ശബരിമല വിഷയത്തില്‍ പ്രധാനമന്ത്രി നരേന്ദ്രമോദിയെ കാണാന്‍ നേരത്തെ യു.ഡി.എ ഫ് എംപിമാര്‍ പദ്ധതിയിട്ടിരുന്നു. ലോകം മുഴുവന്‍ മതസൗഹാര്‍ദ്ദത്തിന്റെ പ്രതീകമായി കാണുന്ന ശബരിമലയുടെ പേരില്‍ അക്രമണം അഴിച്ചുവിടാന്‍ അവസരമുണ്ടാക്കികൊടുക്കുകയാണ് കേരള സര്‍ക്കാര്‍ ഇപ്പോള്‍ ചെയ്യുന്നതെന്നും ശബരിമല വിഷയത്തില്‍ അടിയന്തരമായി ഓര്‍ഡിനന്‍സ് കൊണ്ടുവന്ന് ശബരിമലയിലെ ആചാരങ്ങള്‍ സംരക്ഷിക്കാന്‍ കേന്ദ്രസര്‍ക്കാര്‍ തയ്യാറാവണമെന്നുമാണ് യു.ഡി.എഫ് എംപിമാരുടെ ആവശ്യം.

സംഭവത്തില്‍ പ്രതികരിച്ച് മുസ്‌ലിം ലീഗ് ദേശീയ ജനറല്‍ സെക്രട്ടറി പികെ കുഞ്ഞാലികുട്ടി എംപിയും രംഗത്തെത്തി. ബിജെപി പോലുള്ള സംഘടനകള്‍ക്ക് വര്‍ഗീയ ചേരിതിരവ് സൃഷ്ടിക്കാനുള്ള അവസരമുണ്ടാക്കികൊടുക്കുന്നത് കാണുമ്പോള്‍ അങ്ങേയറ്റത്തെ അസ്വാസ്ഥ്യം എല്ലാവര്‍ക്കുമുണ്ട്. ഇതിനൊരു അവസാനമുണ്ടാവണം. കേന്ദ്രഗവണ്‍മെന്റ് നിയമം പാസാക്കണം എന്നാണ് യുഡിഎഫ് എംപിമാരുടെ ആവശ്യം. ശബരിമലയെ ഉപയോഗിച്ച് ബിജെപിയും സിപിഎമ്മും രാഷ്ട്രീയം കളിക്കുകയാണ്. കോടതി വിധിയായതിനാല്‍ നടപ്പിലാക്കാതിരിക്കാനാവില്ല എന്നാണ് സംസ്ഥാന സര്‍ക്കാര്‍ പറയുന്നത്. അത് ആത്മാര്‍ത്ഥമായിരുന്നങ്കില്‍ അവര്‍ നിയമസഭ ചേര്‍ന്ന് പ്രമേയം പാസാക്കിയേനേ. യുഡിഎഫ് എംപിമാര്‍ പ്രധാനമന്ത്രിയെ കണ്ട് ശബരിമല ആചാരം സംരക്ഷിക്കാനായി നിയമ നിര്‍മ്മാണം നടത്താന്‍ ആവശ്യപ്പെടും. ബിജെപിക്ക് ശബരിമല ആചാര സംരക്ഷണ കാര്യത്തില്‍ ആത്മാര്‍ത്ഥതയുണ്ടങ്കില്‍ അവര്‍ നിയമം കൊണ്ടുവരാന്‍ കേന്ദ്രത്തില്‍ ആവിശ്യപെടുകയാണ് വേണ്ടത് .
മുത്തലാഖ് പോലുള്ളവക്ക് ഓര്‍ഡിനന്‍സ് കൊണ്ടുവരുന്ന കേന്ദ്ര സര്‍ക്കാര്‍ ശബരിമല ആചാരങ്ങള്‍ സംരക്ഷിക്കാന്‍ ഓര്‍ഡിനന്‍സ് കൊണ്ട് വരാത്തത് എന്തുകൊണ്ടാണ്. ശാന്തമായി പ്രാര്‍ത്ഥന നടത്താനുള്ള അവകാശം അയ്യപ്പഭക്തര്‍ക്ക് നിഷേധിക്കപെടുന്ന സ്ത്ഥിയാണ് സംജാതമായിട്ടുള്ളത്. മാത്രമല്ല ശബരിമല വിഷയമുയര്‍ത്തി വര്‍ഗീയ ചേരിതിരുവിനുള്ള വലിയ ശ്രമങ്ങള്‍ നടക്കുന്നുണ്ട്. ഈ ഒരു പാശ്ചാത്തലത്തിലാണ് ശബരിമല ആചാരം സംരക്ഷിക്കാന്‍ നിയമ നിര്‍മ്മാണം നടത്തണമെന്ന് യുഡിഎഫ് എംപിമാര്‍ ഒറ്റകെട്ടായി ആവശ്യപ്പെടുന്നതെന്നും കുഞ്ഞാലിക്കുട്ടി പ്രതികരിച്ചു.