രാവിലെ ദുല്‍ഖര്‍ ചെന്നൈയിലെ വീട്ടിലായിരുന്നു, അവിടെ നിന്ന് ഉച്ചയ്ക്ക് നെടുമ്പാശ്ശേരി വിമാനത്താവളത്തിലെത്തിയ അദ്ദേഹം മാധ്യമങ്ങളോട് പ്രതികരിച്ചില്ല.

മമ്മൂട്ടി ഹൗസ്, ദുല്‍ഖറിന്റെ ചെന്നൈയും കൊച്ചിയിലുമുള്ള വീടുകള്‍, നടന്‍ പൃഥ്വിരാജിന്റെയും അമിത് ചക്കാലക്കലിന്റെയും വീടുകള്‍ ഉള്‍പ്പെടെ അഞ്ച് ജില്ലകളിലായി വാഹന ഡീലര്‍മാരുടെ വീടുകളിലും പരിശോധന നടന്നു. ഫെമ നിയമലംഘനവുമായി ബന്ധപ്പെട്ട കേസിലാണ് ഇഡിയുടെ അന്വേഷണം.

ഫെമ നിയമലംഘനവുമായി ബന്ധപ്പെട്ടാണ് പരിശോധനയെന്ന് ഇ ഡി വ്യക്തമാക്കി. നടന്‍ അമിത് ചക്കാലക്കലിന്റെയും, അഞ്ച് ജില്ലകളിലായ വാഹന ഡീലര്‍മാരുടെയും വീടുകളിലേക്കും റെയ്ഡ് വ്യാപിപ്പിച്ചു. കോട്ടയം, തൃശൂര്‍, മലപ്പുറം, കോഴിക്കോട്, ചെന്നൈ എന്നിവിടങ്ങളിലാണ് അന്വേഷണം പുരോഗമിക്കുന്നത്.

ഭൂട്ടാന്‍ വാഹനക്കടത്തിനെതിരെ നേരത്തെ കസ്റ്റംസ് വകുപ്പ് നടത്തിയ റെയ്ഡില്‍ ദുല്‍ഖറിന്റെ ഡിഫെന്‍ഡര്‍, ലാന്‍ഡ് ക്രൂയിസര്‍, നിസ്സാന്‍ പട്രോള്‍ വാഹനങ്ങള്‍ പിടിച്ചെടുത്തിരുന്നു. ഡിഫെന്‍ഡര്‍ വിട്ടുനല്‍കണമെന്നാവശ്യപ്പെട്ട് ദുല്‍ഖര്‍ ഹൈക്കോടതിയെ സമീപിച്ചിരുന്നു, ഹൈക്കോടതി കേസില്‍ ഇടക്കാല ഉത്തരവായി തീരുമാനമെടുക്കാന്‍ നിര്‍ദ്ദേശം നല്‍കിയിരുന്നു.

ഈ കേസിന് ”നംഖോര്‍” (ഭൂട്ടാനീസ് ഭാഷയില്‍ ‘വാഹനം’ എന്നര്‍ത്ഥം) എന്നാണ് കസ്റ്റംസ് ഓപ്പറേഷനില്‍ നല്‍കിയ പേര്. രാജ്യതലത്തിലുള്ള വാഹനക്കള്ളക്കടത്ത് ശൃംഖലയാണ് അന്വേഷണ ഏജന്‍സികള്‍ ലക്ഷ്യമിടുന്നത്. മോട്ടോര്‍വാഹന വകുപ്പ്, എടിഎസ്, പൊലീസ് എന്നിവരുടെ സഹകരണത്തോടെയാണ് അന്വേഷണം പുരോഗമിക്കുന്നത്.

കഴിഞ്ഞ അഞ്ചു വര്‍ഷത്തിനിടെ ഭൂട്ടാന്‍ പട്ടാളം ലേലം ചെയ്തതെന്ന വ്യാജേന കേരളത്തില്‍ മാത്രം 200ഓളം വാഹനങ്ങളാണ് വിറ്റതെന്ന് കസ്റ്റംസ് കണ്ടെത്തി. യഥാര്‍ത്ഥത്തില്‍ വിദേശത്ത് മോഷ്ടിച്ച വാഹനങ്ങളാണ് ഭൂട്ടാന്‍ വഴി കടത്തി ഇന്ത്യയിലെത്തിച്ചതെന്ന് സംശയിക്കുന്നു. വാഹനങ്ങള്‍ പൊളിച്ചുകെട്ടി റോഡ് മാര്‍ഗം കൊണ്ടുവന്നതും പരിവാഹന്‍ സൈറ്റില്‍ ക്രമക്കേടുകള്‍ നടത്തിയതിലും മോട്ടോര്‍ വാഹന വകുപ്പ് ഉദ്യോഗസ്ഥര്‍ പങ്കുണ്ടെന്ന സൂചനയുണ്ട്.

സിനിമാതാരങ്ങള്‍ ഉള്‍പ്പെടെ പലരെയും ഇടനിലക്കാര്‍ തെറ്റിദ്ധരിപ്പിച്ചിട്ടുണ്ടെന്നും കസ്റ്റംസ് വ്യക്തമാക്കിയിട്ടുണ്ട്. ഹിമാചല്‍ പ്രദേശിലെ ചമ്പ ജില്ലയാണ് പ്രധാന കേന്ദ്രമെന്നും അന്വേഷണം വ്യക്തമാക്കുന്നു.

ഭൂട്ടാനില്‍ നിന്നു നിയമവിരുദ്ധമായി കടത്തിയ വാഹനങ്ങളില്‍ ഇരുനൂറെണ്ണമെങ്കിലും കേരളത്തിലെത്തിയെന്നാണ് കസ്റ്റംസിന്റെ സംശയം. വാഹന ഉടമകളില്‍ അമിത് ചക്കാലക്കല്‍, മാഹിന്‍ അന്‍സാരി എന്നിവരുടേയും മൊഴി നിലവില്‍ രേഖപ്പെടുത്തിയിട്ടുണ്ട്; ബാക്കിയുള്ളവരുടെ മൊഴിയും ഉടന്‍ രേഖപ്പെടുത്തും.

കസ്റ്റംസ് നടത്തിയ റെയ്ഡിന് ശേഷം നിരവധി വാഹനങ്ങള്‍ ഒളിപ്പിച്ചുവെന്ന് സംശയിക്കുന്നതിനാല്‍, കണ്ടെത്തലിനായി പോലീസ് സഹായം തേടിയതായി അറിയിക്കുന്നു. ക്രമസമാധാന ചുമതലയുള്ള എഡിജിപിക്ക് കസ്റ്റംസ് കത്ത് നല്‍കി വാഹനങ്ങള്‍ കണ്ടെത്തണമെന്നും ആവശ്യപ്പെട്ടിട്ടുണ്ട്.

വാഹനങ്ങള്‍ കൈമാറിയ ഏജന്റുമാരെക്കുറിച്ചുള്ള വിവരങ്ങളും കസ്റ്റംസ് ശേഖരിക്കുന്നു. ഏജന്റുമാര്‍ കബളിപ്പിച്ചതിനാല്‍, മാഹിന്‍ അന്‍സാരിക്ക് 24 ലക്ഷം രൂപയുടെ നഷ്ടം സംഭവിച്ചതായി അദ്ദേഹം മൊഴി നല്‍കിയിട്ടുണ്ട്. ഇവരുടെ ലാന്‍ഡ് ക്രൂയിസര്‍ അരുണാചല്‍ പ്രദേശിലെ നംഷായി ആര്‍ടിഒ ഓഫീസില്‍ രജിസ്റ്റര്‍ ചെയ്തിട്ടുണ്ട്.

അരുണാചല്‍ കസ്റ്റംസ് ഉദ്യോഗസ്ഥരില്‍ നിന്ന് അന്വേഷണസംഘം കൂടുതല്‍ വിവരങ്ങള്‍ തേടിയിട്ടുണ്ട്. രേഖകള്‍ പരിശോധിക്കാതെ വാഹനങ്ങള്‍ പിടികൂടിയതിനെക്കുറിച്ചുള്ള ഹരജിയില്‍ നടന്‍ ദുല്‍ഖര്‍ സല്‍മാന്‍ ഹൈക്കോടതിയില്‍ കസ്റ്റംസിനോട് വിശദീകരണം തേടിയിട്ടുണ്ട്.

അമിത്തിന്റെ വിദേശയാത്രകളും സാമ്പത്തിക ഇടപാടുകളും സംബന്ധിച്ച പരിശോധന തുടരുകയാണ്. ഭൂട്ടാനില്‍ നിന്ന് വാഹനങ്ങള്‍ എത്തിക്കുന്നതില്‍ ഇടനിലക്കാരനായി അദ്ദേഹം പ്രവര്‍ത്തിച്ചിട്ടുണ്ടോ എന്ന കാര്യത്തില്‍ വ്യക്തത നേടുക എന്നതാണ് അന്വേഷണത്തിന്റെ ലക്ഷ്യം.

അടുത്തിടെ അമിത്തിന്റെ ഗാരേജില്‍ നിന്ന് കസ്റ്റംസ് എട്ട് വാഹനങ്ങള്‍ പിടിച്ചെടുത്തിരുന്നു. ഇതില്‍ ഒന്ന് മാത്രമാണ് തന്റേതെന്ന് അദ്ദേഹം അവകാശപ്പെട്ടു. ബാക്കി വാഹനങ്ങള്‍ മോഡിഫിക്കേഷന്‍ക്കായി കൊണ്ടുവന്നതാണെന്നും ചിലത് മറ്റ് സംസ്ഥാനങ്ങളില്‍ രജിസ്റ്റര്‍ ചെയ്തവയാണെന്നും അമിത് വ്യക്തമാക്കി. എന്നാല്‍ റീ-രജിസ്‌ട്രേഷന്‍ നടപടികളില്‍ കടന്നിട്ടില്ലെന്നതിനാല്‍ ഇടനിലക്കാരുമായുള്ള ബന്ധം ശക്തമാണെന്ന നിഗമനത്തിലാണ് കസ്റ്റംസ്.

കോയമ്പത്തൂരിനെ കേന്ദ്രീകരിച്ച് പ്രവര്‍ത്തിച്ചിരുന്ന വാഹനക്കടത്ത് സംഘത്തെ കഴിഞ്ഞ വര്‍ഷം കസ്റ്റംസ് പിടികൂടിയിരുന്നു. അതിന്റെ തുടര്‍ച്ചയായാണ് അമിത്തിന്റെ ഗാരേജിലടക്കം പരിശോധനകളും രേഖാ പരിശോധനകളും നടന്നത്. കഴിഞ്ഞ ദിവസത്തെ റെയ്ഡിന് ശേഷവും അമിത്തിനെ കസ്റ്റംസ് ഓഫീസില്‍ വിളിപ്പിച്ച് മൊഴിയെടുത്തിരുന്നു.

പരിശോധനകളുടെ ഭാഗമായി കോഴിക്കോട്, മലപ്പുറം ജില്ലകളില്‍ നിന്നായി 11 വാഹനങ്ങള്‍ കസ്റ്റംസ് കസ്റ്റഡിയിലെടുത്തു. പിടിച്ചെടുത്ത വാഹനങ്ങള്‍ കരിപ്പൂര്‍ വിമാനത്താവളത്തിലെ കസ്റ്റംസ് ഓഫീസിലേക്ക് മാറ്റുമെന്ന് അധികൃതര്‍ വ്യക്തമാക്കി.

വ്യവസായികളുടെയും ഇടനിലക്കാരുടെയും വീടുകള്‍, വാഹന ഷോറൂമുകള്‍ എന്നിവിടങ്ങളിലും പരിശോധനകള്‍ നടന്നു. കോഴിക്കോട്, മലപ്പുറം ജില്ലകളിലെ നാല് ഷോറൂമുകളിലും മൂന്ന് വീടുകളിലുമാണ് കസ്റ്റംസ് റെയ്ഡ് നടത്തിയത്.

കേരളത്തിലെ തിരുവനന്തപുരം, എറണാകുളം, കോഴിക്കോട്, മലപ്പുറം ജില്ലകളിലായി വ്യാപക പരിശോധനകള്‍ നടന്നുവെന്നും, ഓപ്പറേഷന്‍ സംബന്ധിച്ച് വിശദാംശങ്ങള്‍ കസ്റ്റംസ് കമ്മീഷണര്‍ വൈകുന്നേരം മാധ്യമങ്ങളെ അറിയിക്കുമെന്നും അധികൃതര്‍ അറിയിച്ചു.

മലയാള സിനിമാ താരങ്ങള്‍ ഉള്‍പ്പെടെ നിരവധിപേര്‍ ഭൂട്ടാനില്‍ നിന്ന് നികുതി വെട്ടിച്ച് വാഹനങ്ങള്‍ വാങ്ങിയിട്ടുണ്ടെന്ന ഇന്റലിജന്‍സ് റിപ്പോര്‍ട്ടിന്റെ അടിസ്ഥാനത്തിലാണ് പരിശോധനകള്‍ ശക്തിപ്പെടുത്തിയത്. ദുല്‍ഖര്‍ സല്‍മാന്‍, പൃഥ്വിരാജ് സുകുമാരന്‍, അമിത് ചക്കാലക്കല്‍ എന്നിവരുടെ വീടുകളില്‍ പരിശോധനകള്‍ നടന്നിട്ടുണ്ട്.

മമ്മൂട്ടിയുടെ കൊച്ചിയിലെ പനമ്പിള്ളി നഗറിലെ വീടുകളിലും തിരുവനന്തപുരത്തെ വീടുകളിലും പരിശോധന നടന്നു. ദുല്‍ഖര്‍ 2010 മോഡല്‍ ലാന്‍ഡ് റോവര്‍ ഡിഫെന്‍ഡര്‍ വാങ്ങിയതായി കസ്റ്റംസ് കണ്ടെത്തി.

150ഓളം വാഹനങ്ങള്‍ ഭൂട്ടാനില്‍നിന്ന് കടത്തിയതായും, ഇതില്‍ 30-40 എണ്ണം കേരളത്തില്‍ വിറ്റതായും വിവരമുണ്ട്. 10 ലക്ഷം രൂപയ്ക്ക് വാങ്ങിയ വാഹനങ്ങള്‍ 35-45 ലക്ഷം വരെ വിറ്റതായി കണ്ടെത്തി. ഇടനിലക്കാര്‍ വ്യാജരേഖകള്‍ നല്‍കി പലരെയും കബളിപ്പിച്ചെന്നാണ് സംശയം.

സംസ്ഥാനത്തെ വിവിധ ആഡംബര വാഹന ഷോറൂമുകളിലും യൂസ്ഡ് കാര്‍ ഡീലര്‍ഷിപ്പുകളിലും പരിശോധന തുടരുന്നു. കോഴിക്കോട്, മലപ്പുറം ജില്ലകളിലായി ഏഴ് കേന്ദ്രങ്ങളില്‍ റെയ്ഡ് നടത്തി, 11 വാഹനങ്ങള്‍ കസ്റ്റഡിയിലെടുത്തു.