്യമുള്ളവര്‍ക്ക് ഡിസ്‌കവര്‍ ഖത്തര്‍ ഔദ്യോഗിക വെബ്‌സൈറ്റ് മുഖേന മുന്‍കൂര്‍ ബുക്കിങ് നടത്താം. ഇതിനായി വേേു://റശരെീ്‌ലൃൂമമേൃ.ൂമമേൃമശൃംമ്യ.െരീാ/ൃേമിശെേീtuൃ െ സന്ദര്‍ശിക്കുക.150ലേറെ നഗരങ്ങളിലേക്ക് സര്‍വീസ് നടത്തുന്ന ഖത്തര്‍ എയര്‍വേയ്‌സ് വഴി ദശലക്ഷക്കണക്കിന് യാത്രക്കാരാണ് വിവിധയിടങ്ങളിലേക്ക് പോകുന്നത്.
എന്‍ട്രി വിസക്ക് മുന്‍കൂട്ടി അപേക്ഷിക്കാതെ തന്നെ ട്രാന്‍സിറ്റ് വിസക്കാര്‍ക്ക് 96 മണിക്കൂര്‍, അതായത് നാലു ദിവസം രാജ്യത്ത് തങ്ങാനാകും. കുറഞ്ഞത് അഞ്ച് മണിക്കൂര്‍ വരെ വിമാനത്താവളത്തില്‍ തുടര്‍ യാത്രക്കായി കഴിയേണ്ടി വരുന്നവര്‍ക്കായിരിക്കും ഈ സൗകര്യം ലഭിക്കുക. അതിനായി മുന്‍കൂറായി വിസയ്ക്കുള്ള അപേക്ഷ നല്‍കേണ്ടതില്ല. ഖത്തര്‍ ടൂറിസം അതോറിറ്റി, ഖത്തര്‍ എയര്‍വേയ്‌സ്, ആഭ്യന്തര മന്ത്രാലയം എന്നിവ സംയുക്തമായാണ് ട്രാന്‍സിറ്റ് യാത്രക്കാര്‍ക്കായി ടൂര്‍ പദ്ധതി നടപ്പാക്കിയിരിക്കുന്നത്. ആഗോള യാത്രക്കാരെ കൂടുതല്‍ ആകര്‍ഷിക്കാനും ട്രാന്‍സിറ്റ് ഹബ് ആയി മാറാനും ഖത്തറിനെ സഹായിക്കുന്നതാണ് പുതിയ തീരുമാനം. ഹമദിലെത്തുന്ന ഏത് രാജ്യക്കാര്‍ക്കും സൗജന്യ നിരക്കില്‍ ട്രാന്‍സിറ്റ് വിസ ലഭിക്കും. തുടര്‍യാത്ര സ്ഥിരീകരിച്ചതിനും പാസ്‌പോര്‍ട്ട് നടപടിക്രമങ്ങള്‍ പൂര്‍ത്തിയാക്കിയതിനും ശേഷമാണ് വിസ നല്‍കുക. എല്ലാ വിസകളും ഇഷ്യു ചെയ്യുന്നതും അംഗീകരിക്കുന്നതും ആഭ്യന്തര മന്ത്രാലയത്തിന്റെ തീരുമാനപ്രകാരമാണ്.