ജസ്റ്റിസ് ഡി.വൈ ചന്ദ്രചൂഡ് അധ്യക്ഷനായ ബെഞ്ചാണ് ഗോസ്വാമിയോട് ബോംബെ ഹൈക്കോടതിയെ സമീപിക്കാന്‍ ആവശ്യപ്പെട്ടത്. ബോംബെ ഹൈക്കോടതിയുടെ ഓഫീസും റിപ്പബ്ലിക് ടിവിയുടെ ഓഫീസും ഒരേ സ്ഥലത്തായതിനാല്‍ ഹൈക്കോടതിയെ സമീപിക്കുന്നതാണ് നല്ലതെന്ന് സുപ്രീംകോടതി ചൂണ്ടിക്കാട്ടി.

ടി.ആര്‍.പി അഴിമതി കേസില്‍ അര്‍ണബ് ഗോസ്വാമി സുപ്രീം കോടതിയില്‍ സമര്‍പ്പിച്ച ഹരജിയെ എതിര്‍ത്ത മുംബൈ പൊലീസ് അന്വേഷണം സി.ബി.ഐക്ക് വിടണമെന്ന റിപ്പബ്ലിക്ക് ടി.വിയുടെ ആവശ്യം തെറ്റിധരിപ്പിക്കുന്നതാണെന്നും സുപ്രീം കോടതിയില്‍ നല്‍കിയ സത്യവാങ്മൂലത്തില്‍ പറഞ്ഞു.

റിപ്പബ്ലിക്ക് ടി.വിക്കും ഫക്ത് മറാത്തി, ബോക്‌സ് സിനിമ എന്നീ രണ്ട് മറാത്തി ചാനലുകള്‍ക്കുമെതിരെ നേരത്തെ ടിആര്‍പി റേറ്റിങ് തട്ടിപ്പു കേസില്‍ മുംബൈ പൊലീസ് നേരത്തെ കേസെടുത്തിരുന്നു.

അതേസമയം റിപ്പബ്ലിക് ടിവി മേധാവി അര്‍ണബ് ഗോസ്വാമിയെ ഇന്ന് മുംബൈ പൊലീസ് ചോദ്യം ചെയ്‌തേക്കും. റേറ്റിങ്ങില്‍ കൃത്രിമത്വം കാണിച്ചതായി തെളിഞ്ഞാല്‍ ഈ ചാനലുകളുടെയെല്ലാം ആസ്തി മരവിപ്പിക്കാന്‍ പോലും കഴിയുമെന്നിരിക്കെ, വലിയ ചര്‍ച്ചകളിലേക്കാണ് ഈ കേസ് വഴിവക്കുക.

”ഇന്ത്യാ ടുഡേ ടിവിയുടെ പേര് പരാമര്‍ശിക്കുന്നത്, പരാതി പ്രകാരമാണ്. എന്നാല്‍ അന്വേഷണം മുന്നോട്ടുപോയ ഘട്ടത്തില്‍ ബാര്‍കോ, മറ്റ് സാക്ഷികളോ, ആരോപണവിധേയരോ ഇന്ത്യാ ടുഡേ ടിവിയുടെ പേര് പറഞ്ഞിട്ടില്ല. ഇന്ത്യാ ടുഡേക്ക് എതിരെ ഇതുവരെ തെളിവ് കിട്ടിയിട്ടില്ല. റിപ്പബ്ലിക് ടിവിക്കും മറാത്തി ചാനലുകള്‍ക്കും എതിരെ അന്വേഷണം ഊര്‍ജിതമായി മുന്നോട്ടുപോവുകയാണ്”, എന്ന് മുംബൈ പൊലീസ് കമ്മീഷണര്‍ പരംബീര്‍ സിങ് പറഞ്ഞു.

റേറ്റിങ് കണക്കാക്കി ഗാര്‍ഹിക ഉപഭോക്താക്കളുടെ ഡാറ്റ ഉപയോഗിക്കുകയും ഇതില്‍ കൃത്രിമത്വം കാണിച്ച് നിയമവിരുദ്ധമായി പരസ്യവരുമാനം നേടിയെടുക്കുകയും ചെയ്തിരുന്നുവെന്നാണ് റിപ്പബ്ലിക് ടിവി അടക്കം മറ്റു മൂന്നു ചാനലുകള്‍ക്കെതിരയുള്ള കണ്ടെത്തല്‍.

അതേസമയം കേസ് അന്വേഷണത്തിന്റെ ഭാഗമായി റിപ്പബ്ലിക് ടിവിയിലുള്ളവരെ ഇന്നോ നാളെയോ പൊലീസ് ചോദ്യം ചെയ്യും. റേറ്റിങ്ങില്‍ കൃത്വിമത്വം കാണിച്ച് അധിക പരസ്യ വരുമാനങ്ങളും നേടിയിട്ടുണ്ട്. ഇതും അന്വേഷിക്കും. റിപ്പബ്ലിക് ചാനലിന്റെ ബാങ്ക് അക്കൗണ്ടുകള്‍ പരിശോധിക്കും. കുറ്റകൃത്യം നടന്നുവെന്ന് വ്യക്തമായാല്‍ ചാനലിന്റെ ബാങ്ക് അകൗണ്ടുകള്‍ മരവിപ്പിക്കുന്നതടക്കമുള്ള കടുത്ത നടപടികളുണ്ടാകുമെന്ന് മുംബൈ പോലീസ് മേധാവി പരമവീര്‍ സിംഗ് വ്യക്തമാക്കി. രണ്ടുപേരെ നേരത്തെ അറസ്റ്റ് ചെയ്തിരുന്നു.