‘പിന്നാക്കം നില്‍ക്കുന്ന സംസ്ഥാനങ്ങള്‍ക്കാണ് മുന്‍ഗണന കൊടുക്കുന്നത്. കേരളം പിന്നാക്കമാണെന്ന് പ്രഖ്യാപിക്കൂ. അപ്പോള്‍ കിട്ടും. ഞങ്ങള്‍ക്ക് റോഡില്ല, ഞങ്ങള്‍ക്ക് വിദ്യാഭ്യാസമില്ല, സാമൂഹികപരമായി പിന്നാക്കമാണ്, അടിസ്ഥാന സൗകര്യത്തിന്റെ കാര്യത്തില്‍ പിന്നാക്കമാണ് എന്നിങ്ങനെ കേരളം പ്രഖ്യാപിച്ചാല്‍ അത് കമ്മീഷന്‍ പരിശോധിക്കും. പരിശോധിച്ചുകഴിഞ്ഞാല്‍ ഗവണ്‍മെന്റിന് റിപ്പോര്‍ട്ട് കൊടുക്കാം. അങ്ങനെയാണ് തീരുമാനിക്കുക. അല്ലാതെ ഗവണ്‍മെന്റ് അല്ലല്ലോ.’, എന്നാണ് ജോര്‍ജ് കുര്യന്‍ പറഞ്ഞത്.

വ്യക്തിഗത വരുമാന നികുതി പരിധി 12 ലക്ഷമാക്കി ഉയര്‍ത്തിയെങ്കിലും ദരിദ്രരും പാവപ്പെട്ടവരുമായ കോടിക്കണക്കിന് ജനങ്ങളുടെ ക്ഷേമം മുന്‍നിര്‍ത്തി കൊണ്ടുള്ള സമഗ്രമായ പരിപാടികള്‍ ഒന്നും ആവിഷ്‌കരിച്ചിട്ടില്ല. രാഷ്ട്രത്തിന്റെ വിഭവശേഷി വിതരണം ചെയ്യുന്ന സന്ദര്‍ഭത്തില്‍ അത് നീതിബോധത്തോട് കൂടി ചെയ്യണമെന്ന അടിസ്ഥാന സങ്കല്‍പത്തെയും ഈ ബജറ്റ് തകര്‍ക്കുകയാണ് ചെയ്തത്. ബജറ്റില്‍ വിവിധ മേഖലകളില്‍ പലവിധത്തിലുള്ള ദേശീയ സ്ഥാപനങ്ങള്‍ സ്ഥാപിക്കന്‍ നിര്‍ദ്ദേശിക്കപ്പെട്ടിട്ടുണ്ടെങ്കിലും കേരളം അടക്കമുള്ള സംസ്ഥാനങ്ങളില്‍ ഇത്തരത്തിലുള്ള സ്ഥാപനങ്ങള്‍ ഒന്നു പോലും സ്ഥാപിക്കാനുള്ള പ്രഖ്യാനം ബജറ്റില്‍ ഇല്ല.

ബിജെപിയുടെ രാഷ്ട്രീയ അജണ്ട നടപ്പിലാക്കാന്‍ വിദ്യാഭ്യാസ മേഖലയില്‍ അവര്‍ വരുത്തിയിട്ടുള്ള പരിഷ്‌കാരങ്ങളുടെ തുടര്‍ച്ച ഇതിലും പ്രകടമാക്കിയിട്ടുണ്ട് എന്നുള്ളത് മറ്റൊരു ഗൗരവമുള്ള കാര്യമാണ്.
കേരളത്തിന് ഈ ഗവണ്‍മെന്റില്‍ നിന്ന് പരിഗണന ലഭിക്കുമെന്ന പ്രതീക്ഷ ഉണ്ടായിരുന്നു. എന്നാല്‍ വയനാട് പാക്കേജ് അടക്കമുള്ള കേരളത്തിന്റെ പ്രതീക്ഷകള്‍ മുഴുവന്‍ ഇല്ലാതാകുകയാണ് ചെയ്തിട്ടുള്ളത്. മാത്രമല്ല 5000 കോടിയുടെ വികസന പ്രവര്‍ത്തനങ്ങളുടെ പദ്ധതി വിഴിഞ്ഞം പോര്‍ട്ടിന് വേണ്ടി സമര്‍പ്പിച്ചിരുന്നുവെങ്കിലും അതിനെ പറ്റിയും ബജറ്റ് പ്രഖ്യാപനത്തില്‍ യാതൊന്നും കാണാന്‍ കഴിഞ്ഞില്ല.
ഇന്ത്യയില്‍ ആയുര്‍വേദ മേഖലക്ക് വലിയ പ്രാമുഖ്യമുള്ള കേരളത്തിന് ഒരു അന്താരാഷ്ട്രതലത്തിലുള്ള സ്ഥാപനം ആരംഭിക്കുന്നതിനുള്ള അപേക്ഷയും പരിഗണിക്കാതെ പോയി. അലിഗഡ് യുണിവേഴ്സിറ്റിയുടെ പെരിന്തല്‍മണ്ണയിലെ ക്യാമ്പസ് ഉയര്‍ത്തി കൊണ്ടു വരണമെന്ന നിര്‍ദ്ദേശം പരിഗണക്കപ്പെടുകയുണ്ടായില്ല.

വിദേശ രാജ്യങ്ങളില്‍ ജോലി ചെയ്യുന്ന ഏറ്റവും അധികം ആളുകളുള്ള സംസ്ഥാനമായ കേരളത്തിന് പ്രവാസികളുടെ ക്ഷേമത്തിന് ഉതകുന്ന വിധത്തിലുള്ള പദ്ധതികള്‍ ആവഷ്‌കരിക്കാന്‍ നിര്‍ദ്ദേശങ്ങള്‍ ഉണ്ടായില്ല.
തൊഴിലില്ലായ്മ രാജ്യത്ത് രൂക്ഷമാണ്. കേരളത്തില്‍ വിദ്യാഭ്യാസം ഉള്ളവരുടെ തൊഴിലില്ലായ്മ കൂടി വരികയാണ്. തൊഴില്‍ സാധ്യത വര്‍ദ്ധിപ്പിക്കുന്നതിനുള്ള പദ്ധതികളും ബജറ്റില്‍ ഇല്ല. എസ്.സി, എസ്.ടി, പ്രാന്തവത്ക്കരിക്കപ്പെട്ട പിന്നോക്ക സമുദായങ്ങള്‍, ഒബിസി അടക്കമുള്ള സമുദായങ്ങള്‍ അനുഭവിക്കന്ന പ്രയാസങ്ങള്‍ ദുരീകരിക്കുന്ന വിധത്തിലുള്ള പദ്ധതികളും പ്രഖ്യാപിക്കുകയുണ്ടായില്ല.
കേന്ദ്ര ഗവണ്‍മെന്റിന് കീഴില്‍ പ്രവര്‍ത്തിച്ച് കൊണ്ടിരിക്കുന്ന സ്ഥാപനങ്ങള്‍ക്കുള്ള ബജറ്റ് വിഹിതം എത്രയുണ്ടെന്ന് രേഖകള്‍ പരിശോധിച്ചാല്‍ മാത്രമേ അറിയാന്‍ കഴിയുവെങ്കിലും അത്തരം സ്ഥാപനങ്ങളോട് ഗവണ്‍മെന്റ് എടുത്ത സമീപനം അനുകൂലമാണെന്ന് പ്രതീക്ഷിക്കാന്‍ കഴിയില്ല. ഈ ബജറ്റില്‍ ഊന്നലും അനുഗ്രഹവും കൊടുത്ത വിഭാഗം സ്വകാര്യ മേഖലക്ക് പൊതുമേഖലയില്‍ കടന്നുകയറാന്‍ അവസരം ഒരുക്കുന്നുവെന്നുള്ളതാണ്. ഈ പശ്ചാത്തലത്തിലാണ് കേന്ദ്ര ബജറ്റിലെ നീതിരഹിതമായ എല്ലാ നിര്‍ദ്ദേശങ്ങളെയും മുസ് ലിം ലീഗ് എതിര്‍ക്കുന്നതെന്നും നേതാക്കള്‍ വ്യക്തമാക്കി.

രാജ്യത്തിന്റെ സാമ്പത്തിക പുരോഗതി താഴേക്ക് പോയിക്കൊണ്ടിരിക്കുകയാണ്. തൊഴിലില്ലായ്മ പരിഹരിക്കുന്നതിന് പ്രസക്തമായ നിര്‍ദേശങ്ങള്‍ ഒന്നുമില്ല. രാജ്യത്തൊട്ടാകെ കാര്‍ഷിക മേഖല നേരിടുന്ന ഗുരുതരമായ പ്രതിസന്ധി പരിഹരിക്കാനുള്ള മാര്‍ഗങ്ങളെ കുറിച്ചും ബജറ്റ് മൗനം പാലിക്കുന്നു. ആദായ നികുതി പരിധി ഉയര്‍ത്തിയത് ഒരു പൊളിറ്റിക്കല്‍ ഗിമ്മിക്കാക്കി മധ്യവര്‍ഗത്തിന് അനുകൂലമായ ബജറ്റെന്ന പ്രചരണം നടത്തുന്നതല്ലാതെ ആഴത്തിലുള്ള ഒരു സമീപനവും ബജറ്റില്‍ ഇല്ല.

ചെറുകിട ഇടത്തര സംരംഭങ്ങള്‍ പുനരുജ്ജീവിപ്പിക്കാനുള്ള നടപടിയില്ല. രാജ്യത്തിന്റെ മുന്‍ഗണനാ ക്രമം എന്തെന്നു മനസിലാക്കാതെ രാഷ്ട്രീയ ലക്ഷ്യത്തോടെ ചില കാര്യങ്ങള്‍ നേടിയെടുക്കുകയെന്ന അജണ്ടയാണ് ബജറ്റിലുള്ളത്. സംസ്ഥാനങ്ങളെയാകെ കൂടുതല്‍ ധന പ്രതിസന്ധിയിലേക്ക് തള്ളിവിടുന്നതാണ് കേന്ദ്ര ബജറ്റെന്നും വാര്‍ത്താസമ്മേളനത്തില്‍ വി.ഡി. സതീശന്‍ പറഞ്ഞു.