Vietnam – Chandrika Daily

പുതിയ സൈബര്‍ നിയമത്തിനെതിരെ വിയറ്റ്‌നാമില്‍ ശക്തമായ പ്രതിഷേധം

chandrika — Thu, 14 Jun 2018 07:10:15 +0000

ഹാനോയ്: വിയറ്റ്‌നാം പാര്‍ലമെന്റ് പാസാക്കിയ പുതിയ സൈബര്‍ സെക്യൂരിറ്റി നിയമം അഭിപ്രായ, ആവിഷ്‌കാര സ്വാതന്ത്ര്യങ്ങള്‍ക്കുനേരെയുള്ള കടന്നാക്രമണമാണെന്ന് ആരോപണം. ഇന്റര്‍നെറ്റ് കമ്പനികള്‍ ഉപയോക്താക്കളെക്കുറിച്ചുള്ള വിവരങ്ങള്‍ പ്രദേശിക സെര്‍വറുകളില്‍ സൂക്ഷിക്കണമെന്നാണ് നിയമം നിര്‍ദേശിക്കുന്നത്. ദേശീയ സുരക്ഷക്കുവേണ്ടിയാണ് ഇത്തരമൊരു നിയമം കൊണ്ടുവരുന്നതെന്ന് അധികാരികള്‍ പറയുന്നു. എന്നാല്‍ നിയമം പ്രാബല്യത്തില്‍ വരുന്നതോടെ സ്വകാര്യ വിവരങ്ങള്‍ ഭരണകൂടത്തിന് കൈമാറാന്‍ കമ്പനികള്‍ നിര്‍ബന്ധിതമാകുമെന്ന് വിമര്‍ശകര്‍ ആരോപിക്കുന്നു.

തെറ്റായ വിവരങ്ങള്‍ പ്രചരിപ്പിക്കുന്നതിനും രാജ്യത്തിന്റെ അഖണ്ഡത തകര്‍ക്കുന്ന ഓണ്‍ലൈന്‍ പ്രവര്‍ത്തനങ്ങള്‍ക്കും വിലക്കുണ്ട്. ഭരണകൂടത്തിനെതിരെയുള്ള വിമര്‍ശനങ്ങള്‍ക്ക് തടയിടുകയെന്ന ലക്ഷ്യത്തോടെയാണ് ഇത്തരമൊരു നിയമം കൊണ്ടുവന്നിരിക്കുന്നതെന്ന് ചിലര്‍ ചൂണ്ടിക്കാട്ടി.

നിയമം അങ്ങേയറ്റം പിന്തിരിപ്പനാണെന്ന് ആംനസ്റ്റി ഇന്റര്‍നാഷണല്‍ പറഞ്ഞു. വിയറ്റ്‌നാമില്‍ അഭിപ്രായ സ്വാതന്ത്ര്യത്തിനുമേല്‍ കത്തി വെക്കാനാണ് അധികാരികള്‍ ശ്രമിക്കുന്നത്. ഭരണകൂടത്തെ പേടിക്കാതെ അഭിപ്രായങ്ങളും ആശയങ്ങളും പങ്കുവെക്കാനുള്ള വേദിയാണ് ഓണ്‍ലൈന്‍ ഒരുക്കുന്നത്. ഓണ്‍ലൈന്‍ പ്രവര്‍ത്തനങ്ങള്‍ നിരീക്ഷിക്കുന്നതിലൂടെ സ്വതന്ത്രമായി സംസാരിക്കാന്‍ രാജ്യത്ത് ഇടമില്ലാത്ത സ്ഥിതിയാണുള്ളതെന്ന് ആംനസ്റ്റി കൂട്ടിച്ചേര്‍ത്തു. ഗൂഗ്ള്‍, ട്വിറ്റര്‍, ആപ്പിള്‍, ഫേസ്ബുക്ക് തുടങ്ങി വന്‍കിട കമ്പനികള്‍ അടങ്ങിയ ഏഷ്യ ഇന്റര്‍നെറ്റ് കൊയലിഷനും പുതിയ നിമയത്തില്‍ ആശങ്ക അറിയിച്ചു.

വിയറ്റ്‌നാമില്‍ കമ്യൂണിസ്റ്റ് പ്രമുഖന് 13 വര്‍ഷം തടവ്

chandrika — Mon, 22 Jan 2018 18:45:14 +0000

ഹനോയ്: അഴിമതിക്കേസില്‍ പ്രതിയായ വിയറ്റ്‌നാമിലെ മുതിര്‍ന്ന കമ്യൂണിസ്റ്റ് നേതാവിന് 13 വര്‍ഷം തടവ്. മുന്‍ പൊളിറ്റ്ബ്യൂറോ അംഗം ദിന്‍ ല താങിനാണ് കോടതി ശിക്ഷ വിധിച്ചത്. സാമ്പത്തിക ദുര്‍വിനിയോഗം നടത്തിയ താങ് എണ്ണ കമ്പനിയായ പെട്രോവിയറ്റ്‌നാമിന് വന്‍ നഷ്ടം വരുത്തിവെച്ചതായി കോടതി കണ്ടെത്തി. പെട്രോവിയറ്റ്‌നാമിന്റെ എക്‌സിക്യൂട്ടീവായിരുന്ന ട്രിന്‍ ക്‌സുവാന് ജീവപര്യന്തം തടവും വിധിച്ചു. ഇവര്‍ക്കു പുറമെ മറ്റ് ഇരുപതോളം പേരും ശിക്ഷിക്കപ്പെട്ടിട്ടുണ്ട്. ഊര്‍ജ, ബാങ്കിങ് മേഖലകളിലെ ഉന്നതരായ നിരവധി പേര്‍ അഴിമതിക്കേസുകളില്‍ വിചാരണ നേരിട്ടുകൊണ്ടിരിക്കുകയാണ്. വിയറ്റ്‌നാം രാഷ്ട്രീയത്തിലെ ഉദയതാരമായി വളര്‍ന്നുകൊണ്ടിരുന്ന താങിന്റെ അറസ്റ്റ് അന്താരാഷ്ട്ര ശ്രദ്ധ നേടിയിരുന്നു. ബെര്‍ലിനില്‍ അഭയം തേടിയ അദ്ദേഹത്തെ വിയറ്റ്‌നാം നിയമവിരുദ്ധമായി തട്ടിക്കൊണ്ടുപോയതാണെന്ന് ജര്‍മന്‍ വിദേശകാര്യ മന്ത്രാലയം ആരോപിച്ചിരുന്നു. കമ്യൂണിസ്റ്റ് പാര്‍ട്ടി തലപ്പത്ത് എതിരാളികളെ അടിച്ചമര്‍ത്താന്‍ ചിലര്‍ നടത്തുന്ന ശ്രമങ്ങളാണ് താങിന്റെ അറസ്റ്റില്‍ കലാശിച്ചതെന്ന് റിപ്പോര്‍ട്ടുണ്ട്. കഴിഞ്ഞ മേയില്‍ അദ്ദേഹത്തെ പൊളിറ്റ്ബ്യൂറോയില്‍നിന്ന് പുറത്താക്കിയിരുന്നു. രണ്ടു വര്‍ഷം മുമ്പ് നടന്ന പാര്‍ട്ടി കോണ്‍ഗ്രസില്‍ പൊളിറ്റ്ബ്യൂറോയുടെ നിയന്ത്രണം പിടിച്ചെടുത്ത കമ്യൂണിസ്റ്റ് പാര്‍ട്ടിയിലെ യാഥാസ്ഥിതിക വിഭാഗം ഭരണത്തിലിരിക്കെ സമ്പന്നരായവരെ മുഴുവന്‍ പിന്തുടരുകയാണ്. 1986ലാണ് വിയറ്റ്‌നാം സാമ്പത്തിക പരിഷ്‌കരണം തുടങ്ങിയത്. അതിനുശേഷം താങിനെക്കൂടാതെ മറ്റ് രണ്ടു പേരെ പൊളിറ്റ്ബ്യൂറോയില്‍നിന്ന് പുറത്താക്കിയിട്ടുണ്ട്.