union governtmenrt – Chandrika Daily

കോവിഡ് വ്യാപനം തടയാന്‍ സംസ്ഥാനങ്ങള്‍ ലോക്ക് ഡൗണ്‍ പ്രഖ്യാപിക്കണം; നിര്‍ദേശവുമായി സുപ്രീം കോടതി

Test User — Mon, 03 May 2021 08:35:45 +0000

ന്യൂഡല്‍ഹി: കോവിഡ് വ്യാപനം രൂക്ഷമാകുന്ന സാഹചര്യത്തില്‍ സംസ്ഥാനങ്ങള്‍ ലോക്ക് ഡൗണ്‍ ഏര്‍പ്പെടുത്തുന്നത് പരിഗണിക്കണമെന്ന് സുപ്രീം കോടതി നിര്‍ദേശം. രോഗികളെ ആശുപത്രിയില്‍ പ്രവേശിക്കുന്നതുമായി ബന്ധപ്പെട്ട നയം രണ്ടാഴ്ചയ്ക്കുള്ളില്‍ രൂപീകരിക്കാന്‍ സുപ്രീംകോടതി കേന്ദ്രസര്‍ക്കാറിന് നിര്‍ദേശം നല്‍കി.
തിരിച്ചറിയല്‍ രേഖകളോ കാര്‍ഡോ ഇല്ലാത്തതിനെ പേരില്‍ ഒരു പൗരനും രാജ്യത്ത് ചികിത്സ നിഷേധിക്കരുത്. സംസ്ഥാന സര്‍ക്കാറുകള്‍ക്കും കേന്ദ്ര ഭരണ പ്രദേശങ്ങള്‍ക്കും സുപ്രീം കോടതി നിര്‍ദ്ദേശം നല്‍കി.
പല സംസ്ഥാനങ്ങളും രോഗവ്യാപനം ഉയരുന്ന സാഹചര്യത്തില്‍ ആശുപത്രിയില്‍ പ്രവേശിക്കുന്നതിനായി വ്യത്യസ്ത മാനദണ്ഡങ്ങള്‍ ആണ് നിശ്ചയിച്ചിരിക്കുന്നത്.ഇത് പലര്‍ക്കും ബുദ്ധിമുട്ടുണ്ടാക്കുന്ന സാഹചര്യത്തിലാണ് ദേശീയ നയം രൂപീകരിക്കാന്‍ കോടതി നിര്‍ദ്ദേശിച്ചത്.

കേന്ദ്രം കാര്‍ഷിക കടങ്ങള്‍ എഴുതിത്തള്ളില്ല: ജെയ്റ്റ്‌ലി

chandrika — Tue, 20 Jun 2017 19:01:04 +0000

ന്യൂഡല്‍ഹി: കേന്ദ്ര സര്‍ക്കാര്‍ കാര്‍ഷിക കടങ്ങള്‍ എഴുതിത്തള്ളില്ലെന്ന് ആവര്‍ത്തിച്ച് ധനമന്ത്രി അരുണ്‍ ജെയ്റ്റ്‌ലി. മധ്യപ്രദേശിനും മഹാരാഷ്ട്രക്കും പിന്നാലെ പഞ്ചാബും കാര്‍ഷിക കടങ്ങള്‍ എഴുതിത്തള്ളാന്‍ ഒരുങ്ങുന്ന പശ്ചാത്തലത്തിലാണ് ധനമന്ത്രിയുടെ പ്രഖ്യാപനം. 10 ലക്ഷം കര്‍ഷകരുടെ കടങ്ങള്‍ എഴുതിത്തള്ളാനാണ് പഞ്ചാബ് സര്‍ക്കാര്‍ ഒരുങ്ങുന്നത്.
കാര്‍ഷിക കടങ്ങള്‍ എഴുതിത്തള്ളുന്നതു വഴിയുണ്ടാകുന്ന പ്രതിസന്ധി പരിഹരിക്കുന്നതിന് കേന്ദ്രം പ്രത്യേക സാമ്പത്തിക സഹായം അനുവദിക്കണമെന്ന് ഈ സംസ്ഥാനങ്ങള്‍ ആവശ്യപ്പെട്ടിരുന്നു. എന്നാല്‍ സംസ്ഥാന സര്‍ക്കാറുകളെ നിരാശപ്പെടുത്തുന്നതാണ് ധനമന്ത്രിയുടെ പ്രഖ്യാപനം. പണപ്പെരുപ്പം നിയന്ത്രിക്കുന്നതിനു വേണ്ടി സ്വീകരിക്കുന്ന നടപടികളില്‍ സര്‍ക്കാര്‍ ഉറച്ചു നില്‍ക്കും. കാര്‍ഷിക കടങ്ങള്‍ എഴുതിത്തള്ളുന്നത് പണപ്പെരുപ്പം ഉയരാന്‍ ഇടയാക്കും. കഴിഞ്ഞ സാമ്പത്തിക വര്‍ഷം 3.5 ശതമാനമാണ് പണപ്പെരുപ്പം.
നടപ്പു സാമ്പത്തിക വര്‍ഷം ഇത് 3.2 ശതമാനമായി നിയന്ത്രിക്കാനാണ് ബജറ്റില്‍ നിര്‍ദേശിക്കുന്നത്. 2020 ആകുമ്പോഴേക്കും മൊത്തോത്പാദനത്തിന്റെ മൂന്ന് ശതമാനം മാത്രമായി പണപ്പെരുപ്പം നിയന്ത്രിക്കണമെന്ന് മുന്‍ ധനകാര്യ സെക്രട്ടറി എന്‍.കെ സിങ് അധ്യക്ഷനായ ധനകാര്യ ഉത്തരവാദിത്ത- ബജറ്റ് മാനേജ്‌മെന്റ് കമ്മിറ്റി നിര്‍േദശിച്ചിട്ടുണ്ട്.
2022-23 ആകുമ്പോഴേക്കും 2.5 ശതമാനമായി പണപ്പെരുപ്പം കുറച്ചുകൊണ്ടുവരണമെന്നും ധനമന്ത്രി കൂട്ടിച്ചേര്‍ത്തു. മുന്‍ വര്‍ഷങ്ങളെ അപേക്ഷിച്ച് ഇത്തവണ മികച്ച വിളവ് ലഭിച്ചിട്ടും ഉത്പന്നങ്ങള്‍ക്ക് വിലയില്ലാതായതോടെ വന്‍ പ്രതിസന്ധിയാണ് രാജ്യത്തെ കര്‍ഷകര്‍ നേരിടുന്നത്. നോട്ടുനിരോധനത്തെതുടര്‍ന്നുള്ള സാമ്പത്തിക മരവിപ്പാണ് വിലയിടിവിന് കാരണമെന്ന് പ്രതിപക്ഷവും ആഗോള സാഹചര്യങ്ങളാണ് കാരണമെന്ന് കേന്ദ്ര സര്‍ക്കാറും വാദിക്കുന്നു.
വിളകള്‍ക്ക് മതിയായ വില ലഭ്യമാക്കണമെന്നും കാര്‍ഷിക കടങ്ങള്‍ എഴുതിത്തള്ളണമെന്നും ആവശ്യപ്പെട്ട് വിവിധ സംസ്ഥാനങ്ങളില്‍ കര്‍ഷകര്‍ പ്രക്ഷോഭ പാതയിലാണ്. കര്‍ഷക സമരത്തിനു നേരെയുണ്ടായ പൊലീസ് വെടിവെപ്പില്‍ അഞ്ചുപേര്‍ കൊല്ലപ്പെട്ടതിനു പിന്നാലെ കര്‍ഷക ആത്മഹത്യകള്‍ പെരുകുന്നത് ബി.ജെ.പി ഭരിക്കുന്ന മധ്യപ്രദേശ് സര്‍ക്കാറിന് തലവേദനയാകുന്നുണ്ട്.
ഉത്തര്‍പ്രദേശാണ് കാര്‍ഷിക കടങ്ങള്‍ എഴുതിത്തള്ളുമെന്ന പ്രഖ്യാപനം ആദ്യം നടത്തിയത്. 36,359 കോടി രൂപയുടെ കടങ്ങളാണ് യു.പി സര്‍ക്കാര്‍ എഴുതിത്തള്ളുന്നത്. തൊട്ടുപിന്നാലെ മഹാരാഷ്ട്രയും മധ്യപ്രദേശും കടങ്ങള്‍ എഴുതിത്തള്ളുമെന്ന പ്രഖ്യാപനവുമായി രംഗത്തെത്തിയിരുന്നു. രണ്ടു ലക്ഷം രൂപ വരെയുള്ള കാര്‍ഷിക കടങ്ങള്‍ എഴുതിത്തള്ളുമെന്നാണ് അമരീന്ദര്‍ സിങ് നേതൃത്വം നല്‍കുന്ന പഞ്ചാബ് സര്‍ക്കാറിന്റെ പ്രഖ്യാപനം.
എന്നാല്‍ കേന്ദ്ര സര്‍ക്കാര്‍ സ്വീകരിക്കുന്ന നിലപാട് സംസ്ഥാനങ്ങളുടെ നീക്കത്തിന് തിരിച്ചടിയാകും. കേന്ദ്രത്തിന്റെ സാമ്പത്തിക സഹായമില്ലാതെ ഇത്രയും വലിയ തുകയുടെ കടങ്ങള്‍ എഴുതിത്തള്ളാന്‍ സംസ്ഥാന സര്‍ക്കാറുകള്‍ക്ക് കഴിയില്ല. അഥവാ എഴുതിത്തള്ളിയാല്‍ സംസ്ഥാനങ്ങള്‍ വന്‍ കടക്കെണിയിലേക്ക് നീങ്ങുകയും ചെയ്യും. കടം എഴുതിത്തള്ളലിനെതിരെ റിസര്‍വ് ബാങ്ക് ഓഫ് ഇന്ത്യ ഗവര്‍ണര്‍ ഉര്‍ജിത് പട്ടേലും മുന്നറിയിപ്പുമായി രംഗത്തെത്തിയിരുന്നു.

കേന്ദ്രം സഞ്ചരിക്കുന്നത് തെറ്റായ ദിശയിലെന്ന് സുപ്രീം കോടതി

chandrika — Fri, 03 Mar 2017 16:34:49 +0000

ന്യൂഡല്‍ഹി: കര്‍ഷക ആത്മഹത്യ നിയന്ത്രിക്കാന്‍ കേന്ദ്ര സര്‍ക്കാര്‍ നടപടി കൈക്കൊള്ളാത്തതില്‍ ആശങ്ക പ്രകടിപ്പിച്ച് സുപ്രീം കോടതി.
കാര്‍ഷിക വിളകളുടെ തകര്‍ച്ചയും കടക്കെണിയും കാരണം കര്‍ഷകര്‍ ആത്മഹത്യ ചെയ്യുമ്പോള്‍ ഇത് നിയന്ത്രിക്കേണ്ട കേന്ദ്ര സര്‍ക്കാര്‍ തെറ്റായ ദിശയില്‍ സഞ്ചരിക്കുകയാണെന്നും കോടതി ചൂണ്ടിക്കാട്ടി. കര്‍ഷക ആത്മഹത്യ അതീവ ഗുരുതരമായ വിഷയമാണെന്നും ഇതിന് പരിഹാരം കാണുന്നതിനായി എന്ത് നയ പരിപാടിയാണ് കൈക്കൊണ്ടതെന്ന് കേന്ദ്രം അറിയിക്കണമെന്ന് ചീഫ് ജസ്റ്റിസ് ജെ.എസ് ഖേഹാര്‍ അധ്യക്ഷനായ ഡിവിഷന്‍ ബെഞ്ച് പറഞ്ഞു.
കര്‍ഷകര്‍ ബാങ്കുകളില്‍ നിന്നും ലോണെടുക്കുന്നു, ഇത് തിരിച്ചടക്കാനാവാതെ അവര്‍ ആത്മഹത്യ ചെയ്യുന്നു. ആത്മഹത്യക്കു ശേഷം കര്‍ഷകര്‍ക്കു പണം നല്‍കേണ്ടതില്ലെന്നതു മാത്രമാണ് സര്‍ക്കാര്‍ കാണുന്ന പരിഹാരം, ഇത് തടയാന്‍ സര്‍ക്കാറിന് പദ്ധതി വേണ്ടേ എന്നും കോടതി ചോദിച്ചു. കര്‍ഷക ആത്മഹത്യ പതിറ്റാണ്ടുകളായി നടക്കുന്നുണ്ട്. എന്നിട്ടും ഇത് നിയന്ത്രിക്കാന്‍ കാര്യമായ നടപടികളുണ്ടാവുന്നില്ലെന്നത് അല്‍ഭുതപ്പെടുത്തുന്നതായും സുപ്രീം കോടതി പറഞ്ഞു.
സര്‍ക്കാര്‍ ഇക്കാര്യത്തില്‍ ആത്മാര്‍ത്ഥമായി പ്രവര്‍ത്തിച്ചാല്‍ ആത്മഹത്യ നിരക്ക് ഗണ്യമായി കുറക്കാനാവുമെന്നും ഡിവിഷന്‍ ബെഞ്ച് അഭിപ്രായപ്പെട്ടു. അതേ സമയം 2015ല്‍ കേന്ദ്ര സര്‍ക്കാര്‍ പ്രഖ്യാപിച്ച വിള ഇന്‍ഷൂറന്‍സ് അടക്കം നിരവധി പദ്ധതികള്‍ കര്‍ഷക ആത്മഹത്യ ഇല്ലാതാക്കാനായി ചെയ്തിട്ടുണ്ടെന്ന് കേന്ദ്രത്തിനു വേണ്ടി ഹാജരായ അഡീഷണല്‍ സോളിസിറ്റര്‍ ജനറല്‍ പി.എസ് നരസിംഹ കോടതിയെ അറിയിച്ചു. ഗുജറാത്തിലെ കര്‍ഷക ആത്മഹത്യ ചൂണ്ടിക്കാട്ടി സിറ്റിസണ്‍ റിസോഴ്‌സ് ആന്റ് ആക്ഷന്‍ ആന്റ് ഇനീഷ്യേറ്റീവ് എന്ന സന്നദ്ധ സംഘടന സമര്‍പ്പിച്ച ഹര്‍ജിയില്‍ വാദം കേള്‍ക്കുയായിരുന്നു കോടതി.
ഗുജറാത്തില്‍ തുങ്ങുന്നതല്ല വിഷയമെന്നു ചൂണ്ടിക്കാട്ടിയ കോടതി പൊതു വിഷയമായി പരിഗണിക്കുയായിരുന്നു. കേസ് കൂടുതല്‍ വാദം കേള്‍ക്കുന്നതിനായി ഈ മാസം 27ലേക്കു മാറ്റി.