ഒരു പുതിയ ‘സൂപ്പര്‍ലാര്‍ജ് മള്‍ട്ടിപ്പിള്‍ റോക്കറ്റ് ലോഞ്ചറിന്റെ’ വിജയകരമായ പരീക്ഷണം ഉത്തരകൊറിയന്‍ ശാസ്ത്രജ്ഞര്‍ നടത്തിയ ഒരു അദ്ഭുതമാണെന്ന് പ്യോങ്‌യാങ് പറഞ്ഞു. മിസൈല്‍ പരീക്ഷണങ്ങള്‍ തുടരുമെന്ന് തന്നെയാണ് കിം ജോങ് ഉന്‍ പ്രതിജ്ഞയെടുത്തിയിരിക്കുന്നത്.

യുഎസ് പ്രസിഡന്റ് ഡൊണാള്‍ഡ് ട്രംപ് ഈ റോക്കറ്റുകള്‍ പറക്കുന്നത് കാണട്ടെ എന്നാണ് കിം പറഞ്ഞത്. കെസിഎന്‍എ പുറത്തുവിട്ട ശനിയാഴ്ചത്തെ പരീക്ഷണത്തില്‍ നിന്നുള്ള ഫോട്ടോകള്‍ ഉത്തര കൊറിയന്‍ നേതാവ് ഏറെ സന്തോഷത്തിലാണെന്ന് വ്യക്തമാണ്. കിമ്മിന്റെ പുഞ്ചിരിക്കുന്ന ചിത്രങ്ങള്‍ ഇതിനകം തന്നെ മാധ്യമങ്ങളില്‍ ഹിറ്റായി കഴിഞ്ഞു. ലോഞ്ചര്‍ വാഹനവും ഒരു കൂട്ടം ശാസ്ത്രജ്ഞരുമായി നില്‍ക്കുന്ന പുഞ്ചിരിക്കുന്ന കിമ്മിന്റെ ചിത്രങ്ങളാണ് പുറത്തുവന്നിരിക്കുന്നത്.

സിംഗപ്പൂരില്‍ യു.എസ് പ്രസിഡണ്ട് ഡൊണാള്‍ഡ് ട്രംപും ഉത്തര കൊറിയന്‍ ഭരണാധികാരി കിങ് ജോങ് ഉന്നും തമ്മില്‍ നടത്തിയ ചര്‍ച്ചകളെ തുടര്‍ന്ന് ഇരു രാജ്യങ്ങളും തമ്മില്‍ സമവായത്തിലെത്തിയതായി റിപ്പോര്‍ട്ടുകളുണ്ടായിരുന്നു. എന്നാല്‍ പൂര്‍ണമായും ആണവ നിരായുധീകരണം നടപ്പാക്കാതെ ഉത്തര കൊറിയന്‍ ഭീഷണി പൂര്‍ണമായും അവസാനിക്കില്ലെന്നാണ് യു.എസ് നിലപാട്.

ഉന്നുമായുള്ള ചര്‍ച്ചകള്‍ക്ക് ശേഷം ഉത്തര കൊറിയ ആണവ ഭീഷണിയല്ലെന്ന് ട്രംപ് വ്യക്തമാക്കിയിരുന്നു. എന്നാല്‍ ഇപ്പോള്‍ ആ നിലപാടില്‍ നിന്ന് പിന്നോട്ട് പോയിരിക്കുകയാണ് യു.എസ് പ്രസിഡണ്ട്.