അതേസമയം, അഗളി കേസില്‍ വിദ്യക്ക് മണ്ണാര്‍ക്കാട് കോടതി ജാമ്യം അനുവദിച്ചെങ്കിലും കരിന്തളം കോളജിലെ വ്യാജരേഖ കേസില്‍ നീലശ്വരം പൊലീസിന് മുന്നില്‍ വിദ്യ അടുത്തദിവസം ചോദ്യം ചെയ്യലിന് ഹാജരാവണം. വേണ്ടത്ര രേഖകള്‍ കിട്ടിയതിനാലാണ് വിദ്യയെ കൂടുതല്‍ ഇടങ്ങളിലെത്തിച്ച് തെളിവെടുക്കാത്തതെന്നും അന്വേഷണ സംഘം കോടതിയില്‍ വ്യക്തമാക്കി. പിടിച്ചെടുത്ത രേഖകള്‍ പൂര്‍ണമായും കോടതിയില്‍ സമര്‍പ്പിച്ചു. പൊലീസ് നിരത്തുന്നത് യാഥാര്‍ഥ്യവുമായി ബന്ധമില്ലാത്ത കാര്യങ്ങളെന്ന് പ്രതിഭാഗം അഭിഭാഷകന്‍ പറഞ്ഞു. വിദ്യ ഒരു രേഖയും തയ്യാറാക്കിയിട്ടില്ല. മികച്ച അക്കാദമിക് നിലവാരമുള്ളയാള്‍ എന്തിന് കൃത്രിമം കാണിക്കണം. വിദ്യയെ തകര്‍ക്കാന്‍ മറ്റ് ചിലരുടെ ആസൂത്രണം ഇതിന് പിന്നിലുണ്ടെന്ന് അഭിഭാഷകന്‍.

വിദ്യയുടെ ആരോഗ്യ സ്ഥിതി കണക്കിലെടുത്താണ് മണ്ണാര്‍ക്കാട് കോടതി ജാമ്യം അനുവദിച്ചത്. രണ്ടാഴ്ചയിലൊരിക്കല്‍ അന്വേഷണ ഉദ്യോഗസ്ഥന് മുന്നില്‍ ഹാജരാവണം. സാക്ഷികളെ സ്വാധീനിക്കരുത്. കേരളം വിട്ടു പോകരുത്. അന്‍പതിനായിരം രൂപയുടെ രണ്ട് ആള്‍ ജാമ്യം എന്നീ നിര്‍ദേശങ്ങള്‍ ജാമ്യ വ്യവസ്ഥയിലുണ്ട്. നീലേശ്വരം പൊലീസ് കരിന്തളം കോളജിലെ വ്യാജരേഖ കേസില്‍ വിദ്യയുടെ അറസ്റ്റിന് അനുമതി തേടിയെങ്കിലും 41 എ പ്രകാരമുള്ള നോട്ടിസ്

കൈമാറി മൂന്നാം ദിവസം നേരിട്ട് സ്‌റ്റേഷനില്‍ ഹാജരാവാനായിരുന്നു കോടതി നല്‍കിയ നിര്‍ദേശം.
കരിന്തളം കോളജില്‍ സമര്‍പ്പിച്ച വ്യാജരേഖ കേസിലാണ് വിദ്യയെ നീലേശ്വരം പൊലീസ് അറസ്റ്റ് ചെയ്യുക. തിങ്കളാഴ്ചയോ അടുത്ത ദിവസമോ നോട്ടിസ് പ്രകാരം വിദ്യ അന്വേഷണ ഉദ്യോഗസ്ഥന് മുന്നില്‍ നേരിട്ടെത്തും.

വിദ്യയുടെ റിമാന്റ് റിപ്പോര്‍ട്ട് നേരത്തെ പുറത്ത് വന്നിരുന്നു. പ്രതിയെ പിടികൂടിയത് വില്യാപ്പള്ളി രാഘവന്‍ എന്നയാളുടെ വീട്ടില്‍ നിന്നാണെന്നാണ് പൊലീസ് വ്യക്തമാക്കുന്നുത്. പ്രതിക്കെതിരെ സമാനമായ കേസ് വേറെയും രജിസ്റ്റര്‍ ചെയ്തിട്ടുണ്ടെന്നും ഇതില്‍ നിന്ന് പ്രതിയുടെ ക്രിമിനല്‍ പശ്ചാത്തലം വ്യക്തമാണെന്നും റിപ്പോര്‍ട്ടില്‍ പറയുന്നു. വിദ്യയ്ക്ക് പുറത്തു നിന്നുള്ള സഹായം ലഭിച്ചോയെന്ന് പരിശോധിക്കണമെന്നും പൊലീസ് ആവശ്യപ്പെട്ടിട്ടുണ്ട്.

കേസില്‍ കെ വിദ്യയെ 2 ദിവസം പൊലീസ് കസ്റ്റഡിയില്‍ വിട്ടിരിക്കുകയാണ്. മറ്റന്നാള്‍ വിദ്യയുടെ ജാമ്യാപേക്ഷ മണ്ണാര്‍ക്കാട് കോടതി പരിഗണിക്കും. താന്‍ വ്യാജരേഖ തയ്യാറാക്കിയിട്ടില്ലെന്നും കെട്ടിച്ചമച്ച കേസാണെന്നും പോലീസിനോടും മാധ്യമങ്ങളോടും വിദ്യ ആവര്‍ത്തിച്ചു. പഠനത്തില്‍ മിടുക്കിയായ തനിക്ക് വ്യാജ സര്‍ട്ടിഫിക്കറ്റിന്റെ ആവശ്യമില്ല. ഗൂഢാലോചനക്ക് പിന്നില്‍ അട്ടപ്പാടി ഗവണ്‍മെന്റ് കോളേജ് പ്രിന്‍സിപ്പല്‍ ആണെന്നും വിദ്യ പോലീസിനോട് പറഞ്ഞു.

വ്യാജരേഖ തയ്യാറാക്കി ജോലി നേടിയ കെ.വിദ്യയെ അഗളിയില്‍ എത്തിച്ചു. കോഴിക്കോട്ടു നിന്ന് ദിവസങ്ങള്‍ക്ക് ശേഷമാണ് വിദ്യയെ ഇന്നലെ അഗളി പൊലീസ് കസ്റ്റഡിയിലെടുത്തത്. ഇവര്‍ ഇതിനകം കോടതിയില്‍ ജാമ്യഹര്‍ജി ഫയല്‍ചെയ്തിരുന്നു. മഹാരാജാസ് കോളജിന്റെ പേരില്‍ വ്യാജസര്‍ട്ടിഫിക്കറ്റ് ഉണ്ടാക്കിയാണ് കാസര്‍കോട് സ്വദേശിയായ വിദ്യ സര്‍ക്കാര്‍ കോളജില്‍ ജോലി നേടിയത്.

രാത്രി പന്ത്രണ്ടരയോടെയാണ് അഗളി ഡിവൈഎസ്പി ഓഫീസില്‍ എത്തിച്ചത്. ഉച്ചയോടെ വിദ്യയെ മണ്ണാര്‍ക്കാട് കോടതിയില്‍ ഹാജരാക്കും. അഗളി കോളജിലാണ് ഇവര്‍ വ്യാജരേഖ ഹാജരാക്കി അധ്യാപികയായത്. ഇവരുടെ രേഖ വ്യാജമാണെന്ന് കെ.എസ്.യു ആണ് പുറത്തുവിട്ടത്. മേപ്പയൂരില്‍ ഒളിവില്‍ കഴിയുന്നതിനിടെയാണ് പിടിയിലായത്. ഇവരെ കൂടാതെ എസ്.എഫ്.ഐ നേതാവ് നിഖിലിനെയും പിടികിട്ടാനുണ്ട്. ബിരുദസര്‍ട്ടിഫിക്കറ്റ് വ്യാജമായുണ്ടാക്കി കായംകുളം കോളജില്‍ പിജിക്ക് ചേരുകയായിരുന്നു ഈ നേതാവ്.

അട്ടപ്പാടി കോളേജിലെത്തിയത് എസ്.എഫ്.ഐക്കാരനായ സുഹൃത്തിനൊപ്പമെന്നാണ് സൂചന. വ്യാജരേഖ ചമച്ച കേസില്‍ ഇയാളുടെ പങ്ക് പൊലീസ് അന്വേഷിക്കും. വിദ്യ എത്തിയ കാറിന്റെ നമ്പര്‍ പൊലീസ് തിരിച്ചറിഞ്ഞു. രണ്ടാം തിയ്യതി രാവിലെയാണ് വിദ്യയും സുഹൃത്തും വെള്ള സ്വിഫ്റ്റ് കാറില്‍ അട്ടപ്പാടി കോളേജില്‍ എത്തിയത്. വ്യാജ സര്‍ട്ടിഫിക്കറ്റ് കേസില്‍ അഗളി പൊലീസ് അട്ടപ്പാടി ആര്‍.ജി.എം കോളേജിലെ അധ്യാപകരുടെ മൊഴി വീണ്ടും രേഖപ്പെടുത്തി.

കൂടാതെ പൊലീസ് ഇന്ന് വിദ്യയുടെ വീട്ടിലെത്തി പരിശോധന നടത്താന്‍ ശ്രമിച്ചെങ്കിലും വീട്ടില്‍ ആ സമയത്ത് ആരും ഉണ്ടായിരുന്നില്ല. തുടര്‍ന്ന് പൊലീസ് തിരിച്ചു പോവുകയായിരുന്നു. സംഭവത്തില്‍ വിദ്യയെ തള്ളി പറഞ്ഞ നിലപാടാണ് സിപിഎം സ്വീകരിച്ചിരിക്കുന്നത്. വിദ്യക്ക് രാഷ്ട്രീയപരമായി പിന്തുണ നല്‍കേണ്ട എന്നാണ് സിപിഎമ്മിന്റെ നിലപാട്.

എറണാകുളം മഹാരാജാസ് കോളജിലെ മലയാളം വിഭാഗത്തില്‍ 2018-19, 2020-21 വര്‍ഷങ്ങളില്‍ ഗസ്റ്റ് ലക്ചറര്‍ ആയിരുന്നു എന്ന രേഖയാണ് വിദ്യ വ്യാജമായി നിര്‍മിച്ചത്. കോളജിന്റെ ലെറ്റര്‍പാഡ്, സീല്‍, മുദ്ര എന്നിവ വ്യാജമായി ഉണ്ടാക്കിയാണ് കോളജില്‍ ജോലിക്കായി അപേക്ഷിച്ചത്. അട്ടപ്പാടി ആര്‍ജിഎം ഗവ. ആര്‍ട്‌സ് ആന്റ് സയന്‍സ് കോളജില്‍ ഗസ്റ്റ് ലക്ചറര്‍ അഭിമുഖത്തിന് ചെന്നപ്പോഴാണ് ഈ എക്‌സ്പീരിയന്‍സ് സര്‍ട്ടിഫിക്കറ്റ് നല്‍കിയത്. സര്‍ട്ടിഫിക്കറ്റില്‍ സംശയം തോന്നിയ അട്ടപ്പാടി കോളജ് അധികൃതര്‍ മഹാരാജാസ് കോളജുമായി ബന്ധപ്പെടുകയായിരുന്നു. വിദ്യയുടെ എക്‌സ്പീരിയന്‍സ് സര്‍ട്ടിഫിക്കറ്റിലെ കാലയളവില്‍ മലയാളം വിഭാഗത്തില്‍ ഗസ്റ്റ് ലക്ചറര്‍മാര്‍ ഇല്ലെന്നാണ് പ്രിന്‍സിപ്പല്‍ അറിയിച്ചത്. പാലക്കാട് പത്തിരിപ്പാല ഗവ. കോളേജ്, കാസര്‍കോട് കരിന്തളം ഗവ. കോളേജ് എന്നിവിടങ്ങളും വിദ്യ ഗസ്റ്റ് ലക്ചററായി ജോലി ചെയ്തിട്ടുണ്ട്.

വ്യാജ സര്‍ട്ടിഫിക്കറ്റ് നിര്‍മിച്ചു നല്‍കാന്‍ എസ്എഫ്‌ഐ നേതൃത്വം സഹായം നല്‍കി എന്നാണ് കോണ്‍ഗ്രസ് ചൂണ്ടിക്കാട്ടി. 2017-18 കാലത്ത് മഹാരാജാസ് കോളജില്‍ എസ്എഫ്‌ഐ പാനലില്‍ പിജി റെപ് ആയിരുന്നു വിദ്യ. കാലടി സര്‍വകലാശാലയിലെ എംഫില്‍ പഠനക്കാലത്ത് എസ്എഫ്‌ഐ പാനലില്‍ വിജയിച്ച് സര്‍വകലാശാല യൂണിയന്‍ ജനറല്‍ സെക്രട്ടറിയുമായിരുന്നു.

വിദ്യ സമര്‍പ്പിച്ച രേഖകള്‍ വ്യാജമെന്ന് തെളിഞ്ഞതോടെ പൊലീസില്‍ പരാതി നല്‍കാന്‍ ഒരുങ്ങുകയാണ് കരിന്തളം കോളജ് അധികൃതരും. കഴിഞ്ഞ അക്കാദമിക് വര്‍ഷത്തിലാണ് കെ വിദ്യ കരിന്തളം കോളജില്‍ താത്ക്കാലിക അധ്യാപികായായി ജോലി ചെയ്തത്. അന്ന് സമര്‍പ്പിച്ച രേഖകളില്‍ മഹാരാജാസിലെ വ്യാജ രേഖയും ഉള്‍പ്പെട്ടിരുന്നു. അട്ടപ്പാടി കോളജിലെ വിവാദമുയര്‍ന്നതിനെ തുടര്‍ന്ന് രേഖകള്‍ പരിശോധിച്ചപ്പോഴാണ് ഇത് കോളജ് അധികൃതര്‍ പരിശോധിച്ചതും തിരിച്ചറിഞ്ഞതും.

വ്യാജ സര്‍ട്ടിഫിക്കറ്റ് നിര്‍മിച്ചു നല്‍കാന്‍ എസ്എഫ്‌ഐ നേതൃത്വം സഹായം നല്‍കിയിട്ടുണ്ടെന്ന് കോണ്‍ഗ്രസ് ചൂണ്ടിക്കാട്ടി.