നെടുങ്കണ്ടം പൊലീസ് സ്റ്റേഷനില്‍ ഓട്ടോ ഡ്രൈവര്‍ ഹക്കീമിന് മര്‍ദ്ദനമേറ്റ സംഭവം ആണ് അടിയന്തരപ്രമേയ നോട്ടീസിന് ആധാരമായി. സംഭവത്തില്‍ ജുഡിഷ്യല്‍ അന്വേഷണം വേണമെന്ന് പ്രതിപക്ഷ നേതാവ് രമേശ് ചെന്നിത്തല ആവശ്യപ്പെട്ടു. മന്ത്രി മണിയുടെ ഇടപെടലുകള്‍ അവസാനിപ്പിക്കണം. ഓട്ടോ ഡ്രൈവര്‍ ഹക്കീമിന്റെ പരാതിയുടെ അടിസ്ഥാനത്തില്‍ രണ്ടു പോലീസുകാര്‍ക്കെതിരെ കേസെടുത്തുവെന്ന് മുഖ്യമന്ത്രിയുടെ മറുപടി.

അതേസമയം മന്ത്രി മണിയുടെ ഭാഷ സഹിക്കാനാകില്ലെന്ന് എം.കെ.മുനീര്‍ ചൂണ്ടിക്കാട്ടി. ഇടുക്കിയിലെ ഈ മന്ത്രി സ്വന്തമായി നാട്ടുഭാഷാ നിഘണ്ടു തയാറാക്കിയിരിക്കുകയാണ്. അതിലെ വാക്കുകളാണ് പൊലീസും ഉപയോഗിക്കുന്നത്. മന്ത്രിയുടെ അത്തരം വാക്കുകള്‍ കേള്‍ക്കാനുള്ള ശ്രവണശേഷി പ്രതിപക്ഷത്തിനില്ലെന്നും മുനീര്‍ പറഞ്ഞു.

ഇങ്ങനെയുള്ള ആള്‍ക്കാരുള്ളപ്പോള്‍ ഇനിയും ആള്‍ക്കാര്‍ക്ക് നേരെ അതിക്രമം ഉണ്ടാകുകയും മരണം ഉണ്ടാകുകയും ചെയ്യുമെന്നും മുനീര്‍ പറഞ്ഞു.
ആരെങ്കിലും കുറ്റം ചെയ്താല്‍ അവരെ മര്‍ദിച്ചു കൊല്ലുന്നതല്ല പൊലീസിന്റെ ജോലി. ഇത്തരത്തില്‍ പ്രതികള്‍ക്കാണെങ്കിലും ഭക്ഷണവും വെള്ളവും കൊടുക്കാതെ മര്‍ദിക്കുന്ന പ്രാകൃതരൂപം കേരളത്തില്‍ ഉണ്ടാകരുത്. കുമാറിനെ ക്രൂരമായി മര്‍ദിച്ചു കൊന്ന നെടുങ്കണ്ടം ലോക്കപ്പിലാണ് ഹക്കിം എന്ന ഓട്ടോ ഡ്രൈവര്‍ക്ക് അതിക്രൂരമായി മര്‍ദനമേറ്റതെന്നും അദ്ദേഹം പറഞ്ഞു.

ലോക്കപ്പില്‍ നടന്നതൊന്നും ഇടുക്കി എസ്.പി അറിഞ്ഞില്ലെന്ന് പറയുന്നത് വിശ്വസിക്കാനാകില്ല. കേസിലെ പ്രധാനപ്രതി ആരാണെന്ന് സര്‍ക്കാര്‍ വ്യക്തമാക്കണമെന്നും മുനീര്‍ ആവശ്യപ്പെട്ടു.

കസ്റ്റഡി മരണക്കേസില്‍ അന്വേഷണ സംഘം റിപ്പോര്‍ട്ട് സമര്‍പ്പിക്കണമെന്നും ഹൈക്കോടതി അറിയിച്ചു. സി.ബി.ഐ അന്വേഷണം ആവശ്യപ്പെട്ടുള്ള ഹര്‍ജി അടുത്ത മാസം അഞ്ചിന് പരിഗണിക്കുമെന്നും ഹൈക്കോടതി അറിയിച്ചു.

സി.ബി.ഐ അന്വേഷണം ആവശ്യപ്പെട്ട് ശ്രീജിത്തിന്റെ ഭാര്യ അഖിലയാണ് ഹര്‍ജി നല്‍കിയത്. സി.ബി.ഐ അന്വേഷണം ആവശ്യമില്ലെന്നാണ് സര്‍ക്കാര്‍ ഹൈക്കോടതിയെ അറിയിച്ചത്.

എന്നാല്‍ പൊലീസുകാര്‍ പ്രതിയായ കേസില്‍ പൊലീസുകാര്‍ നടത്തുന്ന അന്വേഷണം തൃപ്തികരമല്ലെന്നും സി.ബി.ഐ അന്വേഷണം വേണമെന്നുമാണ് കുടുംബം ഹര്‍ജിയില്‍ ആവശ്യപ്പെട്ടത്.

പൊലീസിനെതിരായ കേസുകള്‍ സ്വതന്ത്ര ഏജന്‍സികള്‍ അന്വേഷിക്കണമെന്ന 2010- ലെ സുപ്രീം കോടതി വിധി മുന്‍ നിര്‍ത്തിയാണ് ഹൈക്കോടതി നിരീക്ഷണം. പൊലീസ് സ്വന്തം നിലക്ക് കേസന്വേഷണം നടത്തുന്നത് ശരിയായ രീതിയല്ല. അതിനാല്‍ ഇക്കാര്യത്തില്‍ നിലപാട് വ്യക്തമാക്കണമെന്നാവശ്യപ്പെട്ടാണ് സര്‍ക്കാരിനും സി.ബി.ഐക്കും നോട്ടീസ് നല്‍കിയത്.

ശ്രീജിത്തിന്റെ കൊലപാതകത്തില്‍ ഉന്നത പൊലീസുദ്യോഗസ്ഥര്‍ക്ക് പങ്കുണ്ടെന്നും കേരള പൊലീസ് അന്വേഷിച്ചാല്‍ നീതി ലഭിക്കില്ലെന്നും ചൂണ്ടികാട്ടി ശ്രീജിത്തിന്റെ ഭാര്യയാണ് ഹൈക്കോടതിയെ സമീപിച്ചത്. കേസന്വേഷണം സ്വതന്ത്ര ഏജന്‍സി അന്വേഷിക്കണമെന്നും ഒരു കോടി രൂപ നഷ്ടപരിഹാരം നല്‍കണമെന്നുമാവശ്യപ്പെട്ടാണ് ഹര്‍ജി.