വീട് തകര്‍ത്ത ടിആര്‍എസ് പ്രവര്‍ത്തകര്‍ക്കെതിരെ കേസ് എടുത്തെങ്കിലും അറസ്റ്റ് രേഖപ്പെടുത്തിയിട്ടില്ല. സംഭവത്തെ അപലപിച്ച് ബിജെപി രംഗത്തെത്തി. കവിതയെ ബിജെപി പാര്‍ട്ടിയിലെത്തിക്കാന്‍ ശ്രമിച്ചുവെന്ന വാര്‍ത്ത നേരത്തെ ചില മാധ്യമങ്ങളില്‍ വന്നിരുന്നു.

തെലങ്കാന രാഷ്ട്ര സമിതി (ടി.ആര്‍.എസ്) ഇനി ഭാരത് രാഷ്ട്ര സമിതി (ബി.ആര്‍.എസ്) എന്ന പേരിലറിയപ്പെടും. ജോത്സ്യന്‍ കുറിച്ചുനല്‍കിയ ‘ശുഭമുഹൂര്‍ത്ത’ത്തിലായിരുന്നു പ്രഖ്യാപനം. ദേശീയ പാര്‍ട്ടിയായി മാറാന്‍ വേണ്ടിയാണ് പേരിലെ മാറ്റമെങ്കിലും സ്വന്തം സംസ്ഥാനമായ തെലങ്കാനക്ക് അപ്പുറം ആന്ധ്രയില്‍ പോലും ടിയാന്റെ പാര്‍ട്ടിക്ക് വേരോട്ടമില്ലെന്നത് വേറെ കാര്യം. കെ.സി.ആറിനെ ഭാവി പ്രധാനമന്ത്രിയെന്ന് വിശേഷിപ്പിച്ചായിരുന്നു പാര്‍ട്ടി പ്രവര്‍ത്തകര്‍ പേര് മാറ്റത്തെ സ്വാഗതം ചെയ്തത്. പേരും കളം മാറ്റവുമൊന്നും പുത്തരിയല്ലാത്ത കെ.സി.ആറിനും പാര്‍ട്ടിക്കും പ്രധാനമന്ത്രി പദമെന്നതാണ് ഇനി ലക്ഷ്യം. അവിഭക്ത ആന്ധ്രപ്രദേശിലെ സിദ്ദിപേട്ടില്‍ ജനിച്ച കെ.സി.ആര്‍ കോണ്‍ഗ്രസില്‍ നിന്നും തുടങ്ങി തെലുങ്ക്‌ദേശം പാര്‍ട്ടിയില്‍ മന്ത്രിയും സ്പീക്കറും എം.എല്‍.എയുമൊക്കെ ആയ ശേഷമാണ് തെലങ്കാന എന്ന സംസ്ഥാനത്തിനായി രംഗത്തിറങ്ങിയത്. പ്രത്യേക തെലങ്കാന സംസ്ഥാനമെന്ന ലക്ഷ്യവുമായി 2001 ഏപ്രില്‍ 27നാണ് കെ. ചന്ദ്രശേഖര്‍റാവു തെലങ്കാന രാഷ്ട്രസമിതിക്ക് രൂപം നല്‍കിയത്. തെലങ്കാന സംസ്ഥാനം രൂപീകരിച്ചാല്‍ പാര്‍ട്ടിയെ കോണ്‍ഗ്രസില്‍ ലയിപ്പിക്കാമെന്ന് മോഹിപ്പിച്ച് യു.പി.എ സര്‍ക്കാറിനെ അതിമനോഹരമായി പറ്റിച്ച ചരിത്രമുള്ള കെ.സി.ആര്‍ പിന്നെ ചെയ്തത്രയും ചരിത്രമാണ്. കോണ്‍ഗ്രസില്‍ ലയിച്ചില്ലെന്ന് മാത്രമല്ല, കോണ്‍ഗ്രസിനെ മുഖ്യശത്രുവായി കണ്ട് ബി.ജെ.പിയെ പിന്തുണക്കുകയും ചെയ്തു.

കേന്ദ്രത്തിലെ ബി.ജെ.പി സര്‍ക്കാരിനെ പിന്താങ്ങിയിരുന്ന ടി.ആര്‍.എസ് 2020 ഓടെയാണ് അപകടം മണത്ത് എതിര്‍ക്കാന്‍ തുടങ്ങിയത്. മറ്റു പ്രതിപക്ഷ കക്ഷികള്‍ കോണ്‍ഗ്രസിനെ മുന്നില്‍നിര്‍ത്തി പ്രതിപക്ഷ സഖ്യത്തിനായി തലങ്ങും വിലങ്ങും ഓടുമ്പോള്‍ കോണ്‍ഗ്രസില്ലാത്ത ഫെഡറല്‍ മുന്നണിയാണ് റാവു ലക്ഷ്യമിടുന്നത്. തെലങ്കാനയില്‍ ടി.ആര്‍.എസിന്റെ സൗഹൃദ കക്ഷിയും രാജ്യത്ത് എവിടെ പ്രധാന തിരഞ്ഞെടുപ്പ് നടന്നാലും ന്യൂനപക്ഷ വോട്ടുകള്‍ ചിന്നിച്ചിതറിക്കാനായി മത്സര രംഗത്തിറങ്ങുകയും ചെയ്യുന്ന അസദുദ്ദീന്‍ ഉവൈസിയുടെ ഓള്‍ ഇന്ത്യ മജ്‌ലിസെ ഇത്തിഹാദുല്‍ മുസ്്‌ലിമീനാണ് കെ.സി.ആറിന്റെ പാര്‍ട്ടിയുടെ പേരു മാറ്റത്തെ സ്വാഗതം ചെയ്തു രംഗത്തുവന്ന ഏക പാര്‍ട്ടി. പാര്‍ട്ടിയുടെ പേരുമാറ്റം ഉടനെ തിരഞ്ഞെടുപ്പു കമ്മിഷനെ അറിയിക്കുമെന്ന് ടി.ആര്‍.എസ് പറയുന്നത്. എന്നാല്‍, ദേശീയ പാര്‍ട്ടിയെന്ന ഔദ്യോഗികാംഗീകാരത്തിന് ഇനിയും കാത്തിരിക്കേണ്ടിവരും. ഈ പദവിക്ക് തിരഞ്ഞെടുപ്പു കമ്മിഷന്റെ നിബന്ധനകളായ നാലു സംസ്ഥാനങ്ങളില്‍ സംസ്ഥാന പാര്‍ട്ടി പദവി എന്ന അംഗീകാരം. അതല്ലെങ്കില്‍ നാലു സംസ്ഥാനങ്ങളില്‍ കുറഞ്ഞത് ആറു ശതമാനം വോട്ടും നാല് ലോക്‌സഭാസീറ്റുകളും വേണമെന്നതുമൊക്കെ സ്വന്തമാക്കാന്‍ കെ.സി.ആര്‍ കുറച്ച് വിയര്‍ക്കേണ്ടിവരും.

യൂത്ത് കോണ്‍ഗ്രസ് പ്രവര്‍ത്തകനായി മെദകില്‍ പ്രവര്‍ത്തനം തുടങ്ങിയ കെ.സി.ആര്‍ 1983ലാണ് അവസരം നോക്കി ടി.ഡി.പിയിലെത്തുന്നത്. അതേ വര്‍ഷം തിരഞ്ഞെടുപ്പില്‍ ദയനീയമായി തോറ്റു. പിന്നീട് സിദ്ദീപേട്ടില്‍ നിന്നും നാലു തവണ തുടര്‍ച്ചയായി ആന്ധ്ര നിയമസഭാംഗമായി. എന്‍.ടി രാമറാവുവിന്റെ മന്ത്രിസഭയില്‍ വരള്‍ച്ച ദുരിതാശ്വാസ വകുപ്പ് കൈകാര്യം ചെയ്ത മന്ത്രിയായിരുന്ന കെ.സി. ആര്‍ 90ല്‍ മെദക്, നിസാമാബാദ്, അദിലാബാദ് ജില്ലകളില്‍ ടി.ഡി.പിയുടെ കണ്‍വീനറായിരുന്നു. 1996ല്‍ ചന്ദ്രബാബു നായിഡു മന്ത്രിസഭയില്‍ ഗതാഗത വകുപ്പ് മന്ത്രിയായി. 1999ല്‍ ചന്ദ്രബാബുനായിഡു മന്ത്രിസഭയില്‍നിന്നും മാറ്റിനിര്‍ത്തിയതോടെയാണ് തെലങ്കാനക്കായി ഇറങ്ങിത്തിരിച്ചത്. ഡെപ്യൂട്ടി സ്പീക്കര്‍ പദവി നായിഡു വെച്ച് നീട്ടിയപ്പോള്‍ പാര്‍ട്ടിയില്‍നിന്നും രാജിവെച്ച് ദീര്‍ഘകാലമായി ഉറങ്ങിക്കിടന്നിരുന്ന ജയ് തെലങ്കാന പ്രക്ഷോഭത്തിന് എണ്ണയൊഴിച്ചു. തെലങ്കാനയെന്ന വികാരത്തിനൊപ്പം നിന്നതോടെ ജനമനസുകളും കൂടെ പോന്നു. 2004ല്‍ യു.പി.എക്കൊപ്പം ചേര്‍ന്ന കെ.സി.ആര്‍ കേന്ദ്ര തൊഴില്‍ വകുപ്പ് മന്ത്രിയാവുകയും ചെയ്തു. പിന്നീട് തെലങ്കാനയുടെ പേരു പറഞ്ഞ് രാജിയും തിരഞ്ഞെടുപ്പുമായി നടന്ന കെ.സി.ആര്‍ 2014ല്‍ തെലങ്കാന സംസ്ഥാനം പ്രഖ്യാപിച്ചതോടെ മുഖ്യമന്ത്രിയായി.
ടി.ഡി.പിയില്‍ കുടുംബാധിപത്യമാണെന്ന് വിമര്‍ശിച്ചിരുന്ന കെ.സി.ആറും സ്വന്തം പാര്‍ട്ടിയും പദവിയും കൈവന്നപ്പോള്‍ പതിവ് തെറ്റിച്ചില്ല. മകനേയും മകളേയും രാഷ്ട്രീയത്തിലിറക്കി. രാഷ്ട്രീയ പിന്‍ഗാമി ആരെന്ന ചോദ്യത്തിന് ഒറ്റ ഉത്തരമേയുള്ളൂ മകന്‍ കെ.ടി രാമറാവു. നയമൊന്നും ടിയാന് പ്രശ്‌നമല്ല. ആര്‍ക്കൊപ്പവും നില്‍ക്കും നിലനില്‍പ് മാത്രമേ പ്രശ്‌നമുള്ളൂ. ബി.ജെ.പി നിലവില്‍ മുഖ്യശത്രുവാണെങ്കിലും കോണ്‍ഗ്രസിനോളം ശത്രുത കെ.സി.ആറിന് ബി. ജെ.പിയുമായില്ലെന്നത് നാളെയും അടുക്കാന്‍ കാരണമായേക്കാം.

‘കര്‍ഷകരോടുള്ള അനീതിയാണ് ഈ ബില്‍. പാര്‍ലമെന്റില്‍ ഏതുവിധേനയും ബില്ലിനെ എതിര്‍ക്കാന്‍ ടി.ആര്‍.എസ് എം.പിമാര്‍ക്ക് നിര്‍ദ്ദേശം നല്‍കിയിട്ടുണ്ട്’- റാവു പറഞ്ഞു.

മോദി സര്‍ക്കാര്‍ ലോക്സഭയില്‍ പാസാക്കിയ കാര്‍ഷിക ബില്ലുകള്‍ രാജ്യസഭ കടക്കുന്നതില്‍ ഭരണകക്ഷിയില്‍ ആശങ്ക നിലനില്‍ക്കുന്നുണ്ട്. വേണ്ടത്ര അംഗങ്ങള്‍ സഭയില്‍ ഇല്ലാത്തതും സഖ്യകക്ഷികള്‍ പലരും ഇടഞ്ഞു നില്‍ക്കുന്നതും ചിലര്‍ പരസ്യമായി രംഗത്ത് വന്നതും ബിജെപിക്ക് തിരിച്ചടിയായിട്ടുണ്ട്. ബില്ലിനെതിരെ വോട്ടു ചെയ്യണമെന്ന് ആവശ്യപ്പെട്ട് കോണ്‍ഗ്രസ് വിവിധ കക്ഷികളെ സമീപിച്ചിട്ടുമുണ്ട്. ഇതിനിടെയാണ് ടിആര്‍എസ് നിലപാട് വ്യക്തമാക്കിയിരിക്കുന്നത്.

കര്‍ഷകരോടുള്ള കടുത്ത അനീതിയാണ് ഈ ഫാം ബില്ലുകള്‍. രാജ്യത്തെ കര്‍ഷകര്‍ക്ക് അല്ല, കോര്‍പ്പറേറ്റ് താല്പര്യങ്ങള്‍ സംരക്ഷിക്കാനാണ് ഈ ബില്ലുകള്‍. രാജ്യസഭയില്‍ ബില്‍ അവതരിപ്പിക്കുമ്പോള്‍ എന്ത് വിലകൊടുത്തും എതിര്‍ക്കുമെന്നും കെ ചന്ദ്രശേഖര്‍ റാവു വ്യക്തമാക്കി.  ബില്ലുകള്‍ സഭക്കുമുന്നിലെത്തുമ്പോള്‍ ‘പല്ലും നഖവും’ ഉപയോഗിച്ച് എതിര്‍ക്കാന്‍ ടിആര്‍എസ് എംപിമാര്‍ക്ക് നിര്‍ദ്ദേശം നല്‍കിയതായും അദ്ദേഹം വ്യക്തമാക്കി.

കേന്ദ്രസര്‍ക്കാരിന്റെ കാര്‍ഷിക ബില്ലുകള്‍ക്കെതിരെ പഞ്ചാബ്, ഹരിയാന, തെലങ്കാന തുടങ്ങിയ സംസ്ഥാനങ്ങളില്‍ കര്‍ഷക പ്രക്ഷോഭങ്ങള്‍ രൂക്ഷമായിക്കൊണ്ടിരിക്കുകയാണ്.

കാര്‍ഷിക മേഖലയുമായി ബന്ധപ്പെട്ട് മൂന്നു ബില്ലുകളാണ് കേന്ദ്രസര്‍ക്കാര്‍ പാര്‍ലമെന്റില്‍ അവതരിപ്പിച്ചത്. 2020ല്‍ പുറത്തിറക്കിയ ദി ഫാര്‍മേഴ്സ് പ്രൊഡ്യൂസ് ട്രേഡ് ആന്‍ഡ് കൊമേഴ്സ് ബില്‍, ദി ഫാര്‍മേഴ്സ് എഗ്രിമെന്റ് ഓഫ് പ്രൈസ് അഷ്വറന്‍സ് ആന്‍ഡ് ഫാം സര്‍വിസ് ബില്‍ എന്നിവയാണ് പാര്‍ലമെന്റില്‍ അവതരിപ്പിച്ചത്.

പ്രതിപക്ഷ പ്രതിഷേധം ഗൗനിക്കാതെ രണ്ട് ഫാം ബില്ലുകളാണ് വ്യാഴാഴ്ച ലോക്‌സഭ പാസാക്കിയത്. കോണ്‍ഗ്രസും ഡിഎംകെയും ഇടതുപാര്‍ട്ടികളും ബില്ലുകളെ എതിര്‍ക്കുകയും പ്രതിഷേധിച്ച് സഭയില്‍ നിന്ന് ഇറങ്ങിപോവുകയും ചെയ്തിരുന്നു. ബിജെപിയുടെ അടുത്ത സഖ്യകക്ഷിയായ ശിരോമണി അകാലിദള്‍ (എസ്എഡി) ലോക്‌സഭയിലെ ബില്ലുകളെ എതിര്‍ക്കുകയും പാര്‍ട്ടി എംപി ഹര്‍സിമ്രത് കൗര്‍ ബാദല്‍ കേന്ദ്രമന്ത്രിസഭയില്‍ നിന്ന് രാജിവക്കുകയുമുണ്ടായി.

243 ആണ് ഉപരിസഭയിലെ അംഗബലം. ഇതില്‍ 122 പേരുടെ പിന്തുണയാണ് ബില്‍ പാസാക്കാനായി വേണ്ടത്. ബിജെപി നേതൃത്വം നല്‍കുന്ന എന്‍ഡിഎയ്ക്ക് 105 സീറ്റുകളാണ് ഉള്ളത്. പ്രതിപക്ഷത്തിന് നൂറും. രാജ്യസഭയിലെ പത്ത് എംപിമാര്‍ കോവിഡ് കാലം പങ്കെടുക്കുന്നില്ല. മുന്‍ പ്രധാനമന്ത്രി ഡോ മന്‍മോഹന്‍സിങ്, മുന്‍ ധനമന്ത്രി പി ചിദംബരം എന്നിവര്‍ അടക്കം 15 പേര്‍ ഈ സെഷനില്‍ നിന്ന് അവധിയെടുത്തിട്ടുണ്ട്. അംഗങ്ങള്‍ കുറയുന്ന വേളയില്‍ ഭൂരിപക്ഷത്തിനു വേണ്ട അംഗ ബലത്തിലും കുറവുണ്ടാകും. ബിജെപിക്ക് മാത്രമായി 86 പേരാണ് ഉപരിസഭയിലുള്ളത്. ബാക്കിയുള്ളവര്‍ സഖ്യകക്ഷി അംഗങ്ങളും.

ഇതില്‍ ഹര്‍സിമ്രത് കൗര്‍ ബാദല്‍ രാജിക്ക് പിന്നാലെ ശിരോമണി അകാലിദളിന്റെ മൂന്ന് എംപിമാര്‍ ബില്ലുകള്‍ക്കെതിരെ വോട്ടു ചെയ്യുമെന്ന് പ്രഖ്യാപിച്ചിട്ടുണ്ട്. അംഗങ്ങള്‍ക്ക് പാര്‍ട്ടി വിപ്പും നല്‍കിയിരുന്നു. ബിജെപിയോട് സൗഹൃദം പുലര്‍ത്തുന്ന ബിജെഡി, വൈഎസ്ആര്‍ കോണ്‍ഗ്രസ്, ടിആര്‍എസ് എന്നിവയുടെ നിലാപടുകള്‍ ബില്ലില്‍ നിര്‍ണായകമാകുമെന്നിരിക്കെയാണ് ടിആര്‍എസ് മേധാവി നിലപാട് വ്യക്തമാക്കിയിരിക്കുന്നത്. വൈഎസ്ആര്‍ കോണ്‍ഗ്രസിന് ആറും ടിആര്‍എസിന് ഏഴും ബിജെഡിക്ക് ഒമ്പതും സീറ്റാണ് ഉള്ളത്. ബാക്കിയുള്ള പാര്‍ട്ടികളുടെ നിലപാടാണ് ഇനി കാത്തിരിക്കുന്നത്. 128 വോട്ടുകള്‍ ബില്ലുകള്‍ക്ക് അനുകൂലമായി ലഭിക്കും എന്നാണ് സര്‍ക്കാറിന്റെ പ്രതീക്ഷ.

നരേന്ദ്ര മോദിയെയും ബിജെപിയെയും രോഗം ബാധിച്ചിരിക്കുന്നു. അവര്‍ കാണുന്നതെല്ലാം ഹിന്ദു-മുസ്ലിം വര്‍ഗീയ വിഷയങ്ങള്‍ മാത്രമാണ്. അവര്‍ മറ്റൊന്നും കാണുന്നില്ല. അതിനാല്‍ അവര്‍ക്ക് ജോലികളില്‍ സംവരണം നല്‍കാനുള്ള തീരുമാനം വൈകുന്നതെന്നും റാവു പറഞ്ഞു. നാരമ്പമ്പറ്റില്‍ തെരഞ്ഞെടുപ്പ് റാലിയില്‍ സംസാരിക്കുകയായിരുന്നു അദ്ദേഹം.

എന്നാല്‍ മഹബൂബബാദിലെ മറ്റൊരു തെരഞ്ഞെടുപ്പ് യോഗത്തില്‍ മോദിക്കെതിരെ കൂടുതല്‍ രൂക്ഷമായ ഭാഷയിലാണ് തെലുങ്കാന മുഖ്യമന്ത്രി പ്രതികരിച്ചത്. മോദി സര്‍ക്കാറിന് വര്‍ഗീയ ഭ്രാന്താ(‘mataparamaina pichi’/communal madness)ണെന്ന് അദ്ദേഹം പറഞ്ഞു.

ജോലികളില്‍ മുസ്്‌ലിംകള്‍ക്ക് സംവരണം നല്‍കാനുള്ള തീരുമാനം വൈകുന്നത് കേന്ദ്ര സര്‍ക്കാറിന്റെ വീഴ്ചയാണെന്ന് റാവു പറഞ്ഞു. ഇതുമായി ബന്ധപ്പെട്ട് മോദിക്ക് 30 കത്തുകളെഴുതിയെങ്കിലും അദ്ദേഹം പ്രതികരിച്ചിട്ടില്ലെന്നും പ്രധാനമന്ത്രിക്ക് ഹിന്ദുക്കളും മുസ്്‌ലിംകളും സംബന്ധിച്ച ചര്‍ച്ചയില്‍ മാത്രമേ താല്‍പര്യമുള്ളുവെന്നും അദ്ദേഹം പറഞ്ഞു. പ്രധാനമന്ത്രിക്ക് എല്ലാവരെയും ഒരുപോലെ കാണാന്‍ സാധിക്കുന്നില്ല. വര്‍ഗീയതയും വിഭാഗീയതയും വളര്‍ത്താനാണ് അദ്ദേഹത്തിന് താല്‍പര്യം. തെലുങ്കാനയിലെ ജനങ്ങള്‍ ഇത്തരം വര്‍ഗീയ രാഷ്ട്രീയത്തെ അംഗീകരിക്കില്ലെന്നും ടിആര്‍എസ് പറഞ്ഞു.

അതേസമയം റാവുവിന്റെ പ്രസ്താവനക്കെതിരെ ബിജെപി രംഗത്തെത്തി. കെ.സി.ആര്‍ വോട്ടുബാങ്ക് രാഷ്ട്രീയം കളിക്കുകയാണെന്നായിരുന്നു കേന്ദ്രമന്ത്രി ജെ.പി നദ്ദയുടെ മറുപടി. കെ.സി.ആറിന്റെ പ്രസ്താവന അപലപനീയമെന്നും അദ്ദേഹം പറഞ്ഞു.

മുഖ്യമന്ത്രി ചന്ദ്രശേഖര റാവു നിയമസഭ പിരിച്ചുവിട്ടതോടെയാണ് തെലങ്കാനയില്‍ വീണ്ടും തെരഞ്ഞെടുപ്പിന് കളമൊരുങ്ങിയത്. സംസ്ഥാനത്തെ രാഷ്ട്രീയ സാഹചര്യം ടി.ആര്‍.എസിന് അനുകൂലമായ സാഹചര്യത്തിലായിരുന്നു നാല് വര്‍ഷം പൂര്‍ത്തിയാക്കിയ നിയമസഭ ചന്ദ്രശേഖര റാവു പിരിച്ചുവിട്ടത്. എന്നാല്‍ അവസരത്തിനൊത്ത് കോണ്‍ഗ്രസ് പ്രവര്‍ത്തിച്ചതോടെ കാര്യങ്ങള്‍ കോണ്‍ഗ്രസിന് അനുകൂലമാവുകയായിരുന്നു എന്നാണ് രാഷ്ട്രീയ നിരീക്ഷകരുടെ വിലയിരുത്തല്‍.

വരാനിരിക്കുന്ന തെരഞ്ഞെടുപ്പില്‍ തെലുങ്കു ദേശം പാര്‍ട്ടി (ടി.ഡി.പി)യുമായി സഖ്യം ചേര്‍ന്ന് തെരഞ്ഞെടുപ്പിനെ നേരിടാനാണ് കോണ്‍ഗ്രസ് ആദ്യം തീരുമാനിച്ചിരുന്നത്. സി.പി.ഐയും പിന്തുണയുമായിയെത്തിയതോടെ തെലങ്കാനയിലെ രാഷ്ട്രീയ ട്രെന്‍ഡ് മാറുകയായിരുന്നു. ഒടുവില്‍ ടി.ജെ.എസും എത്തിയതോടെ സഖ്യം കൂടുതല്‍ കരുത്തായി.

അതേസമയം പാര്‍ട്ടി ധ്യക്ഷന്‍ ചന്ദ്രശേഖര റാവുവിന്റെ നിലപാടില്‍ പ്രതിഷേധിച്ച് അംഗത്വം രാജിവെച്ച് നിയമസഭാംഗമായിരുന്ന ഭൂപതി റെഡ്ഡി കോണ്‍ഗ്രസ് ചേര്‍ന്നതും ഭരണ കക്ഷിയായിരുന്ന ടി.ആര്‍.എസിന് തിരിച്ചടിയായി. ടി.ആര്‍.എസിന്റെ രാജ്യസഭാ എം.പി ഡി ശ്രീനിവാസും പാര്‍ട്ടി വിട്ട് കോണ്‍ഗ്രസില്‍ ചേരുമെന്നും ശക്തമായ അഭ്യൂഹമുണ്ട്. നിലവില്‍ പാര്‍ട്ടി നേതൃത്വവുമായി അദ്ദേഹം ഉടക്കിലാണ്. കൂടാതെ കഴിഞ്ഞ ദിവസം പ്രശസ്ത തെലുങ്കു സിനിമാ നിര്‍മാതാവ് ബാന്ദ്ല ഗണേഷ് കോണ്‍ഗ്രസില്‍ ചേര്‍ന്നിരുന്നു. ഡല്‍ഹില്‍ നടന്ന ചടങ്ങില്‍ രാഹുല്‍ ഗാന്ധിയുടെ സാന്നിധ്യത്തിലായിരുന്നു ബാന്ദ്ല അംഗത്വമെടുത്തത്. കൂടുതല്‍ പേര്‍ ഇനിയും കോണ്‍ഗ്രസില്‍ ചേരുമെന്നാണ് വിവരം. മാത്രമല്ല, കോണ്‍ഗ്രസ് നേതൃത്വം നല്‍കുന്ന സഖ്യത്തില്‍ ചേരാന്‍ ചില പാര്‍ട്ടികളും തയ്യാറായിട്ടുണ്ട്.

നിയമസഭ പിരിച്ചുവിട്ടതിനു പിന്നാലെ തെലങ്കാനയില്‍ നിയമസഭാ തെരഞ്ഞെടുപ്പ് ഉടന്‍ നടത്തണമെന്നാണ് ടിആര്‍എസിന്റെ ആവശ്യം. എന്നാല്‍ കോണ്‍ഗ്രസ് ഇതിന് എതിരായിരുന്നു. രാഷ്ട്രപതി ഭരണം വേണമെന്നായിരുന്നു കോണ്‍ഗ്രസ് ആവശ്യപ്പെടുന്നിരുന്നത്. എന്നാല്‍ സാഹചര്യങ്ങള്‍ കോണ്‍ഗ്രസിന് അനുകൂലമായി മാറിയതോടെ മുന്‍ മുഖ്യമന്ത്രി ചന്ദ്രശേഖര റാവുവിന്റെയും ടി.ആര്‍.എസിന്റെയും ആശങ്ക വര്‍ധിചിരിക്കുകയാണ്.

ടി.ആര്‍.എസും ബി.ജെ.പിയും ഒത്തുകളച്ചാണ് നിയമസഭ പിരിച്ചുവിട്ടതെന്നാണ് കോണ്‍ഗ്രസിന്റെ ആ്‌ക്ഷേപം. ഇതിനെ പ്രതിരോധിക്കാനാണ് കോണ്‍ഗ്രസ് തെരഞ്ഞെടുപ്പ് സഖ്യമുണ്ടാക്കിയതും സര്‍ക്കാര്‍ നീക്കത്തിനെതിരെ സമരത്തിന് ഇറങ്ങിയതും. ബി.ജെ.പിയുമായി ടി.ആര്‍.എസ് സഖ്യത്തിലേര്‍പ്പെടുമെന്ന വാര്‍ത്തകളാണ് ടി.ആര്‍.എസിന്റെ തിരിച്ചടിക്ക് കാരണമായത് എന്നാണ് ചില പാര്‍ട്ടി നേതാക്കളുടെ ആരോപണം. മുന്‍ മുഖ്യമന്ത്രി ചന്ദ്രശേഖര റാവുവിനെതിരെ പാര്‍ട്ടിയിലെ ഒരു വിഭാഗം തിരിഞ്ഞതായും റിപ്പോര്‍ട്ടുണ്ട്.

അടുത്ത വര്‍ഷം ലോക്‌സഭാ തെരഞ്ഞെടുപ്പിനൊപ്പമാണ് തെലങ്കാനയില്‍ അസംബ്ലി തെരഞ്ഞെടുപ്പ് നിശ്ചയിച്ചിരുന്നത്. 2014-ല്‍ ആന്ധ്രാപ്രദേശില്‍ നിന്ന് വിഭജിച്ച് ഇന്ത്യയിലെ 29-ാമത് സംസ്ഥാനമായി രൂപീകൃതമായ തെലങ്കാനയിലെ ആദ്യത്തെ സര്‍ക്കാറാണ് തെലങ്കാന രാഷ്ട്ര സമിതി (ടി.ആര്‍.എസ്) അധ്യക്ഷന്‍ കൂടിയായ ചന്ദ്രശേഖര്‍ റാവുവിന്റെ നേതൃത്വത്തിലുള്ളത്. അസംബ്ലി പിരിച്ചുവിട്ടതോടെ ഡിസംബറില്‍ ഇവിടെ തെരഞ്ഞെടുപ്പ് നടന്നേക്കും.

മന്ത്രിസഭ പിരിച്ചുവിട്ട് തെരഞ്ഞെടുപ്പ് നേരിടാന്‍ ചന്ദ്രശേഖര റാവു ഒരുങ്ങുന്നതായി ദിവസങ്ങളായി സൂചനയുണ്ടായിരുന്നു. ഞായറാഴ്ച ഹൈദരാബാദില്‍ നടന്ന കൂറ്റന്‍ ടി.ആര്‍.എസ് റാലിയില്‍ ഇതുസംബന്ധിച്ചുള്ള പ്രഖ്യാപനമുണ്ടാകുമെന്നായിരുന്നു അഭ്യൂഹങ്കിലും ‘ആറ്’ ഭാഗ്യഅക്കമായി കാണുന്ന റാവു ഇന്ന് (സെപ്തംബര്‍ ആറ്) ഇതിനായി തെരഞ്ഞെടുക്കുകയായിരുന്നു. എല്ലാ പാര്‍ട്ടി എം.എല്‍.എമാരോടും എം.എല്‍.സിമാരോടും ഹൈദരാബാദിലെത്താന്‍ നിര്‍ദേശം നല്‍കിയ റാവു 22 മിനുട്ട് നീണ്ട മന്ത്രിസഭാ യോഗത്തിലാണ് അസംബ്ലി പിരിച്ചുവിടാനുള്ള പ്രമേയം അവതരിപ്പിച്ചത്. ശേഷം ചില മന്ത്രിമാര്‍ക്കൊപ്പം രാജ്ഭവനിലെത്തിയ അദ്ദേഹം ഗവര്‍ണര്‍ക്ക് പ്രമേയത്തിന്റെ പകര്‍പ്പ് കൈമാറി. പ്രമേയം ഗവര്‍ണര്‍ അംഗീകരിച്ചിട്ടുണ്ട്.

തെലുഗുദേശം പാര്‍ട്ടിയും കോണ്‍ഗ്രസും തമ്മില്‍ തെരഞ്ഞെടുപ്പു ധാരണയിലെത്താന്‍ പോകുന്നു എന്ന സൂചനകള്‍ക്കിടെയാണ് ടി.ആര്‍.എസിന്റെ നീക്കം. ലോക്‌സഭാ തെരഞ്ഞെടുപ്പിനു മുമ്പ് തെരഞ്ഞെടുപ്പിനെ നേരിടാന്‍ കഴിഞ്ഞാല്‍, കോണ്‍ഗ്രസ് – ടി.ഡി.പി സഖ്യത്തെ പരാജയപ്പെടുത്താനാവുമെന്നാണ് റാവുവിന്റെ കണക്കുകൂട്ടല്‍. തെലങ്കാനയില്‍ ടി.ആര്‍.എസ്സും ബി.ജെ.പിയുമല്ലാത്ത ഏതു പാര്‍ട്ടിയുമായും സഖ്യചര്‍ച്ചക്ക് തയ്യാറാണെന്ന് കോണ്‍ഗ്രസ് തെലങ്കാന ഇന്‍ചാര്‍ജ് ആര്‍.സി ഖുണ്ഡിയ വ്യക്തമാക്കിയിരുന്നു. അതേസമയം, ‘കേന്ദ്ര പാര്‍ട്ടികളുമായി’ അകലം പാലിക്കണമെന്നാണ് ചന്ദ്രശേഖര്‍ റാവു അണികള്‍ക്ക് നിര്‍ദേശം നല്‍കിയത്.