പൊതുവിപണിയില്‍ അനിയന്ത്രിതമായ വിലക്കയറ്റം പിടിച്ചു നിര്‍ത്താനാവാത്ത സര്‍ക്കാര്‍ സിവില്‍ സ്‌പ്ലൈസ് സ്റ്റോറുകളില്‍ കഴിഞ്ഞ എട്ട് വര്‍ഷമായി അവശ്യ ഉല്‍പന്നങ്ങള്‍ക്ക് വിലവര്‍ദ്ധിച്ചിട്ടില്ലെന്ന് പ്രചരിപ്പിക്കുകയാണു. എന്നാല്‍ റേഷന്‍ കടകള്‍, മാവേലി സ്റ്റോറുകള്‍, സിവില്‍ സ്‌പ്ലൈസ് സ്റ്റോറുകള്‍ എന്നിവിടങ്ങളില്‍ അവശ്യസാധനങ്ങള്‍ ലഭ്യമാവാത്ത അവസ്ഥയാണുള്ളത്. വിലവര്‍ദ്ധനവുകൊണ്ട് പൊറുതിമുട്ടുന്ന വീട്ടമ്മമാര്‍ക്ക് ഇരട്ടി പ്രഹരമെന്നോണം കുത്തഴിഞ്ഞ മദ്യനയം കൂടി സര്‍ക്കാര്‍ നടപ്പിലാക്കുകയാണ്. മുഴുവന്‍ കുടുംബങ്ങള്‍ക്കും കിറ്റ് നല്‍കാന്‍ ആവില്ലെന്ന മുന്‍കൂര്‍ ജാമ്യം വകുപ്പ് മന്ത്രി ആദ്യമേ എടുത്തുകഴിഞ്ഞു.

ഓണക്കാലത്ത് ജനങ്ങളെ ബുദ്ധിമുട്ടിലാക്കാതെ പൊതുവിപണിയില്‍ എത്രയും വേഗം സര്‍ക്കാര്‍ ഇടപെടുകയും സിവില്‍ സപ്ലൈസ് സ്റ്റോറുകളില്‍ അവശ്യ സാധനങ്ങള്‍ ലഭ്യമാകണം എന്നും ആവശ്യപ്പെട്ടുകൊണ്ട് കേരളത്തിലെ വീട്ടമ്മമാര്‍ക്കുവേണ്ടി സമര പരിപാടികളുമായി വനിതാ ലീഗ് മുന്നോട്ട് പോകുകയാണ്.ഓഗസ്റ്റ് 14നു മുഴുവന്‍ പഞ്ചായത്ത് മുന്‍സിപ്പല്‍ കേന്ദ്രങ്ങളിലും വനിതാ ലീഗ് പ്രവര്‍ത്തകര്‍ കഞ്ഞിവച്ച് പ്രതിഷേധിക്കുമെന്ന് വനിതാ ലീഗ് സംസ്ഥാന കമ്മറ്റി അറിയിച്ചു.

മുത്വലാഖ് ബില്ല് രാജ്യസഭാ സെലക്ട് കമ്മറ്റിക്ക് വിടാന്‍ കേന്ദ്രസര്‍ക്കാര്‍ തയ്യാറാവണമെന്ന് പി.കെ കുഞ്ഞാലിക്കുട്ടി എം.പി ആവശ്യപ്പെട്ടു. രാജ്യത്തെ ന്യൂനപക്ഷ വിഭാഗങ്ങളെ ബാധിക്കുന്ന ബില്ലിനെ പറ്റി ന്യൂപക്ഷ വിഭാഗങ്ങളുമായി കൂടിയാലോചന നടത്താന്‍ പോലും കേന്ദ്ര സര്‍ക്കാര്‍ തയ്യാറാവാത്തത് എന്തു കൊണ്ടാണന്ന് കുഞ്ഞാലിക്കുട്ടി ചോദിച്ചു. പാര്‍ലമെന്റിനകത്തും പുറത്തും ബില്ലിനെ പാര്‍ട്ടി എതിര്‍ക്കുകയാണന്നും അത് തുടരുമെന്നും കുഞ്ഞാലിക്കുട്ടി പറഞ്ഞു. മറ്റുള്ളവരുടെ അഭിപ്രായങ്ങള്‍ കേള്‍ക്കാന്‍ പോലും കേന്ദ്ര സര്‍ക്കാര്‍ തയ്യാറാവുന്നില്ല. നിലവിലുള്ള രൂപത്തില്‍ ബില്ല് അനുവദിക്കാനാവില്ല. ബില്ല് ഇപ്പോഴത്തെ രൂപത്തില്‍ പാസ്സാക്കരുതെന്ന് എല്ലാ പ്രതിപക്ഷ കക്ഷികളും ആവശ്യപ്പെട്ടിട്ടുണ്ട്. സ്ത്രീകളെ സംരക്ഷിക്കുന്നതിനുള്ള എല്ലാ അനുകൂല നീക്കങ്ങള്‍ക്കും ഒപ്പം മുസ്ലിം ലീഗും ഉണ്ടാവും. എന്നാല്‍, ഈ ബില്ല് സ്ത്രീകളെ സംരക്ഷിക്കുന്നതിനു വേണ്ടിയുള്ളതല്ല. ഇതിലെ വ്യവസ്ഥകള്‍ ഇരകളെ ഒന്നുകൂടി കഷ്ടപ്പെടുത്തുന്ന വിധത്തിലുള്ളതാണെന്നും രാജ്യസഭയില്‍ ഭരണകക്ഷിക്ക് വേണ്ടത്ര ഭൂരിപക്ഷം ഇല്ലാത്തതുകൊണ്ട് മാത്രമാണ് പാസ്സാക്കാന്‍ കഴിയാതിരുന്നതെന്നും കുഞ്ഞാലിക്കുട്ടി കൂട്ടിച്ചേര്‍ത്തു.

മുത്വലാഖ് കേസില്‍ സുപ്രിംകോടതിയില്‍ ഹരജി നല്‍കിയ അഖിലേന്ത്യാ മുസ്ലിം വ്യക്തിനിയമ ബോര്‍ഡിനോട് പോലും ആലോചിക്കാതെ തയ്യാറാക്കിയ ബില്ല് ന്യൂനപക്ഷങ്ങളെ ലക്ഷ്യംവച്ചുള്ളതാണെന്ന് ആര്‍.എസ്.പി നേതാവ് എന്‍.കെ പ്രേമചന്ദ്രന്‍ എം.പി അഭിപ്രായപ്പെട്ടു. കേസില്‍ ഉത്തരവ് പുറപ്പെടുവിച്ചത് സുപ്രിംകോടതിയുടെ സമ്പൂര്‍ണ ബെഞ്ചല്ല. ഭരണഘടനാബെഞ്ച് വ്യത്യസ്ത അഭിപ്രായമാണ് കേസില്‍ നടത്തിയത്. ബെഞ്ചിലെ ഭൂരിപക്ഷ ജഡ്ജിമാര്‍ മുത്വലാഖ് അസാധുവാക്കിയെങ്കിലും മറ്റു രണ്ടുജഡ്ജിമാര്‍ മുത്വലാഖ് സാധുവാണെന്ന് അഭിപ്രായപ്പെട്ടിരുന്നു. അതിനാല്‍ മുത്വലാഖ് സംവിധാനത്തെ ഒരിക്കലും ക്രിമിനല്‍ കുറ്റമാക്കേണ്ടതില്ല. മുത്വലാഖ് ക്രിമിനല്‍വല്‍കരിച്ചത് ഏകസിവില്‍കോഡ് നടപ്പാക്കാനുള്ള നീക്കത്തിന്റെ ഭാഗമായാണ്. ഈ വിഷയത്തില്‍ വനിതാ ലീഗ് നടത്തുന്ന എല്ലാ പ്രതിഷേധപരിപാടികള്‍ക്കും ആര്‍.എസ്.പിയുടെ പിന്തുണ ഉണ്ടാവുമെന്നും പ്രേമചന്ദ്രന്‍ പറഞ്ഞു.

സ്ത്രീകള്‍ നേരിടുന്ന ഏറ്റവും വലിയ പ്രശ്‌നം മുത്വലാഖ് അല്ലെന്ന് മുസ്ലിംലീഗ് ഓര്‍ഗനൈസിംഗ് സിക്രട്ടറി ഇ.ടി മുഹമ്മദ് ബഷീര്‍ പറഞ്ഞു. സ്ത്രീകള്‍ നേരിടുന്ന വലിയ പ്രശ്‌നങ്ങളിലൊന്ന് മദ്യപാനവുമായി ബന്ധപ്പെട്ടുള്ളതാണ്. എന്നാല്‍, മദ്യപാനം പ്രോല്‍സാഹിപ്പിക്കുന്ന നടപടിയാണ് സര്‍ക്കാരില്‍ നിന്നുണ്ടാവുന്നത്. യാതൊരുനടപടിക്രമങ്ങളും പാലിക്കാതെയാണ് ബില്ല് തയ്യാറാക്കിയതെന്നും അദ്ദേഹം ആരോപിച്ചു.

സ്ത്രീകള്‍ നേരിടുന്ന ഏറ്റവും വലിയ പ്രശ്‌നമായി മുത്വലാഖിനെ ചിത്രീകരിക്കുകയാണ് സര്‍ക്കാര്‍ ചെയ്യുന്നതെന്ന് മുസ്ലിംലീഗ് ദേശീയ ട്രഷറര്‍ പി.വി അബ്ദുല്‍ വഹാബ് എം.പി പറഞ്ഞു. വളരെ ചെറിയൊരു വിഭാഗം മുസ്ലിംസ്ത്രീകള്‍ നേരിടുന്ന പ്രശ്‌നമാണ് ബി.ജെ.പിയുടെ ഏറ്റവും വലിയ ആശങ്കയെന്നും വഹാബ് പരിഹസിച്ചു. മുസ്ലിംകളുടെ ആചാരങ്ങളെ തെറ്റദ്ധരിപ്പച്ച് അവമതിക്കാനുള്ള ശ്രമമാണ് നടക്കുന്നത്. അതിന് ബി.ജെ.പി എന്നല്ല അതിലും വലിയവര്‍ ശ്രമിച്ചാലും സാധ്യമല്ലന്ന് അദ്ദേഹം പറഞ്ഞു. വനിതാലീഗ് ദേശീയ പ്രസിഡന്റ് തഷരിഫ് ജഹാന്‍, ദേശീയ ജനറല്‍ സിക്രട്ടറി അഡ്വ. നൂര്‍ബിനാ റശീദ്, അഡ്വ. ജയന്തി രാജന്‍, കെ.പി മറിയുമ്മ, ഖദീജ പി, കുല്‍സു ടീച്ചര്‍, ഷസ്മിനാസ്, എം.എസ്.എഫ് ദേശീയ വൈസ് പ്രസിഡന്റ് അഹമദ് സാജു, ദില്ലി കെ.എം.സി.സി സിക്രട്ടറി മുഹമ്മദ് ഹലീം എന്നിവരും സംസാരിച്ചു.

സ്വന്തം ലേഖകന്‍
ന്യൂഡല്‍ഹി: രാജ്യത്തെ മുസ്ലിം കുടുംബങ്ങളെ ശിഥിലീകരിക്കാനുള്ള സംഘപരിവാര്‍ നീക്കമാണ് മുത്തലാഖ് ബില്ലന്നും അതിനാല്‍ തന്നെ സര്‍ക്കാര്‍ നീക്കം ഒരു കാരണവശാലും അംഗീകരിക്കാന്‍ സാധ്യമെല്ലന്നും വനിതാ ലീഗ് ദേശീയ ജനറല്‍ സിക്രട്ടറി അഡ്വ നൂര്‍ബീനാ റഷീദ് ദില്ലിയില്‍ പത്രസമ്മേളനത്തില്‍ പറഞ്ഞു. മുത്തലാഖ് ബില്ലിനെതിരെ മാര്‍ച്ച് 8 അന്താരാഷ്ട്ര വനിതാ ദിനത്തില്‍ പാര്‍ലമെന്റിലേക്ക് മാര്‍ച്ച് നടത്തുമെന്നും അവര്‍ അറിയിച്ചു. ലോക്‌സഭ പാസ്സാക്കിയ ബില്ല് വൈരുദ്ധ്യങ്ങള്‍ നിറഞ്ഞതാണ്. ഭര്‍ത്താവിനെ മൂന്ന് വര്‍ഷം ജയിലിലിടുന്നതോടപ്പം ചിലവിന് കൊടുക്കാനും നിര്‍ദ്ദേശിക്കുന്നത് വൈരുദ്ധ്യത്തിന് തെളിവാണ് അഡ്വ നൂര്‍ബീന റഷീദ് പറഞ്ഞു. മുസ്ലിം സ്ത്രീയുടെ കണ്ണീരൊപ്പാനല്ല മറിച്ച് കുടുംബങ്ങളെ അനാഥമാക്കി അവരെ ദുരിതകയത്തിലേക്ക് തള്ളി വിടാനാണ് കേന്ദ്ര സര്‍ക്കാര്‍ നീക്കം. വനിതാ സംഘടനകളുടെ നിരന്തര ആവശ്യത്തിനൊടുവില്‍ രൂപം കൊണ്ട കുടുംബകോടതികളെ മറികടന്നുള്ള അനുരജ്ഞന രീതികള്‍ കുടുംബങ്ങളെ ശിഥിലീകരിക്കുന്നതിലേക്കാണ് കൊണ്ടുചെന്നത്തിക്കുകയന്നും അഡ്വ. നൂര്‍ബീന റഷീദ് കൂട്ടിച്ചേര്‍ത്തു. രാജ്യത്തിന്റെ വിവിധ ഭാഗങ്ങളില്‍ നിന്ന് വനിതകള്‍ മാര്‍ച്ചില്‍ പങ്കെടുക്കുമെന്ന് നേതാക്കള്‍ അറിയിച്ചു. അഡ്വ നൂര്‍ബീന റഷീദ് വനിത ലീഗ് സോണല്‍ സിക്രട്ടറി പി ജയന്തി എന്നിവര്‍ വാര്‍ത്താ സമ്മേളനത്തില്‍ പങ്കെടുത്തു.