WHTASAPP – Chandrika Daily

സ്‌പൈവെയര്‍ ആക്രമണം : വാട്‌സാപ്പ് ഉടന്‍ അപ്‌ഡേറ്റ് ചെയ്യാന്‍ നിര്‍ദേശം

Test User — Wed, 15 May 2019 10:13:44 +0000

അനധികൃതമായി ഉപയോക്താക്കളുടെ വിവരം ശേഖരിക്കുന്ന സ്‌പൈവെയര്‍ ആക്രമണം നേരിട്ടതിനെ തുടര്‍ന്ന് ഉപയോക്താക്കളോട് വാട്ട്‌സാപ്പ് ആപ്ലിക്കേഷന്‍ അപ്‌ഡേറ്റ് ചെയ്യാന്‍ വാട്ട്‌സാപ്പ് അഭ്യര്‍ഥിച്ചു.
വാട്ട്‌സാപ്പ് കോളിലൂടെയാണ് ആപ്പിന്റെ നിയന്ത്രണം സ്‌പൈവെയര്‍ ഏറ്റെടുക്കുന്നത്. ആഗോളവ്യാപകമായി ഈ സൈബര്‍ തട്ടിപ്പ് സ്ഥിരീകരിച്ചിട്ടുണ്ടെന്നും വാട്ട്‌സാപ്പ് അറിയിച്ചു. അടുത്ത 48 മണിക്കൂറിനുള്ളില്‍ ഇന്ത്യയിലെ ഉപയോക്താക്കള്‍ക്ക് പുതിയ അപ്‌ഡേറ്റ് ലഭിക്കും.
മറ്റുള്ളവരുടെ വിവരങ്ങള്‍ ചോര്‍ത്തി കുറ്റകൃത്യങ്ങള്‍ക്ക് ഉപയോഗിക്കുന്ന മാല്‍വെയറുകള്‍ എന്നതരം പ്രോഗ്രാമുകളിലാണ് സ്‌പൈവെയറുകളെയും സൈബര്‍ വിദഗ്ധര്‍ ഉള്‍പ്പെടുത്തിയിരിക്കുന്നത്. അനുവാദമില്ലാതെ ഒരു ആപ്ലിക്കേഷനില്‍ പ്രവര്‍ത്തിക്കുകയും വിവരം ചോര്‍ത്തുകയും ചെയ്യുന്ന പ്രോഗ്രാമുകളാണ് സ്‌പൈവെയറുകള്‍.

ശ്രീലങ്കയില്‍ ഫെയ്‌സ്ബുക്കിനും വാട്‌സ്ആപ്പിനും വിലക്ക്

Test User — Mon, 13 May 2019 12:44:34 +0000

ഈസ്റ്റര്‍ ദിനത്തിലെ സ്‌ഫോടന പരമ്പരകളുടെ പശ്ചാത്തലത്തില്‍ ശ്രീലങ്കയില്‍ ചില സോഷ്യല്‍ മീഡിയ ആപ്ലിക്കേഷനുകള്‍ നിരോധിച്ചു. ഫെയ്‌സ്ബുക്ക്, വാട്‌സ്ആപ്പ് തുടങ്ങിയ ആപ്ലിക്കേഷനുകള്‍ക്കാണ് താല്‍കാലിക വിലക്ക്.
മുസ്ലിം വിരുദ്ധ സംഘര്‍ഷങ്ങള്‍ കലാപത്തിലേക്ക് നീങ്ങുന്നതിനെ തുടര്‍ന്നാണ് താല്‍ക്കാലിക വിലക്ക്.
രാജ്യത്ത് മുസ്ലിം പള്ളികളും, മുസ്ലിങ്ങളുടെ കടകളും വലിയ തോതില്‍ ആക്രമിക്കപ്പെടുന്നുണ്ട്. അക്രമങ്ങള്‍ക്ക് കാരണമായി എന്ന് കരുതുന്ന ഫെയ്‌സ്ബുക്ക് വിവാദ പോസ്റ്റ് ചെയ്ത 38കാരനായ അബ്ദുള്‍ ഹമീദ് മുഹമ്മദ് ഹൗസറിനെ പൊലീസ് അറസ്റ്റ് ചെയ്തു. ഇത് ഭീഷണി പോസ്റ്റാണെന്ന് തെറ്റിദ്ധരിച്ച് പ്രാദേശിക തലത്തില്‍ സംഘര്‍ഷം പൊട്ടിപ്പുറപ്പെട്ടതോടെയായിരുന്നു അറസ്റ്റ്. ഈ പശ്ചാത്തലത്തില്‍ വ്യാജ വാര്‍ത്തകള്‍ ചെറുക്കാനും കുപ്രചാരണങ്ങളില്‍ ആളുകള്‍ വീഴാതിരിക്കാനുമാണ് സര്‍ക്കാര്‍ സമൂഹമാധ്യമങ്ങള്‍ക്ക് ഏര്‍പ്പെടുത്തിയ വിലക്ക്.

അഫ്ഗാനിസ്താനില്‍ വാട്ട്‌സാപ്പിന് നിരോധനം

chandrika — Sat, 04 Nov 2017 07:21:34 +0000

അഫ്ഗാനിസ്താനില്‍ പ്രമുഖ മെസേജിങ് ആപ്പായ വാട്ട്‌സാപ്പിന് നിരോധനം. വെള്ളിയാഴ്ച മുതലാണ് അഫ്ഗാനിസ്താനില്‍ വാട്ട്‌സാപ്പിന് താല്‍ക്കാലിക നിരോധനം ഏര്‍പ്പെടുത്തിയത്. ഇരുപത് ദിവസത്തേക്കാണ് നിരോധനം.
അഫ്ഗാന്‍ കമ്മ്യൂണിക്കേഷന്‍ ആന്റ് ഇന്‍ഫര്‍മേഷന്‍ മന്ത്രാലയം ഇതുസംബന്ധിച്ച നിര്‍ദ്ദേശം രാജ്യത്തെ എല്ലാ ടെലികോം ദാതാക്കള്‍ക്കും അയച്ചു. അതേസമയം വാട്ട്‌സാപ്പിനെ മാത്രമല്ല മറ്റൊരു ആപ്പായ ടെലിഗ്രാമിനെയും വിലക്കിയതായും റിപ്പോര്‍ട്ടുണ്ട്. രാജ്യസുരക്ഷ മുന്‍നിര്‍ത്തിയാണ് വാട്ട്‌സാപ്പിനെ നിരോധിച്ചതെന്ന വാര്‍ത്ത അഫ്ഗാനില്‍ പരന്നിരുന്നു. എന്നാല്‍ ഇതു നിഷേധിച്ച ടെലികോം മന്ത്രാലയം ആപ്പിനെതിരെ വര്‍ധിച്ചുവരുന്ന പരാതിയുടെ സാഹചര്യത്തിലാണ് താല്‍കാലിക നിരോധനം എന്ന് പറഞ്ഞു.

അതേസമയം അഫ്ഗാന്‍ ഫ്രീഡം ഓഫ് സ്പീച് ആന്റ് ആക്ടിവിസ്റ്റ് എക്‌സിക്യുട്ടീവ് ഡയറക്ടര്‍ അബദുല്‍ മുജീബ് ഖാല്‍വാദ്ഗര്‍ നടപടിക്കെതിരെ രംഗത്തെത്തി. രാജ്യത്തെ പൗരന്‍മാരില്‍ ഭൂരിഭാഗവും അവരുടെ ആശയങ്ങും നിലപാടുകളും വാട്ട്‌സാപ്പിലൂടെയുള്ളയാണ് പങ്കുവെക്കുന്നതെന്നും രാജ്യത്തിന്റെ ഭരണഘടന പ്രകാരം നിരോധനം അനീതിയും നിയമവിരുദ്ധമാണെന്നും അദ്ദേഹം പറഞ്ഞു.