us open – Chandrika Daily

യുഎസ് ഓപ്പണ്‍: സെറീന പുറത്ത്; അസരങ്ക-ഒസാക്ക ഫൈനല്‍

ചന്ദ്രിക വെബ് ഡെസ്‌ക്‌ — Fri, 11 Sep 2020 06:48:21 +0000

ന്യൂയോര്‍ക്ക്: സൂപ്പര്‍ താരം സെറീന വില്യംസ് യുഎസ് ഓപ്പണ്‍ ടെന്നീസ് ടൂര്‍ണമെന്റില്‍ ഫൈനല്‍ കാണാതെ പുറത്ത്. ബെലാറസിന്റെ വിക്‌റ്റോറിയ അസരങ്കയോട് ഒന്നിനെതിരെ രണ്ട് സെറ്റുകള്‍ക്കാണ് സെറീന പരാജയപ്പെട്ടത്. ജപ്പാന്റെ നവോമി ഒസാക്കയാണ് ഫൈനലില്‍ അസരങ്കയുടെ എതിരാളി. അമേരിക്കയുടെ തന്നെ ജെന്നിഫര്‍ ബ്രാഡിയെ തോല്‍പിച്ചാണ് ഒസാക്ക ഫൈനലിലെത്തിയത്.

സെറീനക്കെതിരെ 6-1, 3-6, 3-6 എന്ന സ്‌കോറിനാണ് അസരങ്ക ജയിച്ചുകയറിയത്. ആദ്യ സെറ്റ് സെറീന നേടിയെങ്കിലും അവസാന രണ്ട് സെറ്റില്‍ ശക്തമായി തിരിച്ചടിച്ച അസരങ്ക വിജയം പിടിച്ചുവാങ്ങുകയായിരുന്നു.

ബ്രാഡിക്കെതിരെ ഒന്നിനെതിരെ രണ്ട് സെറ്റുകള്‍ക്കാണ് ഒസാക്കയുടെ വിജയം. സ്‌കോര്‍: 6-7, 3-6, 3-6. ആദ്യ സെറ്റ് ഇരുവരും പങ്കിട്ടു. എന്നാല്‍ നിര്‍ണായകമായ മൂന്നാം സെറ്റില്‍ ഒസാക്ക അവസരത്തിനൊത്തുയര്‍ന്ന് ശക്തമായി തിരിച്ചുവരികയായിരുന്നു. 2018ല്‍ സെറീനയെ തോല്‍പിച്ച് ഒസാക്ക കിരീടം ചൂടിയിരുന്നു.

യുഎസ് ഓപ്പണ്‍; നവോമി ഒസാക്ക സെമിയില്‍

Test User — Wed, 09 Sep 2020 10:13:46 +0000

ന്യൂയോര്‍ക്ക്: ലോക നാലാം സീഡും മുന്‍ജേതാവുമായ നവോമി ഒസാക്ക യുഎസ് ഓപ്പണ്‍ ടെന്നീസ് സെമി ഫൈനലില്‍. നേരിട്ടുളള സെറ്റുകള്‍ക്കായിരുന്നു ജപ്പാന്‍ താരത്തിന്റെ വിജയം. ക്വാര്‍ട്ടറില്‍ അമേരിക്കയുടെ ഷെല്‍ബി റോജേഴ്‌സിനെയാണ് താരം തോല്‍പ്പിച്ചത്.സ്‌കോര്‍: 6-3,6-4.

മത്സരത്തിന്റെ എല്ലാ മേഖലിയിലും ആധിപത്യം പുലര്‍ത്തിയ ഒസാക്ക എതിരാളിയെ മൂന്നു തവണ ബ്രേക്ക് ചെയ്യുകയും ഏഴു എയ്‌സുകള്‍ ഉതിര്‍ക്കുകയും ചെയ്തു. മൂന്നാം ഗ്രാന്‍സ്ലാം ലക്ഷ്യമിടുന്ന ഒസാക്കയ്ക്ക് മുന്നില്‍ ഷെല്‍ബി റോജേഴ്‌സിന് കാര്യമായി ഒന്നും ചെയ്യാന്‍ കഴിഞ്ഞില്ല .മത്സരം ഒരു മണിക്കൂറും 20 മിനിറ്റും നീണ്ടുനിന്നു.സെമിഫൈനലില്‍ അമേരിക്കന്‍ താരമായ 28ാം സീഡ് ജെന്നിഫര്‍ ബ്രാഡിയാണ് ഒസാക്കയുടെ എതിരാളി.

യു.എസ് ഓപ്പണ്‍; ഫെഡററെ അട്ടിമറിച്ച് ദിമിത്രോ സെമിയില്‍

Test User — Wed, 04 Sep 2019 04:29:11 +0000

ന്യൂയോര്‍ക്ക്: യു.എസ് ഓപ്പണ്‍ ടെന്നീസ് ടൂര്‍ണമെന്റില്‍ നിന്ന് സൂപ്പര്‍ താരം റോജര്‍ ഫെഡറര്‍ പുറത്ത്. ക്വാര്‍ട്ടറില്‍ ബള്‍ഗേറിയയുടെ 78ാം റാങ്കിലുള്ള ഗ്രിഗോര്‍ ദിമിത്രോവാണ് സ്വിസ് താരത്തെ തോല്‍പ്പിച്ച് സെമിയിലെത്തിയത്.നീണ്ട അഞ്ച് ,സെറ്റുകള്‍ക്കൊടുവിലാണ് ഫെഡററെ ദിമിത്രോ കീഴ്‌പ്പെടുത്തിയത്. സ്‌കോര്‍: 6-3, 4-6, 6-3, 4-6, 2-6.

ഇതിനു മുന്‍പ് ഏഴു തവണ ഇരുവരും ഏറ്റുമുട്ടിയപ്പോള്‍ ഏഴു തവണയും വിജയം ഫെഡറര്‍ക്കായിരുന്നു.

യു.എസ് ഓപണ്‍: നിലവിലെ ചാമ്പ്യന്‍ നൊവാക് ദ്യോകോവിച്ച് പരിക്കേറ്റ് പിന്‍മാറി

ചന്ദ്രിക വെബ് ഡെസ്‌ക്‌ — Mon, 02 Sep 2019 04:56:27 +0000

ന്യൂയോര്‍ക്ക്: ഒന്നാം സീഡും നിലവിലെ ചാമ്പ്യനുമായ നൊവാക് ദ്യോകോവിച്ച് യു.എസ് ഓപണില്‍ നിന്ന് പരിക്കേറ്റ് പിന്‍മാറി. പ്രീ ക്വാര്‍ട്ടറില്‍ സ്റ്റാന്‍ വാവ്‌റിങ്ക്‌ക്കെതിരെ രണ്ടുസെറ്റ് പിന്നില്‍ നില്‍ക്കെ പരുക്കേറ്റ് പിന്‍മാറുകയായിരുന്നു. സ്‌കോര്‍ 6-4, 7-5, 2-1.

മുന്‍ ചാമ്പ്യന്‍മാരായ റോജര്‍ ഫെഡററും സെറീന വില്യംസും ക്വാര്‍ട്ടര്‍ ഫൈനലിലെത്തി. ബെല്‍ജിയത്തിന്റെ ഡേവിഡ് ഗോഫിനെ നേരിട്ടുള്ള സെറ്റുകള്‍ക്ക് ഫെഡറര്‍ തോല്‍പിച്ചു. ക്രൊയേഷ്യയുടെ പെട്‌റ മാറ്റ്‌റിച്ചിനെയാണ് സെറീന തോല്‍പിച്ചത്. ലോക രണ്ടാം നമ്പര്‍ വനിത താരം ഓസ്‌ട്രേലിയയുടെ ആഷ്‌ലി ബാര്‍ടി പ്രീ ക്വാര്‍ട്ടറില്‍ തോറ്റുപുറത്തായി. ചൈനയുടെ വാങ് കിയാങ്ങാണ് ബാര്‍ടിയെ തോല്‍പിച്ചത്.

സെറീനയെ വീഴ്ത്തി; യു.എസ് ഓപ്പണില്‍ നവോമി ഒസാക്കക്കു കിരീടം

chandrika — Sun, 09 Sep 2018 03:40:24 +0000

ന്യൂയോര്‍ക്ക്: യു.എസ് ഓപ്പണ്‍ ചരിത്ര ഫൈനലില്‍ മുന്‍നിര താരം സെറീന വില്യംസിനെ പരാജയപ്പെടുത്തി ജപ്പാന്റെ നവോമി ഒസാകക്കു കിരീടം. 6-2, 6-4 സ്‌കോറുമായി നേരിട്ടുള്ള സെറ്റുകള്‍ക്കാണ് ഒസാക വിജയിച്ചത്. ഇതോടെ ഗ്രാന്‍സ്ലാം സിംഗിള്‍സ് ടൈറ്റില്‍ നേടുന്ന ആദ്യ ജപ്പാന്‍ താരമായി ഒസാക മാറി.

നാടകീയ സംഭവങ്ങള്‍ക്കാണ് ഫൈനല്‍ വേദിയായ ആര്‍തെര്‍ ആഷെ സ്റ്റേഡിയം സാക്ഷ്യം വഹിച്ചത്. മത്സരത്തിനിടെ പോയിന്റു വെട്ടിക്കുറച്ച അമ്പയറോട് തര്‍ക്കിച്ച സെറീന വില്യംസ്, കോര്‍ട്ടില്‍ മുമ്പെങ്ങുമില്ലാത്ത വിധമുള്ള പെരുമാറ്റമാണ് നടത്തിയത്. അമ്പയറോട് തര്‍ക്കിച്ച സെറീന നിങ്ങള്‍ കള്ളനാണെന്ന് വിരല്‍ ചൂണ്ടി സംസാരിച്ചു.

രണ്ടാം സെറ്റ് 3-2 എന്ന നിലയില്‍ നില്‍ക്കെ റാക്കറ്റ് കോര്‍ട്ടില്‍ എറിഞ്ഞു പൊട്ടിച്ചതിന് സെറീനയുടെ പോയിന്റെ വെട്ടിക്കുറച്ചതാണ് പ്രകോപനത്തിന് ഇടയാക്കിയത്. അമ്പയറുടെ നടപടിക്കെതിരെ കാണികളും രംഗത്തുവന്നു. മത്സരത്തിനു ശേഷം അമ്പയര്‍ക്ക് കൈ കൊടുക്കാന്‍ പോലും സെറീന തയാറായില്ല. എന്നാല്‍ അവസാന ചടങ്ങില്‍ എതിരാളിയായ ഒസാകക്കു പ്രശംസ ചൊരിയാനും സെറീന മറന്നില്ല. അവളുടെ ആദ്യ ഗ്രാന്‍സ്ലാം കിരീടമാണിതെന്നും കൂവലോടെയല്ല ആഘോഷിക്കേണ്ടതെന്നും സെറീന കാണികളോടായി പറഞ്ഞു.