VARUN GANDHI – Chandrika Daily

വരുണ്‍ ഗാന്ധി കോണ്‍ഗ്രസില്‍ എത്തണം; പ്രിയങ്കയുടെ ആദ്യ ദൗത്യം ഇങ്ങനെ…

chandrika — Fri, 25 Jan 2019 07:19:51 +0000

ന്യൂഡല്‍ഹി: ഉത്തര്‍പ്രദേശില്‍ ബി.ജെ.പിക്കെതിരെ അങ്കത്തട്ടിലിറങ്ങുന്ന പ്രിയങ്കഗാന്ധിക്ക് മുന്നിലുള്ള ആദ്യ ദൗത്യം ബി.ജെ.പിയില്‍ നിന്ന് വരുണഗാന്ധിയെ കോണ്‍ഗ്രസിലെത്തത്തിക്കണമെന്നതാണെന്ന് റിപ്പോര്‍ട്ട്. പ്രധാനമന്ത്രി നരേന്ദ്ര മോദിക്കെതിരെ വാരാണസിയില്‍ പ്രിയങ്ക മത്സരിക്കണമെന്ന ആവശ്യം ഉയര്‍ന്നിരുന്നു. ഇതിന് പിന്നാലെയാണ് പ്രിയങ്കയുടെ ആദ്യദൗത്യത്തെക്കുറിച്ചുള്ള വാര്‍ത്തകള്‍ ദേശീയമാധ്യമങ്ങളില്‍ ചര്‍ച്ചയാവുന്നത്.

ബി.ജെ.പിയില്‍ വരുണ്‍ ഗാന്ധിയെ അടര്‍ത്തിയെടുത്ത് കോണ്‍ഗ്രസിലേക്ക് എത്തിക്കാനാണ് പാര്‍ട്ടിയുടെ നീക്കം. നിലവില്‍ സുല്‍ത്താന്‍പൂരിലെ ബി.ജെ.പി എം.പിയായ വരുണിനെ പാര്‍ട്ടിയില്‍ തഴയുന്ന സ്ഥിതിവിശേഷമാണുള്ളത്. ഇത് മുതലെടുത്ത് പുറത്തുചാടിക്കാനാണ് കോണ്‍ഗ്രസ് നീക്കം. ഈ ദൗത്യം പ്രിയങ്കഗാന്ധിക്ക് നിറവേറ്റാന്‍ കഴിയുമെന്ന വിശ്വാസത്തിലാണ് കോണ്‍ഗ്രസ് നേതൃത്വം.

എന്നാല്‍ വരുണിന്റെ അമ്മയും കേന്ദ്രമന്ത്രിയുമായ മനേക ഗാന്ധി ഈ നീക്കത്തിന് തടസമായിരിക്കുമെന്നാണ് കോണ്‍ഗ്രസ് വിലയിരുത്തല്‍. അതേസമയം, മനേക ഗാന്ധിക്ക് ഇത്തവണ ബി.ജെ.പി മത്സരിക്കാന്‍ അവസരം നല്‍കിയില്ലെങ്കില്‍ കോണ്‍ഗ്രസ് നീക്കത്തിന് കരുത്ത് പകര്‍ന്നേക്കും. മനേകയും സോണിയാ ഗാന്ധിയും തമ്മിലുള്ള ബന്ധം ഊഷ്മളമല്ലെങ്കിലും രാഹുല്‍ ഗാന്ധി, പ്രിയങ്ക എന്നിവര്‍ക്ക് വരുണുമായി ഉറച്ച സൗഹൃദമുണ്ട്. രാഷ്ട്രീയ പ്രസംഗങ്ങളില്‍ ഗാന്ധി കുടുംബത്തെ കടന്നാക്രമിക്കണമെന്ന ബി.ജെ.പി നേതൃത്വത്തിന്റെ ആവശ്യം എക്കാലവും വരുണ്‍ നിഷേധിച്ചിരുന്നു.

പ്രിയങ്ക ഗാന്ധി രാഷ്ട്രീയത്തിലേക്ക് വരണമെന്നത് ദീര്‍ഘനാളായി കോ്ണ്‍ഗ്രസ് പ്രവര്‍ത്തകര്‍ ഉന്നയിക്കുന്ന ആവശ്യമാണ്. മോദിയെ താഴേയിറക്കി തിരികെ ഗുജറാത്തിലേക്ക് അയക്കാന്‍ പ്രിയങ്കയെ കൊണ്ട് സാധിക്കുമെന്നാണ് പ്രവര്‍ത്തകര്‍ വിശ്വസിക്കുന്നതെന്ന് വാരണാസിയിലെ കോണ്‍ഗ്രസ് നേതാക്കള്‍ പറയുന്നു. കാശിയില്‍ നിന്ന് പ്രിയങ്ക മത്സരിക്കണമെന്നാണ് തങ്ങളുടെ ആഗ്രഹം. വന്‍ ഭുരിപക്ഷത്തോടെ തന്നെ അവര്‍ വിജയിക്കുമെന്നും അവര്‍ കൂട്ടിച്ചേര്‍ത്തു.

എന്നാല്‍, ലോക്‌സഭാ തെരഞ്ഞെടുപ്പില്‍ പ്രിയങ്ക മത്സരിക്കുമോ ഇല്ലയോ എന്ന കാര്യത്തില്‍ ഇതുവരെയും വ്യക്തത വന്നിട്ടില്ല. പ്രിയങ്ക ഗാന്ധിയുടെ സജീവ രാഷ്ട്രീയത്തിലേക്കുള്ള കടന്നുവരവിലൂടെ ഊര്‍ജ്ജവും പരിചയസമ്പത്തും സമന്വയിപ്പിക്കുകയാണെന്ന് കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി പറഞ്ഞു.

നെഹ്രുകുടുംബം ഒന്നിക്കാന്‍ വഴിയൊരുങ്ങിയതായി; വരുണ്‍ ഗാന്ധി കോണ്‍ഗ്രസിലേക്കെന്നും റിപ്പോര്‍ട്ട്

chandrika — Tue, 28 Nov 2017 07:03:24 +0000

ന്യൂഡല്‍ഹി: ബി.ജെ.പി എം.പി.യും രാഹുല്‍ ഗാന്ധിയുടെ പിതൃസഹോദരന്‍ സഞ്ജയ് ഗാന്ധിയുടെ മകനുമായ വരുണ്‍ ഗാന്ധി കോണ്‍ഗ്രസില്‍ ചേരുമെന്ന് അഭ്യൂഹം. രാഹുല്‍ ഗാന്ധി കോണ്‍ഗ്രസിന്റെ അധ്യക്ഷസ്ഥാനം ഏറ്റെടുക്കുന്നതോടെ വരുണ്‍ ഗാന്ധി കോണ്‍ഗ്രസില്‍ എത്തുമെന്നാണ് പ്രചരണം. 35 വര്‍ഷത്തിനുശേഷം നെഹ്രുകുടുംബം ഒന്നിക്കാന്‍ വഴിയൊരുങ്ങിയതായി ചില ദേശീയ മാധ്യമങ്ങള്‍ റിപ്പോര്‍ട്ട് ചെയ്തതിന് പിന്നാലെയാണ് വരുണ്‍ ഗാന്ധിയുമായി ബന്ധപ്പെട്ട അഭ്യൂഹം പരക്കുന്നത്.

കുറേ നാളായി ബി.ജെ.പി നേതൃത്വവുമായി അകല്‍ച്ചയിലാണ് വരുണ്‍ഗാന്ധി. ബി.ജെ.പി സംഘടിപ്പിക്കുന്ന പൊതുപരിപാടികളിലൊന്നും ഇപ്പോള്‍ വരുണ്‍ പങ്കെടുക്കാറില്ല. കഴിഞ്ഞ ഉത്തര്‍പ്രദേശ് നിയമസഭാ തെരഞ്ഞെുടുപ്പിലും വരുണ്‍ ഗാന്ധി ബി.ജെ.പി നിരയില്‍ തെളിഞ്ഞിരുന്നില്ല.

35 വര്‍ഷത്തെ കാത്തിരിപ്പിന് ശേഷം നെഹ്രു കുടുംബത്തിലെ അനന്തരാവകാശികള്‍ ഒന്നിക്കാന്‍ വഴിയൊരുങ്ങിയതായാണ് ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നത്. വരുണ്‍ ഗാന്ധിയെ ബിജെപി അടുത്ത കാലത്തായി തഴയുന്നതായും മോദിയുടെ ഭരണത്തെ വിമര്‍ശിച്ച വരുണിന്റെ പ്രതികരണമാണ് ഇതിന് പിന്നിലെന്നും കോണ്‍ഗ്രസ് നേതാവ് ഹാജി ജമാലുദ്ദീന്‍ ചൂണ്ടിക്കാണിക്കുന്നു.

ബിജെപിക്ക് തിരിച്ചടി; വരുണ്‍ ഗാന്ധി കോണ്‍ഗ്രസില്‍ ചേരുന്നു; ചര്‍ച്ച വീണ്ടും സജീവം

chandrika — Thu, 08 Jun 2017 06:48:53 +0000

ന്യൂഡല്‍ഹി: ബിജെപി നേതാവും കേന്ദ്രമന്ത്രി മനേകാഗാന്ധിയുടെ മകനുമായ വരുണ്‍ ഗാന്ധി കോണ്‍ഗ്രസില്‍ ചേരുന്നതിന് വീണ്ടും ചര്‍ച്ച സജീവമായതായി റിപ്പോര്‍ട്ട്. ഡിഎന്‍എയാണ് ഇതുസംബന്ധിച്ച വാര്‍ത്ത പുറത്തുവിട്ടത്. ബിജെപി നേതൃത്വത്തില്‍ നിന്ന് തുടര്‍ച്ചയായ അവഗണന നേരിട്ടതാണ് ഇത്തരമൊരു നീക്കത്തിന് വരുണിനെ പ്രേരിപ്പിക്കുന്നതെന്നാണ് വിവരം. കോണ്‍ഗ്രസ് പ്രവേശം സംബന്ധിച്ച് പാര്‍ട്ടി അധ്യക്ഷ സോണിയാഗാന്ധിയുമായി വരുണ്‍ നിരവധി തവണ ചര്‍ച്ച നടത്തിയതായാണ് വിവരം. മാര്‍ച്ച് 25ന് ജന്‍പഥില്‍ ഇരുവരും നടത്തിയ കൂടിക്കാഴ്ചയുടെ റിപ്പോര്‍ട്ടുകള്‍ നേരത്തെ പുറത്തുവന്നിരുന്നു.
രാഹുലും പ്രിയങ്കയും അന്ന് ചര്‍ച്ചയില്‍ പങ്കെടുത്തിരുന്നു. പ്രിയങ്ക ഗാന്ധിയാണ് ചര്‍ച്ചക്കു മധ്യസ്ഥത വഹിച്ചതും വരുണിനെ കോണ്‍ഗ്രസിലേക്ക് കൊണ്ടുവരാനുള്ള ശ്രമങ്ങള്‍ക്ക് പിന്നിലുമെന്നാണ് ഡിഎന്‍എ റിപ്പോര്‍ട്ട് ചെയ്യുന്നത്. 2015ല്‍ ബിജെപി ദേശീയ ജനറല്‍ സെക്രട്ടറി സ്ഥാനത്തു നിന്ന് ഒഴിവാക്കിയതു മുതല്‍ അമിത് ഷാ വരുണിനെ പാര്‍ട്ടി നേതൃനിരയില്‍ നിന്ന് അകറ്റി നിര്‍ത്തിയിരുന്നു. ഉത്തര്‍പ്രദേശ് നിയമസഭാ തെരഞ്ഞെടുപ്പിലും വരുണിന് കാര്യമായ സ്ഥാനമുണ്ടായിരുന്നില്ല. ഇതാണ് പാര്‍ട്ടിമാറ്റത്തിന് വരുണിനെ പ്രേരിപ്പിച്ചതെന്നാണ് റിപ്പോര്‍ട്ടില്‍ പറയുന്നത്. എന്നാല്‍ മനേകാ ഗാന്ധി വരുണിന്റെ പാര്‍ട്ടി മാറ്റത്തെ ശക്തമായി എതിര്‍ക്കുന്നതായാണ് വിവരം. വരുണിന്റെ കോണ്‍ഗ്രസ് പ്രവേശം അത്ര എളുപ്പമാകില്ലെന്നാണ് രാഷ്ട്രീയ നിരീക്ഷകരുടെ വിലയിരുത്തല്‍. പാര്‍ട്ടിയില്‍ എന്തു സ്ഥാനം നല്‍കണമെന്നതു സംബന്ധിച്ച് തര്‍ക്കം ഉടലെടുക്കാന്‍ സാധ്യതയുണ്ടെങ്കിലും വരുണിനെ പാര്‍ട്ടിയിലെത്തിക്കുന്നതോടെ ഉത്തര്‍പ്രദേശില്‍ കോണ്‍ഗ്രസിന് പ്രതാപം തിരിച്ചുകൊണ്ടുവരാനാകുമെന്നാണ് പാര്‍ട്ടി നേതൃത്വം കരുതുന്നത്.
1983ലാണ് കോണ്‍ഗ്രസ് വിട്ട് മനേകാ ഗാന്ധി സഞ്ജയ് വിചാര്‍ മഞ്ച് രൂപീകരിച്ചത്. പിന്നീട് ജനതാദളിലേക്കും അതുവഴി ബിജെപിയിലേക്കും മനേകാ ഗാന്ധിയുടെ പാര്‍ട്ടി എത്തുകയായിരുന്നു.

വരുണ്‍ ഗാന്ധിയുടെ ‘സര്‍ജിക്കല്‍ സ്‌ട്രൈക്കിനെ’ ‘ട്രോളി സോഷ്യല്‍മീഡിയ

Web Desk — Sun, 23 Oct 2016 10:22:18 +0000

ന്യൂഡല്‍ഹി: ഹണിട്രാപ്പില്‍ കുടുങ്ങിയ വരുണ്‍ ഗാന്ധിയുടേതെന്ന തരത്തില്‍ സോഷ്യല്‍മീഡിയയില്‍ ചിത്രങ്ങള്‍ പ്രചരിക്കുന്നതിനിടെ ബിജെപി നേതാവിനെ ട്രോളില്‍ മുക്കി സോഷ്യല്‍ മീഡിയ. രൂപസാദൃശത്തില്‍ വരുണ്‍ ഗാന്ധിയെ പോലെ തോന്നിക്കുന്ന വ്യക്തി മുസാഫര്‍പൂര്‍ എം.പിയാണെന്ന് ഉറപ്പിച്ചാണ് സോഷ്യല്‍മീഡിയയില്‍ ട്രോളുകള്‍ പ്രവഹിക്കുന്നത്.

ശത്രുക്കളെ എങ്ങനെ തുരത്താമെന്ന് കാണിച്ചു തന്ന ധീരപുത്രന് അഭിവാദ്യമര്‍പ്പിച്ചും ട്രോളുകളുണ്ട്. സര്‍ജിക്കല്‍ സ്‌ട്രൈക്ക് എന്ന് കേട്ടപ്പോള്‍ ഇത്രയും കരുതിയില്ല എന്നാണ് മറ്റുചിലര്‍. രസത്തില്‍ ചാലിച്ച ചില ട്രോളുകളിതാ..