ജറൂസലം: ഇസ്രാഈലിലെ അമേരിക്കന്‍ എംബസി ടെല്‍അവീവില്‍നിന്ന് ജറൂസലമിലേക്ക് മാറ്റിയതിനെതിരെ അന്താരാഷ്ട്ര പ്രതിഷേധം അലയടിക്കുന്നു. അന്താരാഷ്ട്ര നിയമങ്ങളുടെ ലംഘനമാണ് ഇതെന്ന് യൂറോപ്യന്‍ വിദേശകാര്യ മന്ത്രിമാര്‍ വ്യക്തമാക്കി. അപക്വമായ നീക്കം സംഘര്‍ഷങ്ങള്‍ ആളിക്കത്തിക്കുമെന്ന് അവര്‍ മുന്നറിയിപ്പ് നല്‍കി. യു.എന്‍ രക്ഷാസമിതി പ്രമേയങ്ങള്‍ക്കും അന്താരാഷ്ട്ര നിയമങ്ങള്‍ക്കും വിരുദ്ധമാണ് എംബസി മാറ്റമെന്ന് ഫ്രഞ്ച് വിദേശകാര്യ മന്ത്രി ജാന്‍ ലോഡ്രിയാന്‍ പറഞ്ഞു. നിയമസാധുതയില്ലാത്ത അവിവേകമെന്നാണ് തുര്‍ക്കി വിദേശകാര്യ മന്ത്രാലയം എംബസി മാറ്റത്തെ വിശേഷിപ്പിച്ചത്.

വാഷിങ്ടണ്‍: അമേരിക്കക്കു പിന്നാലെ ഗ്വാട്ടിമാലയും ഇസ്രാഈലിലെ എംബസി ടെല്‍അവീവില്‍നിന്ന് ജറൂസലമിലേക്ക് മാറ്റാന്‍ നടപടി തുടങ്ങി. അമേരിക്കന്‍ എംബസി ടെല്‍അവീവില്‍നിന്ന് ജറൂസലമിലേക്ക് മാറ്റി രണ്ടു ദിവസത്തിനുശേഷം തങ്ങളും എംബസി മാറ്റുമെന്ന് ഗ്വാട്ടിമാലന്‍ പ്രസിഡന്റ് ജിമ്മി മൊറേല്‍സ് പറഞ്ഞു. വാഷിങ്ടണില്‍ അമേരിക്കന്‍ ഇസ്രാഈല്‍ പബ്ലിക്ക് അഫയേഴ്‌സ് കമ്മിറ്റി വാര്‍ഷിക സമ്മേളനത്തിലാണ് അദ്ദേഹം പ്രഖ്യാപനം നടത്തിയത്. മെയ് 14ന് എംബസി മാറ്റുമെന്ന് യു.എസ് ഭരണകൂടം പ്രഖ്യാപിച്ചിട്ടുണ്ട്. ഗ്വാട്ടിമാലന്‍ എംബസി മെയ് പതിനാറിനും ജറൂസലമില്‍ പ്രവര്‍ത്തനം തുടങ്ങും. ഇസ്രാഈല്‍ ജനതക്ക് ഗ്വാട്ടിമാലയുടെ ഉറച്ച പിന്തുണയുണ്ടെന്നതിന്റെ തെളിവാണ് എംബസി മാറ്റമെന്ന് മൊറേല്‍സ് പറഞ്ഞു. ഫലസ്തീനികള്‍ ദുരന്ത ദിനമായി ആചരിക്കുന്ന ഇസ്രാഈല്‍ രൂപീകരണത്തിന്റെ 70-ാം വാര്‍ഷികാചരണ ദിവസം തന്നെയാണ് അമേരിക്കയും ഗ്വാട്ടിമാലയും എംബസി മാറ്റത്തിന് തെരഞ്ഞെടുത്തിരിക്കുന്നത്. ജറൂസലമിനെ ഇസ്രാഈല്‍ തലസ്ഥാനമായി അംഗീകരിക്കുകയും എംബസി മാറ്റാന്‍ തീരുമാനിക്കുകയും ചെയ്തതിന് യു.എസ് പ്രസിഡന്റ് ഡൊണാള്‍ഡ് ട്രംപിനെ മൊറേല്‍സ് അഭിനന്ദിച്ചു. ധീരമായ തീരുമാനമെന്നാണ് ട്രംപിനെ പ്രഖ്യാപനത്തെ അദ്ദേഹം വിശേഷിപ്പിച്ചത്. ഫലസ്തീന്‍ വിഷയത്തില്‍ അമേരിക്കയുടെ പതിറ്റാണ്ടുകളായുള്ള നിലപാട്് അട്ടിമറിച്ചാണ് ട്രംപ് ജറൂസലമിനെ ഇസ്രാഈല്‍ തലസ്ഥാനമായി അംഗീരിച്ചത്. ഫലസ്തീനിലെ ഇസ്രാഈല്‍ അധിനിവേശത്തെ അന്താരാഷ്ട്ര സമൂഹം അംഗീകരിക്കുന്നില്ല. യു.എസ് തീരുമാനം പുനപ്പരിശോധിക്കാന്‍ ആവ്യപ്പെടുന്ന യു.എന്‍ ജനറല്‍ അസംബ്ലി പ്രമേയം വന്‍ ഭൂരിപക്ഷത്തോടെ അംഗീകരിച്ചിരുന്നു. പ്രമേയത്തെ എതിര്‍ത്ത് വോട്ടുചെയ്ത ചുരുക്കം രാജ്യങ്ങളില്‍ ഗ്വാട്ടിമാലയും പെടും. യു.എന്‍ പ്രമേയത്തെ അനുകൂലിച്ച രാജ്യങ്ങള്‍ക്കുള്ള സാമ്പത്തിക സഹായം പിന്‍വലിക്കുമെന്ന് യു.എസ് ഭീഷണി മുഴക്കിയിരുന്നു.

അങ്കാറ: തുര്‍ക്കിയിലെ അമേരിക്കന്‍ എംബസി സുരക്ഷാ ഭീഷണിയെത്തുടര്‍ന്ന് അടച്ചു. ആള്‍ക്കൂട്ടത്തില്‍നിന്നും എംബസി കെട്ടിടത്തില്‍നിന്നും അകന്നുനില്‍ക്കാന്‍ എംബസി അധികൃതര്‍ തുര്‍ക്കിയിലെ യു.എസ് ഉദ്യോഗസ്ഥര്‍ക്ക് നിര്‍ദേശം നല്‍കി. ടൂറിസ്റ്റ് കേന്ദ്രങ്ങള്‍ സന്ദര്‍ശിക്കുന്നത് തല്‍ക്കാലം നീട്ടിവെക്കാനും ആവശ്യപ്പെട്ടിട്ടുണ്ട്. ഏതു തരം ഭീഷണിയാണ് എംബസി അടക്കാന്‍ കാരണമെന്ന് വ്യക്തമല്ല. കുറച്ചു ദിവസത്തേക്ക് എംബസിയില്‍നിന്ന് അടിയന്തര സേവനങ്ങള്‍ മാത്രമേ ഉണ്ടാകൂ. എംബസിക്കും യു.എസ് പൗരന്മാര്‍ താസിക്കുന്ന സ്ഥലങ്ങള്‍ക്കും നേരെ ആക്രമണത്തിന് സാധ്യതയുള്ളതായി അങ്കാറ ഗവര്‍ണര്‍ അറിയിച്ചു. അമേരിക്കന്‍ വൃത്തങ്ങളില്‍നിന്നുള്ള ഇന്റലിജന്‍സ് റിപ്പോര്‍ട്ടിനെ തുടര്‍ന്നാണ് എംബസി അടച്ചതെന്ന് ഗവര്‍ണറുടെ ഓഫീസ് പറയുന്നു. 2013ല്‍ യു.എസ് എംബസിക്കുനേരെയുണ്ടായ ചാവേറാക്രമണത്തില്‍ തുര്‍ക്കി സുരക്ഷാ ഉദ്യോഗസ്ഥന്‍ കൊല്ലപ്പെട്ടിരുന്നു. നാറ്റോ സഖ്യകക്ഷികളായ തുര്‍ക്കിയും അമേരിക്കയും നിരവധി വിഷയങ്ങളില്‍ ഭിന്നതയിലാണ്. വടക്കന്‍ സിറിയയില്‍ യു.എസ് പിന്തുണയുള്ള കുര്‍ദിഷ് പീപ്പിള്‍സ് പ്രൊട്ടക്ഷന്‍ യൂണിറ്റിനുനേരെ തുര്‍ക്കി വ്യോമാക്രമണം തുടരുന്നതില്‍ അമേരിക്ക ക്ഷുഭിതരാണ്.