utharpradesh police – Chandrika Daily

ഉത്തര്‍പ്രദേശ് സര്‍ക്കാരിനെ പിരിച്ചുവിടണം; സുപ്രീംകോടതിയില്‍ ഹര്‍ജി

chandrika — Mon, 05 Oct 2020 09:32:04 +0000

ന്യൂഡല്‍ഹി: ഉത്തര്‍പ്രദേശ് സര്‍ക്കാരിനെ പിരിച്ചുവിടാന്‍ സുപ്രീംകോടതിയില്‍ ഹര്‍ജി. സുപ്രീംകോടതി അഭിഭാഷകന്‍ സിആര്‍ വിജയ സുകിനാണ് ഹര്‍ജി നല്‍കിയത്. ഹത്രാസ് ഉന്നാവോ പീഡനങ്ങള്‍ ഉള്‍പ്പെടെ കഴിഞ്ഞ നാളുകളില്‍ ഉത്തര്‍പ്രദേശില്‍ നടന്ന എല്ലാ സംഭവങ്ങളും, മാധ്യമ വാര്‍ത്തകളും, തെളിവുകളും സഹിതമാണ് ഹര്‍ജി നല്‍കിയിരിക്കുന്നത്.

ഹാത്രസില്‍ കൂട്ടബലാത്സംഗത്തിനിരയായി ദളിത് പെണ്‍കുട്ടി കൊല്ലപ്പെട്ട സംഭവത്തിനെതിരെ രാജ്യമൊട്ടാകെ പ്രതിഷേധം ഉയര്‍ന്നിരുന്നു. പെണ്‍കുട്ടിയുടെ മരണം പുറം ലോകമറിയാതിരിക്കാനുള്ള ഉത്തര്‍പ്രദേശ് സര്‍ക്കാരിന്റെ നീക്കങ്ങള്‍ വിമര്‍ശിക്കപ്പെടുകയായിരുന്നു. മാധ്യമങ്ങള്‍ക്കും പ്രതിപക്ഷ രാഷ്ട്രീയ പ്രവര്‍ത്തകര്‍ക്കും അങ്ങോട്ടുള്ള പ്രവേശനം തടഞ്ഞായിരുന്നു യുപി പൊലീസിന്റെ ഇടപെടല്‍.

രണ്ട് ജെയ്‌ഷെ മുഹമ്മദ് പ്രവര്‍ത്തകരെ പിടികൂടിയതായി യു.പി പൊലീസ്

chandrika — Fri, 22 Feb 2019 17:06:09 +0000

ന്യൂഡല്‍ഹി: പാകിസ്താന്‍ കേന്ദ്രമായി പ്രവര്‍ത്തിക്കുന്ന ഭീകര സംഘടനയായ ജെയ്‌ഷെ മുഹമ്മദുമായി ബന്ധമുണ്ടെന്ന് ആരോപണത്തില്‍ രണ്ടുപേരെ ഉത്തര്‍പ്രദേശ് പൊലീസ് അറസ്റ്റു ചെയ്തു. ഒരു വിദ്യാര്‍ത്ഥി നല്‍കിയ രഹസ്യ വിവരത്തെ തുടര്‍ന്നാണ് അറസ്റ്റ്. മുസ്ലിം വിദ്യാഭ്യാസ സ്ഥാപനങ്ങളാല്‍ പ്രശസ്തമായ ഉത്തര്‍പ്രദേശിലെ ദയൂബന്ദില്‍ നിന്നാണ് ഇവരെ യോഗി സര്‍ക്കാറിന്റെ ആഭ്യന്തര പൊലീസ് കസ്റ്റഡിയില്‍ എടുത്തത്.

കശ്മീര്‍ സ്വദേശികളായ ഷാനവാസ് തെളി, ആഖിബ് അഹമ്മദ് മാലിക് എന്നിവരാണ് പിടിയിലായതെന്ന് ഉത്തര്‍പ്രദേശ് തീവ്രവാദ വിരുദ്ധ സേന(എ.ടി.എസ്) അവകാശപ്പെട്ടു. തെളി കുല്‍ഗാം സ്വദേശിയും ആഖിബ് പുല്‍വാമ സ്വദേശിയുമാണ്. ഇവരുടെ മുറികളില്‍ നടത്തിയ പരിശോധനകളില്‍ 32 റേഞ്ചിലുള്ള രണ്ട് ബോര്‍ പിസ്റ്റളുകള്‍, 30 വെടിയുണ്ടകള്‍ എന്നിവയും ഭീകരബന്ധം സൂചിപ്പിക്കുന്ന ചാറ്റുകളുടേയും വീഡിയോകളുടേയും ഫോട്ടോകളുടേയും വിവരങ്ങളും ലഭിച്ചതായി പൊലീസ് അറിയിച്ചു. ഭീകര സംഘടനകളിലേക്ക് ആളുകളെ എത്തിക്കുന്ന റിക്രൂട്ട്‌മെന്റ് കണ്ണികളാണ് ഇരവരുമെന്ന് കരുതുന്നതായി പൊലീസ് വ്യക്തമാക്കി.

പൊലീസുകാരന്റെ ജീവനേക്കാള്‍ വില പശുവിനോ: നസീറുദ്ദീന്‍ ഷാ മക്കളുടെ കാര്യത്തില്‍ ഭയപ്പെടുന്നു

chandrika — Thu, 20 Dec 2018 17:50:12 +0000

ന്യൂഡല്‍ഹി: ബുലന്ദ്ശഹര്‍ കലാപവുമായി ബന്ധപ്പെട്ട് ഭരണകൂട നിലപാടുകളെ വിമര്‍ശിച്ച് നടന്‍ നസീറുദ്ദീന്‍ ഷാ.
ഒരു പൊലീസുദ്യോഗസ്ഥന്റെ കൊലപാതകത്തേക്കാള്‍ പ്രാധാന്യം ഒരു പശുവിന്റെ ജീവന് കൊടുത്തത് നമ്മള്‍ കണ്ടതാണെന്നായിരുന്നു അദ്ദേഹത്തിന്റെ പരാമര്‍ശം. നിയമം കയ്യിലെടുത്താലും ശിക്ഷിക്കപ്പെടില്ലെന്ന ധൈര്യമാണ് അക്രമികള്‍ക്കുള്ളതെന്നും നസറുദ്ദീന്‍ ഷാ പറഞ്ഞു. ബുലന്ദ്ശഹര്‍ കലാപത്തില്‍ പൊലീസ് ഉദ്യോഗസ്ഥന്‍ സുബോധ് കുമാറിനെ വെടിവെച്ചുകൊലപ്പെടുത്തിയ സംഭവത്തെ പരാമര്‍ശിച്ചായിരുന്നു നസീറുദ്ദീന്‍ ഷായുടെ പ്രതികരണം.
ഇന്ത്യന്‍ സമൂഹത്തില്‍ ഗുരുതരമായ ഒരു വിഷം കലര്‍ന്നിരിക്കുകയാണെന്നും ഇതിനെ തിരിച്ചുപിടിച്ച് കുപ്പിയിലാക്കുകയെന്നത് വളരെ ശ്രമകരമായ ജോലിയാണെന്നും നസറുദ്ദീന്‍ ഷാ പറഞ്ഞു. ഒരു മാധ്യമത്തിന് നല്‍കിയ അഭിമുഖത്തിലായിരുന്നു പ്രതികരണം.
ഇന്ത്യയിലാണ് തന്റെ കുട്ടികള്‍ വളര്‍ന്നുവരുന്നതെന്നതില്‍ താന്‍ ഇപ്പോള്‍ ഭയപ്പെടുകയാണെന്നും നസീറുദ്ദീന്‍ ഷാ പറഞ്ഞു. നിങ്ങള്‍ ഹിന്ദുവാണോ മുസ്‌ലിമാണോ എന്ന് ചോദിക്കുന്ന ഒരു കൂട്ടം ആക്രമാസക്തരായ ആള്‍ക്കൂട്ടത്തിന് നടുവിലാണ് അവര്‍ ജീവിക്കുന്നതെന്നതാണ് തന്നെ ഭയപ്പെടുത്തുന്നതെന്നും അദ്ദേഹം പറഞ്ഞു.
നിങ്ങള്‍ ഹിന്ദുവാണോ മുസ്‌ലിമാണോ എന്ന ചോദ്യത്തിന് തന്റെ മക്കള്‍ക്ക് ഒരു ഉത്തരം നല്‍കാനാവില്ലെന്നും തങ്ങള്‍ അവര്‍ക്ക് അത്തരത്തിലൊരു മതമോ മതവിദ്യാഭ്യാസമോ നല്‍കിയിട്ടില്ല.
ഞാന്‍ വളരെ ദേഷ്യത്തിലാണെന്നും ശരിയില്‍ വിശ്വസിക്കുന്ന ഓരോ മനുഷ്യനും ഈ അവസരത്തില്‍ ദേഷ്യപ്പെടുമെന്നും അദ്ദേഹം പറഞ്ഞു.

ഡ്യൂട്ടിയ്ക്കിടെ പൊലീസുകാരുടെ നൃത്തചുവട്; രണ്ട് പേര്‍ക്ക് സസ്‌പെന്‍ഷന്‍

chandrika — Sun, 08 Apr 2018 16:21:00 +0000

ന്യൂഡല്‍ഹി: ബോളിവുഡ് ഗാനത്തിനൊപ്പം ചുവടുവയ്ക്കുകയും നര്‍ത്തകികള്‍ക്ക് നേരെ നോട്ടുകള്‍ വാരിയെറിയുകയും ചെയ്ത പൊലീസ് ഉദ്യോഗസ്ഥര്‍ക്ക് സസ്‌പെന്‍ഷന്‍. ഡ്യൂട്ടിയ്ക്കിടെയായിരുന്നു പൊലീസുകാരുടെ നൃത്തചുവട്. ഈ ദൃശ്യങ്ങള്‍ സമൂഹമാധ്യമങ്ങളില്‍ വൈറലായതോടെയാണ് ഇവര്‍ക്കെതിരെ ഉയര്‍ന്ന ഉദ്യോഗസ്ഥര്‍ നടപടി സ്വീകരിച്ചത്. ഉത്തര്‍പ്രദേശിലെ ഉനായിലാണ് സംഭവം. പ്രാദേശിക മേളയില്‍ നടന്ന ഷോയ്ക്കിടെയായിരുന്നു പൊലീസുകാരുടെ നൃത്തം. എല്ലാ വര്‍ഷവും ഇതേ സ്ഥലത്ത് മേള നടക്കാറുണ്ട്. മേളയുടെ സുഗമമായ നടത്തിപ്പിനായി നിയോഗിച്ചതായിരുന്നു ഈ പൊലീസ് ഉദ്യോഗസ്ഥരെ. 2015ല്‍ വഡോദരയില്‍ വിവാഹ പാര്‍ട്ടിയ്ക്കിടെ നൃത്തക്കാര്‍ക്ക് നേരെ പണം എറിഞ്ഞ സംഭവവും വിവാദമായിരുന്നു.

#WATCH Police personnel throws currency notes at dancers at an event in Unnao. He was deployed at the event for security. The police personnel was suspended after the incident. (7.04.18) pic.twitter.com/VQZYLAKwKS

— ANI UP (@ANINewsUP) April 8, 2018

ഉത്തര്‍പ്രദേശില്‍ വോട്ടെണ്ണല്‍ മണ്ഡലത്തില്‍ മാധ്യമങ്ങള്‍ക്ക് വിലക്ക്

chandrika — Wed, 14 Mar 2018 08:35:00 +0000

ലക്‌നൗ: ഉത്തര്‍പ്രദേശിലെ ലോക്‌സഭാ ഉപതിരഞ്ഞെടുപ്പിന്റെ വോട്ടെണ്ണല്‍ തുടരുന്ന മുഖ്യമന്ത്രി ആദിത്യനാഥിന്റെ മണ്ഡലത്തില്‍ മാധ്യമങ്ങള്‍ക്ക് വിലക്ക്. വോട്ടെണ്ണലില്‍ സമാജ്‌വാദി പാര്‍ട്ടി സ്ഥാനാര്‍ത്ഥി മുന്നേറുന്നതിനിടെയാണ് വോട്ടെണ്ണല്‍ കേന്ദ്രങ്ങളില്‍ മാധ്യമങ്ങളെ റിപ്പോര്‍ട്ട് ചെയ്യുന്നതില്‍ നിന്ന് തടഞ്ഞത്.

ജില്ലാ മജിസ്‌ട്രേറ്റ് രാജീവ് രൂതേല വോട്ടിംഗ് കേന്ദ്രത്തിലേക്ക് കടന്നുവന്ന് മാധ്യമങ്ങള്‍ക്ക് വിവരങ്ങള്‍ നല്‍കരുതെന്ന് ആവശ്യപ്പെടുകയായിരുന്നു. കൂടാതെ പ്രദേശത്ത് തുടരുന്ന മാധ്യമപ്രവര്‍ത്തകരെ ഒഴിപ്പിക്കാനും ശ്രമം നടന്നു. ഇലക്ട്രോണിക് വോട്ടിംഗ് മെഷീനുകളില്‍ കൃത്രിമം നടക്കുന്നെന്ന ആരോപണം നിലനില്‍ക്കുന്നതിനിടെയാണ് ജില്ലാ മജിസ്‌ട്രേറ്റ് ഇടപെട്ട് മാധ്യമങ്ങളെ തടയാന്‍ ശ്രമം നടത്തുന്നത്.

ബി.ജെ.പിയുടെ ഉപേന്ദ്ര ദത്ത് ശുക്ലയെ പിന്തളളി എസ്.പി സ്ഥാനാര്‍ത്ഥി പ്രവീണ്‍ കുമാര്‍ നിഷാദാണ് മുന്നേറ്റം നടത്തുന്നത്. ഉപേന്ദ്ര ദത്ത് ശുക്ല 7000 വോട്ടുകള്‍ക്കാണ് പിന്നിലുളളത്.

ഉത്തര്‍പ്രദേശില്‍ പരാതി പറയാനെത്തിയ സഹോദരിമാര്‍ക്ക് നേരെ പോലീസിന്റെ ലൈംഗികാതിക്രമം

chandrika — Sun, 04 Jun 2017 10:52:49 +0000

മെയിന്‍പുരി: പരാതി പറയാന്‍ ഉത്തര്‍പ്രദേശിലെ പോലീസ് സ്‌റ്റേഷനിലെത്തിയ സഹോദരിമാര്‍ക്ക് നേരെ പോലീസിന്റെ ലൈംഗികാതിക്രമം. തങ്ങളെ അപമാനിച്ചയാള്‍ക്കെതിരെ പരാതി പറയാനാണ് സഹോദരിമാര്‍ സ്‌റ്റേഷനിലെത്തിയത്. എന്നാല്‍ സ്റ്റേഷനില്‍ ഇവര്‍ക്ക് നേരെ ലൈംഗികാതിക്രമം ഉണ്ടാവുകയായിരുന്നു. സംഭവത്തിന്റെ വീഡിയോ സാമൂഹ്യമാധ്യമങ്ങളിലൂടെ പ്രചരിക്കുകയായിരുന്നു. ഉദ്യോഗസ്ഥനെതിരെ അധികൃതര്‍ നടപടിയെടുത്തിട്ടുണ്ട്.

ഉത്തര്‍പ്രദേശിലെ കര്‍ഹാല്‍ ഗെയ്റ്റ് പോലീസ് സ്‌റ്റേഷനിലാണ് പരാതിയ പറയാനെത്തിയ സഹോദരിമാര്‍ക്കെതിരെ പോലീസിന്റെ അതിക്രമം. എന്നാല്‍ സംഭവം പോലീസുകാര്‍ നിഷേധിക്കുകയായിരുന്നു. പെണ്‍കുട്ടികളാണ് പോലീസുകാര്‍ക്കെതിരെ മോശമായി പെരുമാറിയതെന്നായിരുന്നു വാദം. എന്നാല്‍ സംഭവത്തിന്റെ ദൃശ്യങ്ങള്‍ പരന്നതോടെ കാര്യങ്ങള്‍ വ്യക്തമാകുകയായിരുന്നു. ഈശ്വരി പ്രസാദ് എന്ന പോലീസുകാരന്‍ സഹോദരിമാരില്‍ ഒരാളോട് മോശമായി പെരുമാറുന്നത് വീഡിയോയില്‍ കാണാം.

സംഭവത്തെക്കുറിച്ച് അന്വേഷിക്കാന്‍ സിറ്റി സര്‍ക്കിള്‍ ഇന്‍സ്‌പെക്ടറെ ചുമതലപ്പെടുത്തിയിട്ടുണ്ട്. ആരോപണ വിധേയരായ പോലീസുകാരെ സസ്‌പെന്‍ഡ് ചെയ്തു.