സ്വാശ്രയ കോളജുകളെ എതിര്‍ത്ത് വിദ്യാഭ്യാസം പൊതുമേഖലയില്‍ മാത്രം മതിയെന്നായിരുന്നു മുന്‍പ് പറഞ്ഞതെങ്കില്‍ പഴയ നിലപാട് തിരുത്തിയാണ് സ്വകാര്യ വിദേശ നിക്ഷേപങ്ങള്‍ക്കുള്ള പച്ചക്കൊടി. വിദ്യാഭ്യാസ മേഖലയില്‍ വിളിച്ച പഴയ മുദ്രാവാക്യങ്ങള്‍ക്കും നയങ്ങള്‍ക്കുമെല്ലാം ഇതോടെ ലാല്‍ സലാം. സി.പി. എം എറണാകുളം സംസ്ഥാന സമ്മേളനത്തില്‍ മുഖ്യമന്ത്രി അവതരിപ്പിച്ച നയരേഖയുടെ അടിസ്ഥാനത്തിലാണ് മാറ്റത്തിനുള്ള മുന്നണി തീരുമാനം. അല്ലേലും മുഖ്യന്റെ തിരുവായ്ക്ക് എതിര്‍ വാ അവതരിപ്പിക്കാന്‍ കെല്‍പുള്ളവനൊന്നും ആ പാര്‍ട്ടിയിലും മുന്നണിയിലും ഇന്നില്ലെന്നത് ആര്‍ക്കാണ് അറിയാത്തത്.

അണ്‍ എയ്ഡഡുകള്‍ക്കെതിരെ മുദ്രാവാക്യം വിളിച്ചവര്‍ ആദ്യം സ്വകാര്യ കല്‍പിത സര്‍വകലാശാലകള്‍ക്ക് അനുമതി നല്‍കാനായിരുന്നു നീക്കം നടത്തിയത്. സംസ്ഥാനത്തെ മികച്ച പല എയ്ഡഡ് സ്ഥാപനങ്ങളും അപേക്ഷയും നല്‍കി. എന്നാല്‍ ഉന്നത വിദ്യാഭ്യാസ രംഗത്തെ പരിഷ്‌കരണത്തിനായി നിയോഗിച്ച ശ്യാം ബി മേനോന്‍ കമ്മിറ്റി സ്വകാര്യ ഡീംഡ് സര്‍വകലാശാലകളെ എതിര്‍ത്തു, പകരം സ്വകാര്യ സര്‍വകലാശാലകള്‍ക്ക് അനുമതി നല്‍കാമെന്ന് ശുപാര്‍ശ മുന്നോട്ട്‌വെച്ചു. അതിനാണിപ്പോള്‍ അംഗീകാരം. അതായത് നിരവധി സ്വകാര്യ സര്‍വകലാശാലകള്‍ രാജ്യത്തുണ്ട്. അവക്കെല്ലാം കേരളത്തിലേക്കെത്താനാണ് അനുമതി കിട്ടുന്നത്. ഇതിന്റെ മറുവശമെന്ന് പറയുന്നത്.

ഫീസും പ്രവേശനവുമെല്ലാം തീരുമാനിക്കാനുള്ള പൂര്‍ണ അധികാരം സ്വകാര്യ സര്‍വകലാശാലകള്‍ക്കായിരിക്കും. വിദേശ സ്ഥാപനങ്ങള്‍ക്ക് പ്രോത്സാഹനം നല്‍കുന്നുവെന്ന് കുറ്റപ്പെടുത്തി യു.ഡി.എഫ് കാലത്തെ ഉന്നത വിദ്യാഭ്യാസ കൗണ്‍സില്‍ വൈസ് ചെയര്‍മാന്‍ ടി.പി ശ്രീനിവാസനെ അടിച്ചുവീഴ്ത്തിയ എസ്.എഫ്.ഐ ശിങ്കിടികള്‍ക്ക് ഇനി എന്തു പറയാനുണ്ടെന്നതാണ് കാത്തിരുന്നു കാണേണ്ടത്. അല്ലേലും എസ്.എഫ്.ഐ എന്നത് ക്യാമ്പസുകളില്‍ അധ്യാപകരേയും പ്രിന്‍സിപ്പല്‍മാരെയും പൂട്ടിയിടാനും അരാചകത്വത്തിന് വഴിവെട്ടാനും മാത്രമുള്ള സിനിമകളില്‍ മാത്രം ജീവിക്കുന്ന സംഘടനയായിട്ട് നാളെത്രയായി. ഉന്നത വിദ്യാഭ്യാസ രംഗത്തേക്ക് മുതലാളിമാരെ ക്ഷണിക്കുന്നതില്‍ അവസാനിക്കില്ല സി.പി.എമ്മിന്റേയും എല്‍.ഡി.എഫിന്റേയും യൂ ടേണ്‍.

മകനും ഭാര്യയുമടക്കം കുടുംബം കോടികളുടെ ആയുര്‍വേദ റിസോര്‍ട്ട് വിവാദത്തില്‍ കുടുങ്ങിക്കിടക്കുന്ന മുന്നണി കണ്‍വീനര്‍ നയിക്കുന്ന തൊഴിലാളി പാര്‍ട്ടിക്ക് വിദ്യാര്‍ത്ഥികളുടെ ഫീസെന്നാല്‍ എന്ത് വെറും നിസാരം. ആള് വലിയ ഫിലോസഫി ഒക്കെ പറയുകയും ചെയ്യും. തെറ്റ് എല്ലാ കാലത്തും തെറ്റും ശരി എല്ലാ കാലത്തും ശരിയും ആകില്ലെന്നാണ് സ്വാശ്രയ സമരത്തെ കുറിച്ച് ടിയാന്റെ അഭിപ്രായം. അതായത് ഇന്നത്തെ തെറ്റ് നാളെ ശരിയാവുകയും ഇന്നത്തെ ശരി സഖാക്കള്‍ക്ക് നാളെ തെറ്റുമാകാമെന്ന് സാരം. പച്ചപരിഷ്‌കാരം ഇവിടം കൊണ്ട് തീര്‍ന്നെന്ന് കരുതരുത്. വിലക്കയറ്റം മൂലം നടുവൊടിഞ്ഞ കേരളീയര്‍ക്ക് പുതുവര്‍ഷ സമ്മാനമായി വെള്ളക്കരം കൂട്ടിയിട്ടുണ്ട്. യഥാ രാജ തഥാ പ്രജ എന്നാണല്ലോ. മുന്നണി കണ്‍വീനറും മുഖ്യനുമൊക്കെ ഇതുപോലെ തള്ളുമ്പോള്‍ ഘടക കക്ഷി മന്ത്രിക്കും വേണ്ടേ ഒന്നു ഷൈന്‍ ചെയ്യാന്‍ അവസരം. കൂട്ടുക തന്നെ. ടിയാന്‍ വെള്ളം കുടി മുട്ടിച്ചാണ് സമ്മാനം നല്‍കിയത്. ലിറ്ററിന് ഒരു പൈസ വീതം കൂട്ടാനാണ് മുന്നണിയില്‍ നിന്നും അനുമതി കിട്ടിയത്. പോരെ പൂരം.

കേള്‍ക്കുന്നവര്‍ക്ക് നിസാരമെന്ന് തോന്നുമെങ്കിലും മാസം ഒരു കുടുംബത്തിന് 120 രൂപയുടെ അധിക ബാധ്യതയാണ് ഇത് നല്‍കുന്നത്. പക്ഷേ മന്ത്രി കണ്‍വീനറെ പോലെ അടുത്ത ഫിലോസഫി ഇറക്കിയിട്ടുണ്ട്. സംഗതിയെ പോസിറ്റീവായാണ് കാണേണ്ടതെന്നാണ് പറയുന്നത്. അല്ലേലും കുറക്കുക എന്നത് നെഗറ്റീവ് ചിഹ്നം ഉപയോഗിച്ചാണല്ലോ ചെയ്യേണ്ടത്. അത് പാടില്ല താനും. മാധ്യമങ്ങളും ഇത് പോസിറ്റീവായി കാണണം. കാരണം കൂട്ടുക എന്നതിന്റെ കൂട്ടല്‍ ചിഹ്നം പോസിറ്റീവാണല്ലോ കേട്ട പാതി കേള്‍ക്കാത്ത പാതി പഴയ എസ്.എഫ്.ഐ നേതാക്കന്‍മാര്‍ പൂണ്ടുവിളയാടുന്ന മാധ്യമ മേഖല പോസിറ്റീവായി കഴിഞ്ഞു. ജനത്തിന്‌മേല്‍ ഇത്ര കണ്ട് പോസിറ്റീവ് നല്‍കുന്ന മറ്റൊരു സര്‍ക്കാറിനേയും മുന്നണിയേയും കാണണമെങ്കില്‍ ഇനി കേന്ദ്രത്തിലോട്ട് നോക്കണം.

എന്ത് സംഭവിച്ചാലും സില്‍വര്‍ലൈന്‍ പദ്ധതിയില്‍ നിന്നും പിന്നോട്ടുപോകില്ലെന്ന നിലപാടിലായിരുന്നു മുഖ്യമന്ത്രി പിണറായി വിജയന്‍. പ്രതിഷേധം കണ്ടില്ലെന്ന് നടിച്ച് വീട്ടുമുറ്റത്തും അടുപ്പിലുംവരെ മഞ്ഞക്കുറ്റികളിട്ട് നാട്ടുകാരുടെ മുതുകില്‍ പൊലീസിനെകൊണ്ട് കോല്‍ക്കളി കളിപ്പിച്ചശേഷം ഇപ്പോള്‍ പറയുന്നു കേന്ദ്ര സര്‍ക്കാര്‍ അനുകൂല നിലപാട് സ്വീകരിച്ചാല്‍ മാത്രമേ പദ്ധതിയുമായി മുന്നോട്ടുപോകാന്‍ കഴിയൂ എന്ന്. ഇത്രയും കാലം മുന്നോട്ടുപോയതും കേന്ദ്ര ഭരണക്കാരുടെ പിന്തുണയില്‍ത്തന്നെ ആണെന്നത് വേറെ സത്യം. എന്തൊക്കെയായിരുന്നു തള്ള് വിദഗ്ധരുമായി ചര്‍ച്ചയെന്ന പേരില്‍ സി.പി.എം അനുഭാവികളെ കുത്തിനിറച്ച് പ്രധാന സ്ഥലങ്ങളിലെല്ലാം സില്‍വര്‍ ലൈന്‍ ചര്‍ച്ച. ചര്‍ച്ചയില്‍ മുന്‍കൂട്ടി തയാറാക്കിയ ചോദ്യങ്ങള്‍ വിദഗ്ധരെന്ന വ്യാജേന എത്തുന്ന പാര്‍ട്ടിക്കാര്‍ ചോദിക്കുന്നു, മറുപടി. തീര്‍ന്നില്ല. അഞ്ച് മുതല്‍ പന്ത്രണ്ടാം ക്ലാസ് വരെയുള്ള വിദ്യാര്‍ഥികള്‍ക്കായി കേരള റെയില്‍ ഡവലപ്‌മെന്റ് കോര്‍പറേഷന്‍ (കെ റെയില്‍) സിംപോസിയം, കാസര്‍കോട് മുതല്‍ തിരുവനന്തപുരം വരെ മൂന്ന് മണിക്കൂര്‍ 54 മിനിറ്റെന്നും പറഞ്ഞ് നാടുനീളെ മുഖ്യന്റെ പടമുള്ള ബോര്‍ഡുകള്‍, എസ്.എഫ്.ഐ പിള്ളാരെ കൊണ്ട് തൊട്ടപൊട്ടുമാറ് ഉച്ചത്തില്‍ കെ റെയിലിന് സിന്ദാബാദ് വിളിപ്പിക്കല്‍. മുകളില്‍ കെ റെയില്‍ അതിനു താഴെ മെട്രോ അതിനു താഴെ വാട്ടര്‍ മെട്രോ, പിന്നെ നെതര്‍ലന്‍ഡ്‌സില്‍ ടൂറ് പോയി കണ്ടുപിടിച്ച റൂം ഫോര്‍ റിവര്‍ പദ്ധതി അങ്ങനങ്ങനെ…

രാവിലെ തിരുവനന്തപുരത്ത് നിന്നു കാസര്‍കോട് എത്തി തൊഴില്‍ ഉറപ്പു ജോലിയും കഴിഞ്ഞു ബിരിയാണിയും കഴിച്ചു വൈകുന്നേരം തിരികെ തിരുവനന്തപുരത്ത് എത്തി വീട്ടില്‍ കിടന്നുറങ്ങുക എന്ന സ്വപ്‌നമായിരുന്നു പല സഖാക്കന്‍മാരും പങ്കുവെച്ചിരുന്നത്. ഹാ പ്രതിപക്ഷം കുത്തിത്തിരിപ്പ് നടത്തിയ സ്ഥിതിക്ക് ഇനി സ്വപ്‌നം സ്വപ്‌നമായി അവശേഷിക്കും. ഒടുവില്‍ പതിവ് പോലെ പവനായി ശവമായി. കേന്ദ്രത്തെ സോപ്പിടാന്‍ എന്തൊക്കെ തിത്തൈ തികൃതൈ കളികളാണ് സര്‍ക്കാറും മുഖ്യനും കാണിച്ചത്. ഭരണം സ്‌ക്രീനില്‍ നോക്കി വിലയിരുത്താന്‍ ബെസ്റ്റ് ഗുജറാത്താണെന്നു പറഞ്ഞ് ചീഫ് സെക്രട്ടറിയടക്കമുള്ളവരെ മോദിയുടെ നാട്ടിലേക്ക് പഠനത്തിന്‌വിട്ടു. തൃക്കാക്കര ഉപതിരഞ്ഞെടുപ്പ് സമയത്ത് കെ റെയില്‍ വികസനം ചര്‍ച്ചയാവുമെന്ന് ആദ്യം പറഞ്ഞ സര്‍ക്കാറും സി.പി.എമ്മും തിരഞ്ഞെടുപ്പ് കഴിയുവോളം കെ റെയിലിന്റെ മഞ്ഞക്കുറ്റികള്‍ നാട്ടിയില്ല. തിരഞ്ഞെടുപ്പ് ഫലം വന്നു എട്ടു നിലയില്‍ പൊട്ടി പിന്നീട് ഇതേ കുറിച്ച് നിലപാടിന്റെ ആശാന്‍മാര്‍ മിണ്ടിയതുമില്ല.

യു ടേണ്‍ അടിക്കുന്ന കാര്യത്തില്‍ മുഖ്യന് റെക്കോഡ് തന്നെയുണ്ട്. നേരത്തെ പൊതുമേഖല സ്ഥാപനങ്ങളിലെ പെന്‍ഷന്‍ പ്രായം 60 ആക്കി ഉത്തരവിട്ടു. പ്രതിഷേധം വന്നു നിലപാട് മാറ്റി, യു ടേണ്‍. വഖഫ് ബോര്‍ഡ് നിയമനങ്ങള്‍ പി.എസ്.സിക്ക് വിട്ടു. മുസ്്‌ലിംലീഗിന്റെ ശക്തമായ പ്രതിഷേധം വന്നു. മുസ്്‌ലിംലീഗിനെ ആരു കണക്കാക്കുന്നുവെന്ന് വീമ്പിളക്കിയ മുഖ്യന്‍ പ്രതിഷേധം കനത്തതോടെ വീണ്ടും യു ടേണ്‍. ജന്‍ഡ്രല്‍ ന്യൂട്രല്‍ ഡ്രസെന്നും പറഞ്ഞ് മതനിരാസത്തിനുള്ള വഴിയായിരുന്നു പിന്നീട് തുറന്നത്. ഒടുവില്‍ പ്രതിഷേധം കാരണം അവിടേയും യു ടേണ്‍ തന്നെ ഗതി. കെ റെയിലുമായി ബന്ധപ്പെട്ട് ഒരു അനുമതിയും നേരത്തെ കിട്ടിയിരുന്നില്ല. എന്നാല്‍ അന്ന് അതിനെ കുറിച്ച് ചോദിക്കുമ്പോഴൊക്കെ ആ ചോദ്യം മുഖ്യമന്ത്രിയും മറ്റു ഇടതു നേതാക്കളും കണ്ടില്ലെന്ന് നടിക്കുകയായിരുന്നു. നേരത്തെ തൃക്കാക്കര ഉപതിരഞ്ഞെടുപ്പില്‍ എന്തുവന്നാലും കെ റെയില്‍ ഓടിക്കും എന്നു തന്നെയായിരുന്നു മുഖ്യമന്ത്രി പറഞ്ഞത്. നാട്ടുകാര്‍ വോട്ട് ചെയ്ത് ഓടിച്ചപ്പോഴാണ് യു ടേണിനെ കുറിച്ച് പതിയെ ചിന്ത വന്നത്. ലോകായുക്തയുടെ പല്ല് പറിച്ച് അഴിമതിക്ക് കുടപിടിച്ച സര്‍ക്കാര്‍ മുന്നാക്ക സംവരണ കാര്യത്തില്‍ കാണിച്ച ധൃതിയായിരുന്നു കെ റെയിലിന് കല്ലിടാനും കാണിച്ചിരുന്നത്.]