Uttarpradesh election – Chandrika Daily

എസ്.പി-ബി.എസ്.പി സഖ്യം വഴി പിരിയില്ല; നിയമസഭാ തെരഞ്ഞെടുപ്പ് വരെ ഒരുമിച്ച്

chandrika — Tue, 28 May 2019 09:25:10 +0000

ലക്‌നോ: ലോക്‌സഭാ തെരഞ്ഞെടുപ്പില്‍ പ്രതീക്ഷിച്ച നേട്ടം കൊയ്യാനാവാതെ വന്നതോടെ രാഷ്ട്രീയ പണ്ഡിറ്റുകള്‍ എഴുതിത്തള്ളിയെങ്കിലും എസ്.പി-ബി.എസ്.പി മഹാസഖ്യം വഴി പിരിയില്ല. സഖ്യം മുന്നോട്ടു കൊണ്ടു പോകാന്‍ തന്നെയാണ് മായവതിയുടേയും അഖിലേഷ് യാദവിന്റെയും തീരുമാനം. 2022ലെ നിയമസഭാ തെരഞ്ഞെടുപ്പ് വരെ സംസ്ഥാനത്ത് സഖ്യം നിലനിര്‍ത്താനാണ് ഇരു പാര്‍ട്ടി നേതാക്കളും ആലോചിക്കുന്നത്.

സംസ്ഥാനത്തെ യോഗി സര്‍ക്കാറില്‍ എം.എല്‍.എമാരായ 11 പേരാണ് ലോക്‌സഭയിലേക്ക് തെരഞ്ഞെടുക്കപ്പെട്ടത്. ഇതോടെ ഇവര്‍ രാജിവെച്ചൊഴിയുന്ന 11 നിയമസഭാ മണ്ഡലങ്ങളിലേക്ക് ആറു മാസത്തിനകം നടക്കാനിരിക്കുന്ന ഉപതെരഞ്ഞെടുപ്പാണ് സഖ്യത്തിനു മുന്നിലുള്ള ആദ്യ കടമ്പ. ഞായറാഴ്ച ഡല്‍ഹിയിലേക്ക് പുറപ്പെടും മുമ്പ് സഖ്യം തുടരുമെന്ന് പാര്‍ട്ടി പ്രവര്‍ത്തകരോട് മായവതി വ്യക്തമാക്കിയിരുന്നു. വരാനിരിക്കുന്ന നിയമസഭാ ഉപതെരഞ്ഞെടുപ്പ് ഫലമായിരിക്കും സഖ്യത്തിന്റെ മുന്നോട്ടുള്ള പ്രയാണം സംബന്ധിച്ച തീരുമാനിക്കുകയെന്ന് മുതിര്‍ന്ന ബി.എസ്.പി നേതാവ് പറഞ്ഞു. ലോക്‌സഭാ തെരഞ്ഞെടുപ്പില്‍ സഖ്യം പ്രതീക്ഷിച്ച നേട്ടം കൊയ്തില്ലെങ്കിലും സഖ്യം ഏറെ ഗുണം ചെയ്തത് മായാവതിയുടെ ബി.എസ്.പിക്കാണ്. 2014ല്‍ സംപൂജ്യരായ പാര്‍ട്ടി ഇത്തവണ 10 സീറ്റുകളിലാണ് വിജയിച്ചത്. അതേ സമയം എസ്.പിക്ക് സഖ്യം മൂലം ഏറെ പ്രയോജനം ലഭിച്ചതുമില്ല. അഖിലേഷ് യാദവിന്റെ ഭാര്യ ദിംപിള്‍ യാദവ്, അനന്തരവന്‍മാരായ ധര്‍മേന്ദ്ര യാദവ്, അക്ഷയ് ദാദവ് എന്നിവരെല്ലാം പരാജയപ്പെട്ടു. യോഗി സര്‍ക്കാറില്‍ മന്ത്രിമാരായ ചിലരും ലോക്‌സഭയിലേക്ക് തെരഞ്ഞെടുക്കപ്പെട്ടതിനാല്‍ യു.പി മന്ത്രിസഭയിലും ഉടന്‍ അഴിച്ചു പണിയുണ്ടാകും.

കോണ്‍ഗ്രസ് വിട്ട് ബി.ജെ.പിയിലെത്തിയ റീത ബഹുഗുണ ജോഷി അലഹാബാദില്‍ നിന്നും ലോക്‌സഭയിലേക്ക് തെരഞ്ഞെടുക്കപ്പെട്ടതിനാല്‍ ലക്‌നോ കാന്റില്‍ നിന്നുളള നിയമസഭാ അംഗത്വം അവര്‍ രാജിവെക്കും. ഗോവിന്ദ് നഗര്‍ നിയമസഭാ മണ്ഡലത്തെ പ്രതിനിധീകരിക്കുന് സത്യദേവ് പചൗരി കാണ്‍പൂരില്‍ നിന്നും ലോക്‌സഭയിലേക്ക് തെരഞ്ഞെടുക്കപ്പെട്ടതിനാല്‍ നിയമസഭാ അഗത്വം രാജിവെക്കും. ആഗ്രയില്‍ നിന്നും തെരഞ്ഞെടുക്കപ്പെട്ട എസ്.പി സിങ് ബഗേല്‍ തുണ്ട്‌ലയില്‍ നിന്നുള്ള എം.എല്‍.എയാണ്. ഇവര്‍ മൂന്ന് പേരും യോഗി സര്‍ക്കാറില്‍ മന്ത്രിമാരുമാണ്. പ്രതാപ്ഗഡ് എം.എല്‍.എ സംഗം ലാല്‍ ഗുപ്ത, സഹാറന്‍പൂര്‍ എം.എല്‍.എ പ്രതീപ് കുമാര്‍, ചിത്രകൂട് എം.എല്‍,എ ആര്‍.കെ സിങ് പട്ടേല്‍, ബാരാബംഗി എം.എല്‍.എ ഉപേന്ദ്ര റാവത്ത്, ബഹറായിച്ച് എം.എല്‍.എ അക്ഷയ് വാര്‍ ലാല്‍, അലീഗഡ് എം.എല്‍.എ രാജ് വീര്‍ സിങ്. എന്നിവരാണ് ലോക്‌സഭയിലേക്ക് തെരഞ്ഞെടുക്കപ്പെട്ട ബി.ജെ.പി എം.എല്‍.എമാര്‍. ഇവര്‍ക്കു പുറമെ രാംപൂരില്‍ നിന്നുള്ള എം.എല്‍.എ അസം ഖാന്‍, ജബല്‍പൂരില്‍ നിന്നുള്ള ബി.എസ്.പി എം.എല്‍.എ റിതേഷ് പാണ്ഡേ എന്നിവരും നിയമസഭാ അംഗത്വം ഉടന്‍ രാജിവെക്കും.

തെരഞ്ഞെടുപ്പ് പരാജയം: ആറ് പി.സി.സി അധ്യക്ഷന്‍മാര്‍ രാജി സമര്‍പ്പിച്ചു

chandrika — Mon, 27 May 2019 18:48:49 +0000

ന്യൂഡല്‍ഹി: ലോക്‌സഭാ തെരഞ്ഞെടുപ്പില്‍ കോണ്‍ഗ്രസിനേറ്റ പരാജയത്തിന്റെ ധാര്‍മിക ഉത്തരവാദിത്തം ഏറ്റെടുത്ത് മൂന്ന് സംസ്ഥാന പി.സി.സി അധ്യക്ഷന്‍മാര്‍ കൂടി രാജി സമര്‍പ്പിച്ചു. ഇതോടെ പി.സി.സി അധ്യക്ഷ സ്ഥാനത്തു നിന്നും രാജി സമര്‍പ്പിച്ചവരുടെ എണ്ണം ആറായി. യു.പി അധ്യക്ഷന്‍ രാജ് ബബ്ബര്‍, ഒഡീഷ സംസ്ഥാന അധ്യക്ഷന്‍ നിരഞ്ജന്‍ പട്‌നായിക്, മഹാരാഷ്ട്ര പി.സി.സി അധ്യക്ഷന്‍ അശോക് ചവാന്‍ എന്നിവരാണ് നേരത്തെ രാജി സമര്‍പ്പിച്ചിരുന്നത്. ഇവര്‍ക്ക് പുറമെ പഞ്ചാബ്, ജാര്‍ഖണ്ഡ്, അസം പി.സി.സി അധ്യക്ഷന്‍മാരായ സുനില്‍ ഝാകര്‍, അജോയ് റോയ്, റിപുന്‍ ബോറ എന്നിവരും പാര്‍ട്ടി അധ്യക്ഷന് രാജികത്ത് നല്‍കിയിട്ടുണ്ട്. പഞ്ചാബില്‍ 2014ല്‍ മൂന്ന് സീറ്റു മാത്രം ഉണ്ടായിരുന്ന സ്ഥാനത്ത് 13ല്‍ എട്ടിടത്ത് കോണ്‍ഗ്രസ് വിജയിച്ച് സാമാന്യം ഭേദപ്പെട്ട പ്രകടനം കാഴ്ച വെച്ചെങ്കിലും ഗുരുദാസ്പൂരില്‍ സണ്ണി ഡിയോളിനോടേറ്റ തോല്‍വിയുടെ ഉത്തരവാദിത്തം സ്വയം ഏറ്റെടുത്ത് സംസ്ഥാന അധ്യക്ഷ സ്ഥാനത്തു നിന്നും മാറുകയാണെന്നാണ് സുനില്‍ ഝാകര്‍ രാഹുല്‍ ഗാന്ധിക്കയച്ച ഇമെയില്‍ സന്ദേശത്തില്‍ പറയുന്നത്. സംസ്ഥാനത്തെ 14ല്‍ ഒരു സീറ്റില്‍ മാത്രമാണ് കോണ്‍ഗ്രസിന് ജയിക്കാനായതെന്നും ജാര്‍ഖണ്ഡിലെ പാര്‍ട്ടിയുടെ മോശം പ്രകടനത്തിന്റെ ഉത്തരവാദിത്തം ഏറ്റെടുത്ത് ഒഴിയുകയാണെന്നുമാണ് അജോയ് റോയ് കത്തില്‍ വ്യക്തമാക്കിയിട്ടുള്ളത്. സംസ്ഥാന അധ്യക്ഷന്‍ സ്ഥാനമൊഴിയാന്‍ സന്നദ്ധനായെങ്കിലും സംസ്ഥാനത്ത് പാര്‍ട്ടിയുടെ പ്രകടനം അത്ര മോശമല്ലെന്ന് പാര്‍ട്ടി വക്താവ് അലോക് ദുബെ പറഞ്ഞു. സിങ്ബൂമില്‍ വന്‍ മാര്‍ജിനില്‍ വിജയിച്ച പാര്‍ട്ടി കുന്തിയില്‍ 1400 വോട്ടുകള്‍ക്കും ലോഹര്‍ഗഡയില്‍ 10,000 വോട്ടുകള്‍ക്കുമാണ് തോറ്റതെന്നും അദ്ദേഹം പറഞ്ഞു. അസമില്‍ 2014ല്‍ മൂന്ന് സീറ്റുകളില്‍ വിജയിച്ച കോണ്‍ഗ്രസിന് ഇത്തവണയും മൂന്ന് സീറ്റുകള്‍ മാത്രമാണ് ലഭിച്ചത്. പാര്‍ട്ടി പ്രകടനം കരുതിയതിലും മോശമായതിനാല്‍ അധ്യക്ഷ സ്ഥാനത്തു നിന്നും ഒഴിയാന്‍ സന്നദ്ധത പ്രകടിപ്പിച്ചാണ് റിപൂര്‍ ബോറ അഖിലേന്ത്യാ അധ്യക്ഷന് കത്ത് നല്‍കിയത്. കാലിബോര്‍, നഗാവോന്‍, ബാര്‍പേട്ട എന്നീ മൂന്നിടത്താണ് കോണ്‍ഗ്രസ് ഇത്തവണ വിജയിച്ചത്. 2014ല്‍ 29.9 ശതമാനം വോട്ടു മാത്രം നേടിയ കോണ്‍ഗ്രസ് 2016ലെ നിയനസഭാ തെരഞ്ഞെടുപ്പില്‍ ഇത് 30.96 ശതമനമായി ഉയര്‍ത്തിയിരുന്നു. 2019ലെ ലോക്‌സഭാ തെരഞ്ഞെടുപ്പില്‍ കോണ്‍ഗ്രസിന്റെ വോട്ടു വിഹിതം 35.44 ശതമാനമായി വര്‍ധിച്ചെങ്കിലും സീറ്റുകള്‍ കൂടുതല്‍ നേടാനായിരുന്നില്ല.

“കണക്കു കൂട്ടലുകള്‍ പിഴച്ചു”; ഉത്തര്‍പ്രദേശില്‍ പരാജയം മുന്നില്‍കണ്ട് മഹാസഖ്യത്തിന് നേരെത്തിരിഞ്ഞ് മോദി

chandrika — Sun, 05 May 2019 18:00:30 +0000

ഉത്തര്‍പ്രദേശില്‍ ബി.എസ്.പി അധ്യക്ഷ മായാവതിക്ക് ഉപദേശവുമായി പ്രധാനമന്ത്രി നരേന്ദ്ര മോദിയെത്തിയത് പരാജയം മുന്നില്‍കണ്ടെന്ന് വിലയിരുത്തല്‍. തെരഞ്ഞെടുപ്പ് അഞ്ചാം ഘട്ടത്തിലേക്ക് എത്തിയതോടെ മോദി തിരിച്ചടി മനസിലാക്കിയതായാണ് രാഷ്ട്രീയ വിലയിരുത്തല്‍. രാജീവ് ഗാന്ധിക്കെതിരെയുള്ള മോദിയുടെ പരാമര്‍ശവും പ്രധാനമന്ത്രിയുടെ കണക്കുകൂട്ടലുകള്‍ തെറ്റിയതില്‍ നിന്നും പുറത്തുവരുന്നവയാണെന്നും വിമര്‍ശനമുണ്ട്. പരാജയം ഉറപ്പായതോടെ യുപിയില്‍ മോദി പുതിയ തന്ത്രം തേടുകയാണെന്നാണ് വിലയിരുത്തല്‍.

എസ്.പിയും കോണ്‍ഗ്രസും മായാവതിയെ വഞ്ചിച്ചുവെന്ന ആരോപണവുമായാണ് പ്രധാനമന്ത്രി നരേന്ദ്രമോദി കഴിഞ്ഞ ദിവസം രംഗത്തെത്തിയത്. മായാവതി കോണ്‍ഗ്രസിനെതിരെ രൂക്ഷ വിമര്‍ശം ഉന്നയിക്കുന്നതിനിടെ കോണ്‍ഗ്രസ്, എസ്.പി നേതാക്കള്‍ വേദി പങ്കിടുകയാണെന്ന് മോദി ആരോപിച്ചിരുന്നു. റായ്ബറേലിയില്‍ നടന്ന എസ്.പി യോഗത്തില്‍ എ.ഐ.സി.സി ജനറല്‍ സെക്രട്ടറി പ്രിയങ്കാഗാന്ധി പങ്കെടുത്തത് ചൂണ്ടിക്കാട്ടിയായിരുന്നു മോദിയുടെ വിമര്‍ശം. എന്നാല്‍ ഇതിനു പിന്നാലെ മോദിയെ തള്ളി മായാവതി രംഗത്തെത്തിയത് ബിജെപിക്ക് വീണ്ടും തിരിച്ചടിയായിരിക്കുകയാണ്.

ബിജെപിക്കെതിരെ പൊതു സ്ഥാനാര്‍ഥിയായ സോണിയയും രാഹുലും മത്സരിക്കുന്ന റായ്ബറേലിയിലും അമേഠിയിലും കോണ്‍ഗ്രസിന് വോട്ടുചെയ്യണമെന്ന അഭ്യര്‍ഥനയുമായാണ് ബി.എസ്.പി അധ്യക്ഷ മായാവതി രംഗത്തെത്തിയത്. അമേഠിയില്‍ എസ്പി പ്രവര്‍ത്തകര്‍ രാഹുലിന്റെ പ്രചാരത്തിന് എത്തിയതും ബിജെപി ക്യാമ്പിന് തിരിച്ചടിയായി.

ഇതിനിടെ പ്രധാനമന്ത്രി നരേന്ദ്ര മോദിക്കെതിരെ രൂക്ഷ വിമര്‍ശവുമായി എസ്.പി ദേശീയ അധ്യക്ഷന്‍ അഖിലേഷ് യാദവും രംഗത്തെത്തി. കോണ്‍ഗ്രസും എസ്.പിയും തമ്മിലുണ്ടാക്കിയ രഹസ്യ ധാരണ പ്രകാരം ഇരു പാര്‍ട്ടികളും ചേര്‍ന്ന് മായാവതിയെ വഞ്ചിച്ചുവെന്ന മോദിയുടെ പ്രസ്താവന പരാജയം ഉറപ്പായതില്‍ നിന്നുമുണ്ടായതാണെന്ന് അഖിലേഷ് പറഞ്ഞു. തെരഞ്ഞെടുപ്പിന്റെ നാലു ഘട്ടം കഴിഞ്ഞതോടെ മോദിയുടെ കണക്കു കൂട്ടുലുകള്‍ പിഴച്ചു. പരാജയം ഉറപ്പായതോടെ പുതിയ തന്ത്രം തേടുകയാണ്. ബ്രിട്ടീഷുകാരുടെ ഭിന്നിപ്പിച്ച് ഭരിക്കല്‍ തന്ത്രമാണ് മോദി യു.പിയില്‍ പയറ്റാന്‍ ശ്രമിക്കുന്നതെന്നും എന്നാല്‍ ഇത് ഇത്തവണ വിലപ്പോവില്ലെന്നും അദ്ദേഹം പറഞ്ഞു. വികസനം, കാര്‍ഷിക വരുമാനം തുടങ്ങി ഒന്നും തന്നെ ബി.ജെ.പിക്കോ മോദിക്കോ പറയാനില്ല. ഇനി ആകെയുള്ള രക്ഷ ജനങ്ങളെ തെറ്റിദ്ധരിപ്പിക്കുകയാണ്. എസ്.പി-ബി.എസ്.പി-ആര്‍.എല്‍.ഡി സഖ്യം അടുത്ത പ്രധാനമന്ത്രിയെ തീരുമാനിക്കുമെന്നും അഖിലേഷ് കൂട്ടിച്ചേര്‍ത്തു. മോദി 180 ഡ്രിഗ്രി പ്രധാനമന്ത്രിയാണ്. ജനസംഖ്യയുടെ ഒരു ശതമാനത്തെ മാത്രമാണ് അദ്ദേഹം പ്രതിനിധാനം ചെയ്യുന്നത്. പറയുന്നതിന്റെ നേര്‍ വിപരീതം മാത്രം പ്രവര്‍ത്തികുന്ന ആദ്യ പ്രധാനമന്ത്രിയാണ് മോദിയെന്നും എസ്.പി അധ്യക്ഷന്‍ ആരോപിച്ചു.

അഞ്ചാം ഘട്ടം; അമേഠിയും റായ്ബറേലിയുമടക്കം 51 മണ്ഡലങ്ങള്‍ നാളെ ബൂത്തിലേക്ക്

chandrika — Sun, 05 May 2019 10:55:21 +0000

ലോക്‌സഭാ തെരഞ്ഞെടുപ്പിന്റെ അഞ്ചാം ഘട്ടത്തില്‍ വോട്ടെടുപ്പ് നടക്കുന്ന 51 മണ്ഡലങ്ങളില്‍ പരസ്യ പ്രചാരണം അവസാനിച്ചു. ഉത്തര്‍പ്രദേശ് ഉള്‍പ്പെടെ ഏഴ് സംസ്ഥാനങ്ങളിലാണ് നാളെ വോട്ടെടുപ്പ് നടക്കുന്നത്.
ജമ്മുകശ്മീരിലും രാജസ്ഥാനിലും അഞ്ചാം ഘട്ടത്തോടെ വോട്ടെടുപ്പ് പൂര്‍ത്തിയാകും. ബിഹാര്‍, ജാര്‍ഖണ്ഡ്, മധ്യപ്രദേശ്, പശ്ചിമബംഗാള്‍ എന്നിവയാണ് വോട്ടെടുപ്പ് നടക്കുന്ന മറ്റ് സംസ്ഥാനങ്ങള്‍.

ഉത്തര്‍പ്രദേശില്‍ പതിനാലും രാജസ്ഥാനില്‍ പന്ത്രണ്ടും ബംഗാള്‍, മധ്യപ്രദേശ് എന്നിവിടങ്ങളിലും ഏഴ് വീതവും ബിഹാറില്‍ അഞ്ചും ജാര്‍ഖണ്ഡില്‍ നാലും ജമ്മുകശ്മീരില്‍ രണ്ടും മണ്ഡലങ്ങളിലാണ് വോട്ടെടുപ്പ് നടക്കുന്നത്. കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയും കേന്ദ്രമന്ത്രിയും ബി.ജെ.പി നേതാവുമായ സ്മൃതി ഇറാനിയും ഏറ്റുമുട്ടുന്ന അമേഠിയാണ് അഞ്ചാംഘട്ടത്തില്‍ ശ്രദ്ധേയമായ മണ്ഡലം. സോണിയാ ഗാന്ധി(റായ്ബറേലി), രാജീവ് പ്രതാപ് റൂഡി(മുസഫര്‍പുര്‍), അര്‍ജുന്‍ മുണ്ട(റാഞ്ചി), ജയന്ത് സിന്‍ഹ(ഹസാരിബാഗ്), രാജ്യവര്‍ധന്‍ സിങ് റാത്തോഡ്, കൃഷ്ണ പുനിയ(ജയ്പൂര്‍ റൂറല്‍), രാജ്‌നാഥ് സിങ്, പൂനം സിന്‍ഹ(ലഖ്‌നൊ) ദിനേഷ് ത്രിവേദി(ബാരക്പുര്‍) എന്നിവരാണ് ജനവിധി തേടുന്ന പ്രമുഖര്‍.

റായ്ബറേലിയിലും അമേഠിയിലും ബിജെപിക്കെതിരെ പൊതു സ്ഥാനാര്‍ഥിയായാണ് സോണിയയും രാഹുലും മത്സരിക്കുന്നത്. പ്രചാരണത്തിന്റെ അവസാന മണിക്കൂറുകളില്‍ നേതാക്കളെല്ലാം സജീവമായി രംഗത്തുണ്ടായിരുന്നു. അമേഠിയില്‍ എസ്പി പ്രവര്‍ത്തകര്‍ രാഹുലിന്റ പ്രചാരത്തിന് എത്തിയതും ബിജെപി ക്യാമ്പിന് തിരിച്ചടിയായി.

റായ്ബറേലിയിലും, അമേഠിയിലും കോണ്‍ഗ്രസിന് വോട്ടുചെയ്യണമെന്ന് പ്രവര്‍ത്തകരോട് ബി.എസ്.പി അധ്യക്ഷ മായാവതി പറഞ്ഞു. കോണ്‍ഗ്രസുമായി ബി.എസ്.പിക്ക് യാതൊരുവിധ സഖ്യവുമില്ല. എന്നാല്‍, ബിജെപിയെ പരാജയപ്പെടുത്താന്‍ അമേത്തിയിലും, റായ്ബറേലിയിലും തങ്ങള്‍ കോണ്‍ഗ്രസിന് വോട്ടുചെയ്യും.

എസ്.പിയും കോണ്‍ഗ്രസും മായാവതിയെ വഞ്ചിച്ചുവെന്ന ആരോപണവുമായി പ്രധാനമന്ത്രി നരേന്ദ്രമോദി കഴിഞ്ഞ ദിവസം രംഗത്തെത്തിയിരുന്നു. മായാവതി കോണ്‍ഗ്രസിനെതിരെ രൂക്ഷ വിമര്‍ശം ഉന്നയിക്കുന്നതിനിടെ കോണ്‍ഗ്രസ്, എസ്.പി നേതാക്കള്‍ വേദി പങ്കിടുകയാണെന്ന് അദ്ദേഹം ആരോപിച്ചിരുന്നു. റായ്ബറേലിയില്‍ നടന്ന എസ്.പി യോഗത്തില്‍ എ.ഐ.സി.സി ജനറല്‍ സെക്രട്ടറി പ്രിയങ്കാഗാന്ധി പങ്കെടുത്തത് ചൂണ്ടിക്കാട്ടിയായിരുന്നു മോദിയുടെ വിമര്‍ശം. എന്നാല്‍ ഇതിനു പിന്നാലെ മോദിയെ തള്ളിയാണ് മോറായ്ബറേലിയിലും അമേഠിയിലും കോണ്‍ഗ്രസിന് വോട്ടുചെയ്യണമെന്ന അഭ്യര്‍ഥനയുമായി മായാവതി രംഗത്തെത്തിയിട്ടുളളത്

രാഹുല്‍ ഗാന്ധി സ്വന്തം തട്ടകമായ അമേഠിയിലും ഹരിയാനയിലെ ഗുഡ്ഗാവിലും പ്രചാരണത്തിനെത്തി. കോണ്‍ഗ്രസ് അധികാരത്തിലേറിയാല്‍ ബി.ജെ.പി തടഞ്ഞുവെച്ച പദ്ധതികള്‍ നടപ്പാക്കുമെന്ന് അദ്ദേഹം ജനങ്ങള്‍ക്ക് ഉറപ്പുനല്‍കി.

ഉത്തര്‍ പ്രദേശില്‍ ബിജെപി തകര്‍ന്നടിയുമെന്നും മതേതരമുന്നണി വന്‍ വിജയം നേടുമെന്നും രാഹുല്‍ ഗാന്ധി കഴിഞ്ഞ ദിവസം വ്യക്തമാക്കിയിരുന്നു. കോണ്‍ഗ്രസിന് ശക്തമായ സ്ഥാനാര്‍ഥിയില്ലാത്ത യുപിയിലെ മണ്ഡലങ്ങളില്‍ പാര്‍ട്ടി മതേതരമുന്നണിയെ സഹായിക്കുമെന്നും രാഹുല്‍ ഗാന്ധി വ്യക്തമാക്കി.

അമേഠിയില്‍ ബി.ജെ.പി അധ്യക്ഷന്‍ അമിത് ഷായുടെ റോഡ് ഷോ നടത്തി. പ്രധാനമന്ത്രി നരേന്ദ്രമോദി യു.പിയിലും ബിഹാറിലും പ്രചാരണ യോഗങ്ങളില്‍ പങ്കെടുത്തു. എന്നാല്‍ ബംഗാളിലും ജാര്‍ഖണ്ഡിലും ഫോനി ചുഴലിക്കാറ്റ് അവസാനവട്ട പ്രചാരണങ്ങളുടെ നിറംകെടുത്തി.

അതേസമയം അഞ്ചാം ഘട്ട വോട്ടെടുപ്പിലേക്ക് കടക്കുമ്പേള്‍ ഇതുവരെ വോട്ടെടുപ്പ് നടന്ന 374 ലോക്സഭാ മണ്ഡലങ്ങളില്‍ നൂറില്‍ താഴെ സീറ്റുകള്‍ മാത്രമേ ബി.ജെ.പിക്ക് നേടാന്‍ കഴിയുകയുള്ളൂ എന്നാണ് ആഭ്യന്തര വിലയിരുത്തല്‍. 2019 ലോക്സഭാ തെരഞ്ഞെടുപ്പില്‍ കോണ്‍ഗ്രസ് ശക്തമായ മുന്നേറ്റം നടത്തുമെന്നും ഹിന്ദി ഹൃദയ ഭൂമിയില്‍ ബിജെപി തകര്‍ന്നടിയുമെന്നും ആഭ്യന്തര റിപ്പോര്‍ട്ട്.

ഏഴു ഘട്ടങ്ങളിലായാണ് പൊതുതെരഞ്ഞെടുപ്പ് നടക്കുന്നത്. ഏപ്രില്‍ 11, ഏപ്രില്‍ 18, ഏപ്രില്‍ 23, ഏപ്രില്‍ 29, മെയ് 6, മേയ് 12, മേയ് 19 എന്നീ തീയതികളിലാണ് വോട്ടെടുപ്പ്. മെയ് 23ന് തെരഞ്ഞെടുപ്പ് ഫലംപ്രഖ്യാപനവും നടക്കും.

പഴയ സീലിന്റെ സ്ഥാനത്ത് മറ്റൊരു സീല്‍; വോട്ടിങ് മെഷീനുകള്‍ സൂക്ഷിച്ച മുറിയില്‍ അതിക്രമിച്ചു കടന്നതായി പരാതി

chandrika — Fri, 26 Apr 2019 07:36:10 +0000

ഉത്തര്‍പ്രദേശിലെ സാംബാലില്‍ ഇവിഎം മെഷീനുകള്‍ സൂക്ഷിച്ചിരുന്ന മുറിയുടെ സീല്‍ തകര്‍ത്തതായി പരാതി. യുപിയിലെ ബദൗന്‍ ലോകസഭാ മണ്ഡലത്തിലെ എസ്പി സ്ഥാനാര്‍ത്ഥി ധര്‍മേന്ദ്ര യാദവാണ് സീല്‍ തകര്‍ന്നെന്ന പരാതിയുമായി തെരഞ്ഞെടുപ്പ് കമ്മീഷനെ സമീപിച്ചത്. വോട്ടിങ് മെഷീന്‍ സൂക്ഷിച്ച ഉത്തര്‍പ്രദേശിലെ സാംബാനിലെ സ്‌ടോംങ് റൂമിന്റെ സീല്‍ തകര്‍ത്തെന്നാണ് പരാതി.

സ്‌ട്രോങ് റൂമിന് പുറത്തുള്ള ഡോറിന്റെ നെറ്റ് വലിച്ചുപൊട്ടിച്ചതായി വ്യക്തമാണെന്ന് ധര്‍മേന്ദ്ര യാദവ് പരാതിയില്‍ പറയുന്നു. അതിന്റെ വീഡിയോ ഫൂട്ടേജുകള്‍ കൈവശമുണ്ട്. ഗേറ്റില്‍ സ്ഥാപിച്ചിരുന്ന സീലും തകര്‍ത്ത നിലയിലാണ്. എന്നാല്‍ പഴയ സീലിന്റെ സ്ഥാനത്ത് ഇപ്പോള്‍ മറ്റൊരു സീലാണ് ഉള്ളതെന്നും അദ്ദേഹം പരാതിയില്‍ വ്യക്തമാക്കി. സൂക്ഷിപ്പ് റൂമിന്റെ സീല്‍ തകര്‍ത്ത ശേഷം ചിലര്‍ അകത്തുകടന്നിട്ടുണ്ടെന്നും സംഭവത്തില്‍ അന്വേഷണം വേണമെന്നും പരാതിയില്‍ ആവശ്യപ്പെടുന്നു.

മൂന്നാംഘട്ട പോളിങിന് ശേഷം എല്ലാ പാര്‍ട്ടി പ്രതിനിധികളുടെയും സാന്നിദ്ധ്യത്തില്‍ ഏപ്രില് 24ന് മൂന്നുമണിക്കാണ് മുറി സീല്‍ വച്ച് പൂട്ടിയത്. എന്നാല്‍ ആ സീല്‍ ഇപ്പോള്‍ അവിടെയില്ലെന്നും ഇലക്ട്രോണിക്ക് മെഷീനില്‍ കൃത്രിമം നടത്തിയതായി സംശയിക്കുന്നെന്നും എസ്പി സ്ഥാനാര്‍ത്ഥിയുടെ തെരഞ്ഞെടുപ്പ് ഏജന്റ് അജയ് കുമാര്‍ പറഞ്ഞു.

അതസമയം പരാതി വളരെ ലാഘവത്തോടെയാണ് അധികൃതര്‍ കാണുന്നത്. സീല്‍ തകര്‍ന്നതിന് പിന്നില്‍ ഏതെങ്കിലും പക്ഷികളാകാമെന്നാണ് അവരുടെ വാദം. വാതിലിന് പുറത്തുണ്ടായിരുന്ന കമ്പി വല പക്ഷികള്‍ കടിച്ചുപൊട്ടിച്ചതാകാമെന്നാണ് ഇവര്‍ പറയുന്നു്.

യു.പിയിലെ ബി.ജെ.പി എം.പിയും മുന്‍ മന്ത്രിയുമായ ദോഹ്റ കോണ്‍ഗ്രസില്‍ ചേര്‍ന്നു

chandrika — Fri, 29 Mar 2019 09:02:16 +0000

ഉത്തര്‍പ്രദേശിലെ ബിജെപി എം പി അശോക് കുമാര്‍ ദോഹ്റ കോണ്‍ഗ്രസില്‍ ചേര്‍ന്നു. ഇറ്റാവ മണ്ഡലത്തിലെ സിറ്റിങ്ങ് എംപിയും മുന്‍ ഉത്തര്‍പ്രദേശ് മന്ത്രിയുമാണ് ദോഹ്റ. കോണ്‍ഗ്രസ് അംഗത്വം സ്വീകരിച്ച ബിജെപി എംപിയെ കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി ഷാള്‍ അണിയിച്ച് സ്വീകരിച്ചു. യുപിയിലെ യോഗി സര്‍ക്കാറിനും പൊതുതെരഞ്ഞെടുപ്പില്‍ ബിജെപിക്കും വന്‍ തിരിച്ചടിയാണ് ദോഹ്‌റയുടെ കൂടുമാറ്റം.

ബിജെപിയുടെ മുന്‍ കേന്ദ്ര മന്ത്രി ശത്രുഘ്‌നന്‍ സിന്ഹ കഴിഞ്ഞ ദിവസം രാഹുല്‍ ഗാന്ധിയെ സന്ദര്‍ശിച്ചു കോണ്‍ഗ്രസിനോടുള്ള അടുപ്പം വ്യക്തമാക്കിയിരുന്നു. സിന്ഹ ദിവസങ്ങള്‍ക്കകം കോണ്‍ഗ്രസില്‍ ചേരുമെന്നാണ് വിവരം. ബോളിവുഡ് നടി ഊര്‍മിള മതോന്ദ്കറും കഴിഞ്ഞ ദിവസം കോണ്‍ഗ്രസില്‍ ചേര്‍ന്നിരുന്നു. ഊര്‍മിള മതോന്ദ്കറെ മുംബൈ നോര്‍ത്തില്‍ കോണ്‍ഗ്രസ് സ്ഥാനാര്‍ത്ഥിയായി പ്രഖ്യാപിച്ചിട്ടുണ്ട്. ബി ജെ പി സ്ഥാനാര്‍ത്ഥി ഗോപാല്‍ ഷെട്ടിക്കെതിരെയാണ് ഊര്‍മിള മത്സരിക്കുന്നത്.

യോഗി സര്‍ക്കാറിന്റെ കീഴില്‍ യുപിയില്‍ നടക്കുന്ന ദളിത് പീഢനത്തിനെതിരെ പ്രത്യക്ഷമായി പ്രതികരിച്ചിരുന്നു എംപിയാണ് അശോക് കുമാര്‍. പൊലീസിന്റെ ദളിത് വിരുദ്ധ നിലപാടുകള്‍ക്കെതിരെ ദോഹ്‌റ മോദിക്ക് കത്തയക്കുക വരെ ഉണ്ടായിരുന്നു.

ഉത്തര്‍പ്രദേശ് രാഷ്ട്രീയത്തില്‍ കോണ്‍ഗ്രസ് പുതുതായി നിയമിച്ച ജോതിരാഥിത്യ സിന്ധ്യയുടെ പ്രവര്‍ത്തന ഫലമാണ് ബിജെപി എംപിയുടെ മനംമാറ്റമെന്നാണ് വിലയിരുത്തല്‍

“മദ്യം”; പ്രതിപക്ഷ മഹാസഖ്യത്തെ അധിക്ഷേപിച്ച് മോദി

chandrika — Thu, 28 Mar 2019 16:04:56 +0000

യുപിയിലെ യോഗി ഭരണത്തിനെതിരെയും വര്‍ഗീയ ഫാസിസത്തിനെതിരെയും ഒത്തുചേര്‍ന്ന പ്രതിപക്ഷ മഹാസഖ്യത്തെ പൊതുവേദിയില്‍ അധിക്ഷേപിച്ച് പ്രധാനമന്ത്രി നരേന്ദ്രമോദി.
പൊതുതെരഞ്ഞെടുപ്പില്‍ കേന്ദ്രസര്‍ക്കാറിനെതിരെ രൂപം കൊണ്ട മഹാസഖ്യത്തെ മദ്യമെന്ന് വിശേഷിപ്പിച്ചാണ് പ്രധാനമന്ത്രി രംഗത്തെത്തിയത്. മീററ്റില്‍ ബി.ജെ.പിയുടെ തെരഞ്ഞെടുപ്പ് പ്രചാരണ പരിപാടിയില്‍ സംസാരിക്കുകയായിരുന്നു മോദി.

പ്രതിപക്ഷ പാര്‍ട്ടികളുടെ ചുരുക്കെഴുത്താണ് ശരാബ്(മദ്യം) എന്ന് അദ്ദേഹം അധിക്ഷേപിച്ചു. സമാജ് വാദി പാര്‍ട്ടിയില്‍നിന്ന് എസ്.എയും രാഷ്ട്രീയ ലോക്ദളില്‍നിന്ന് ആര്‍.എയും ബി.എസ്.പിയില്‍നിന്ന് ബിയും എയും എടുക്കു. ശരാബ് ആയി. ഈ രാഷ്ട്ര മദ്യം കുടിക്കുന്നത് ഉത്തര്‍പ്രദേശിന്റെ ആരോഗ്യം തകര്‍ക്കും. ഈ വിപത്തിനെതിരെ രാജ്യത്തെ രക്ഷിക്കണമെന്നും മോദി പറഞ്ഞു. രാജ്യസുരക്ഷ പ്രചാരണ ആയുധമാക്കിയായിരുന്നു മോദിയുടെ പ്രസംഗം. ഭൂമിയിലും ആകാശത്തും ബഹിരാകാശത്തും മിന്നലാക്രമണം നടത്താന്‍ തന്റെ സര്‍ക്കാര്‍ ധൈര്യം കാട്ടിയെന്ന്് സദസ്സില്‍ മോദി അവകാശപ്പെട്ടു.

#WATCH: PM Narendra Modi says in Meerut, "Sapa (SP) ka 'sha', RLD ka 'Raa' aur Baspa (BSP) ka 'ba', matlab 'sharab'…Sapa, RLD, Baspa, ye 'sharab' aapko barbaad kar degi." pic.twitter.com/Sc7owbEO8p
— ANI UP (@ANINewsUP) March 28, 2019

അതേസമയം മോദിയുടെ അധിക്ഷേപിത്തിനെതിരെ പ്രതിപക്ഷ പാര്‍ട്ടികള്‍ ശക്തമായി രംഗത്തുവന്നു. കഴിഞ്ഞ അഞ്ച് വര്‍ഷത്തിനിടെ മരീചിക കാട്ടി രാജ്യത്തെ പറ്റിക്കുകയായിരുന്നു ബി.ജെ.പിയെന്ന് സമാജ്‌വാദി പാര്‍ട്ടി അധ്യക്ഷന്‍ അഖിലേഷ് യാദവ് കുറ്റപ്പെടുത്തി. തെരഞ്ഞെടുപ്പ് അടുത്തപ്പോഴും അവര്‍ അത് തന്നെയാണ് ചെയ്യുന്നതെന്ന് അദ്ദേഹം പറഞ്ഞു. മോദിക്ക് അഹങ്കാരം തലക്ക് പിടിച്ചിരിക്കുകയാണെന്നും അതുകൊണ്ട് വേറെ മദ്യത്തിന്റെ ആവശ്യമില്ലെന്നും കോണ്‍ഗ്രസ് പരിഹസിച്ചു. പ്രധാനമന്ത്രി പദത്തില്‍ ഇരിക്കുന്ന മോദി ഇത്ര തരംതാഴരുതെന്ന് കോണ്‍ഗ്രസ് വിമര്‍ശിച്ചു.

അതേസമയം മോദിയുടെ ചുരുക്കെഴുത്ത് സാമാന്യ ബോധമില്ലാത്തതായി എന്നാണ് സോഷ്യല്‍ മീഡിയയില്‍ വിമര്‍ശനം ഉയരുന്നത്.

I need a drink now… https://t.co/S00c6lS0ix
— Seema Goswami (@seemagoswami) March 28, 2019

The one who wrote
M= Masood
O= Osama
D= Dawood
I= ISI
Competition is at peak
— Ashu singh (@ashusingh21) March 28, 2019

എസ്‍.പി-ബി.എസ്‍.പി സഖ്യം; അതൃപ്തി പരസ്യമാക്കി മുലായം സിംഗ് യാദവ്

chandrika — Thu, 21 Feb 2019 12:11:14 +0000

ഉത്തര്‍പ്രദേശിലെ എസ്പി- ബിഎസ്പി സഖ്യത്തില്‍ അതൃപ്തി പരസ്യമാക്കി സമാജ്‌വാദി പാര്‍ട്ടി മുന്‍ അധ്യക്ഷന്‍ നേതാവ് മുലായം സിംഗ് യാദവ്.
വരുന്ന ലോക്‌സഭാ തെരഞ്ഞെടുപ്പിലെ സീറ്റ് വിഭജനത്തില്‍ എസ്പി-ബിഎസ്പി-ആര്‍എല്‍ഡി സഖ്യം ധാരണയിലെത്തിയതിന് തൊട്ടുപിന്നാലെയാണ് സഖ്യത്തില്‍ അതൃപ്തി പരസ്യമാക്കി മുലായം സിംഗ് യാദവ് രംഗത്തെത്തിയത്.

സ്വന്തം പാര്‍ട്ടിയിലുള്ളവര്‍ തന്നെ പാര്‍ട്ടിയെ ഇല്ലാതാക്കാന്‍ ശ്രമിക്കുകയാണെന്ന് മുലായം കുറ്റുപ്പെടുത്തി. ഉത്തര്‍പ്രദേശില്‍ മൂന്ന് തവണ സര്‍ക്കാരുണ്ടാക്കിയതും കേന്ദ്രത്തില്‍ പ്രതിരോധ മന്ത്രിയായതെന്നും താന്‍ ഒറ്റക്കാണെന്ന് മുലായം സിംഗ് യാദവ് പറഞ്ഞു.

ഉത്തര്‍ പ്രദേശിലെ 80 ലോക്‌സഭാ മണ്ഡലങ്ങളിലെ 78 സീറ്റുകളില്‍ എസ്പി- ബിഎസ്പി-ആര്‍എല്‍ഡി സഖ്യം മത്സരിക്കാനാണ് ധാരണയായത്. അഖിലേഷ് യാദവിന്റെ സമാജ്‌വാദി പാര്‍ട്ടി 37 സീറ്റിലും മായാവതിയുടെ ബഹുജന്‍ സമാജ്‌വാദി പാര്‍ട്ടി 38 സീറ്റിലുമാണ് ജനവിധി തേടുക. മൂന്ന് സീറ്റുകള്‍ ആര്‍എല്‍ഡിക്ക് നല്‍കിയേക്കും.

കോണ്‍ഗ്രസിന്റെ സിറ്റിംഗ് സീറ്റുകളായ അമേഠിയിലും റായ്ബറേലിയിലും മഹാസഖ്യം സ്ഥാനാര്‍ത്ഥികളെ നിര്‍ത്തില്ല. പ്രധാനമന്ത്രി നരേന്ദ്ര മോദിയുടെ മണ്ഡലമായ വാരാണസിയില്‍ എസ്പി സ്ഥാനാര്‍ത്ഥിയെ മത്സരിപ്പിക്കാനും ധാരണയായി.

‘ഞങ്ങളുടെ നേതാവായി പ്രിയങ്ക വരണം’; മോദിയുടെ മണ്ഡലത്തില്‍ പോസ്റ്ററുകള്‍

chandrika — Thu, 24 Jan 2019 15:13:28 +0000

ലക്‌നൗ: പ്രിയങ്ക ഗാന്ധിയുടെ രാഷ്ട്രീയ പ്രവേശനത്തിന്റെ വമ്പന്‍ വാര്‍ത്തകള്‍ക്ക് പിന്നാലെ പ്രധാനമന്ത്രി നരേന്ദ്ര മോദിയുടെ മണ്ഡലമായ വാരണാസിയില്‍ പ്രിയങ്കയ്ക്ക് അഭിവാദ്യമര്‍പ്പിച്ചുകൊണ്ട് പോസ്റ്ററുകള്‍. ഞങ്ങളുടെ നേതാവായി പ്രിയങ്ക വരണം എന്ന വാചകത്തോടെയുള്ള പോസ്റ്ററുകളാണ് വാരണാസി മണ്ഡലത്തില്‍ പ്രത്യക്ഷപ്പെട്ടത്. പോസ്റ്ററില്‍ പ്രിയങ്കയ്‌ക്കൊപ്പം കോണ്‍ഗ്രസ് ദേശീയ അധ്യക്ഷന്‍ രാഹുല്‍ ഗാന്ധിയുടെയും മുതിര്‍ന്ന നേതാവ് അജയ് റായിയുടെയും ചിത്രവും ഉള്‍പ്പെടുത്തിയിട്ടുണ്ട്.

വാരണാസിയില്‍ മോദി വീണ്ടും മത്സരിക്കും എന്ന റിപ്പോര്‍ട്ടുകള്‍ പുറത്തു വരുന്നതിനിടയിലാണ് പ്രിയങ്കയെ വരവേറ്റുള്ള പോസ്റ്ററുകള്‍ മണ്ഡലത്തില്‍ നിറയുന്നത്.

പ്രിയങ്ക ഗാന്ധി രാഷ്ട്രീയത്തിലേക്ക് വരണമെന്നത് ദീര്‍ഘനാളായി പ്രവര്‍ത്തകര്‍ ഉന്നയിക്കുന്ന ആവശ്യമാണ്. മോദിയെ താഴേയിറക്കി തിരികെ ഗുജറാത്തിലേക്ക് അയക്കാന്‍ പ്രിയങ്കയെ കൊണ്ട് സാധിക്കുമെന്നാണ് പ്രവര്‍ത്തകര്‍ വിശ്വസിക്കുന്നതെന്ന് വാരണാസിയിലെ കോണ്‍ഗ്രസ് നേതാക്കള്‍ പറയുന്നു. കാശിയില്‍ നിന്ന് പ്രിയങ്ക മത്സരിക്കണമെന്നാണ് തങ്ങളുടെ ആഗ്രഹം. വന്‍ ഭുരിപക്ഷത്തോടെ തന്നെ അവര്‍ വിജയിക്കുമെന്നും അവര്‍ കൂട്ടിച്ചേര്‍ത്തു.

Neutral Journalism at it’s Best…

Aaj Tak reporter urging congress supporters to raise Slogans for Priyanka Gandhi. pic.twitter.com/LondjlBCn9— Squint Neon (@squintneon) January 24, 2019

എന്നാല്‍, ലോക്സഭാ തെരഞ്ഞെടുപ്പില്‍ പ്രിയങ്ക മത്സരിക്കുമോ ഇല്ലയോ എന്ന കാര്യത്തില്‍ ഇതുവരെയും വ്യക്തത വന്നിട്ടില്ല. പ്രിയങ്ക ഗാന്ധിയുടെ സജീവ രാഷ്ട്രീയത്തിലേക്കുള്ള കടന്നുവരവിലൂടെ ഊര്‍ജ്ജവും പരിചയസമ്പത്തും സമന്വയിപ്പിക്കുകയാണ് കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി പറഞ്ഞു.

യുപിയില്‍ സഖ്യം ശക്തമാവുന്നു; എസ്.പിക്ക് പിന്തുണയുമായി ആര്‍.ജെ.ഡിയും

chandrika — Mon, 14 Jan 2019 15:40:56 +0000

പട്‌ന: ലോകസഭാ തെരഞ്ഞെടുപ്പിന് മുന്നോടിയായി ഉത്തര്‍പ്രദേശില്‍ രൂപംകൊണ്ട ബി.എസ്.പി-എസ്.പി സഖ്യത്തിന് പിന്തുണ പ്രഖ്യാപിച്ച് ആര്‍.ജെ.ഡി നേതാവ് തേജസ്വി യാദവ്. സമാജ്വാദി പാര്‍ട്ടി നേതാവും ഉത്തര്‍പ്രദേശ് മുന്‍ മുഖ്യമന്ത്രിയുമായ അഖിലേഷ് യാദവുമായി കൂടിക്കാഴ്ച നടത്തിയതിന് പിന്നാലെയാണ് തേജസ്വി മതേതര സഖ്യത്തിന് പിന്തുണ അറിയിച്ചത്. ഞായറാഴ്ച ബി.എസ്.പി അധ്യക്ഷ മായാവതിയുമായും തേജസ്വി കൂടിക്കാഴ്ച നടത്തിയിരുന്നു.

മായാവതിയേയും അഖിലേഷ് യാദവിനേയും അഭിനന്ദിച്ച തേജസ്വി, നിലവിലെ ദേശീയ സാഹചര്യം മുന്‍നിര്‍ത്തി സഖ്യം സഖ്യം അനിവാര്യമായിരുന്നുവെന്നും വ്യക്തമാക്കി. ബി.എസ്.പി-എസ്.പി സഖ്യത്തെ ജനങ്ങള്‍ പിന്തുണക്കുമെന്ന് തീര്‍ച്ചയാണ്. ലോക്‌സഭാ തെരഞ്ഞെടുപ്പ് കഴിയുമ്പോള്‍ യു.പിയില്‍ ബി.ജെ.പി ഇല്ലാതാകുമെന്നും അദ്ദേഹം കൂട്ടിച്ചേര്‍ത്തു.