womens cricket – Chandrika Daily

ഇന്ത്യയുടെ വനിതാ ക്രിക്കറ്റ് ചരിത്രവിജയം; കിരീടത്തോടൊപ്പം താരങ്ങളുടെ ബ്രാന്‍ഡ് മൂല്യവും ആകാശനീളം

webdesk18 — Mon, 03 Nov 2025 15:04:15 +0000

മുംബൈ: ലോകകപ്പ് ഫൈനലില്‍ ദക്ഷിണാഫ്രിക്കയെ 52 റണ്‍സിന് തകര്‍ത്ത ഇന്ത്യ വനിതാ ക്രിക്കറ്റ് ടീം ചരിത്രം കുറിച്ചു. ഹര്‍മന്‍പ്രീത് കൗറിന്റെ നേതൃത്വത്തില്‍ ഇന്ത്യക്ക് ആദ്യമായി വനിതാ ഏകദിന ലോകകപ്പ് കിരീടം ഉയര്‍ത്താനായി. ഫൈനലിലെ ഈ അതിഭയങ്കര പോരാട്ടം ഇന്ത്യയിലെ വനിതാ ക്രിക്കറ്റിന് ഒരു പുതുയുഗം തുറന്നുകൊടുത്തു.

കിരീടനേട്ടത്തോടൊപ്പം താരങ്ങളുടെ ബ്രാന്‍ഡ് വാല്യു 35 ശതമാനം വരെ ഉയരും എന്നാണ് ബിസിനസ് സ്റ്റാന്‍ഡേഡ് റിപ്പോര്‍ട്ട്. പരസ്യ മേഖലയില്‍ വലിയ പ്രതിഫലം ലഭിക്കുമെന്നാണ് കണക്കാക്കുന്നത്.

1983ല്‍ കപില്‍ ദേവ് ഇന്ത്യക്കായി ലോകകപ്പ് നേടിയതുപോലെതന്നെയാണ് ഈ വിജയം സ്ത്രീകളുടെ ക്രിക്കറ്റിന്റെ ”മൈല്‍സ്റ്റോണ്‍” എന്ന് വിദഗ്ധര്‍ വിലയിരുത്തുന്നു. ഫൈനലില്‍ തിളങ്ങി മാച്ച് ഓഫ് ദി ഫൈനല്‍ നേടിയ ഷഫാലി വര്‍മ, ടൂര്‍ണമെന്റിലെ താരമായ ദീപ്തി ശര്‍മ്മ, ഏറ്റവും കൂടുതല്‍ റണ്‍സ് നേടിയ സ്മൃതി മന്ദാന, ഓസ്‌ട്രേലിയക്കെതിരെ സെമിയില്‍ മികവ് തെളിയിച്ച ജെമീമ റോഡ്രിഗസ് എന്നിവര്‍ വിജയത്തിന്റെ മുഖ്യശില്പികളായി.

സ്‌പോര്‍ട്‌സ് മാര്‍ക്കറ്റിങ് കമ്പനി ബേസ്ലൈന്‍ വെഞ്ചേഴ്‌സ് സഹസ്ഥാപകന്‍ വിശാല്‍ ജയ്‌സന്റെ വിലയിരുത്തല്‍പ്രകാരം, ദീപ്തി, ഷഫാലി, ജെമീമ എന്നിവരുടെ ബ്രാന്‍ഡ് മൂല്യം 20 മുതല്‍ 30 ശതമാനം വരെ ഉയരും. പരസ്യലോകം ഇനി ഇവരെ സൗന്ദര്യ ഉല്‍പ്പന്നങ്ങളില്‍ മാത്രം ഒതുക്കില്ല; ബാങ്കിങ്, ഫിനാന്‍സ്, ഇന്‍ഷുറന്‍സ്, ടെക്നോളജി മേഖലകളിലേക്കും ഇവര്‍ കടക്കും.

ഹര്‍മന്‍പ്രീതും സ്മൃതി മന്ദാനയും 35 ശതമാനം വരെ ബ്രാന്‍ഡ് മൂല്യം വര്‍ധിപ്പിക്കുമെന്ന് റിപ്പോര്‍ട്ടുകള്‍ സൂചിപ്പിക്കുന്നു. സ്മൃതി മന്ദാനയുടെ ആസ്തി 3235 കോടി രൂപയും, ഹര്‍മന്‍പ്രീതിന്റേത് ഏകദേശം 25 കോടിയുമാണ്. താരങ്ങളുടെ ബ്രാന്‍ഡ് മൂല്യത്തില്‍ പുരുഷ താരങ്ങളായ വിരാട് കോഹ്ലി (231 മില്യന്‍ ഡോളര്‍) എം.എസ്. ധോണി (102.9 മില്യന്‍ ഡോളര്‍) എന്നിവരോടു താരതമ്യപ്പെടുത്തുമ്പോഴും വളര്‍ച്ച ശ്രദ്ധേയമാണ്.

ഐ.സി.സി സമ്മാനമായ 39 കോടി രൂപയ്ക്ക് പുറമെ, ബി.സി.സി.ഐയുടെ 51 കോടി രൂപയുടെ പ്രത്യേക ബോണസും പ്രഖ്യാപിച്ചു. ടീമംഗങ്ങള്‍ക്കും കോച്ചിനും സപ്പോര്‍ട്ട് സ്റ്റാഫിനും ഉള്‍പ്പെടെ ഈ തുക ലഭിക്കും. ബി.സി.സി.ഐ സെക്രട്ടറി ദേവജിത് സൈകിയയാണ് ഈ പാരിതോഷികം പ്രഖ്യാപിച്ചത്.

ലോകകപ്പ് സമ്മാനത്തുകയും ഈ വര്‍ഷം 300 ശതമാനം വര്‍ധിപ്പിച്ച് 1.4 കോടി ഡോളറായി ഉയര്‍ത്തിയിട്ടുണ്ട്. ജേതാക്കളായ ഇന്ത്യയ്ക്ക് 44.8 ലക്ഷം ഡോളറും (ഏകദേശം 39 കോടി), റണ്ണേഴ്‌സ്അപ്പായ ദക്ഷിണാഫ്രിക്കയ്ക്ക് 19.88 കോടിയും ലഭിക്കും.

സെമി ഫൈനലിസ്റ്റുകളായ ഇംഗ്ലണ്ടും ആസ്‌ട്രേലിയക്കും 9.94 കോടി രൂപ വീതം ലഭിക്കും.

എന്നാല്‍, കഴിഞ്ഞ വര്‍ഷം പുരുഷ ടീമിന് ബി.സി.സി.ഐ നല്‍കിയ 125 കോടി രൂപയുമായി താരതമ്യപ്പെടുത്തുമ്പോള്‍ വനിതകളുടെ സമ്മാനം പകുതിപോലുമല്ലെന്ന് വിമര്‍ശനങ്ങളും ഉയരുന്നുണ്ട്.

വനിതാ ക്രിക്കറ്റിന്റെ സാമൂഹ്യ-ആര്‍ഥിക സ്വാധീനവും ഈ വിജയത്തോടെ ദൃഢമായി ഉയര്‍ന്നിരിക്കുകയാണ്. ”ഇത് വെറും കിരീടനേട്ടമല്ല, പുതിയ തലമുറക്ക് പ്രചോദനമാണ്,” എന്ന് ബി.സി.സി.ഐ സെക്രട്ടറി വ്യക്തമാക്കി.

വനിതാ ലോകകപ്പിനേയും ചൂടുപിടിപ്പിച്ച് ഹസ്തദാന വിവാദം; പാകിസ്ഥാന് കൈ കൊടുക്കാതെ ഇന്ത്യ

webdesk14 — Sun, 05 Oct 2025 12:26:22 +0000

കൊളംബോ: ഏഷ്യ കപ്പിലെ ചൂട് പിടിച്ച ഹസ്തദാന വിവാദത്തിൻ്റെ ചുവടുപിടിച്ച് വനിതാ ലോകകപ്പിലും പാകിസ്ഥാൻ കൈ കൊടുക്കാതെ ഇന്ത്യ. വനിതാ ലോകകപ്പിലെ ഇന്ത്യ-പാകിസ്ഥാൻ മത്സരത്തിന് മുന്നോടിയായി ഇരു ക്യാപ്റ്റൻമാരും ഹസ്തദാനത്തിന് തയ്യാറായില്ല. ലോകകപ്പിലെ ഗ്രൂപ്പ് ഘട്ടത്തിൽ ഇന്ത്യയുടെ രണ്ടാം മത്സരമാണിത്.

കൊളംബോയിൽ നടക്കുന്ന വനിതാ ലോകകപ്പ് 2025 മത്സരത്തിൽ ടോസിന് പിന്നാലെ ക്യാപ്റ്റൻമാരായ ഹർമൻപ്രീത് കൗറും ഫാത്തിമ സനയും ഹസ്തദാനം ഒഴിവാക്കുകയായിരുന്നു. നേരത്തെ ടോസ് നേടിയ പാകിസ്ഥാൻ ബൗളിങ് തിരഞ്ഞെടുത്തു. പ്രേമദാസ സ്റ്റേഡിയത്തിൽ നടക്കുന്ന ഗ്രൂപ്പ് മത്സരത്തിൽ ഇന്ത്യയാണ് ആദ്യം ബാറ്റ് ചെയ്യുന്നത്.

കളിക്കളത്തിലെ അനാവശ്യമായ സംഭവങ്ങൾ ഒഴിവാക്കാൻ ഐസിസി മാച്ച് ഒഫീഷ്യലുകൾ മത്സര ദിനത്തിൽ പ്രോട്ടോക്കോളുകളെ കുറിച്ച് ഇരു ടീമുകളെയും പ്രത്യേകം ബോധവൽക്കരിച്ചിരുന്നു.

നേരത്തെ ഇന്ത്യ ചാംപ്യന്മാരായ ഏഷ്യാ കപ്പിൽ ഇന്ത്യൻ പുരുഷ ടീം പാകിസ്ഥാൻ താരങ്ങൾക്ക് ഹസ്തദാനം നൽകിയിരുന്നില്ല. ബിസിസിഐ നിർദ്ദേശത്തെ തുടർന്ന് വനിതാ താരങ്ങളും പാകിസ്ഥാനോട് ഇതേ നിലപാട് തുടരുകയായിരുന്നു.

വനിതാ ലോകകപ്പിൽ ആദ്യ മത്സരത്തിൽ ഇന്ത്യ ശ്രീലങ്കയെ തോൽപ്പിച്ചിരുന്നു. അതേസമയം, ബംഗ്ലാദേശിനോട് പരാജയപ്പെട്ട പാകിസ്ഥാന് ലോകകപ്പ് പ്രതീക്ഷകൾ നിലനിർത്താൻ ഇന്ന് ജയം അനിവാര്യമാണ്.

113 റണ്‍സിന് ഓളൗട്ടായി ഇന്ത്യ; ബംഗ്ലാദേശിനെതിരെ ഞെട്ടിക്കുന്ന തോല്‍വി

webdesk14 — Sun, 16 Jul 2023 16:06:28 +0000

ബംഗ്ലാദേശിനെതിരെയുള്ള ആദ്യ ഏകദിന മത്സരത്തില്‍ ഇന്ത്യന്‍ വനിതാ ടീമിന് തോല്‍വി. ഡക് വര്‍ത്ത് നിയമപ്രകാരം 40 റണ്‍സിനാണ് ഇന്ത്യ തോല്‍വി വഴങ്ങേണ്ടി വന്നത്. മഴ മൂലം 44 ഓവറാക്കി ചുരുക്കിയ മത്സരത്തില്‍ ബംഗ്ലാദേശ് 43 ഓവറില്‍ 152 റണ്‍സിന് ഓളൗട്ടായി. എന്നാല്‍, മറുപടി ബാറ്റിംഗിനിറങ്ങിയ ഇന്ത്യയാവട്ടെ 15.5 ഓവറില്‍ 113 റണ്‍സിന് തോല്‍വി സമ്മതിച്ചു.

ബംഗ്ലാദേശിനെതിരായ ടി20 പരമ്പര ഇന്ത്യ നേടിയിരുന്നു. രണ്ടാം മത്സരത്തിന്റെ അവസാന ഓവറില്‍ നാല് വിക്കറ്റ് വീഴ്ത്തിയ പരമ്പരയില്‍ തിളങ്ങിയ മലയാളി താരം മിന്നു മണി ഏകദിന പരമ്പരയില്‍ കളിക്കുന്നില്ല. 39 റണ്‍സ് നേടിയ ക്യാപ്റ്റന്‍ നിഗര്‍ സുല്‍ത്താനയാണ് ബംഗ്ലാദേശിന്റെ ടോപ്പ് സ്‌കോറര്‍. ഫര്‍ഗാന ഹഖ് 27 റണ്‍സെടുത്ത് പുറത്തായി.

ബംഗ്ലാദേശ് നിരയില്‍ അഞ്ച് പേര്‍ ഒറ്റയക്കത്തിനു പുറത്തായി. ഇവരില്‍ ഒരാള്‍ പരുക്കേറ്റ് മടങ്ങിയതാണ്. ഇന്ത്യക്കായി അരങ്ങേറിയ അമഞ്‌ജോത് കൗര്‍ 4 വിക്കറ്റ് വീഴ്ത്തി.