ഇതിനു മുമ്പ് സുപ്രിം കോടതി രണ്ട് തവണ ജാമ്യാപേക്ഷ പരിഗണിക്കുന്നത് മാറ്റിവച്ചിരുന്നു. 2020 സെപ്റ്റംബറില്‍ ഉമര്‍ ഖാലിദിനെ ഡല്‍ഹി പൊലീസ് അറസ്റ്റ് ചെയ്തിരുന്നു. ക്രിമിനല്‍ ഗൂഢാലോചന, കലാപം, നിയമവിരുദ്ധമായി സംഘം ചേരല്‍, യുഎപിഎ തുടങ്ങിയ വകുപ്പുകളിലാണ് കേസ് രജിസ്റ്റര്‍ ചെയ്തത്.

ഉമര്‍ ഖാലിദ്, ഷര്‍ജീല്‍ ഇമാം അടക്കമുള്ള എട്ട് പേരുടെ ജാമ്യാപേക്ഷ ഡല്‍ഹി ഹൈക്കോടതി നേരത്തെ തള്ളിയിരുന്നു. അറസ്റ്റിന് അഞ്ചു വര്‍ഷത്തിന് ശേഷമാണ് അവരുടെ ജാമ്യാപേക്ഷയില്‍ സുപ്രിം കോടതി അന്തിമ തീരുമാനം കൈക്കൊള്ളുന്നത്. സിഎഎ വിരുദ്ധ സമരവും തുടര്‍ന്നുണ്ടായ ഡല്‍ഹി കലാപവുമായി ബന്ധപ്പെട്ട കേസുകളിലാണ് ഇവരെ അറസ്റ്റ് ചെയ്തത്.

ജവഹര്‍ലാല്‍ നെഹ്‌റു സര്‍വകലാശാലയിലെ മുന്‍ വിദ്യാര്‍ഥി നേതാവായ ഖാലിദിനെ ഡല്‍ഹി കലാപക്കേസില്‍ പ്രതിചേര്‍ത്ത് ജയിലില്‍ അടച്ചിരിക്കുകയാണ്. വൈദ്യസഹായം നല്‍കാനും രണ്ട് ദിവസത്തിനകം വിശദ റിപ്പോര്‍ട്ട് നല്‍കാനും മജിസ്‌ട്രേറ്റ് ദിനേശ് കുമാര്‍ ജയില്‍ ഉദ്യോഗസ്ഥരോട് നിര്‍ദ്ദേശിച്ചു. ദന്തഡോക്ടര്‍ ജയിലില്‍ ലഭ്യമല്ലെങ്കില്‍, ചികിത്സക്കായി പ്രതിയെ ജയിലിന് പുറത്ത് കൊണ്ടുപോകാമെന്നും കോടതി അറിയിച്ചു.

ബുധനാഴ്ച ജയില്‍ സന്ദര്‍ശിക്കാന്‍ നിശ്ചയിച്ചിരുന്ന ദന്തരോഗവിദഗ്ധന്‍ എത്തിയിട്ടില്ലെന്ന് ഖാലിദ് കോടതിയെ അറിയിച്ചു. തനിക്ക് വേദനയുണ്ടെന്നും ഡോക്ടറുടെ സന്ദര്‍ശനത്തിനായി ഒരാഴ്ച കാത്തിരിക്കാന്‍ ബുദ്ധിമുട്ടാണെന്നും അദ്ദേഹം പറഞ്ഞു.