VENKAIYA NAIDU – Chandrika Daily

‘പദ്മാവതി’ക്കെതിരായ കൊലവിളി; തീവ്രവാദത്തെ തള്ളിപ്പറഞ്ഞ് ഉപരാഷ്ട്രപതി

chandrika — Sat, 25 Nov 2017 13:30:11 +0000

ന്യൂഡല്‍ഹി: ബോളിവുഡ് ചിത്രം പദ്മാവതിക്കെതിരായ ഹിന്ദുത്വ സംഘടനകളുടെ ഭീഷണിയെയും പാരിതോഷിക പ്രഖ്യാപനത്തെയും പരോക്ഷമായി തള്ളിപ്പറഞ്ഞ് ഉപരാഷ്ട്രപതി വെങ്കയ്യ നായിഡു. എതിര്‍പ്പുകളുടെ പേരില്‍ മറ്റുള്ളവര്‍ക്കെതിരെ വധഭീഷണി മുഴക്കുന്നതും കയ്യും കാലും വെട്ടുന്നതിന് പ്രതിഫലം വാഗ്ദാനം ചെയ്യുന്നതും ജനാധിപത്യ ക്രമത്തില്‍ സ്വീകാര്യമല്ലെന്ന് അദ്ദേഹം അഭിപ്രായപ്പെട്ടു. ഡല്‍ഹിയില്‍ ഒരു സാഹിത്യോല്‍സവത്തില്‍ സംസാരിക്കവെയാണ് സംഘ്പരിവാര്‍ നേതാക്കളുടെ കൊലവിളിക്കും പാരിതോഷിക പ്രഖ്യാപനങ്ങള്‍ക്കുമെതിരെ ഉപരാഷ്ട്രപതി രംഗത്തെത്തിയത്. രാജ്യത്തെ നിയമവാഴ്ചയെ വിലകുറച്ചു കാണരുതെന്ന് ‘പദ്മാവതി’ സിനിമയുടെ പേര് പരാമര്‍ശിക്കാതെ വെങ്കയ്യ മുന്നറിയിപ്പ് നല്‍കി. ഇന്ത്യ ഭിന്നാഭിപ്രായങ്ങളെ അംഗീകരിക്കുന്ന രാജ്യമാണ്. എന്നാല്‍ ശിഥിലീകരണത്തെ യാതൊരു തരത്തിലും അനുവദിക്കില്ല. രാജ്യത്തിന്റെ ദേശീയോദ്ഗ്രഥനത്തിനും ഐക്യത്തിനും വികസനത്തിനും തുരങ്കം വെക്കുന്ന ശക്തികളെ മുളയിലെ നുള്ളിക്കളയണം. തലക്ക് വില പറയുന്നതും ശാരീരികമായി കൈകാര്യം ചെയ്യുമെന്ന് ഭീഷണിപ്പെടുത്തുന്നതും ജനാധിപത്യത്തില്‍ സ്വീകാര്യമല്ല. ചില പുതിയ ചിത്രങ്ങള്‍ മതവിഭാഗത്തെയും ജനവികാരത്തെയും വ്രണപ്പെടുത്തുന്നതായി പരാതിയുണ്ട്. ചിലര്‍ പ്രതിഷേധിക്കുന്നു. മറ്റു ചിലര്‍ ഒരു കോടി രൂപ പാരിതോഷികം പ്രഖ്യാപിക്കുന്നു. ഇത്രയും പണം എളുപ്പത്തില്‍ എവിടെ നിന്നാണ് കിട്ടുന്നതെന്ന് തനിക്ക് സംശയമുണ്ടെന്നും വെയ്യങ്ക പറഞ്ഞു. ‘ബഹുവിധ പാമ്പര്യവും ആചാര്യങ്ങളും ഉള്‍ക്കൊള്ളുന്ന, വലിയ മാറ്റങ്ങളും ചരിത്രപരമായ ദശാസന്ധിയും കടന്ന് വളര്‍ന്നുവന്ന രാഷ്ട്രമാണിത്. വിരൂപരായ ചിലരില്‍ നിന്ന് ഇടുങ്ങിയതും ഭ്രാന്തമായതുമായ പ്രവര്‍ത്തനങ്ങള്‍ ഉണ്ടാകുന്നുണ്ട്. വളരെ പഴക്കമേറിയ സംസ്‌കാരം ഉള്‍ക്കൊള്ളുന്ന യുവതലമുറയാണ് രാജ്യത്തുള്ളത്. ജനാധിപത്യത്തില്‍ അക്രമങ്ങള്‍ അംഗീകരിക്കില്ല. ജനാധിപത്യപരമായ രീതിയില്‍ നിങ്ങള്‍ക്ക് പ്രതിഷേധിക്കാം. എതിര്‍പ്പ് ഉന്നയിക്കാം. അതിന് അധികാരികളെ സമീപിക്കുകയാണ് വേണ്ടത്. ആരെയും ശാരീരികമായി ഉപദ്രവിക്കാനും ഭീഷണി മുഴക്കാനും ആര്‍ക്കും അധികാരമില്ല.’- ഉപരാഷ്ട്രപതി ചൂണ്ടിക്കാട്ടി. ഏതെങ്കിലും പ്രത്യേക ചലച്ചിത്രത്തെക്കുറിച്ചല്ല താന്‍ പറയുന്നതെന്നും വ്യക്തമാക്കിയ അദ്ദേഹം മുമ്പ് നിരോധിക്കപ്പെട്ട ചില സിനിമകളുടെ പേര് പരാമര്‍ശിച്ചതും ശ്രദ്ധേയമായി.

കടം എഴുതി തള്ളുന്നതിനെതിരെ കേന്ദ്രസര്‍ക്കാര്‍; ഫാഷനായി മാറിയിട്ടുണ്ടെന്നു കേന്ദ്രമന്ത്രി വെങ്കയ്യ നായിഡു

chandrika — Thu, 22 Jun 2017 12:19:04 +0000

മുംബൈ: കാര്‍ഷിക വായ്പകള്‍ എഴുതിത്തള്ളുമെന്ന കര്‍ണാടക മുഖ്യമന്ത്രി സിദ്ധരാമയ്യയുടെ വന്‍ പ്രഖ്യാപത്തിനിടെ സംഭവത്തോട് വിയോജിപ്പുമായി കേന്ദ്രസര്‍ക്കാര്‍. കടം എഴുതിത്തള്ളുന്നത് ഇപ്പോള്‍ ഫാഷനായി മാറിയതായി കേന്ദ്രമന്ത്രി വെങ്കയ്യ നായിഡു പറഞ്ഞു. മുബൈയില്‍ ഒരു സ്വകാര്യ ചടങ്ങില്‍ സംസാരിക്കുകയായിരുന്നു അദ്ദേഹം. അതേസമയം ഒഴിവാക്കാനാകാത്ത പ്രത്യേക സാഹചര്യത്തില്‍ കടം എഴുതിത്തള്ളുന്നതു പോലുള്ള കാര്യങ്ങള്‍ പരിഗണിക്കണമെന്നും മന്ത്രി വ്യക്തമാക്കി.

കടം എഴുതിത്തള്ളല്‍ ഇപ്പോള്‍ ഒരു ഫാഷനായി മാറിയിട്ടുണ്ട്. ഇതൊരു ശാശ്വത പരിഹാരമല്ല. കര്‍ഷരെക്കുറിച്ചു കരുതലുള്ളതുപോലെ, സാമ്പത്തിക സംവിധാനങ്ങളെക്കുറിച്ചും കരുതല്‍ ആവശ്യമാണ് നായിഡു പറഞ്ഞു.

മതത്തിന്റെ പേരില്‍ സംവരണം: മറ്റൊരു പാകിസ്താനെ സൃഷ്ടിക്കുമെന്ന് വെങ്കയ്യ നായിഡു

chandrika — Sat, 15 Apr 2017 06:10:27 +0000

ഹൈദരാബാദ്: മതത്തിന്റെ അടിസ്ഥാനത്തില്‍ സംവരണം നല്‍കുന്നത് മറ്റൊരു പാകിസ്താന്റെ പിറവിയിലേക്ക് നയിക്കുമെന്ന് കേന്ദ്ര വാര്‍ത്താവിനിമയ മന്ത്രി വെങ്കയ്യ നായിഡു പറഞ്ഞു. അംബേദ്കര്‍ ജയന്തിയോടനുബന്ധിച്ച് ഹൈദരാബാദില്‍ ബിജെപി നടത്തിയ പരിപാടിയില്‍ സംസാരിക്കുകയായിരുന്നു അദ്ദേഹം. ചില മതവിഭാഗക്കാര്‍ക്ക് സംവരണം ഏര്‍പ്പെടുത്തുന്നത് ശരിയായ നടപടിയല്ല. ഇത്തരം നടപടികള്‍ സാമൂഹിക അസ്ഥിരതക്കു കാരണമാകും. മതസംവരണ നടപടികള്‍ക്ക് ഭരണഘടനാ സാധുതയുണ്ടാവില്ലെന്നും മന്ത്രി പറഞ്ഞു. രാജ്യത്തിനത്ത് മറ്റൊരു രാജ്യത്തിനായി വാദിക്കാന്‍ അത് അവസരമൊരുക്കും. പ്രത്യേക മതവിഭാഗങ്ങള്‍ക്ക് നല്‍കുന്ന സംവരണത്തെ ഭരണഘടനാ ശില്‍പിയായ ഡോ. ബിആര്‍ അംബേദ്കര്‍ എതിര്‍ത്തിരുന്നതായും കേന്ദ്രമന്ത്രി ചൂണ്ടിക്കാട്ടി. ആളുകള്‍ക്കിടയില്‍ വര്‍ഗീയത വളരാനും സാമൂഹിക അന്തരീക്ഷം തകരാനും ഇത്തരം നടപടികള്‍ വഴിവെക്കുമെന്നും വെങ്കയ്യ നായിഡു പറഞ്ഞു. അതേസമയം ന്യൂനപക്ഷ വിഭാഗങ്ങള്‍ക്കു നേരെയുള്ള കടന്നാക്രമണമാണ് ബിജെപി ലക്ഷ്യമിടുന്നതെന്ന് പരക്കെ ആക്ഷേപമുയര്‍ന്നിട്ടുണ്ട്.