up congress – Chandrika Daily

സഖ്യത്തിനില്ലെന്ന് എസ്പി; യുപിയില്‍ കോണ്‍ഗ്രസിനെ പ്രിയങ്ക ഒറ്റയ്ക്ക് നയിക്കും

Test User — Mon, 16 Nov 2020 11:13:04 +0000

ന്യൂഡല്‍ഹി: 2022ലെ ഉത്തര്‍പ്രദേശ് നിയമസഭാ തെരഞ്ഞെടുപ്പില്‍ കോണ്‍ഗ്രസ് ഒറ്റയ്ക്ക് മത്സരിക്കും. കോണ്‍ഗ്രസുമായി സഖ്യത്തിനില്ലെന്ന് സമാജ്‌വാദി പാര്‍ട്ടി അധ്യക്ഷന്‍ അഖിലേഷ് യാദവ് വ്യക്തമാക്കിയതോടെയാണ് കോണ്‍ഗ്രസ് തനിച്ച് മത്സരിക്കാന്‍ നിര്‍ബന്ധിതമായത്. സംസ്ഥാനത്തിന്റെ ചുമതലയുള്ള ജനറല്‍ സെക്രട്ടറി പ്രിയങ്ക ഗാന്ധി പ്രചാരണത്തിന് ചുക്കാന്‍ പിടിക്കും.

2017ല്‍ കോണ്‍ഗ്രസും എസ്പിയും ചേര്‍ന്നാണ് തെരഞ്ഞെടുപ്പിനെ നേരിട്ടിരുന്നത്. എന്നാല്‍ വലിയ പാര്‍ട്ടികളുമായി സഖ്യമില്ലെന്നും ചെറുകക്ഷികളുമായുള്ള ധാരണയിലാണ് പാര്‍ട്ടിക്ക് താത്പര്യമെന്നും അഖിലേഷ് യാദവ് പറഞ്ഞു. ഇന്ത്യ ടുഡേയാണ് വാര്‍ത്ത റിപ്പോര്‍ട്ട് ചെയ്തത്.

ഇനി ഒന്നര വര്‍ഷം മാത്രമാണ് തെരഞ്ഞെടുപ്പിനായി അവശേഷിക്കുന്നത്. അതു കൊണ്ടു തന്നെ ലഖ്‌നൗവില്‍ ക്യാംപ് ചെയ്താകും പ്രിയങ്കയുടെ പ്രവര്‍ത്തനങ്ങള്‍. ഇതിനായി ഇവര്‍ നേരത്തെ കണ്ടു വച്ച വീട്ടിലേക്ക് മാറും എന്നാണ് റിപ്പോര്‍ട്ടുകള്‍.

ഈയിടെ ഏഴു നിയമസഭാ ഉപതെരഞ്ഞെടുപ്പുകളില്‍ കോണ്‍ഗ്രസിന് തിരിച്ചടിയാണ് ഉണ്ടായിരുന്നു. ആറെണ്ണത്തില്‍ മത്സരിച്ച പാര്‍ട്ടിക്ക് നാലിടത്ത് കെട്ടിവച്ച പണം നഷ്ടമായിരുന്നു. രണ്ടിടങ്ങളില്‍ രണ്ടാം സ്ഥാനത്തായി. ഇവിടെ ആറു സീറ്റില്‍ ബിജെപിയും ഒരിടത്ത് എസ്പിയുമാണ് ജയിച്ചത്.

കഴിഞ്ഞ വര്‍ഷം ഡിസംബറിലാണ് പ്രിയങ്ക തലസ്ഥാനത്തെ പാര്‍ട്ടി ആസ്ഥാനത്ത് ഒടുവില്‍ എത്തിയത്. കോവിഡ് മഹാമാരി മൂലം മിക്ക യോഗങ്ങളും ഓണ്‍ലൈനായാണ് നടക്കുന്നത്. എന്നാല്‍ പാര്‍ട്ടി സ്ഥാപക ദിനമായ ഡിസംബര്‍ 28ന് അറുപതിനായിരം പേരെ അണി നിരത്തി പദയാത്ര സംഘടിപ്പിക്കാന്‍ കോണ്‍ഗ്രസ് തീരുമാനിച്ചിട്ടുണ്ട്.

ബ്ലോക്ക് തല പ്രസിഡണ്ടുമാരുടെയും കമ്മിറ്റികളുടെയും തെരഞ്ഞെടുപ്പ് ഡിസംബര്‍ 28ന് അകം പൂര്‍ത്തീകരിക്കാന്‍ പ്രിയങ്ക നിര്‍ദേശിച്ചു. സംസ്ഥാനത്തുടനീളം പാര്‍ട്ടിയുടെ നെറ്റ്‌വര്‍ക്ക് വിപുലപ്പെടുത്തുകയാണ് ഇതിന്റെ ലക്ഷ്യമെന്ന് സംഘടനാ ചുമതലയുള്ള സെക്രട്ടറി സിദ്ധാര്‍ത്ഥ് പ്രിയ ശ്രീവാസ്തവ എകണോമിക് ടൈംസിനോട് പറഞ്ഞു.

403 അംഗ നിയമസഭയില്‍ കോണ്‍ഗ്രസിന് ഏഴു സീറ്റാണ് ഉള്ളത്. പ്രതിപക്ഷത്ത് എസ്പിക്ക് 49 ഉം ബിഎസ്പിക്ക് 18 ഉം സീറ്റുകളുണ്ട്.

ബിഹാറിലെ തിരിച്ചടി ആവര്‍ത്തിക്കരുത്; യുപിയില്‍ ഇറങ്ങിക്കളിച്ച് പ്രിയങ്ക

Test User — Sat, 14 Nov 2020 05:18:28 +0000

ലഖ്‌നൗ: ബിഹാര്‍ തെരഞ്ഞെടുപ്പിലെ തോല്‍വി യുപിയില്‍ ആവര്‍ത്തിക്കാതിരിക്കാന്‍ മുന്‍കരുതലുമായി കോണ്‍ഗ്രസ് ജനറല്‍ സെക്രട്ടറി പ്രിയങ്ക ഗാന്ധി. ഇതിന്റെ ഭാഗമായി കോവിഡ് മൂലം നിര്‍ത്തിവച്ചിരുന്ന എല്ലാ പാര്‍ട്ടി പരിപാടികളും പുനരാരംഭിക്കാന്‍ കോണ്‍ഗ്രസ് തീരുമാനിച്ചു. പാര്‍ട്ടിയെ താഴേത്തട്ടില്‍ ശക്തിപ്പെടുത്തുകയാണ് പ്രിയങ്കയുടെ ഉന്നം.

ബ്ലോക്ക് തല പ്രസിഡണ്ടുമരുടെയും കമ്മിറ്റികളുടെയും തെരഞ്ഞെടുപ്പ് ഡിസംബര്‍ 28ന് അകം പൂര്‍ത്തീകരിക്കാന്‍ പ്രിയങ്ക നിര്‍ദേശിച്ചു. സംസ്ഥാനത്തുടനീളം പാര്‍ട്ടിയുടെ നെറ്റ്‌വര്‍ക്ക് വിപുലപ്പെടുത്തുകയാണ് ഇതിന്റെ ലക്ഷ്യമെന്ന് സംഘടനാ ചുമതലയുള്ള സെക്രട്ടറി സിദ്ധാര്‍ത്ഥ് പ്രിയ ശ്രീവാസ്തവ എകണോമിക് ടൈംസിനോട് പറഞ്ഞു.

പാര്‍ട്ടി സ്ഥാപക ദിനമായ ഡിസംബര്‍ 28ന് സംസ്ഥാനത്ത് നടത്തുന്ന ഫ്‌ളാഗ് മാര്‍ച്ചില്‍ എംപിമാര്‍, എംഎല്‍എമാര്‍ ഉള്‍പ്പെടെ അറുപതിനായിരം പേര്‍ പങ്കെടുക്കും. 2019ല്‍ ചുമതലയേറ്റ അധ്യക്ഷന്‍ അജയ് കുമാര്‍ ലല്ലുവിന്റെ നേതൃത്വത്തിലാണ് പാര്‍ട്ടി നഷ്ടപ്പെട്ട പ്രതാപം തിരിച്ചുപിടിക്കാന്‍ ഒരുങ്ങുന്നത്.

അതിനിടെ, യുപി ഉപതെരഞ്ഞെടുപ്പുകളില്‍ പാര്‍ട്ടി മോശം പ്രകടനമാണ് കാഴ്ച വച്ചത്. ഏഴു സീറ്റുകളില്‍ നാലിടത്തും പാര്‍ട്ടിക്ക് കെട്ടിവച്ച കാശു പോയി. രണ്ടിടത്ത് പാര്‍ട്ടി സ്ഥാനാര്‍ത്ഥികള്‍ രണ്ടാമതെത്തി. ഏഴില്‍ ആറിടത്താണ് കോണ്‍ഗ്രസ് മത്സരിച്ചത്.

ബന്‍ഗാര്‍മൗ, ഘടംപൂര്‍, ബുലന്ദ്ഷഹര്‍, ദിയോരിയ, നൗഗാവന്‍, സദത്, തുണ്ഡ്‌ല, മല്‍ഹാനി സീറ്റുകളിലേക്കായിരുന്നു ഉപതെരഞ്ഞെടുപ്പ്. സമാജ് വാദി പാര്‍ട്ടി ജയിച്ച മല്‍ഹാനി ഒഴികെയുള്ള എല്ലാ സീറ്റിലും വിജയിച്ചത് ബിജെപിയാണ്. ബന്‍ഗാര്‍മൗ, ഘടംപൂര്‍ മണ്ഡലങ്ങളില്‍ കോണ്‍ഗ്രസ് രണ്ടാമതെത്തി.

പത്തു ലക്ഷം പേരുമായി ആശയവിനിമയം; യുപിയില്‍ കോണ്‍ഗ്രസിനെ ഉടച്ചുവാര്‍ത്ത് പ്രിയങ്ക

Test User — Fri, 18 Sep 2020 11:59:30 +0000

ലഖ്‌നൗ: അടുത്ത വര്‍ഷം നടക്കുന്ന നിയമസഭാ തെരഞ്ഞെടുപ്പിന് മുമ്പോടിയായി ഉത്തര്‍പ്രദേശ് കോണ്‍ഗ്രസിനെ ഉടച്ചു വാര്‍ത്ത് ജനറല്‍ സെക്രട്ടറി പ്രിയങ്ക ഗാന്ധി. മുമ്പൊന്നും കാണാത്ത തരത്തിലുള്ള സംഘടനാ ചര്‍ച്ചകള്‍ക്കും കൂടിയാലോചനകള്‍ക്കുമാണ് ലഖ്‌നൗവിലെ പാര്‍ട്ടി ആസ്ഥാനം വേദിയാകുന്നത്. പ്രത്യേകം പ്രത്യേകം പാര്‍ട്ടി സമിതികളുമായുള്ള കൂടിക്കാഴ്ചയിലാണ് ഇപ്പോള്‍ പ്രിയങ്ക.

കഴിഞ്ഞ ദിവസം മാത്രം നാലു വിര്‍ച്വല്‍ യോഗങ്ങളാണ് പ്രിയങ്കയുടെ അധ്യക്ഷതയില്‍ ചേര്‍ന്നത്. യോഗം ചേര്‍ന്നു പിരിഞ്ഞു പോകുക മാത്രമല്ല, ഓരോ സമിതികള്‍ക്കും ഏറ്റെടുത്ത പ്രവര്‍ത്തനങ്ങള്‍ പൂര്‍ത്തീകരിക്കാനായി സമയക്രമവും നിശ്ചയിക്കുന്നുണ്ട്. ലോക്‌സഭാ തെരഞ്ഞെടുപ്പ് വേളയിലാണ് പടിഞ്ഞാറന്‍ യുപിയുടെ ചുമതലയുള്ള നേതാവായി പ്രിയങ്ക യുപിയിലെത്തുന്നത്. പിന്നീട് സംസ്ഥാനത്തിന്റെ മുഴുവന്‍ ചുമതലയും പാര്‍ട്ടി അവരെ ഏല്‍പ്പിക്കുകയായിരുന്നു.

പത്തു ലക്ഷം പേരുമായി ആശയവിനിമയം

നിയമസഭാ തെരഞ്ഞെടുപ്പിനുള്ള പ്രകടന പത്രിക തയ്യാറാക്കാനുള്ള ശ്രമങ്ങള്‍ അണിയറയില്‍ സജീവമാണ്. ഇതിന്റെ ഭാഗമായി രൂപീകരിച്ച സമിതിക്ക് പത്തു ലക്ഷം ആളുകളുമായി ആശയവിനിമയം നടത്താനുള്ള ടാര്‍ഗറ്റാണ് നല്‍കിയിട്ടുള്ളത്. ഗ്രാമീണ മേഖലയ്ക്ക് കൂടുതല്‍ ഊന്നല്‍ നല്‍കുന്ന പത്രികയാണ് തയ്യാറാകുന്നത്. യുവാക്കളില്‍ നിന്നും വിദ്യാര്‍ത്ഥികളില്‍ നിന്നും അഭിപ്രായങ്ങള്‍ രൂപീകരിക്കുന്നത് പ്രിയങ്ക നേരിട്ടാണ്.

PTI3_18_2019_000088B

നേരത്തെ പ്രഖ്യാപിച്ച പ്രകടന പത്രികയുമായി തെരഞ്ഞെടുപ്പിനെ സമീപിക്കാമെന്ന കണക്കുകൂട്ടിലാണ് പ്രിയങ്ക. യുവാക്കള്‍ക്കിടയിലെ തൊഴിലില്ലായ്മയും കാര്‍ഷിക പ്രശ്‌നങ്ങളും പത്രികയില്‍ പ്രാധാന്യപൂര്‍വം ഇടംപിടിക്കുമെന്നാണ് സൂചന.

പരിശീലന ക്യാമ്പുകള്‍ സജീവമാകുന്നു

അടുത്ത ആറു മാസത്തിനുള്ളില്‍ പാര്‍ട്ടി പ്രവര്‍ത്തകര്‍ക്കായി രണ്ടായിരം പരിശീലന ക്യാമ്പുകളാണ് കോണ്‍ഗ്രസ് സംഘടിപ്പിക്കുന്നത്. ഓരോ ബ്ലോക്കിലും മൂന്ന് പരിശീലന ക്യാമ്പുകളെങ്കിലും സംഘടിപ്പിക്കാനും പദ്ധതിയുണ്ട്. സംസ്ഥാനത്ത് 840 ബ്ലോക്കുകളാണ് ഉള്ളത്. പരിശീലന പദ്ധതിയുടെ ട്രയിനിങ് മൊഡ്യൂളുകള്‍ തയ്യാറാക്കി വരികയാണ്. ഇതിനു പുറമേ, സംസ്ഥാനത്ത് മെമ്പര്‍ഷിപ്പ് ക്യാംപയിന്‍ ഊര്‍ജിതമായി നടത്താനും പ്രിയങ്ക സമിതിക്ക് രൂപം നല്‍കിയിട്ടുണ്ട്. പാര്‍ട്ടിയുടെ താഴേത്തട്ടിലുള്ള സംഘടനാ സംവിധാനം ദുര്‍ബലമായ സാഹചര്യത്തില്‍ ക്യാമ്പുകള്‍ പുതിയ ഊര്‍ജം കൊണ്ടുവരുമെന്ന കണക്കുകൂട്ടലിലാണ് അവര്‍.

തെരഞ്ഞെടുപ്പ് പരാജയം: ആറ് പി.സി.സി അധ്യക്ഷന്‍മാര്‍ രാജി സമര്‍പ്പിച്ചു

chandrika — Mon, 27 May 2019 18:48:49 +0000

ന്യൂഡല്‍ഹി: ലോക്‌സഭാ തെരഞ്ഞെടുപ്പില്‍ കോണ്‍ഗ്രസിനേറ്റ പരാജയത്തിന്റെ ധാര്‍മിക ഉത്തരവാദിത്തം ഏറ്റെടുത്ത് മൂന്ന് സംസ്ഥാന പി.സി.സി അധ്യക്ഷന്‍മാര്‍ കൂടി രാജി സമര്‍പ്പിച്ചു. ഇതോടെ പി.സി.സി അധ്യക്ഷ സ്ഥാനത്തു നിന്നും രാജി സമര്‍പ്പിച്ചവരുടെ എണ്ണം ആറായി. യു.പി അധ്യക്ഷന്‍ രാജ് ബബ്ബര്‍, ഒഡീഷ സംസ്ഥാന അധ്യക്ഷന്‍ നിരഞ്ജന്‍ പട്‌നായിക്, മഹാരാഷ്ട്ര പി.സി.സി അധ്യക്ഷന്‍ അശോക് ചവാന്‍ എന്നിവരാണ് നേരത്തെ രാജി സമര്‍പ്പിച്ചിരുന്നത്. ഇവര്‍ക്ക് പുറമെ പഞ്ചാബ്, ജാര്‍ഖണ്ഡ്, അസം പി.സി.സി അധ്യക്ഷന്‍മാരായ സുനില്‍ ഝാകര്‍, അജോയ് റോയ്, റിപുന്‍ ബോറ എന്നിവരും പാര്‍ട്ടി അധ്യക്ഷന് രാജികത്ത് നല്‍കിയിട്ടുണ്ട്. പഞ്ചാബില്‍ 2014ല്‍ മൂന്ന് സീറ്റു മാത്രം ഉണ്ടായിരുന്ന സ്ഥാനത്ത് 13ല്‍ എട്ടിടത്ത് കോണ്‍ഗ്രസ് വിജയിച്ച് സാമാന്യം ഭേദപ്പെട്ട പ്രകടനം കാഴ്ച വെച്ചെങ്കിലും ഗുരുദാസ്പൂരില്‍ സണ്ണി ഡിയോളിനോടേറ്റ തോല്‍വിയുടെ ഉത്തരവാദിത്തം സ്വയം ഏറ്റെടുത്ത് സംസ്ഥാന അധ്യക്ഷ സ്ഥാനത്തു നിന്നും മാറുകയാണെന്നാണ് സുനില്‍ ഝാകര്‍ രാഹുല്‍ ഗാന്ധിക്കയച്ച ഇമെയില്‍ സന്ദേശത്തില്‍ പറയുന്നത്. സംസ്ഥാനത്തെ 14ല്‍ ഒരു സീറ്റില്‍ മാത്രമാണ് കോണ്‍ഗ്രസിന് ജയിക്കാനായതെന്നും ജാര്‍ഖണ്ഡിലെ പാര്‍ട്ടിയുടെ മോശം പ്രകടനത്തിന്റെ ഉത്തരവാദിത്തം ഏറ്റെടുത്ത് ഒഴിയുകയാണെന്നുമാണ് അജോയ് റോയ് കത്തില്‍ വ്യക്തമാക്കിയിട്ടുള്ളത്. സംസ്ഥാന അധ്യക്ഷന്‍ സ്ഥാനമൊഴിയാന്‍ സന്നദ്ധനായെങ്കിലും സംസ്ഥാനത്ത് പാര്‍ട്ടിയുടെ പ്രകടനം അത്ര മോശമല്ലെന്ന് പാര്‍ട്ടി വക്താവ് അലോക് ദുബെ പറഞ്ഞു. സിങ്ബൂമില്‍ വന്‍ മാര്‍ജിനില്‍ വിജയിച്ച പാര്‍ട്ടി കുന്തിയില്‍ 1400 വോട്ടുകള്‍ക്കും ലോഹര്‍ഗഡയില്‍ 10,000 വോട്ടുകള്‍ക്കുമാണ് തോറ്റതെന്നും അദ്ദേഹം പറഞ്ഞു. അസമില്‍ 2014ല്‍ മൂന്ന് സീറ്റുകളില്‍ വിജയിച്ച കോണ്‍ഗ്രസിന് ഇത്തവണയും മൂന്ന് സീറ്റുകള്‍ മാത്രമാണ് ലഭിച്ചത്. പാര്‍ട്ടി പ്രകടനം കരുതിയതിലും മോശമായതിനാല്‍ അധ്യക്ഷ സ്ഥാനത്തു നിന്നും ഒഴിയാന്‍ സന്നദ്ധത പ്രകടിപ്പിച്ചാണ് റിപൂര്‍ ബോറ അഖിലേന്ത്യാ അധ്യക്ഷന് കത്ത് നല്‍കിയത്. കാലിബോര്‍, നഗാവോന്‍, ബാര്‍പേട്ട എന്നീ മൂന്നിടത്താണ് കോണ്‍ഗ്രസ് ഇത്തവണ വിജയിച്ചത്. 2014ല്‍ 29.9 ശതമാനം വോട്ടു മാത്രം നേടിയ കോണ്‍ഗ്രസ് 2016ലെ നിയനസഭാ തെരഞ്ഞെടുപ്പില്‍ ഇത് 30.96 ശതമനമായി ഉയര്‍ത്തിയിരുന്നു. 2019ലെ ലോക്‌സഭാ തെരഞ്ഞെടുപ്പില്‍ കോണ്‍ഗ്രസിന്റെ വോട്ടു വിഹിതം 35.44 ശതമാനമായി വര്‍ധിച്ചെങ്കിലും സീറ്റുകള്‍ കൂടുതല്‍ നേടാനായിരുന്നില്ല.

യു.പിയിലെ ബി.ജെ.പി എം.പിയും മുന്‍ മന്ത്രിയുമായ ദോഹ്റ കോണ്‍ഗ്രസില്‍ ചേര്‍ന്നു

chandrika — Fri, 29 Mar 2019 09:02:16 +0000

ഉത്തര്‍പ്രദേശിലെ ബിജെപി എം പി അശോക് കുമാര്‍ ദോഹ്റ കോണ്‍ഗ്രസില്‍ ചേര്‍ന്നു. ഇറ്റാവ മണ്ഡലത്തിലെ സിറ്റിങ്ങ് എംപിയും മുന്‍ ഉത്തര്‍പ്രദേശ് മന്ത്രിയുമാണ് ദോഹ്റ. കോണ്‍ഗ്രസ് അംഗത്വം സ്വീകരിച്ച ബിജെപി എംപിയെ കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി ഷാള്‍ അണിയിച്ച് സ്വീകരിച്ചു. യുപിയിലെ യോഗി സര്‍ക്കാറിനും പൊതുതെരഞ്ഞെടുപ്പില്‍ ബിജെപിക്കും വന്‍ തിരിച്ചടിയാണ് ദോഹ്‌റയുടെ കൂടുമാറ്റം.

ബിജെപിയുടെ മുന്‍ കേന്ദ്ര മന്ത്രി ശത്രുഘ്‌നന്‍ സിന്ഹ കഴിഞ്ഞ ദിവസം രാഹുല്‍ ഗാന്ധിയെ സന്ദര്‍ശിച്ചു കോണ്‍ഗ്രസിനോടുള്ള അടുപ്പം വ്യക്തമാക്കിയിരുന്നു. സിന്ഹ ദിവസങ്ങള്‍ക്കകം കോണ്‍ഗ്രസില്‍ ചേരുമെന്നാണ് വിവരം. ബോളിവുഡ് നടി ഊര്‍മിള മതോന്ദ്കറും കഴിഞ്ഞ ദിവസം കോണ്‍ഗ്രസില്‍ ചേര്‍ന്നിരുന്നു. ഊര്‍മിള മതോന്ദ്കറെ മുംബൈ നോര്‍ത്തില്‍ കോണ്‍ഗ്രസ് സ്ഥാനാര്‍ത്ഥിയായി പ്രഖ്യാപിച്ചിട്ടുണ്ട്. ബി ജെ പി സ്ഥാനാര്‍ത്ഥി ഗോപാല്‍ ഷെട്ടിക്കെതിരെയാണ് ഊര്‍മിള മത്സരിക്കുന്നത്.

യോഗി സര്‍ക്കാറിന്റെ കീഴില്‍ യുപിയില്‍ നടക്കുന്ന ദളിത് പീഢനത്തിനെതിരെ പ്രത്യക്ഷമായി പ്രതികരിച്ചിരുന്നു എംപിയാണ് അശോക് കുമാര്‍. പൊലീസിന്റെ ദളിത് വിരുദ്ധ നിലപാടുകള്‍ക്കെതിരെ ദോഹ്‌റ മോദിക്ക് കത്തയക്കുക വരെ ഉണ്ടായിരുന്നു.

ഉത്തര്‍പ്രദേശ് രാഷ്ട്രീയത്തില്‍ കോണ്‍ഗ്രസ് പുതുതായി നിയമിച്ച ജോതിരാഥിത്യ സിന്ധ്യയുടെ പ്രവര്‍ത്തന ഫലമാണ് ബിജെപി എംപിയുടെ മനംമാറ്റമെന്നാണ് വിലയിരുത്തല്‍

പ്രിയങ്കാ ഗാന്ധിയുടെ വരവിന് ശേഷം കോണ്‍ഗ്രസിലേക്ക് പ്രവര്‍ത്തകരുടെ കുത്തൊഴുക്കെന്ന് റിപ്പോര്‍ട്ട്

chandrika — Sat, 09 Mar 2019 17:15:49 +0000

ഉത്തര്‍പ്രദേശില്‍ വമ്പന്‍ രാഷ്്ട്രീയ നീക്കവുമായി കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി നടത്തിയ പ്രിയങ്കാ ഗാന്ധിയുടെ രാഷ്ട്രീയ പ്രവേശനം കോണ്‍ഗ്രസ് പാര്‍ട്ടിക്ക് പുത്തന്‍ ഉണര്‍വ് പകര്‍ന്നതായി റിപ്പോര്‍ട്ട്.

കോണ്‍ഗ്രസ് ഡാറ്റ അനലറ്റിക്‌സ് വിഭാഗത്തിന്റെ കണക്കുകള്‍ പ്രകാരം പാര്‍ട്ടിയിലേക്ക് പ്രവര്‍ത്തകരുടെ വന്‍ ഒഴുക്ക് നടന്നതായാണ് വിവരം. ഉത്തര്‍പ്രദേശിന്റെ ചുമതലയുള്ള എ.ഐ.സി.സി ജനറല്‍ സെക്രട്ടറിയായി പ്രിയങ്കാ ഗാന്ധി എത്തിയത്. പ്രിയങ്കയ്ക്ക് ചുമതല നല്‍കിയ ഉത്തര്‍പ്രദേശില്‍ പ്രവര്‍ത്തകരുടെ എണ്ണത്തില്‍ വന്‍കുതിപ്പുണ്ടായെന്നാണ് ഡാറ്റ അനലിറ്റിക്സ് വിഭാഗം പറയുന്നത്. പ്രിയങ്കയുടെ വരവിന് പിന്നാലെ പാര്‍ട്ടിയിലേക്ക് പുതുതായി 10 ലക്ഷം പ്രവര്‍ത്തകര്‍ എത്തിയതായി കണക്കുകള്‍ വ്യക്തമാക്കുന്നത്.

”പ്രിയങ്കാ ഗാന്ധിയുടെ നിയമനത്തിന് ശേഷം സംഘടനയില്‍ വലിയ ഉണര്‍വുണ്ടായിട്ടുണ്ട്. എല്ലാ സംസ്ഥാനങ്ങളിലും പ്രകടമായ മാറ്റമാണ് കാണാനാകുന്നത്. ഉത്തര്‍പ്രദേശില്‍ മാത്രമല്ല, തമിഴ്‌നാട്, കേരളം തുടങ്ങിയ സംസ്ഥാനങ്ങളിലും പുതുതായി പാര്‍ട്ടിയില്‍ ചേര്‍ന്നവരുടെ എണ്ണത്തില്‍ വന്‍ വര്‍ധനവാണ് ഉണ്ടായിരിക്കുന്നത്” കോണ്‍ഗ്രസ് ഡാറ്റ അനലറ്റിക്‌സ് വിഭാഗം തലവന്‍ പ്രവീണ്‍ ചക്രവര്‍ത്തി വ്യക്തമാക്കി.

ഉത്തര്‍പ്രദേശിലെ കണക്കുകള്‍ പരിശോധിച്ചാല്‍ കോണ്‍ഗ്രസ് പ്രവര്‍ത്തകരുടെ എണ്ണം ഇരട്ടിയിലധികമായി കാണാനാകും. നേരത്തെ ഉത്തര്‍പ്രദേശിലെ കോണ്‍ഗ്രസ് പ്രവര്‍ത്തകരുടെ എണ്ണം 1,50,000 ആയിരുന്നു. പ്രിയങ്കയുടെ വരവിന് ശേഷം ഇത് 3,50,000 ആയി ഉയര്‍ന്നു.

തമിഴ്‌നാട്ടിലും പുതുതായി കോണ്‍ഗ്രസിലേക്കെത്തിയവരുടെ എണ്ണത്തില്‍ കാര്യമായ വര്‍ധനവുണ്ടായി. 2,50,000 പേരാണ് കോണ്‍ഗ്രസിലേക്ക് പുതുതായി എത്തിയത്. ആകെ കണക്ക് പരിശോധിച്ചാല്‍ രാജ്യമൊട്ടാകെ 10 ലക്ഷം പേരാണ് കോണ്‍ഗ്രസിലേക്ക് പുതുതായി എത്തിച്ചേര്‍ന്നത്. പ്രിയങ്കാ ഗാന്ധിയുടെ രാഷ്ട്രീയ പ്രവേശനത്തിന് ഒരുമാസത്തിന് ശേഷമുള്ള കണക്കാണിത്. ജനുവരി 23നാണ് കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി കിഴക്കന്‍ യു.പിയുടെ ചുമതലയുള്ള എ.ഐ.സി.സി ജനറല്‍ സെക്രട്ടറിയായി പ്രിയങ്കാ ഗാന്ധിയെ നിയമിച്ചത്. ഫെബ്രുവരി ആറിനാണ് പ്രിയങ്കാ ഔദ്യോഗികമായി ചുമതലയേറ്റെടുത്തത്.

ശക്തി ആപ് വഴിയാണ് കോണ്‍ഗ്രസിലേക്ക് പുതുതായി എത്തുന്നവരുടെ കണക്ക് കൃത്യമായി കണക്കാക്കുന്നത്. താഴേത്തട്ടിലുള്ള പാര്‍ട്ടി പ്രവര്‍ത്തകരുമായി സംവദിക്കാന്‍ പ്രിയങ്ക സമയം കണ്ടെത്തുന്നുണ്ട്. യു.പിയില്‍ ബൂത്ത് തലത്തില്‍ പ്രവര്‍ത്തകരുമായി സംവദിക്കുന്നതിനായി ലഖ്നൗവില്‍ കോള്‍ സെന്ററും പ്രിയങ്കാ ഗാന്ധി സ്ഥാപിച്ചിട്ടുണ്ട്.

അഭ്യൂഹങ്ങള്‍ക്ക് വിരാമം; യുപിയില്‍ മുഴുവന്‍ സീറ്റിലും മത്സരിക്കാന്‍ തീരുമാനിച്ച് കോണ്‍ഗ്രസ്

chandrika — Sun, 13 Jan 2019 11:50:53 +0000

ലക്‌നൗ: അഭ്യൂഹങ്ങള്‍ക്ക് വിരാമമിട്ട് കൊണ്ട് വരാനിരിക്കുന്ന ലോക്‌സഭാ തെരഞ്ഞെടുപ്പില്‍ ഉത്തര്‍പ്രദേശില്‍ 80 ലോകസഭാ മണ്ഡലങ്ങളിലും ഒറ്റയ്ക്ക് മത്സരിക്കുമെന്ന് കോണ്‍ഗ്രസ് പ്രഖ്യാപിച്ചു. ബി.ജെ.പി ഭരണത്തിന് തടയിടാന്‍ യുപിയില്‍ ഒന്നിച്ചു മത്സരിക്കുമെന്ന് എസ്.പിയും ബിഎസ്പിയും പ്രഖ്യാപിച്ചതിന് പിന്നാലെയാണ് കോണ്‍ഗ്രസിന്റെ തീരുമാനിച്ചത്. തെരഞ്ഞെടുപ്പിനെ നേരിടാന്‍ മണ്ഡലങ്ങളിലെ മറ്റു പാര്‍ട്ടികളുമായി സഖ്യമുണ്ടാക്കാന്‍ ശ്രമിക്കുമെന്ന് രാഹുല്‍ ഗാന്ധി നേരത്തെ വ്യക്തമാക്കിയിരുന്നു.

മുതിര്‍ന്ന കോണ്‍ഗ്രസ് നേതാവ് ഗുലാം നബി ആസാദും യുപിസിസി അധ്യക്ഷന്‍ രാജ് ബബ്ബറും മറ്റു മുതിര്‍ന്ന നേതാക്കളും ചേര്‍ന്ന് ലക്‌നൗവില്‍ നടത്തിയ ചര്‍ച്ചകള്‍ക്ക് ശേഷമാണ് മുഴുവന്‍ സീറ്റിലും ഒറ്റയ്ക്ക് മത്സരിക്കാനുള്ള കോണ്‍ഗ്രസ് തീരുമാനം പ്രഖ്യാപിച്ചത്. കോണ്‍ഗ്രസ് മറ്റു കക്ഷികളുമായി സഖ്യം ചേരാനുള്ള സാധ്യതകള്‍ തള്ളിക്കളയുന്നില്ലെന്നും ഏത് മതേതരകക്ഷിയുമായും ഒന്നിച്ചു നില്‍ക്കാന്‍ കോണ്‍ഗ്രസ് തയ്യാറാണെന്നും ഗുലാം നബി ആസാദ് അറിയിച്ചു.

GN Azad: We didn’t break this alliance, public should know that. We had earlier also said that we’re ready to walk with every party that wants to defeat BJP. But we can’t force anyone. They’ve (SP-BSP) closed this chapter, so we’ll continue this fight for defeating BJP on our own pic.twitter.com/8HcXZIMLr4

— ANI UP (@ANINewsUP) January 13, 2019

2009- ലോക്‌സഭാ തിരഞ്ഞെടുപ്പില്‍ യുപിയില്‍ ഒറ്റയ്ക്ക് മത്സരിച്ച കോണ്‍ഗ്രസ് 21 സീറ്റുകളില്‍ വിജയിച്ചിരുന്നു. എന്നാല്‍ 2014-ല്‍ കോണ്‍ഗ്രസ് ജയം രണ്ട് സീറ്റുകളിലേക്കൊതുങ്ങി. എന്നാല്‍ 2009-ല് നേടിയതിലും ഇരട്ടി സീറ്റുകള്‍ 2019-ല്‍ നേടുമെന്ന ആത്മവിശ്വാസമാണ് ഗുലാം നബി ആസാദ് പ്രകടിപ്പിച്ചത്.

യു.പിയില്‍ കോണ്‍ഗ്രസ് സംവിധാനം ഉടച്ചുവാര്‍ക്കാന്‍ രാഹുല്‍ ഗാന്ധി

chandrika — Sun, 14 Jan 2018 15:40:04 +0000

ലക്‌നോ: 2019 ലെ ലോക്‌സഭാ തെരഞ്ഞെടുപ്പ് മുന്നില്‍കണ്ട് ഉത്തര്‍പ്രദേശില്‍ കോണ്‍ഗ്രസ് സംഘടനാ സംവിധാനം ഉടച്ചുവാര്‍ക്കുന്നു. ഇതിനായി പാര്‍ട്ടി അധ്യക്ഷന്‍ രാഹുല്‍ ഗാന്ധി പദ്ധതി തയ്യാറാക്കി. ആദ്യഘട്ടമായി സ്വന്തം മണ്ഡലമായ അമേത്തിയില്‍ രാഹുലിന്റെ രണ്ടു ദിവസത്തെ പര്യടനം ഇന്ന് തുടങ്ങും. പാര്‍ട്ടി അധ്യക്ഷനായി സ്ഥാനമേറ്റതിന് ശേഷം ആദ്യമായാണ് രാഹുല്‍ സ്വന്തം മണ്ഡലത്തിലെ ജനങ്ങളെ കാണാനെത്തുന്നത്. സന്ദര്‍ശനം ഗംഭീരമാക്കാനുള്ള തയ്യാറെടുപ്പുകള്‍ പൂര്‍ത്തിയായതായി പാര്‍ട്ടി വക്താവ് അമര്‍നാഥ് പ്രതികരിച്ചു.

സംസ്ഥാന നിയമസഭാ തെരഞ്ഞെടുപ്പില്‍ നേരിട്ട തിരിച്ചടി മറികടക്കാന്‍ അടിത്തറമുതല്‍ ശക്തിപ്പെടുത്തണമെന്ന നിര്‍ദേശമാകും രാഹുല്‍ പ്രവര്‍ത്തകര്‍ക്ക് നല്‍കുക. നേതാക്കളുമായും പ്രവര്‍ത്തകരുമായും അദ്ദേഹം കൂടിക്കാഴ്ച നടത്തും. സമാജ് വാദി പാര്‍ട്ടിയുമായി സഖ്യമുണ്ടാക്കിയിട്ടും യു.പിയില്‍ 403 സീറ്റില്‍ ഏഴ് സീറ്റ് മാത്രമായിരുന്നു കോണ്‍ഗ്രസിന്റെ സമ്പാദ്യം. അമേത്തിയിലും സോണിയാ ഗാന്ധിയുടെ മണ്ഡലമായ റായ്ബറേലിയും വരെ തിരിച്ചടികളുണ്ടായി. ഇവിടങ്ങളില്‍ ബി.ജെ.പി ആറ് സീറ്റുകളാണ് പിടിച്ചെടുത്തത്.

എന്നാല്‍ ബി.ജെ.പിയുടെ രാഷ്ട്രീയ കുതന്ത്രങ്ങളെ മറികടന്ന് ഗുജറാത്ത് തെരഞ്ഞെടുപ്പില്‍ വന്‍ മുന്നേറ്റം കാഴ്ചവെക്കാനായതിന്റെ ആത്മവിശ്വാസത്തിലാണ് കോണ്‍ഗ്രസ് നേതൃത്വം. ഇതിന്റെ ചുവടുപിടിച്ച് യു.പിയിലും ഒരുകൈ നോക്കാനാണ് രാഹുലിന്റെ തീരുമാനം. രാജ്യത്തെ ഏറ്റവും വലിയ സംസ്ഥാനമായ യു.പി പിടിച്ചടക്കിയാല്‍ കേന്ദ്ര ഭരണം നേടുക എന്നത് എളുപ്പമാകുമെന്നാണ് അദ്ദേഹത്തിന്റെ കണക്കുകൂട്ടല്‍. പാര്‍ട്ടി സംവിധാനം ശക്തിപ്പെടുത്തുന്നതോടൊപ്പം സംസ്ഥാന സര്‍ക്കാരിന്റെ ജനദ്രോഹ നടപടികളും വര്‍ഗീയ നീക്കങ്ങളും തുറന്നുകാട്ടിയാവും പ്രചാരണം.

80 ലോക്‌സഭാ സീറ്റാണ് യു.പിയിലുള്ളത്. കഴിഞ്ഞതവണ ബി.ജെ.പി 71 സീറ്റില്‍ വിജയിച്ചപ്പോള്‍ സമാജ് വാദി പാര്‍ട്ടിക്ക് അഞ്ചും കോണ്‍ഗ്രസിന് രണ്ടും സീറ്റുകള്‍കൊണ്ട് തൃപ്തിപ്പെടേണ്ടി വന്നു. എന്നാല്‍ മാറിയ രാഷ്ട്രീയ സാഹചര്യത്തില്‍ ജനങ്ങള്‍ കൈവിടില്ലെന്ന വിശ്വാസം കോണ്‍ഗ്രസിനുണ്ട്. നരേന്ദ്ര മോദി സര്‍ക്കാരിന്റെ ഭരണ പരാജയവും നോട്ട് നിരോധനം, ജി.എസ്.ടി തുടങ്ങിയ ജനദ്രോഹ നടപടികളും പിന്നോക്ക സംസ്ഥാനമായ യു.പിയേയും തളര്‍ത്തിയിട്ടുണ്ട്. താഴെതട്ടുമുതല്‍ സംഘടനാ സംവിധാനം ഉടച്ചുവാര്‍ക്കുന്നതോടൊപ്പം കേന്ദ്ര-സംസ്ഥാന സര്‍ക്കാരുകളുടെ ജനവിരുദ്ധ നയങ്ങളും കോണ്‍ഗ്രസിന് പ്രതീക്ഷക്ക് വകനല്‍കുന്നു.

പ്രചാരണത്തിന് ആവേശം പകര്‍ന്ന് പ്രിയങ്ക ഇന്നിറങ്ങുന്നു

chandrika — Fri, 17 Feb 2017 09:15:11 +0000

ലക്‌നൗ: ഉത്തര്‍പ്രദേശ് നിയമസഭാ തെരഞ്ഞെടുപ്പ് പ്രചാരണത്തിനായി പ്രിയങ്ക ഗാന്ധി ഇന്നിറങ്ങും. റായ് ബറേലിയില്‍ നടക്കുന്ന തെരെഞ്ഞെടുപ്പ് റാലികളില്‍ എ ഐ സി സി ഉപാധ്യക്ഷന്‍ രാഹുല്‍ ഗാന്ധിക്ക് ഒപ്പമാകും പ്രിയങ്ക പ്രചാരണം നടത്തുക.

ഉത്തര്‍പ്രദേശില്‍ എസ് പി കോണ്‍ഗ്രസ് സഖ്യം യാഥാര്‍ത്ഥ്യമാക്കാന്‍ നിര്‍ണായക പങ്കു വഹിച്ച പ്രിയങ്ക ഗാന്ധി, സമാജ്്വാദി പാര്‍ട്ടി, കോണ്‍ഗ്രസ് സഖ്യത്തിന്റെ പ്രചാരണത്തിന് സംസ്ഥാനത്തില്‍ നേതൃത്വം വഹിക്കുമെന്ന് സൂചനയുണ്ടായിരുന്നു. എന്നാല്‍ അമേഠിയിലും റായ്ബറേലിയിലും മാത്രമേ പ്രചാരണം നടത്തുകയുള്ളൂ എന്നാണ് നേതൃത്വം വ്യക്തമാക്കുന്നത്.

കോണ്‍ഗ്രസ് സ്ഥാനാര്‍ത്ഥി അതിഥി സിംഗിന് വേണ്ടി റായ് ബറേലി ടൗണ്‍, മഹാരാജഗഞ്ച് എന്നിവിടങ്ങളില്‍ നടക്കുന്ന റാലികളില്‍ ആണ് പ്രിയങ്ക പങ്കെടുക്കുക. ഈ തെരഞ്ഞെടുപ്പില്‍ ഇത് ആദ്യമായാണ് പ്രിയങ്ക പരസ്യ പ്രചാരണത്തിന് ഇറങ്ങുന്നത്.

#ExpectToday Congress VP Rahul Gandhi to address rallies in Hathgaon of Fatehpur & Raebareli where Priyanka Gandhi will accompany him. pic.twitter.com/Al7GBFmO28

— ANI UP (@ANINewsUP) February 17, 2017

ഉത്തര്‍പ്രദേശിലെ മൂന്നാംഘട്ട തിരഞ്ഞെടുപ്പിനുള്ള പരസ്യപ്രചാരണം ഇന്നവസാനിക്കുകയാണ്. പന്ത്രണ്ട് ജില്ലകളിലായി അറുപത്തൊന്‍പത് മണ്ഡലങ്ങളില്‍ ഞായറാഴ്ചയാണ് തിരഞ്ഞെടുപ്പ്. കോണ്‍ഗ്രസ് അധ്യക്ഷ സോണിയാഗാന്ധിയുടെ ലോക്സഭാ മണ്ഡലമാണ് റായ് ബറേലി. തൊട്ടടുത്ത മണ്ഡലമായ അമേഠി രാഹുല്‍ ഗാന്ധിയുടേതുമാണ്. സ്വന്തം കോട്ടകളിലെ ശക്തി വര്‍ധിപ്പിക്കുക എന്ന ലക്ഷ്യത്തോടെയാണ് പ്രിയങ്ക കൂടി പ്രചാരണരംഗത്തിറങ്ങുന്നത്.

ഉത്തരാഖണ്ഡില്‍ രാഹുലിന്റെ റാലിയിലേക്ക് ഇരച്ചുകയറി ബി.ജെ.പി പ്രവര്‍ത്തകര്‍

chandrika — Sun, 12 Feb 2017 15:35:37 +0000

ഹരിദ്വാര്‍: നിയമസഭാ തെരഞെടുപ്പിന്റെ ഭാഗമായി കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധിയുടെ റോഡ്‌ഷോയിലേക്ക് ഇരച്ചു കയറി ബിജെപി പ്രവര്‍ത്തകര്‍. ഹരിദ്വാറില്‍ നടന്ന കോണ്‍ഗ്രസ് റാലിയിലേക്കാണ് മോദി അനുകൂല മുദ്രാവാക്യവുമായി ആയിരക്കണക്കിന് ബി.ജെ.പി പ്രവര്‍ത്തകര്‍ ഇരച്ചെത്തിയത്. സംഭവത്തില്‍ പതറാതെ നിന്ന രാഹുല്‍ ‘അഴിമതിക്കാര്‍ക്കിതിരെ നടപടിയെടുക്കാന്‍ ഞാന്‍ മുഖ്യമന്ത്രി ഹരീഷ് റാവതിനോട് ആവശ്യപ്പെട്ടിട്ടുണ്ട്’ എന്ന് പ്രഖ്യാപിച്ചു. അഴിമതിക്കാരായ മുന്‍ കോണ്‍ഗ്രസ് മുഖ്യമന്ത്രിമാര്‍ ബി.ജെ.പി റാലിയില്‍ ഇപ്പോള്‍ മോദിയെ പുണരുകയാണെന്നും അദ്ദേഹം കുറ്റപ്പെടുത്തി. ആയിരക്കണക്കിന് പേരാണ് കോണ്‍ഗ്രസ് ഉപാധ്യക്ഷന്റെ റാലിക്കെത്തിയത്.
പ്രധാനമന്ത്രി നരേന്ദ്രമോദിയും ഇതേ സമയം ഉത്തരാഖണ്ഡിലുണ്ടായിരുന്നു. ശ്രീനഗറിലെ തെരഞെടുപ്പ് റാലിയെ അഭിസംബോധന ചെയ്യാനെത്തിയതായിരുന്നു അദ്ദേഹം.
ബിജെപി പ്രവര്‍ത്തകര്‍ റോഡ്‌ഷോയിലേക്ക് ഇരച്ചു കയറിയിട്ടും കോണ്‍ഗ്രസ് പ്രവര്‍ത്തകര്‍ തികഞ്ഞ സംയമനം പാലിച്ചതു മൂലം അനിഷ്ട സംഭവങ്ങള്‍ റിപ്പോര്‍ട്ട് ചെയ്തില്ല. ഫെബ്രുവരി 15നാണ് ഉത്തരാഖണ്ഡിലെ വോട്ടെടുപ്പ്.