നേരത്തെ ലത്തീന്‍ സഭാ നേതാക്കള്‍ ചീപ് സെക്രട്ടറിയുമായി ചര്‍ച്ച നടത്തിയിരുന്നു. കര്‍ദ്ദിനാള്‍ ക്ലീമിസ് മുന്‍ കൈയെടുത്താണ് ചീഫ് സെക്രട്ടറിയും ലത്തീന്‍ സഭയും തമ്മിലുള്ള ചര്‍ച്ച നടത്തിയത്.അതിനിടെ ഗാന്ധിസ്മാരക നിധിയും ഒത്തുതീര്‍പ്പ് ചര്‍ച്ചകള്‍ക്ക് രംഗത്തുണ്ട്. ഇതിനായി ഗാന്ധി സ്മാരക നിധി ചെയര്‍മാന്‍ എന്‍. രാധാകൃഷ്ണന്‍. ജസ്റ്റിസ് ഹരിഹരന്‍ നായര്‍, ടി.പി. ശ്രീനിവാസന്‍. ജോര്‍ജ് ഓണക്കൂര്‍ എന്നിവരുള്‍പ്പെട്ട കോ‌ര്‍ ഗ്രൂപ്പും രൂപീകരിച്ചിട്ടുണ്ട്.

പൊലീസ് സ്റ്റേഷന്‍ ആക്രമണത്തില്‍ പ്രതികളായവര്‍ക്കെതിരെ കര്‍ശന നടപടിയെടുക്കണം.ഇത് സംബന്ധിച്ച്‌ സംസ്ഥാന സര്‍ക്കാരിനും ഡിജിപിക്കും നിര്‍ദേശം നല്‍കണം. സര്‍ക്കാരിന് സാധിച്ചില്ലെങ്കില്‍ കേന്ദ്രസര്‍ക്കാരിന്റെയോ കേന്ദ്രസേനയുടെയോ സഹായം തേടാന്‍ ഉത്തരവിടണമെന്നും ഹര്‍ജിയില്‍ ആവശ്യപ്പെട്ടിട്ടുണ്ട്.

വികസനത്തിന് തടസമുണ്ടാക്കുന്ന നിക്ഷിപ്ത ശക്തികള്‍ എല്ലാ കാലത്തും ഉണ്ടായിട്ടുണ്ട്. ഇവരെല്ലാം കൂടി ഒത്തുകൂടുകയാണ്. ഇത് സര്‍ക്കാരിനെതിരായ പ്രക്ഷോഭമാണെന്ന് തെറ്റിധരിക്കേണ്ട. നാടിന്റെ മുന്നോട്ടു പോക്കിനെ തടയാന്‍ നോക്കുകയാണ്. ശാന്തിയും സമാധാനാവുമുള്ള നാടിന്റെ ഇന്നത്തെ അവസ്ഥയ്ക്ക് മാറ്റമുണ്ടാക്കാന്‍ ശ്രമിക്കുകയാണ്.’ മുഖ്യമന്ത്രി ആരോപിച്ചു.

സി.പി.എം മുഖപത്രമായ ദേശാഭിമാനി തീവ്രവാദ ബന്ധമുള്ള ഒന്‍പത് പേരുടെ മുഖചിത്രം നല്‍കിയിട്ടുണ്ട്. അതില്‍ ഒരാള്‍ ഗതാഗത വകുപ്പ് മന്ത്രി ആന്റണി രാജുവിന്റെ സഹോദരനാണ്. തന്റെ സഹോദരന് തീവ്രവാദ ബന്ധമുണ്ടോയെന്ന് മന്ത്രി വ്യക്തമാക്കണം. ചിത്രത്തിലുള്ള മറ്റൊരു വൈദികന്‍ കഴിഞ്ഞ തെരഞ്ഞെടുപ്പില്‍ ആന്റണി രാജുവിനും കടകംപള്ളി സുരേന്ദ്രനും വേണ്ടി പരസ്യമായി പ്രവര്‍ത്തിച്ച ആളാണ്. കേന്ദ്ര സര്‍ക്കാരിനെതിരെ സമരം ചെയ്ത കര്‍ഷകരെ തീവ്രവാദികളായും മാവോയിസ്റ്റുകളായും അര്‍ബന്‍ നക്‌സലൈറ്റുകളായും മോദി സര്‍ക്കാര്‍ ചിത്രീകരിച്ചതു പോലെയാണ് വിഴിഞ്ഞത്ത് നാല് വര്‍ഷമായി സിമെന്റ് ഗോഡൗണില്‍ കഴിയുന്ന മത്സ്യത്തൊഴിലാളികളെ പിണറായി സര്‍ക്കാര്‍ ചിത്രീകരിക്കുന്നത്. വികസനത്തിന്റെ ഇരകളായി മാറിയ പാവങ്ങളെ താല്‍ക്കാലികമായി വാടക വീട്ടിലേക്ക് മാറ്റി ഭാവിയില്‍ വീട് നിര്‍മ്മിച്ച് നല്‍കാന്‍ സര്‍ക്കാര്‍ തയാറുണ്ടോയെന്നും പ്രതിപക്ഷം ചോദിച്ചു.

അദാനിയുടെ ഉച്ചഭാഷിണിയായി സംസ്ഥാന സര്‍ക്കാര്‍ മാറിയിരിക്കുകയാണ്. അദാനിയുടെ കേസ് കോടതിയില്‍ വന്നപ്പോള്‍ മത്സ്യത്തൊഴിലാളികള്‍ കലാപകാരികളാണെന്ന് വരുത്തിത്തീര്‍ത്ത് പ്രകോപനമുണ്ടാക്കാനാണ് സര്‍ക്കാര്‍ ശ്രമിച്ചത്. ഒരു അക്രമ സംഭവത്തെയും പ്രതിപക്ഷം പ്രോത്സാഹിപ്പിക്കില്ല. പക്ഷെ ആര്‍ച്ച് ബിഷപ്പ് ഉള്‍പ്പെടെയുള്ളവരെ പ്രതിയാക്കിയും കസ്റ്റഡിയില്‍ എടുത്തവരെ അന്വേഷിച്ച് ചെന്ന പള്ളിക്കമ്മിറ്റിക്കാരെ അറസ്റ്റ് ചെയ്തും സമരക്കാരെ സര്‍ക്കാരും പൊലീസും മനപൂര്‍വം പ്രകോപിപ്പിക്കുകയായിരുന്നു. കുഴപ്പം ഉണ്ടാക്കി അവിടെ നടക്കുന്നത് കലാപവും തീവ്രവാദവുമാണെന്ന് വരുത്തിത്തീര്‍ക്കാനുള്ള ശ്രമമാണ് സര്‍ക്കാര്‍ നടത്തുന്നത്. പ്രതിപക്ഷം പ്രതികരിച്ചു.

വിഴിഞ്ഞം പശ്ചാത്തലത്തില്‍ സംസ്ഥാനത്ത് പൊലീസ് ജാഗ്രതാ നിര്‍ദ്ദേശം നല്‍കി. അവധി റദ്ദാക്കി തിരിച്ചെത്താന്‍ പൊലീസുകാരോട് ആവശ്യപ്പെട്ടിട്ടുമുണ്ട്.വിഴിഞ്ഞം ആക്രണവുമായി ബന്ധപ്പെട്ട കേസുകളുടെ അന്വേഷണത്തിന് തിരുവനന്തപുരം ഡിസിപി കെ ലാല്‍ജിയുടെ നേതൃത്വത്തില്‍ നാല് അസിസ്റ്റന്റ് കമ്മീഷണര്‍മാരെ ഉള്‍പ്പെടുത്തി മറ്റൊരു സംഘവും രൂപീകരിച്ചു.

ഒത്തുതീര്‍പ്പിന് ചെന്ന പള്ളിക്കമ്മിറ്റി ഭാരവാഹികളെ പിടിച്ച് അകത്തിട്ടത് സമരത്തെ പ്രകോപിപ്പിക്കാന്‍ വേണ്ടി മനപ്പൂര്‍വം ചെയ്തതാണെന്ന് സംശയിക്കേണ്ടിയിരിക്കുന്നു. സാധാരണ സമരത്തെ കൈകാര്യം ചെയ്യുന്നത് പോലെ തീരദേശവാസികളുടെ സമരത്തെ നോക്കിക്കാണാനാവില്ല. എല്ലാ വിഷയങ്ങളോടും വൈകാരികമായി പ്രതികരിക്കുന്നവരാണവര്‍. അവരെ പ്രകോപിപ്പിക്കാത്ത, ചര്‍ച്ചക്ക് വിളിച്ച് പ്രശ്‌നം തീര്‍ക്കാനാണ് സര്‍ക്കാര്‍ ശ്രമിക്കേണ്ടത്. സമരം അക്രമത്തിലേക്ക് കൊണ്ടുപോകുന്നത് സര്‍ക്കാരാണെന്ന് വ്യക്തമാണ്. പൊലീസ് സ്റ്റേഷന്‍ ആക്രമിക്കുകയും പൊലീസുകാരെ പരിക്കേല്‍പ്പിക്കുകയും ഉള്‍പ്പെടെ നടന്ന അക്രമം സംസ്ഥാന സര്‍ക്കാരിന്റെ അറിവോടെയും പിന്തുണയോടെയുമാണെന്ന് ന്യായമായും സംശയിക്കേണ്ടിയിരിക്കുന്നു. മൂവായിരത്തോളം ആളുകളാണ് സംഘത്തില്‍ ഉണ്ടായിരുന്നതെന്നാണ് സര്‍ക്കാര്‍ കോടതിയില്‍ പറഞ്ഞിരിക്കുന്നത്. ഇത്രയും ആളുകള്‍ സംഘടിച്ച് അക്രമം ഉണ്ടാക്കുമെന്ന കാര്യം സംസ്ഥാനത്തെ രഹസ്യാന്വേഷണ വിഭാഗത്തിന് മുന്‍കൂട്ടി മനസ്സിലാക്കാന്‍ കഴിഞ്ഞില്ല എന്നത് വിശ്വസിക്കാന്‍ പ്രയാസമാണ്. സമരത്തിനെതിരെ ഹൈക്കോടതി വിധി ഉണ്ടായിട്ടും അതൊന്നും നടപ്പിലാക്കാന്‍ ഭരണകൂടം യാതൊരു താത്പര്യവും കാട്ടിയില്ല എന്നത് ഗൗരവമേറിയ വിഷയമാണ്. ഭരണ കക്ഷികളായ സി.പി.എമ്മും-ബി.ജെ.പിയും സമരത്തിനെതിരെ ഒന്നിച്ചുനില്‍ക്കുകയാണ്. സമരം പൊളിക്കാനാണ് ഇവരുടെ ശ്രമം. ജനരോഷം സമരക്കാര്‍ക്കെതിരെ തിരിക്കാനാണ് ഇരു പാര്‍ട്ടികളും ശ്രമിക്കുന്നത്. സമരത്തെ ദുര്‍ബലാമാക്കാന്‍ അദാനി- സര്‍ക്കാര്‍ കൂട്ടുകെട്ട് പ്രവര്‍ത്തിക്കുന്നതായി സമരസമിതി കണ്‍വീനര്‍ ഫാ. യൂജിന്‍ പെരേര ആരോപിച്ചതും കണക്കിലെടുക്കേണ്ടതുണ്ട്.

അതേസമയം, സമരത്തിന്റെ പേരില്‍ നടക്കുന്ന അക്രമസംഭവങ്ങളെ ഒരു നിലക്കും പ്രോത്സാഹിപ്പിക്കാനാവില്ല. സമരം ചെയ്യാന്‍ ഏതൊരു പൗരനും സംഘടനക്കും അവകാശമുണ്ട്. പക്ഷേ അത്തരം സമരങ്ങള്‍ വര്‍ഗീയ കലാപം ഉള്‍പ്പെടെയുള്ള പ്രക്ഷോഭത്തിലേക്ക് വഴിമാറുമ്പോള്‍, സമരത്തിന്റെ പ്രസക്തിതന്നെ നഷ്ടമാവുകയാണ്. പൊലീസ് സ്റ്റേഷനു നേരെ മാത്രമല്ല, മറ്റ് സമുദായത്തില്‍പെട്ട ആളുകളും അവരുടെ വീടുകളും അക്രമത്തിനിരയായി എന്നത് ഗൗരവമര്‍ഹിക്കുന്ന വിഷയമാണ്.

തുറമുഖ നിര്‍മാണം കൊണ്ടും പുലിമുട്ട് നിര്‍മാണംകൊണ്ടും പ്രകൃതി വൈരൂപ്യമോ മത്സ്യശോഷണമോ മത്സ്യ ഹാര്‍ബര്‍ ഉപയോഗത്തിന് തടസ്സമോ വരില്ല എന്നാണ് മത്സ്യ തൊഴിലാളികളുടെ ആശങ്കയിലുള്ള സര്‍ക്കാറിന്റെ ഉറപ്പ്. എന്നാല്‍, പുലിമുട്ടിന്റെ മൂന്നിലൊരു ഭാഗം തീര്‍ന്നപ്പോഴേക്കും ആര്‍ച്ച് ബിഷപ്പും മത്സ്യത്തൊഴിലാളികളും ചൂണ്ടിക്കാണിച്ചതുപോലെ അതിരൂക്ഷ പാരിസ്ഥിതികാഘാതങ്ങള്‍ സമുദ്രത്തിലും തീരത്തും ഉണ്ടായി. വിഴിഞ്ഞം ഫിഷിങ് ഹാര്‍ബര്‍ ഉപയോഗശൂന്യമായി. മത്സ്യത്തൊഴിലാളികള്‍ക്ക് അവരുടെ പരമ്പരാഗത മത്സ്യബന്ധനത്തിന് വള്ളം ഇറക്കുന്നതിനോ വല കെട്ടുന്നതിനോ മീന്‍ ഉണക്കുന്നതിനോ കഴിയാത്ത സാഹചര്യവും വന്നു. മത്സ്യ ലഭ്യത വളരെ കുറഞ്ഞതിനാല്‍ വിഴിഞ്ഞം, വലിയ തുറ, ചെറിയ തുറ, ബീമാ പള്ളി, കോവളം, ശംഖുമുഖം തുടങ്ങിയ പ്രദേശങ്ങളിലെ മത്സ്യത്തൊഴിലാളികള്‍ കടക്കെണിയിലായി. മത്സ്യബന്ധനത്തില്‍ വന്‍ ഇടിവാണ് സംഭവിച്ചിരിക്കുന്നത്. ചെറുമീനുകള്‍ ഇല്ലാതാവുകയും ചാള, അയല, ചെമ്മീന്‍, ചെമ്പാന്‍ തുടങ്ങിയവരുടെ ലഭ്യത കുറയുകയും ചെയ്തു. ഇതിനു കാരണം വിഴിഞ്ഞം തീരത്തോടു ചേര്‍ന്ന പാറ അടുക്കുകളുടെ നശീകരണവും കപ്പല്‍ചാല്‍ 20 മീറ്റര്‍ വരെ താഴ്ത്തി എടുക്കാന്‍ ഡ്രഡ്ജിങ് നടത്തിയതുമാണെന്നാണ് മത്സ്യതൊഴിലാളികള്‍ ആരോപിക്കുന്നത്. സമരക്കാരുടെ ആശങ്ക പരിഹരിക്കേണ്ടതുണ്ട്. മര്‍ക്കടമുഷ്ടി ഉപേക്ഷിക്കാന്‍ സര്‍ക്കാര്‍ തയാറാവണം. ചര്‍ച്ചയിലൂടെ പരിഹരിക്കാനാവാത്തതായിട്ടൊന്നുമില്ല. സമരക്കാരെ ഇനിയും പ്രകോപിപ്പിച്ചാല്‍ അത് നാടിനുതന്നെ ആപത്തായിരിക്കുമെന്നെങ്കിലും ഭരണകര്‍ത്താക്കള്‍ ഓര്‍ക്കണം.

മത്സ്യത്തൊഴിലാളികളെ പുനരധിവസിപ്പിക്കുമെന്ന് പറയുന്നുണ്ടെങ്കിലും മത്സ്യത്തൊഴിലാളികള്‍ വിവിധ ആവശ്യങ്ങള്‍ ഉന്നയിച്ച് ഇപ്പോഴും സമരത്തിലാണ്.

വള്ളങ്ങളും വലകളുമുപയോഗിച്ചാണ് സമരക്കാര്‍ റോഡ് ഉപരോധിച്ചത്. വിമാനത്താവളത്തിലേക്കുള്ള റോഡുള്‍പ്പടെ വിവിധ പ്രധാനറോഡുകള്‍ സമരക്കാര്‍ ഉപരോധിച്ചു. ഇതോടെ വിദ്യാര്‍ത്ഥികളും യാത്രക്കാരും റോഡില്‍ കുടുങ്ങി. സമരക്കാരുടെ ആവശ്യങ്ങള്‍ അംഗീകരിക്കുന്നത് വരെ സമരം തുടരുമെന്ന് സമരസമിതി അറിയിച്ചു.