vegetable – Chandrika Daily

പച്ചക്കറി വില കുതിക്കുന്നു

webdesk13 — Mon, 10 Jun 2024 13:23:19 +0000

ഹോട്ടലുകളിലെ സാമ്പാറില്‍ മുങ്ങിത്തപ്പിയാലും തക്കാളി കിട്ടാനിടയില്ല. വിലയില്‍ സെഞ്ച്വറിയടിച്ച്‌ നില്‍ക്കുന്ന തക്കാളി കൂടെക്കൂട്ടിയാല്‍ മുതലാവില്ല എന്നതുതന്നെ കാരണം.

പച്ചമുളക്, തക്കാളി, പടവലം, ബീൻസ്, അമരപ്പയർ, കോളിഫ്ളവർ എന്നിവയ്ക്കെല്ലാം വില കൂടിത്തുടങ്ങി. ഒരാഴ്ചകൊണ്ട് 10-50 രൂപയുടെ വർധനയാണ് പച്ചക്കറികളുടെ വിലയിലുണ്ടായത്.

കറികളിൽ ഒഴിച്ചുകൂടാനാകാത്ത പച്ചമുളകിനും തക്കാളിക്കുമാണ് ഏറ്റവുമധികം വില ഉയർന്നത്. പച്ചമുളക് നീളന് കിലോയ്ക്ക് 140-150 രൂപയാണ് എറണാകുളത്തെ വില. എന്നാൽ, ചിലയിടങ്ങളിൽ വില ഇതിലും കൂടുതലാണ്. ഉണ്ട മുളകിന് 145-155 രൂപ വരെ വിലയുണ്ട്. തക്കാളിക്ക് കിലോയ്ക്ക് 80-100 രൂപയായി. ഒരാഴ്ചകൊണ്ട് 40 രൂപയാണ് കൂടിയത്. ചില സൂപ്പർ/ഹൈപ്പർ മാർക്കറ്റുകളിൽ വില ഇതിലും കൂടുതലാണ്. ഇഞ്ചി വില 200 രൂപയിൽ തുടരുകയാണ്. ബീൻസിന് കിലോയ്ക്ക് 180 രൂപയിലാണ് വ്യാപാരം. ഉരുളക്കിഴങ്ങ്, സവാള, വഴുതന എന്നിവയ്ക്ക് നേരിയ രീതിയിൽ വില വർധന പ്രകടമാണ്.

പച്ചക്കറികളുടെ വരവ് കുറഞ്ഞതാണ് വില ഉയരാൻ കാരണം. അയൽ സംസ്ഥാനങ്ങളിൽ ഉത്പാദനം കുറഞ്ഞതാണ് കേരള വിപണിയിലും പ്രതിഫലിച്ചത്. തമിഴ്നാട്, കർണാടക, ആന്ധ്ര എന്നീ സംസ്ഥാനങ്ങളിൽനിന്നാണ് കേരളത്തിലേക്ക് കൂടുതലായി പച്ചക്കറികൾ എത്തുന്നത്. വേനൽ ശക്തമായത് കൃഷിനാശത്തിന് കാരണമായി. ഒപ്പം, മഴ നേരത്തേ എത്തിയതും ഉത്പാദനത്തെ ബാധിച്ചു.

സംസ്ഥാനത്ത് പച്ചക്കറി വില കുതിച്ചുയരുന്നു

chandrika — Sun, 08 Jul 2018 11:40:07 +0000

തിരുവന്തപുരം: സംസ്ഥാനത്ത് പച്ചക്കറി വില കുതിച്ചുയരുന്നു. മറ്റ് സംസ്ഥാനങ്ങളില്‍ നിന്നുള്ള വരവ് കുറഞ്ഞതും, സംസ്ഥാത്ത് തുടരുന്ന പ്രതികൂല കാലാവസ്ഥയുമാണ് വില വര്‍ധനവിന് പ്രധാനകാരണം. കഴിഞ്ഞ ദിലസം കേരളത്തിലേക്ക്് കടത്തിയിരുന്ന ഫോര്‍മാലിന്‍ ചേര്‍ത്ത മീനുകള്‍ പിടിച്ചെടുത്തതോടെ മീന്‍ ഉപയോഗം കുറച്ച് ആളുകള്‍ പച്ചക്കറിയിലേക്ക് തിരിഞ്ഞതും വില കൂടാന്‍ ഇടയാക്കി. ഉണക്ക മത്സ്യത്തിന്റെ വിലയും ഇരട്ടിയായിട്ടുണ്ട്.

തക്കാളി, മുളക്, ചെറിയ ഉള്ളി, പയര്‍, കൂര്‍ക്ക, പടവലം, പാവക്ക, വെണ്ട തുടങ്ങിയവക്ക് ഇരട്ടിയോ, അതിലധികമോ വില കൂടിയിട്ടുണ്ട്. കൂടാതെ ഒട്ടുമിക്ക പച്ചക്കറികള്‍ക്കും വില കൂടിയിട്ടുണ്ട്. സംസ്ഥാനത്ത് തുടരുന്ന കനത്ത മഴ കാരണം പ്രാദേശിക പച്ചക്കറി ഉത്പാദനം കുറഞ്ഞതും മറ്റ് സംസ്ഥാനങ്ങളില്‍ നിന്നുള്ള പച്ചക്കറികളുടെ വരവില്‍ ഗണ്യമായ കുറവും തന്നെയാണ് വര്‍ധനവിന് കാരണം. ഫോര്‍മാലിന്‍ ചേര്‍ത്ത മത്സ്യങ്ങള്‍ പിടിച്ചെടുത്തതോടെ ആളുകള്‍ മീന്‍ ഉപയോഗം കുറച്ച് പച്ചക്കറിയിലേക്ക് തിരിഞ്ഞത് പച്ചക്കറിയുടെ ഡിമാന്റ് വര്‍ധിപ്പിച്ചെങ്കിലും ആവശ്യമായ പച്ചക്കറി മാര്‍ക്കറ്റില്‍ ലഭ്യമാക്കാന്‍ സാധിച്ചില്ല. ഇതും വില ഉയരാന്‍ കാരണമായിയെന്നാണ് പഠനങ്ങള്‍ പറയുന്നത്.

നാട്ടിന്‍ പുറങ്ങളിലെ പച്ചക്കറി മാര്‍ക്കറ്റുകളിലാണ് പച്ചക്കറിയുടെ വില വലിയതോതില്‍ കൂടിയത്. തിരുവനന്തപുരത്തെ ചാല മാര്‍ക്കറ്റും, കോഴിക്കോട്ടെ പാളയം മാര്‍ക്കറ്റും പോലുള്ള നഗരകളിലെ മാര്‍ക്കറ്റുകളില്‍ നാട്ടിന്‍ പുറങ്ങളിലെ അത്ര വിലവര്‍ധനവില്ല. പച്ചക്കറിയുടെ വിലവര്‍ധന സാധാരണക്കാരന്റെ ജീവിത ബജറ്റ് തകിടംമറിച്ചിരിക്കുകയാണ്.

പച്ചക്കറി വില കുതിക്കുന്നു

chandrika — Wed, 18 Oct 2017 17:33:55 +0000

ഷാജഹാന്‍ കാരുവള്ളി
കൊച്ചി
സംസ്ഥാനത്ത് കഴിഞ്ഞ ഒരാഴ്ചയായി പച്ചക്കറി വില കുതിക്കുന്നു. ചെറിയ ഉള്ളിയുടെയും മാങ്ങയുടേയും വില സെഞ്ച്വറി കഴിഞ്ഞപ്പോള്‍ മുരിങ്ങക്കായുടെ വിലയാകട്ടെ ഡബിള്‍ സെഞ്ച്വറി അടിച്ചിരിക്കയാണ്. ഒരാഴ്ച മുമ്പ് കൊച്ചിയിലെ റീട്ടയില്‍ മാര്‍ക്കറ്റില്‍ ചെറിയ ഉള്ളിയുടെ വില 80 രൂപയായിരുന്നിടത്താണ് ഇപ്പോള്‍ 120ല്‍ എത്തി നില്‍ക്കുന്നത്. നേരത്തെ 100 രൂപ വരെ വന്ന ശേഷം വീണ്ടും കുറഞ്ഞിരുന്നു. എന്നാല്‍ ഇപ്പോള്‍ ഒറ്റയടിക്ക് 40 രൂപയാണ് കൂടിയിരിക്കുന്നത്. മാങ്ങയുടെ വില ഒരാഴ്ച മുമ്പ് 40 രൂപയായിരുന്നിടത്താണ് നാലിരട്ടി കൂടി 160 രൂപയില്‍ എത്തി നില്‍ക്കുന്നത്. മുരിങ്ങക്കായക്ക് ഒരാഴ്ച മുമ്പ് 40 രൂപയായിരുന്നത് ഇപ്പോള്‍ അഞ്ചിരട്ടി കൂടി 200 രൂപയിലാണ് എത്തി നില്‍ക്കുന്നത്. അച്ചിങ്ങയുടെ വിലയാകട്ടെ 40 രൂപയായിരുന്നത് ഇപ്പോള്‍ 80 രൂപയായും ബീന്‍സിന്റെ വില 60 രൂപയില്‍ നിന്ന് 100 രൂപയായുമാണ് വര്‍ധിച്ചിരിക്കുന്നത്. ക്യാരറ്റിന്റെ വില 40 രൂപയില്‍ നിന്ന് 60 രൂപയായും വെണ്ടക്കയുടെ വില 30ല്‍ നിന്ന് 60 ആയും അമര പയറിന്റെ വില 40ല്‍ നിന്ന് 60 ആയും വര്‍ധിച്ചപ്പോള്‍ 30 രൂപയില്‍ സ്റ്റഡിയായിരുന്ന തക്കാളിക്ക് ഇപ്പോള്‍ ഇരട്ടിയായാണ് വര്‍ധിച്ചിരിക്കുന്നത്. ക്യാരറ്റിന് 40 രൂപയായിരുന്നത് 60 രൂപയായും സവാളയുടെ വില 25ല്‍ നിന്ന് 40 രൂപയായുമാണ് വര്‍ധിച്ചിരിക്കുന്നത്. ബീറ്റ്‌റൂട്ടുകള്‍ രണ്ട് വിധത്തിലുണ്ട്. ഒരിനത്തിന് 40 രൂപയൂം രണ്ടാമത്തേതിന് 30 രൂപയുമായിരുന്നത് യഥാക്രമം 60ഉം 40ഉം ആയാണ് വര്‍ധിച്ചിരിക്കുന്നത്. കുക്കുമ്പര്‍ 15 രൂപയുണ്ടായിരുന്നത് 40 രൂപയായും ചെറിയ ഇനത്തിന് 30 രൂപയുണ്ടായിരുന്നത് 54 രൂപയായും വര്‍ധിച്ചിരിക്കുന്നു. തമിഴ് നാട്ടില്‍ മഴ കനത്തതാണ് പച്ചക്കറി വില വര്‍ധിക്കാന്‍ കാരണമെന്ന് വ്യാപാരികള്‍ പറയുന്നു. അതേസമയം പച്ചക്കറിയുടെയും നിത്യോപയോഗ സാധനങ്ങളുടേയും വില കുതിച്ചുയരുമ്പോഴും സര്‍ക്കാര്‍ കാഴ്ചക്കാരായി നോക്കി നില്‍ക്കുകയാണ്. രാഷ്ട്രീയ എതിരാളികളെ ഇല്ലായ്മ ചെയ്യാനും സ്വന്തം പാര്‍ട്ടിയിലെ ഗ്രൂപ്പ് പോര് തീര്‍ക്കാനും മാത്രമാണ് ഇപ്പോള്‍ സര്‍ക്കാര്‍ പ്രവര്‍ത്തിക്കുന്നതെന്നും ജനങ്ങളുടെ പ്രശ്‌നത്തില്‍ ഇടപെടാന്‍ ഇടതു സര്‍ക്കാരിന് സമയമില്ലെന്നുമാണ് പൊതുജനങ്ങളുടെ ആക്ഷേപം.