US Embassy – Chandrika Daily

യു.എസ് എംബസിക്ക് സമീപം സ്‌ഫോടനം

chandrika — Thu, 26 Jul 2018 17:34:43 +0000

ബെയ്ജിംങ്: ചൈനയിലെ യുഎസ് എംബസിക്കു സമീപമുണ്ടായ സ്‌ഫോടനത്തിന് പിന്നില്‍ 26 കാരനെന്ന് റിപ്പോര്‍ട്ട്. എംബസിയുടെ പ്രാദേശിക സുരക്ഷാ ഓഫീസറുടെ റിപ്പോര്‍ട്ട് പ്രകാരം ബോംബ് പൊട്ടിച്ചെന്നു കരുതുന്ന ആളുടെ പരിക്ക് ഗുരുതരമല്ല. സ്‌ഫോടനത്തിനുശേഷം പ്രദേശത്തിന്റെ ചിത്രങ്ങളും വീഡിയോയും നിരവധി പേര്‍ സോഷ്യല്‍ മീഡിയയില്‍ പോസ്റ്റുചെയ്തിട്ടുണ്ട്.
വ്യാഴാഴ്ച രാവിലെയാണ് എംബസി പരിസരത്ത് സ്‌ഫോനം നടന്നത്. ഒരു വ്യക്തി മാത്രമാണ് സ്‌ഫോടനത്തിന് പിന്നിലെന്ന് സുരക്ഷാ ഉദ്യോഗസ്ഥര്‍ വ്യക്തമാക്കി. സ്‌ഫോടനത്തില്‍ ആര്‍ക്കും പരിക്കില്ല. ഉടന്‍ തന്നെ സുരക്ഷാ സൈന്യവും പൊലീസും സ്ഥലത്തെത്തുകയും ജാഗ്രതാ നിര്‍ദേശം നല്‍കുകയുമായിരുന്നു. സ്‌ഫോടനം നടന്നയുടനെ ജനം ചിതറിയോടി. തുടര്‍ന്ന് സുരക്ഷയുടെ ഭാഗമായി കൂടുതല്‍ സൈന്യത്തെയും പൊലീസിനെയും സ്ഥലത്ത് വിന്യസിച്ചു. കുടുതല്‍ വിവരങ്ങള്‍ പൊലീസ് പുറത്തുവിട്ടിട്ടില്ല. സംഭവത്തില്‍ അന്വേഷണം ആരംഭിച്ചു.

ജറൂസലമിലെ യു.എസ് എംബസി ഉദ്ഘാടനം: പങ്കെടുക്കുന്നവരുടെ പേരുകള്‍ പുറത്തുവിട്ടു

chandrika — Tue, 08 May 2018 16:20:21 +0000

വാഷിങ്ടണ്‍: അന്താരാഷ്ട്ര പ്രതിഷേധം വകവെക്കാതെ അടുത്തയാഴ്ച ജറൂസലമില്‍ തുറക്കുന്ന അമേരിക്കന്‍ എംബസിയുടെ ഉദ്ഘാടന ചടങ്ങില്‍ പങ്കെടുക്കുന്ന പ്രമുഖരുടെ പേരു വിവരങ്ങള്‍ യു.എസ് ഭരണകൂടം പ്രഖ്യാപിച്ചു. പ്രസിഡന്റ് ഡൊണാള്‍ഡ് ട്രംപ് ചടങ്ങിനെത്തില്ല. പക്ഷെ, ട്രംപിന്റെ മകള്‍ ഇവാന്‍ക, മരുമകന്‍ ജാരെദ് കുഷ്‌നര്‍, യു.എസ് ട്രഷറി സെക്രട്ടറി സ്റ്റീവന്‍ മിനുച്ചിന്‍, ഇസ്രാഈലിലെ യു.എസ് അംബാസഡര്‍ ഡേവിഡ് ഫ്രീഡ്മാന്‍, ട്രംപിന്റെ പശ്ചിമേഷ്യന്‍ ദൂതന്‍ ജാസന്‍ ഗ്രീന്‍ബാള്‍ട്ട് എന്നിവര്‍ പരിപാടിയില്‍ പങ്കെടുക്കും.

14നാണ് എംബസിയുടെ ഉദ്ഘാടനം. ജറൂസലമില്‍ നിലവിലുള്ള യു.എസ് കോണ്‍സുലേറ്റാണ് എംബസിയാക്കി മാറ്റിയിരിക്കുന്നത്. ഫലസ്തീന്‍ വിഷയത്തില്‍ പതിറ്റാണ്ടുകളായി അമേരിക്ക സ്വീകരിച്ചിരിക്കുന്ന നിലാപാടിനെ അട്ടിമറിച്ച് 2017 ഡിസംബറിലാണ് ട്രംപ് ഇസ്രാഈല്‍ തലസ്ഥാനമായി ജറൂസലമിനെ അംഗീകരിക്കുകയും എംബസി മാറ്റുമെന്ന് പ്രഖ്യാപിക്കുകയും ചെയ്തത്. യു.എസ് അംബാസഡറായ ഫ്രീഡ്മാനും ട്രംപിന്റെ പ്രതിനിധി ഗ്രീന്‍ബാള്‍ട്ടും ഇസ്രാഈലുമായി ഏറെ അടുപ്പമുള്ളവരാണ്. ഫലസ്തീനിലെ ഇസ്രാഈല്‍ അധിനിവേശത്തെയും കുടിയേറ്റ നിര്‍മാണ പ്രവര്‍ത്തനങ്ങളെയും അവര്‍ പരസ്യമായി ന്യായീകരിച്ചിരുന്നു.

ജറൂസലമിലെ യു.എസ് എംബസി കെട്ടിടത്തിലേക്കുള്ള ദിശാസൂചക ബോര്‍ഡുകള്‍ സ്ഥാപിക്കുന്ന ജോലികള്‍ പൂര്‍ത്തിയായ ശേഷമാണ് ഉദ്ഘാടനത്തില്‍ പങ്കെടുക്കുന്നവരുടെ പേരുകള്‍ വൈറ്റ്ഹൗസ് പ്രഖ്യാപിച്ചത്. ലോകത്ത് ഒരു രാജ്യത്തിനും ഇതുവരെ ജറൂസലമില്‍ എംബസിയില്ല. അമേരിക്കക്കു പിന്നാലെ പരാഗ്വെയും ജറൂസലമില്‍ എംബസി തുറക്കുമെന്ന് പ്രഖ്യാപിച്ചിട്ടുണ്ട്. 1967ലെ യുദ്ധത്തില്‍ ഫലസ്തീനില്‍നിന്ന് പിടിച്ചെടുത്ത ജറൂസലമിനെ ഇസ്രാഈലിന്റെ ഭാഗമായി പോലും അന്താരാഷ്ട്ര സമൂഹം അംഗീകരിക്കുന്നില്ല.

വിസാ നിയമം കര്‍ശനമാക്കി യു.എസ്; സോഷ്യല്‍ മീഡിയ അക്കൗണ്ടുകള്‍ പരിശോധിക്കും

chandrika — Sat, 31 Mar 2018 10:20:22 +0000

വാഷിംഗ്ടണ്‍: വിദേശികള്‍ക്ക് വിസ അനുവദിക്കുന്നതിനുള്ള ചട്ടങ്ങള്‍ കര്‍ശനമാക്കി അമേരിക്ക. വിസക്ക് അപേക്ഷിക്കുന്നവര്‍ നേരത്തെ ഉപയോഗിച്ചിരുന്ന ഫോണ്‍ നമ്പര്‍, ഇമെയില്‍ അഡ്രസ്, സോഷ്യല്‍ മീഡിയ ഹിസ്റ്ററി എന്നീ വിവരങ്ങള്‍ കൂടി ഇനി സമര്‍പ്പിക്കേണ്ടി വരും. രാജ്യത്തിന് ഭീഷണി ഉയര്‍ത്തുന്ന വ്യക്തികളെ തടഞ്ഞ് നിര്‍ത്തുക എന്ന ലക്ഷ്യത്തോടെയാണിത്.
രാജ്യസുരക്ഷ കണക്കിലെടുത്ത് സുരക്ഷാ ഭീഷണിയുയര്‍ത്തുന്ന വിദേശികളുടെ പ്രവേശനം തടയുന്നതിനുള്ള നീക്കമാണ് ഇപ്പോള്‍ അമേരിക്ക നടത്തിക്കൊണ്ടിരിക്കുന്നത്. ഫെഡറല്‍ രജിസ്റ്ററില്‍ പോസ്റ്റ് ചെയ്ത രേഖകളിലാണ് ഇക്കാര്യം പരാമര്‍ശിക്കുന്നത്. പുതിയ ചട്ടം പ്രകാരം അമേരിക്കയില്‍ നോണ്‍ ഇമ്മിഗ്രന്റ് വിസക്ക് അപേക്ഷിക്കുന്നവര്‍ സോഷ്യല്‍ മീഡിയ അക്കൗണ്ടുകള്‍, ഫോണ്‍ നമ്പര്‍, ഇമെയില്‍ ഐഡി എന്നിവ സംബന്ധിച്ച ചോദ്യങ്ങള്‍ക്ക് മറുപടി നല്‍കേണ്ടതായും വരും. ഇതിന് പുറമേ കഴിഞ്ഞ 15 വര്‍ഷത്തെ ബയോഗ്രാഫിക്കല്‍ വിവരങ്ങളും വിസക്കുള്ള അപേക്ഷക്കൊപ്പം സമര്‍പ്പിക്കണമെന്നുള്ള ചട്ടവും ഇതോടെ പ്രാബല്യത്തില്‍ വരും. പുതിയ നിര്‍ദേശത്തിന് 2017 മെയ് 23ന് ഓഫീസ് ഓഫ് മാനേജ്‌മെന്റ് ആന്റ് ബജറ്റിന്റെ അംഗീകാരം ലഭിച്ചിരുന്നു. 710,000 കുടിയേറ്റക്കാരെയും 14 മില്യണ്‍ നോണ്‍ ഇമ്മിഗ്രന്റ് വിസാ അപേക്ഷകരെയും ബാധിക്കുന്നതാണ് അമേരിക്കയുടെ പുതിയ നീക്കം.
സോഷ്യല്‍ മീഡിയ അക്കൗണ്ടുകള്‍ സംബന്ധിച്ച വിവരങ്ങള്‍ക്കൊപ്പം കഴി!ഞ്ഞ അഞ്ച് വര്‍ഷത്തിനിടെ ഉപയോഗിച്ച ഫോണ്‍ നമ്പറുകളും മൊബൈല്‍ നമ്പറുകളും നല്‍കാനും യുഎസ് സര്‍ക്കാര്‍ നിര്‍ദേശം നല്‍കും.
അഞ്ച് വര്‍ഷത്തിനിടെ ഉപയോഗിച്ചിട്ടുള്ള ഇമെയില്‍ ഐഡികള്‍, അന്താരാഷ്ട്ര തലത്തില്‍ യാത്ര ചെയ്തതിനുള്ള രേഖകള്‍ എന്നിവയും സമര്‍പ്പിക്കേണ്ടതായി വരും. മറ്റേതെങ്കിലും രാജ്യത്തുനിന്ന് നാടുകടത്തിയതാണോ എന്നും ഭീകരവാദ കുറ്റം ചുമത്തിയിട്ടുള്ള വ്യക്തിയോ ഭീകരവാദ പ്രവര്‍ത്തനങ്ങളില്‍ പങ്കാളികളാണോ എന്നിങ്ങനെയുള്ള വിവരങ്ങള്‍ ശേഖരിക്കുന്നതിന് വേണ്ടിയാണ് ഈ നീക്കങ്ങള്‍.
ഫെഡറല്‍ റജിസ്റ്ററിന്റെ പുതിയ നിര്‍ദേശം നടപ്പിലാക്കുന്നതിന് പൊതുജനങ്ങളില്‍ നിന്നു അഭിപ്രായം തേടുന്നതിനായി 60 ദിവസം അനുവദിച്ചിട്ടുണ്ട്.

സുരക്ഷാ ഭീഷണി: തുര്‍ക്കിയിലെ അമേരിക്കന്‍ എംബസി അടച്ചു

chandrika — Tue, 06 Mar 2018 20:30:52 +0000

അങ്കാറ: തുര്‍ക്കിയിലെ അമേരിക്കന്‍ എംബസി സുരക്ഷാ ഭീഷണിയെത്തുടര്‍ന്ന് അടച്ചു. ആള്‍ക്കൂട്ടത്തില്‍നിന്നും എംബസി കെട്ടിടത്തില്‍നിന്നും അകന്നുനില്‍ക്കാന്‍ എംബസി അധികൃതര്‍ തുര്‍ക്കിയിലെ യു.എസ് ഉദ്യോഗസ്ഥര്‍ക്ക് നിര്‍ദേശം നല്‍കി. ടൂറിസ്റ്റ് കേന്ദ്രങ്ങള്‍ സന്ദര്‍ശിക്കുന്നത് തല്‍ക്കാലം നീട്ടിവെക്കാനും ആവശ്യപ്പെട്ടിട്ടുണ്ട്.

ഏതു തരം ഭീഷണിയാണ് എംബസി അടക്കാന്‍ കാരണമെന്ന് വ്യക്തമല്ല. കുറച്ചു ദിവസത്തേക്ക് എംബസിയില്‍നിന്ന് അടിയന്തര സേവനങ്ങള്‍ മാത്രമേ ഉണ്ടാകൂ. എംബസിക്കും യു.എസ് പൗരന്മാര്‍ താമസിക്കുന്ന സ്ഥലങ്ങള്‍ക്കും നേരെ ആക്രമണത്തിന് സാധ്യതയുള്ളതായി അങ്കാറ ഗവര്‍ണര്‍ അറിയിച്ചു.

അമേരിക്കന്‍ വൃത്തങ്ങളില്‍നിന്നുള്ള ഇന്റലിജന്‍സ് റിപ്പോര്‍ട്ടിനെ തുടര്‍ന്നാണ് എംബസി അടച്ചതെന്ന് ഗവര്‍ണറുടെ ഓഫീസ് പറയുന്നു.
2013ല്‍ യു.എസ് എംബസിക്കുനേരെയുണ്ടായ ചാവേറാക്രമണത്തില്‍ തുര്‍ക്കി സുരക്ഷാ ഉദ്യോഗസ്ഥന്‍ കൊല്ലപ്പെട്ടിരുന്നു. നാറ്റോ സഖ്യകക്ഷികളായ തുര്‍ക്കിയും അമേരിക്കയും നിരവധി വിഷയങ്ങളില്‍ ഭിന്നതയിലാണ്. വടക്കന്‍ സിറിയയില്‍ യു.എസ് പിന്തുണയുള്ള കുര്‍ദിഷ് പീപ്പിള്‍സ് പ്രൊട്ടക്ഷന്‍ യൂണിറ്റിനുനേരെ തുര്‍ക്കി വ്യോമാക്രമണം തുടരുന്നതില്‍ അമേരിക്ക ക്ഷുഭിതരാണ്.

‘പവിത്രമായ അല്‍അഖ്‌സ പള്ളി സംരക്ഷിക്കേണ്ടതുണ്ട്’; ജറൂസലേം വിഷയത്തില്‍ മുസ്‌ലിംകള്‍ക്ക് പിന്തുണയേകി ഫാദര്‍ മാന്വല്‍ മുസല്ലം

chandrika — Fri, 29 Dec 2017 11:05:10 +0000

രാമല്ല: ഇസ്രാഈലിലെ അമേരിക്കന്‍ എംബസി ടെല്‍അവീവില്‍ നിന്ന് ജറുസലേമിലേക്ക് മാറ്റി കൊണ്ട് യു.എസ് പ്രസിഡന്റ് ഡൊണാള്‍ഡ് ട്രംപ് നടത്തിയ പ്രഖ്യാപനത്തിനെതിരെ ജറുസലേമിലെ ക്രിസ്ത്യന്‍-ഇസ്‌ലാമിക് ഐക്യ കമ്മിറ്റി അംഗം ഫാദര്‍ മാന്വല്‍ മുസല്ലം രംഗത്ത്. മുസ്‌ലിംകളുടെ ആദ്യ കിബ്‌ലയായ മസ്ജിതുല്‍ അഖ്‌സ ഉള്‍പ്പെടെ പുണ്യ ഇടങ്ങള്‍ സംരക്ഷിക്കപ്പെടേണ്ടതുണ്ടെന്ന് മുസല്ലം പറഞ്ഞു. ജറുസലേം വിഷയത്തിന് വര്‍ഗീയ മുഖം നല്‍കി യുദ്ധപ്രഖ്യാപനം നടത്താനാണ് ഇസ്രാഈല്‍ ശ്രമിക്കുന്നത്. എന്നാല്‍ അത്തരമൊരു യുദ്ധം ഫലസ്തീനില്‍ പൊട്ടിപുറപ്പെടുകയാണെങ്കില്‍ ക്രിസ്ത്യന്‍ സമൂഹം ഒന്നടങ്കം മുസ്‌ലിംകള്‍ക്കൊപ്പം നില്‍ക്കുമെന്നും അദ്ദേഹം പറഞ്ഞു. അല്‍അഖ്‌സ പള്ളിക്കും ജറൂസലേമിനുമെതിരായ സയണിസ്റ്റ് ആക്രമണങ്ങള്‍ എന്തു വിലകൊടുത്തും ചെറുത്തു തോല്‍പ്പിക്കേണ്ടതുണ്ട്. അതിന് മുസ്‌ലിം രാഷ്ട്രങ്ങള്‍ ഫലസ്തീനികള്‍ക്കാവശ്യമായ സഹായങ്ങള്‍ നല്‍കണമെന്നും ആവശ്യമെങ്കില്‍ ചെറുത്തു നില്‍പ്പിന് ആയുധങ്ങള്‍ കൈമാറണമെന്നും മുസല്ലം അഭ്യര്‍ത്ഥിച്ചു.
ട്രംപിന്റെ തീരുമാനം ശുദ്ധമണ്ടത്തരമാണ്. ജറുസലേമിനെ ഇസ്രാഈല്‍ തലസ്ഥാനമായി മാറ്റിയതിലൂടെ ഫലസ്തീന്‍ ജനതയോടുള്ള തുറന്ന യുദ്ധപ്രഖ്യാപനമാണുണ്ടായതെന്നും അദ്ദേഹം പറഞ്ഞു. ഫലസ്തീന്‍ നേതൃത്വവും ജനങ്ങളും വ്യത്യസ്ത തട്ടിലാണുള്ളത്. അത് ഒഴിവാക്കി ഇസ്രാഈലിനെ ചെറുക്കുന്നതിന് ഒറ്റക്കെട്ടായി പുതിയ നയം രൂപപെടുത്തേണ്ടതുണ്ടെന്നും ഫാദര്‍ മാന്വല്‍ മുസല്ലം പറഞ്ഞു.