ന്യൂഡല്‍ഹി: ഇന്ത്യന്‍ സൈന്യത്തിന്റെ സാമ്പത്തിക സ്ഥിതി ദയനീയമെന്ന് റിപ്പോര്‍ട്ട്. പത്താന്‍കോട്ട്, ഉറി ആക്രമണങ്ങളുടെ പശ്ചാതലത്തില്‍ അടിയന്തരമായി ആയുധങ്ങള്‍ വാങ്ങാനും, ചൈനീസ് അതിര്‍ത്തിയില്‍ തന്ത്രപ്രധാനമായ റോഡ് നിര്‍മിക്കുന്നതിനും പദ്ധതി തയാറാക്കിയിരുന്നെങ്കിലും ഇതിനാവശ്യമായ പണം ലഭിച്ചില്ലെന്ന് സൈന്യം പാര്‍ലമെന്ററി പാനല്‍ മുമ്പാകെ വ്യക്തമാക്കി. പാകിസ്താനും ചൈനയും ഉയര്‍ത്തുന്ന .യുദ്ധ ഭീഷണി വലുതാണ്. ഈ സാഹചര്യത്തില്‍ സൈന്യത്തിന്റെ ആധുനിക വത്കരണം അടിയന്തരമായി നടക്കേണ്ടതാണ്. എന്നാല്‍ ഇതിനാവശ്യമായ പണം സൈന്യത്തിന് അനുവദിക്കുന്നില്ലെന്നും സൈന്യം അറിയിച്ചതായി പാര്‍ലമെന്ററി പാനല്‍ സമര്‍പ്പിച്ച റിപ്പോര്‍ട്ട് വ്യക്തമാക്കുന്നു. അടിയന്തരമായി നടപ്പാക്കേണ്ട 125 പദ്ധതികള്‍ക്കായി സൈന്യത്തിന് 29,033 കോടി വേണ്ട സ്ഥാനത്ത് ബജറ്റില്‍ അനുവദിച്ചത് 21,338 കോടി മാത്രമാണ്. 10 ദിവസം ശക്തമായ യുദ്ധം നടത്താനാവശ്യമായ ആയുധങ്ങള്‍ പോലും വാങ്ങാന്‍ 6,380 കോടിയുടെ കുറവാണ് സൈന്യം നേരിടുന്നത്. 2018-19ലെ കേന്ദ്ര ബജറ്റ് തങ്ങളുടെ എല്ലാ പ്രതീക്ഷകളെ തല്ലിക്കെടുത്തിയതായി ആര്‍മി വൈസ് ചീഫ് ലഫ്.ജനറല്‍ ശരത് ചന്ദ് പാര്‍ലമെന്ററി പാനലിന് മുമ്പാകെ പറഞ്ഞു. ഇതുവരെ നേടിയത് എന്താണോ അതിന് തിരിച്ചടിയാണ് നേരിട്ടതെന്നും അദ്ദേഹം പറഞ്ഞു. ബജറ്റില്‍ സൈന്യത്തിനുള്ള തുക നാമമാത്രമായി വര്‍ധിപ്പിച്ചത് പണപ്പെരുപ്പം പരിഗണിക്കുമ്പോള്‍ ഒന്നുമല്ലെന്നും അദ്ദേഹം പറഞ്ഞു. സൈന്യത്തിന് മുന്തിയ പരിഗണനയെന്ന മോദി സര്‍ക്കാറിന്റെ പൊള്ള വാദങ്ങള്‍ക്കുള്ള തിരിച്ചടി കൂടിയാണ് സൈന്യത്തിന്റെ റിപ്പോര്‍ട്ട്. പാകിസ്താനും ചൈനയും സൈന്യത്തെ വളരെ വേഗത്തിലാണ് ആധുനിക വത്കരിക്കുന്നത്. ഈ ശ്രദ്ധ ഇന്ത്യന്‍ സൈന്യത്തിനും ലഭിക്കണമെന്നും അദ്ദേഹം പറഞ്ഞു. സൈന്യത്തിന്റെ കയ്യിലുള്ള 68 ശതമാനം ആയുധങ്ങളും കാലപ്പഴക്കം ചെന്നതാണ്. 24 ശതമാനം നടപ്പ് ആയുധങ്ങളും എട്ട് ശതമാനം ഉപയോഗ ശൂന്യവുമാണ്. ആയുധങ്ങള്‍, സ്‌പെയര്‍ പാര്‍ട്‌സ്, എന്നിവ വാങ്ങിക്കുന്നതിനായി ആവശ്യമായ തുക ലഭിക്കുന്നില്ലെന്നും പാനല്‍ മുമ്പാകെ സൈന്യം അറിയിച്ചു. ചൈനീസ് അതിര്‍ത്തിയില്‍ റോഡ് നിര്‍മിക്കുന്നതിനായി സൈന്യത്തിന് 902 കോടി രൂപയുടെ കുറവുണ്ടെന്നും 14 ശതമാനം സൈനിക ബജറ്റ് മാത്രമാണ് ആധുനിക വത്കരണത്തിന് പോകുന്നതെന്നും ഇത് 25 ശതമാനമാക്കി ഉയര്‍ത്തണമെന്നും സൈന്യം ആവശ്യപ്പെട്ടു.

ന്യൂഡല്‍ഹി: നോട്ട് നിരോധനത്തിന്റെ പേരില്‍ മോദി സര്‍ക്കാറിന്റെ മറ്റൊരു തള്ള് കൂടി പൊളിയുന്നു. നോട്ട് നിരോധനത്തോടെ ജമ്മുകശ്മീരിലെ ഭീകര പ്രവര്‍ത്തനങ്ങളില്‍ കാര്യമായ മാറ്റം വന്നില്ലെന്ന് കേന്ദ്ര സര്‍ക്കാര്‍ ലോക്‌സഭയെ അറിയിച്ചു.
എന്നാല്‍ വടക്കു കിഴക്കന്‍ സംസ്ഥാനങ്ങളിലെ ഭീകര പ്രവര്‍ത്തനങ്ങളിലും മാവോയിസ്റ്റ് ആക്രമണങ്ങളുടെ കാര്യത്തിലും ചില മാറ്റങ്ങള്‍ ഉണ്ടായിട്ടുണ്ടെന്നും സര്‍ക്കാര്‍ പാര്‍ലമെന്റില്‍ വ്യക്തമാക്കി. രാജ്യത്തെ സുരക്ഷയുടെ കാര്യത്തില്‍ നോട്ട് നിരോധനത്തിന് ശേഷം പുരോഗതിയുണ്ടായെങ്കിലും ജമ്മുകശ്മീരില്‍ കഴിഞ്ഞ വര്‍ഷത്തെ അപേക്ഷിച്ച് ഭീകരാക്രമണങ്ങളുടെ എണ്ണത്തില്‍ വര്‍ധനവാണുണ്ടായതെന്നും കേന്ദ്ര ആഭ്യന്തര സഹമന്ത്രി ഹന്‍സ് രാജ് ആഹിര്‍ വ്യക്തമാക്കി. സുരക്ഷാ ഉദ്യോഗസ്ഥര്‍ക്കു നേരെയുള്ള കല്ലേറ് കുറഞ്ഞിട്ടുണ്ടെന്നും അദ്ദേഹം ലോക്‌സഭയെ അറിയിച്ചു. 2016 നവംബര്‍ ഒന്നിനും 2017 ഒക്‌ടോബര്‍ 31നും ഇടയില്‍ ജമ്മുകശ്മീരില്‍ 341 ഭീകരാക്രമണങ്ങള്‍ നടന്നതായും മുന്‍ വര്‍ഷം ഇതേ കാലയളവില്‍ 311 ഭീകരാക്രമണങ്ങളാണ് നടന്നതെന്നും ഹര്‍സ് രാജ് ആഹിര്‍ ലോക്‌സഭയെ രേഖാമൂലം അറിയിച്ചു.
അതേ സമയം മാവോയിസ്റ്റ് ആക്രമണങ്ങള്‍ 1078ല്‍ നിന്നും 857 ആയി കുറഞ്ഞിട്ടുണ്ട്. വടക്കു കിഴക്കന്‍ സംസ്ഥാനങ്ങളില്‍ ഭീകരാക്രമണങ്ങള്‍ 507ല്‍ നിന്നും 323 ആയി കുറഞ്ഞതായും അദ്ദേഹം സഭയെ അറിയിച്ചു. മാവോയിസ്റ്റുകളില്‍ നിന്നും നോട്ട് നിരോധനത്തിനു ശേഷം 90 ലക്ഷം രൂപ പിടിച്ചെടുത്തതായും 564 പേര്‍ കീഴടങ്ങിയതായും മന്ത്രി പറഞ്ഞു.
നിയന്ത്രണ രേഖയില്‍ പാകിസ്താന്‍ 771 തവണ വെടിനിര്‍ത്തല്‍ കരാര്‍ ലംഘിച്ചതായും രാജ്യാന്തര അതിര്‍ത്തിയില്‍ 110 തവണയും വെടിനിര്‍ത്തല്‍ കരാര്‍ ലംഘിച്ചതായും അദ്ദേഹം പറഞ്ഞു. മുന്‍ വര്‍ഷം ഇത് യഥാക്രമം 228, 221 എന്നിങ്ങനെയായിരുന്നു. വെടിനിര്‍ത്തല്‍ കരാര്‍ ലംഘിച്ചുകൊണ്ടുള്ള ആക്രമണത്തില്‍ 14 സൈനികരും നാല് ബി.എസ്.എഫ് ജവാന്‍മാരും രണ്ട് സിവിലിയന്‍മാരും കൊല്ലപ്പെട്ടതായും ഒരു ചോദ്യത്തിന് മറുപടിയായി അദ്ദേഹം പറഞ്ഞു.
നോട്ട് നിരോധനത്തോടെ ജമ്മുകശ്മീരിലെ ഭീകര പ്രവര്‍ത്തനങ്ങള്‍ നിലച്ചുവെന്ന ബി. ജെ.പിയുടെ അവകാശ വാദം തെറ്റെന്ന് തെളിയിക്കുന്നതാണ് മന്ത്രിയുടെ ലോക്‌സഭയിലെ മറുപടി.

ഓഖി ചുഴലിക്കാറ്റ് മൂലമുണ്ടായ ദുരന്തത്തെ ദേശീയ ദുരന്തമായി പ്രഖ്യാപിക്കണമെന്നും ദുരിതബാധിതകര്‍ക്കായി 2000 കോടി രൂപയുടെ പ്രത്യേക ദുരിതാശ്വാസ പാക്കേജ് പ്രഖ്യാപിക്കണമെന്നതുള്‍പ്പെടെയുള്ള നിര്‍ദേശങ്ങളടങ്ങിയ നിവേദനം പ്രധാനമന്ത്രിക്ക് യു.ഡി.എഫ് കൈമാറി. പൂന്തുറയിലെ സന്ദര്‍ശന വേളയില്‍ വി.എസ്.ശിവകുമാര്‍ എംഎല്‍എയാണ് പ്രധാനമന്ത്രിക്ക് നിവേദനം കൈമാറിയത്. യു.ഡി.എഫ് സംഘത്തിന് സന്ദര്‍ശനാനുമതി ലഭിക്കാഞ്ഞതിനാലാണ് ഇത്.

ഓഖി ദുരന്തത്തെത്തുടര്‍ന്ന് കാണാതായ മല്‍സ്യത്തൊഴിലാളികളെയും അവരുടെ ബോട്ടുകളെയും വഞ്ചികളെയും കണ്ടെത്താനുളള ജോലികള്‍ വേഗത്തിലാക്കാന്‍ നേവല്‍ എയര്‍ ക്രാഫ്റ്റുകളുടെയും നേവിയുടെ വലിയ കപ്പലുകളുടെയും സേവനം ഉപയോഗപ്പെടുത്തണം. നാഷണല്‍ സൈക്ളോണ്‍ റിസ്‌ക് മിറ്റിഗേഷന്‍ പ്രോജക്റ്റ് രണ്ടാം ഘട്ടത്തിന്റെ പൂര്‍ത്തീകരണം വേഗത്തിലാക്കണമെന്നും യു.ഡി.എഫ് ആവശ്യപ്പെട്ടു. കേന്ദ്രത്തില്‍ ഫിഷറീസ് മന്ത്രാലയം ആരംഭിക്കണമെന്ന നിര്‍ദേശവും യു.ഡി.എഫ് മുന്നോട്ടുവെച്ചു.

കേന്ദ്ര സര്‍ക്കാറിന്റെ മോട്ടോര്‍ വാഹന നിയമ ഭേദഗതികള്‍ക്കെതിരെ പ്രതിഷേധം ശക്തമാകുന്നു. മോട്ടോര്‍ വ്യവസായ മേഖലെയ തകര്‍ക്കുന്നതാണ് ഭേദഗതിയെന്നാണ് കേരള മോട്ടോര്‍ വ്യവസായ സംരക്ഷണ സമിതി അറിയിച്ചു.

ബില്ല രാജ്യസഭയില്‍ അവതരിപ്പിക്കുന്ന ദിവസം മോട്ടോര്‍ വാഹന പണിമുടക്ക് ഉള്‍പ്പെടെയുള്ള സമരപരിപാടികള്‍ സംഘടിപ്പിക്കുമെന്നും സമിതി അറിയിച്ചു

കേന്ദ്ര സര്‍ക്കാര്‍ തുടര്‍ന്നു പോരുന്ന സാമ്പത്തിക നയങ്ങള്‍ രാജ്യത്തെ സാധാരണ തൊഴിലാളിക്ക് ജീവിതം ദുസ്സഹമാക്കിയിരിക്കുകയാണ്. തൊഴിലാളി വിരുദ്ധ നയങ്ങള്‍ക്കെതിരെ എല്ലാവരും ഒന്നിച്ച് നിന്ന് പൊരുതേണ്ടതുണ്ട്. വര്‍ഗീയതക്കെതിരെയുള്ള പോരാട്ടത്തില്‍ തൊഴിലാളികളുടെ പങ്ക് ഒഴിച്ചു കൂടാനാവില്ല.വര്‍ഷങ്ങളോളം ട്രേഡ് യൂനിയന്‍ രംഗത്ത് പ്രവര്‍ത്തിച്ച തനിക്ക് തൊഴിലാളിയായിരുന്നു എന്ന് പറയുന്നതില്‍ അഭിമാനമുണ്ട്. സംഘ പരിവാര്‍ രാജ്യത്ത് നടപ്പിലാക്കുന്ന വര്‍ഗീയ നയങ്ങള്‍ രാജ്യത്തിന്റെ മതേതര സ്വഭാവം ഇലാതാക്കും. അത് അനുവദിക്കാന്‍ കഴിയില്ല ഇ ടി. മുഹമ്മദ് ബഷീര്‍ എം പി പറഞ്ഞു. കേന്ദ്ര സര്‍ക്കാരിന്റെ തൊഴിലാളി വിരുദ്ധ വര്‍ഗീയ അജണ്ടകളെ ശക്തമായ സമരങ്ങളിലുടെ ഒറ്റക്കെട്ടായി ചെറുത്ത് തോല്‍പ്പിക്കുമെന്ന് എസ് ടി യു ദേശീയ പ്രസിഡന്റ് അംജദ് അലി പറഞ്ഞു. നിരവധി സമരങ്ങളിലൂടെ നേടിയെടുത്ത തൊഴിലവകാശങ്ങള്‍ എന്ത് വില കൊടുത്തതും രാജ്യത്തെ തൊഴിലാളി വര്‍ഗം സംരക്ഷിക്കുമെന്ന് എസ്. ടി. യു ദേശീയ സിക്രട്ടറി അഡ്വ. എം റഹ്മത്തുല്ല പറഞ്ഞു. എസ്ടിയു കേരള സംസ്ഥാന പ്രസിഡന്റ് അഹ്മദ് കുട്ടി ഉണ്ണികുളം, മുസ്ലിം യൂത്ത് ലീഗ് ദേശീയ സിക്രട്ടറി സി.കെ സുബൈര്‍, മുഹമ്മദ് ഹലീം (ദില്ലി കെ.എം.സി സി ) സഫറുല്ല മുല്ല,എം.എ.കരീം, അഡ്വ.പി എം ഹനീഫ്, അഖില്‍ അഹ്മദ്, രഖുനാഥ് പന്‍വേലി, മുഹമ്മദ് ഹാറൂന്‍ഷാ, ഹനീഫ മാഹി,
കെ പി മുഹമ്മദ് അഷ്‌റഫ്, സി.എച്ച് ജമീല, എന്നിവര്‍ സംസാരിച്ചു. ഉമ്മര്‍ ഒട്ടുമ്മല്‍, കെ കെ ഹംസ, അഡ്വ.വേളാട്ട് അഹമ്മദ്, കല്ലടി അബൂബക്കര്‍, പി എം ഹാരിസ്, മാഹീന്‍ അബുബക്കര്‍, പി.എ.ഷാഹുല്‍ ഹമീദ്, വല്ലാഞ്ചിറ മജീദ്, നസീമ ബീഗം, പി ലക്ഷ്മി , എസ്. അബൂബക്കര്‍, എ ഫെസല്‍, എ. സൈതാലി, അബുള്‍ ഹുസൈന്‍ മുല്ല, ബീഫാത്തിമ ഇബ്രാഹിം, പി കെ ഇബ്രാഹിം, ഹലീല്‍ റഹ്മാന്‍ തുടങ്ങിയവര്‍ നേത്ത്ര്തം നല്‍കി.