തിരുവനന്തപുരത്തേക്ക് കീഴാറ്റൂരിലെ പ്രതിഷേധക്കാര്‍ നടത്താന്‍ തീരുമാനിച്ചിരുന്ന ലോങ് മാര്‍ച്ച് ഇപ്പോള്‍ നടത്തില്ല. ഓഗസ്റ്റില്‍ തൃശൂരില്‍ ചേരുന്ന യോഗതത്തില്‍ തീരുമാനിക്കാമെന്ന ധാരണയില്‍ ഇന്ന് ചേര്‍ന്ന കണ്‍വെന്‍ഷെന്‍ പിരിഞ്ഞു. അതേസമയം കീഴാറ്റൂരിലെ വയല്‍കിളികള്‍ സി.പി.എമ്മിന് ശത്രുക്കളല്ലെന്ന് കണ്ണൂര്‍ ജില്ലാ സെക്രട്ടറി പി. ജയരാജന്‍ പറഞ്ഞു.

കീഴാറ്റൂര്‍ സമരത്തിന്റെ അടുത്ത ഘട്ടമെന്ന നിലക്ക് തിരുവനന്തപുരത്തേക്ക് ലോങ് മാര്‍ച്ച് നടത്തുമെന്ന് നേരത്തെ പ്രഖ്യാപിച്ചിരുന്നു. സംസ്ഥാന സര്‍ക്കാറിനെ സമ്മര്‍ദ്ദത്തിലാക്കുന്നതായിരുന്നു ലോങ് മാര്‍ച്ച് പ്രഖ്യാപനം.
അതേസമയം വയല്‍കിളി സമരത്തിന്റെ നട്ടെല്ല് ചില തീവ്രവാദ ഗ്രൂപ്പുകളാണെന്ന ആരോപണം ജയരാജന്‍ ആവര്‍ത്തിച്ചു. വയല്‍കിളി സമരം അവസാനിപ്പിക്കാന്‍ സി.പി.എം മുമ്പും ശ്രമിച്ചിട്ടുണ്ട്. ഈ ശ്രമം ഇനിയും തുടരും. അവര്‍ സി.പി.എമ്മിന്റെ ശത്രുക്കളല്ല. എന്നാല്‍ കേരളത്തില്‍ മാവോയിസ്റ്റ്-ഇസ്ലാമിക സഖ്യം രൂപപ്പെടുകയാണ്. അവരാണ് വയല്‍കിളി സമരത്തിന്റെയും നട്ടെല്ല’. ജയരാജന്‍ ആരോപിച്ചു.

കുറ്റിപ്പുറത്ത് തിങ്കളാഴ്ച ദേശീയപാതാസര്‍വേ തടസ്സപ്പെടുത്തിയ നാട്ടുകാരെ പൊലീസിനെക്കൊണ്ട് ഭയപ്പെടുത്തി നടപടികളുമായി മുന്നോട്ടുപോകുന്ന നയമാണ് സര്‍ക്കാരിന്റെ ഭാഗത്തുനിന്നുണ്ടായത്. കഴിഞ്ഞ സര്‍ക്കാരുകളുടെ കാലത്ത് പത്തു വര്‍ഷത്തോളമായി മാറ്റിവെച്ച പാത നിര്‍മാണ നടപടിയാണ് ഇടതുപക്ഷസര്‍ക്കാര്‍ പൂര്‍വാധികം ആവേശത്തോടെ ഏറ്റെടുത്തിരിക്കുന്നത്. കര്‍ഷകരെ വെടിവെച്ചുകൊന്ന പശ്ചിമ ബംഗാളിലെ നന്ദിഗ്രാമിനെയും സിംഗൂരിനെയും അനുസ്മരിപ്പിക്കുന്ന നടപടികളാണ് ഇപ്പോള്‍ പിണറായി സര്‍ക്കാരിന്റെ ഭാഗത്തുനിന്ന് ഉണ്ടായിക്കൊണ്ടിരിക്കുന്നത്.

പാതകളും ആധുനിക ഗതാഗത സംവിധാനങ്ങളും ജനങ്ങളുടെ ആവശ്യമാണെന്നതിന് ആര്‍ക്കും തര്‍ക്കമില്ല. കാസര്‍കോടുനിന്ന് നിലവിലെ ദേശീയപാത വീതികൂട്ടി നാലു വരിയാക്കുന്നതിനായാണ് സ്ഥലമേറ്റെടുക്കലിന് സര്‍ക്കാര്‍ നടപടി തുടങ്ങിയിരിക്കുന്നത്. പതിനായിരത്തിലധികം പേര്‍ക്ക് ഭൂമിയും കിടപ്പാടവും കെട്ടിടങ്ങളും കച്ചവടവും തൊഴിലും നഷ്ടമാകുന്ന വിഷയത്തില്‍ അവരുമായി കൂടിയാലോചന നടത്താതെയും നഷ്ടപരിഹാരം ഉറപ്പുവരുത്താതെയുമാണ് സംസ്ഥാന സര്‍ക്കാര്‍ കഴിഞ്ഞ ദിവസം ഉദ്യോഗസ്ഥരെവിട്ട് ഭൂമി അളന്നുതിട്ടപ്പെടുത്തുന്നതിന് തയ്യാറായത്. ഇതിലൂടെ 5561 കെട്ടിടങ്ങള്‍ പൊളിക്കേണ്ടിവരികയും അറുന്നൂറിലധികം കിണറുകള്‍ ഇല്ലാതാകുകയും ചെയ്യും. ആയിരത്തഞ്ഞൂറിലധികം കുടുംബങ്ങള്‍ കിടപ്പാടം വിട്ടൊഴിയണം. മുപ്പതിനായിരം വന്‍മരങ്ങള്‍ മുറിക്കപ്പെടും. കുറ്റിപ്പുറം പാലത്തുനിന്ന് തുടങ്ങുന്ന സര്‍വേ നാലു കിലോമീറ്റര്‍ ദൂരത്തില്‍ അതിര്‍ത്തിക്കല്ല് നാട്ടി പതിനഞ്ച് ദിവസത്തിനകം തീര്‍ക്കാനാണ് തീരുമാനമത്രെ. കഴിഞ്ഞ ഇടതുപക്ഷ സര്‍ക്കാരിന്റെ കാലത്ത ്2009ലും പിന്നീട് 2011ലും 13ലും സമാനമായ നടപടികള്‍ ഉണ്ടായെങ്കിലും ജനങ്ങളുടെ ശക്തമായ പ്രതിഷേധം മൂലം സര്‍വേ നടപടികള്‍ നിര്‍ത്തിവെക്കുകയായിരുന്നു. ഒക്ടോബറോടെ സ്ഥലമെടുപ്പ് പൂര്‍ത്തിയാക്കി ദേശീയപാതാഅതോറിറ്റിക്ക് ഭൂമി കൈമാറാനാണ് തീരുമാനം.

നാല്‍പത്തഞ്ച് മീറ്ററായാണ് പാത വീതികൂട്ടുന്നത്. എന്നാല്‍ ഇത്രയും ഭൂമി ഇതിനായി ഏറ്റെടുക്കേണ്ടതുണ്ടോ എന്ന ചോദ്യമാണ് നാട്ടുകാരും സമരസമിതിയും മുന്നോട്ടുവെക്കുന്നത്. മുപ്പത് മീറ്റര്‍ ആയാലും നാലുവരി നിര്‍മിക്കാമെന്നിരിക്കെ അധികം ഭൂമി കൈക്കലാക്കുന്നതിന് പിന്നില്‍ വന്‍കിട ടോള്‍ ലോബിയുടെ പങ്കുള്ളതായാണ് ആരോപണം. കേരളത്തിന്റെ അമിത ജനസാന്ദ്രത കണക്കിലെടുത്ത് ഇതര സംസ്ഥാനങ്ങളില്‍ നിന്ന് വ്യത്യസ്തമായി ദേശീയ പാതയുടെ വീതി മുപ്പത് മീറ്ററായി കുറക്കണമെന്നത് വളരെക്കാലമായുള്ള ആവശ്യമാണ്. ഇതുസംബന്ധിച്ച് യു.പി.എ സര്‍ക്കാരിന്റെ കാലത്ത് പ്രത്യേകാനുമതി വാങ്ങുകയും ചെയ്തിരുന്നു. ആ സര്‍ക്കാരിന്റെ കാലത്തുതന്നെയാണ് 2013ല്‍ സ്ഥലമേറ്റെടുക്കുമ്പോള്‍ എണ്‍പത് ശതമാനം ഭൂവുടമകള്‍ സമ്മതപത്രം നല്‍കിയിരിക്കണമെന്ന നിയമം പാസാക്കിയതും. എന്നാല്‍ ഇതൊന്നും പാലിക്കാതെയാണ് ഇന്ന് ഇടതുപക്ഷ സര്‍ക്കാര്‍ സ്വന്തം നിലപാടുമായി ഭൂവുടമകള്‍ക്കെതിരെ തോക്കും ലാത്തികളുമായി രംഗത്തുവന്നിരിക്കുന്നത്. ഭൂമി നഷ്ടപ്പെടുന്നവര്‍ക്ക് വിപണിവില മുന്‍കൂറായി നല്‍കണമെന്ന ആവശ്യവും പാലിക്കപ്പെട്ടിട്ടില്ല.

അധികാരത്തിലില്ലാതിരിക്കുമ്പോള്‍ തൊഴിലാളി-പാവപ്പെട്ടവരോടുള്ള പ്രേമത്തെക്കുറിച്ച് വാചാലരാകുകയും അധികാരത്തിലേറുമ്പോള്‍ നവ സാമ്പത്തിക മുതലാളിത്ത നയത്തിന്റെ ശക്തിയായ വക്താക്കളാകുകയും ചെയ്യുന്ന അവസ്ഥ ഇടതുപക്ഷത്തിന് പതിവായിട്ട് കുറെക്കാലമായി. അതിന്റെ പരിണിത ഫലമാണ് അവര്‍ മുപ്പത്തിനാലുകൊല്ലം ഭരിച്ച പശ്ചിമബംഗാളിലും കാല്‍നൂറ്റാണ്ട് ഭരിച്ച ത്രിപുരയിലുമായി ഇന്ന് അനുഭവിച്ചുകൊണ്ടിരിക്കുന്നത്. കോണ്‍ഗ്രസിന്റെ സാമ്പത്തിക നയത്തെ എതിര്‍ക്കുന്നവരുടെ കുട്ടിക്കരണം മറിച്ചിലാണിവിടെ കാണാനാകുന്നത്. കീഴാറ്റൂരിലെ വയല്‍കിളി സമരപ്പന്തലിന് തീയിട്ടും കുറ്റിപ്പുറത്ത് ബലം പ്രയോഗിച്ചും നടപ്പാക്കിക്കൊണ്ടിരിക്കുന്ന അവരുടെതന്നെ ഭാഷയിലെ ബൂര്‍ഷ്വാനയങ്ങള്‍ കേരളം സഹിക്കുമെന്ന് കരുതുക മൗഢ്യമാകും. നോട്ടു നിരോധനവും ചരക്കുസേവന നികുതിയും മുതലാളിത്ത-കുത്തക അനുകൂല ഭരണവും കൊണ്ട് സാധാരണക്കാരന്റെയും കര്‍ഷകന്റെയും ജീവിതം ദുസ്സഹമായിരിക്കുന്ന കാലത്താണ് പാതക്കും ഫാക്ടറിക്കും വേണ്ടി തൊഴിലാളി പാര്‍ട്ടിക്കാര്‍ കാള്‍മാര്‍ക്‌സ് പറഞ്ഞ അടിച്ചമര്‍ത്തല്‍ സംവിധാനങ്ങളുപയോഗിച്ച് ജനത്തെ കൊല്ലാക്കൊല ചെയ്യുന്നത്. പാവപ്പെട്ടവരും നാമമാത്രരുമായ ഭൂവുടമകളുടെ ഭൂമി ഒരു പ്രഭാതത്തില്‍ പൊലീസിനെ ഉപയോഗിച്ച് കയ്യേറി കൊച്ചി-മംഗളൂരു വാതകപൈപ്പ് ലൈനിനുവേണ്ടി പൈപ്പിട്ടുകൊണ്ടിരിക്കുന്ന കോഴിക്കോട് ജില്ലയിലെ മുക്കത്തെ സര്‍ക്കാര്‍ നടപടിക്കെതിരെയും വന്‍ ജനരോഷമാണ് ആളിക്കത്തുന്നത്. ജനാധിപത്യത്തില്‍ ചെറു ന്യൂനപക്ഷത്തിന്റെപ്രതിഷേധത്തെ കണക്കിലെടുക്കാന്‍ ഭരണകൂടങ്ങള്‍ക്ക് താല്‍പര്യമുണ്ടാകാത്തത് അവരുടെ വോട്ടുകള്‍ തങ്ങള്‍ക്ക് നിര്‍ണായകമല്ലെന്നതുകൊണ്ടായിരിക്കും. എന്നാല്‍ ഇത്തരം പല തുള്ളികളാണ് വിപ്ലവത്തിന്റെ മലവെള്ളപ്പാച്ചിലുകളായി മാറുകയെന്ന സത്യം അധികാര സോപാനങ്ങളിലെ ആലസ്യാസനസ്ഥര്‍ക്ക് ഉണ്ടായിരിക്കേണ്ടതാണ്. സമാധാനപരമായ പ്രതിഷേധങ്ങളെ തീവ്രവാദത്തിലേക്ക് വലിച്ചിഴക്കുന്ന ഭരണകൂട ഭീകരത മുമ്പ് ചെങ്ങറയിലും വൈപ്പിനിലും മൂലമ്പിള്ളിയിലുമൊക്കെ കാക്കിപ്പട്ടാളവും ചുവപ്പന്‍സഖാക്കളും ചേര്‍ന്ന് നിര്‍വഹിച്ചിരുന്നു.

തിരുവനന്തപുരം: കീഴാറ്റൂരില്‍ വയല്‍ നികത്തി ബൈപ്പാസ് നിര്‍മിക്കുന്നതിനെതിരായ ജനവികാരം പരിഗണിച്ച് ബദല്‍വഴി തേടണമെന്ന് പ്രതിപക്ഷ ഉപനേതാവ് ഡോ.എം.കെ മുനീര്‍. പ്രതിഷേധങ്ങളെ തച്ചുതകര്‍ത്ത് മുന്നോട്ടുപോയാല്‍ ജനം സര്‍ക്കാറിന് മാപ്പ് നല്‍കില്ലെന്നും അദ്ദേഹം പറഞ്ഞു. നിയമസഭയില്‍ വാക്കൗട്ട് പ്രസംഗം നടത്തുകയായിരുന്നു മുനീര്‍. ശാസ്ത്രസാഹിത്യ പരിഷത്തിന്റെ റിപ്പോര്‍ട്ട് പ്രകാരം 29 ഹെക്ടര്‍ ഭൂമിയാണ് ബൈപ്പാസ് നിര്‍മാണത്തിനായി വേണ്ടത്. ഇതില്‍ 21 ഹെക്ടര്‍ ഭൂമിയും വയലും തണ്ണീര്‍ത്തടങ്ങളുമാണ്. ഇവിടേക്ക് സമീപത്തുള്ള കുന്നുകളില്‍ നിന്ന് വെള്ളവും ഒഴുകിവരുന്നുണ്ട്. വയല്‍ നികത്തി ബൈപ്പാസ് നിര്‍മിക്കുന്നതോടെ സമീപപ്രദേശങ്ങളിലെല്ലാം വെള്ളക്കെട്ടുണ്ടാകുമെന്നാണ് റിപ്പോര്‍ട്ടില്‍ പറയുന്നത്.
ബൈപ്പാസിനായി നാലരകിലോമീറ്റര്‍ ദൂരം 45 മീറ്റര്‍ വീതിയില്‍ വയല്‍ഭാഗം മണ്ണിട്ട് നികത്തേണ്ടിവരും. മൂന്നു മീറ്റര്‍ എങ്കിലും ഉയരത്തില്‍ മണ്ണിടേണ്ടതുണ്ട്. 1.30 ലക്ഷം ലോഡ് മണ്ണ് ഇതിനായി വേണ്ടിവരും. ഇതിന് സമീപത്തെ കുന്നുകളെല്ലാം ഇടിക്കേണ്ടിവരും. ബദല്‍ അലൈന്‍മെന്റിനെ പറ്റിയും പരിഷത്തിന്റെ റിപ്പോര്‍ട്ടില്‍ ചൂണ്ടിക്കാട്ടുന്നുണ്ട്. കാര്‍ഷിക മേഖലയെ തകര്‍ക്കാതെ ബദല്‍ വഴികള്‍ ആരായണം. ഇതിന്റെ സാധ്യതകള്‍ സര്‍ക്കാര്‍ പരിശോധിക്കണം. നാലു കുടുംബങ്ങള്‍ മാത്രമാണ് റോഡ് വരുന്നതിനെ എതിര്‍ക്കുന്നതെന്നാണ് സര്‍ക്കാര്‍ പറയുന്നത്. എന്നാല്‍ പിന്നെ നൂറോളം പേര്‍ അവിടെ സമരം ചെയ്യുന്നതെങ്ങനെയെന്നും മുനീര്‍ ചോദിച്ചു.
റോഡിന് അലൈന്‍മെന്റ് തയാറാക്കാനുള്ള സര്‍വേ നടത്താന്‍ സി.പി.എം പ്രവര്‍ത്തകര്‍ക്ക് ആരാണ് അനുവാദം നല്‍കിയത്. ധാര്‍ഷ്ട്യം ഉപയോഗിച്ച് സമരത്തെ അടിച്ചമര്‍ത്തുന്നതിനോട് യോജിക്കാനാകില്ല. നന്ദിഗ്രാം സംഭവത്തിലുണ്ടായ അനുഭവം ഓര്‍മയില്‍ വേണം. പശ്ചിമബംഗാളില്‍ അതിനുശേഷം തിരിച്ചുവരാന്‍ സാധിച്ചിട്ടില്ല. കേരളത്തിലും ഇത്തരം രീതികള്‍ ആവര്‍ത്തിച്ചാലുണ്ടാകുന്ന തിരിച്ചടികളെ കുറിച്ച് ഓര്‍മിക്കണം. നന്ദിഗ്രാമില്‍ പോയ ഘട്ടത്തില്‍ ചെങ്കൊടിയുമായി നിന്ന ഗ്രാമീണര്‍ പറഞ്ഞത് ഞങ്ങളാണ് യഥാര്‍ത്ഥ കമ്മ്യൂണിസ്റ്റുകാര്‍ എന്നും സി.പി.എമ്മുകാര്‍ വോട്ടിന് വേണ്ടി കമ്മ്യൂണിസ്റ്റുകാരായതെന്നുമാണ്. കീഴാറ്റൂരിലെ സമരക്കാരും ഇതാവര്‍ത്തിക്കുന്നു.
മഹാരാഷ്ട്രയില്‍ കര്‍ഷക സമരത്തിന് വേണ്ടി നിന്നവര്‍ ഇവിടെ കര്‍ഷകരെ അടിച്ചമര്‍ത്തുകയാണ്. പൊലീസ് മര്‍ദനോപാധിയാണെന്ന് പറയുന്ന സി.പി.എമ്മുകാര്‍ അധികാരത്തിലെത്തുമ്പോളും പൊലീസിനെ അതിനായി തന്നെ ഉപയോഗിക്കുന്നു. താന്‍ എക്‌സ്പ്രസ് ഹൈവേ നടപ്പാക്കാന്‍ ശ്രമിച്ചപ്പോള്‍, സര്‍വേനടത്താനെത്തിയ ഉദ്യോഗസ്ഥരെ വളഞ്ഞുവെച്ച് ബന്ദിയാക്കി. എന്നിട്ട് ഇപ്പോള്‍ വികസനത്തെ കുറിച്ച് വാതോരാതെ സംസാരിക്കുകയാണ്. ഇരട്ടനിലപാടാണ് സി.പി.എം സ്വീകരിക്കുന്നതെന്നും മുനീര്‍ പറഞ്ഞു.