കൊളംബിയ 1 (3) – ഇംഗ്ലണ്ട് 1 (4)

#COLENG

പ്രിയപ്പെട്ട ടീം ലോകകപ്പിന്റെ നോക്കൗട്ട് ഘട്ടത്തില്‍ ഷൂട്ടൗട്ടില്‍ കൊല്ലപ്പെടുന്നത് സങ്കടപ്പെടുത്തുന്ന കാര്യമാണ്. അര്‍ജന്റീന പുറത്തായപ്പോള്‍ (അതിനു മുമ്പുതന്നെ) കൊളംബിയക്കൊപ്പം കൂടാന്‍ കാരണം അവരുടെ കൗശലക്കാരനായ ഹോസെ പെക്കര്‍മാന്‍ എന്ന പരിശീലകനായിരുന്നു. പക്ഷേ, കളിക്കൊപ്പം കളിബാഹ്യമായ കാര്യങ്ങളും അവസാനം ഷൂട്ടൗട്ടും കാര്യങ്ങള്‍ തീരുമാനിക്കുന്ന മത്സരങ്ങളില്‍ കോച്ച് എത്ര തന്ത്രശാലിയാണെങ്കിലും ഭാഗ്യമാണ് കാര്യങ്ങള്‍ തീരുമാനിക്കുക. ഓത്ക്രിതി അറേനയിലും അതുതന്നെ സംഭവിച്ചു.

ഹാമിസ് റോഡ്രിഗസിന്റെ അഭാവം പെക്കര്‍മാനെ എത്രമാത്രം ഹതാശനാക്കി എന്നതിന്റെ തെളിവായിരുന്നു ഇത്തവണ ആദ്യമായി അദ്ദേഹം പരീക്ഷിച്ച 4-3-3 ലൈനപ്പ്. ചെറുപ്പക്കാരും അതിവേഗക്കാരുമായ ഇംഗ്ലീഷുകാരെ തടയാന്‍ പ്രതിരോധത്തിന് പ്രാധാന്യം നല്‍കേണ്ടി വരുമെന്നും നിയന്ത്രണം പിടിച്ചെടുക്കുക എന്നതിനേക്കാള്‍ കാത്തിരുന്നു കളിക്കുകയാവും ഉചിതമെന്നുമായിരുന്നു സങ്കല്‍പം. മുന്‍മത്സരങ്ങളില്‍ കൊളംബിയയുടെ കളിശൈലിയുടെ ഹൃദയമായി വര്‍ത്തിച്ച മൂന്നംഗ അറ്റാക്കിങ് മിഡ്ഫീല്‍ഡ് എന്ന ശൈലി തന്നെ ഉപേക്ഷിച്ചു കൊണ്ടുള്ള ഈ തീരുമാനം പ്രീക്വാര്‍ട്ടര്‍ പോലുള്ള ഡു ഓര്‍ ഡൈ മത്സരങ്ങളില്‍ നിര്‍ണായകവുമായിരുന്നു. ഇംഗ്ലണ്ട് കോച്ച് ഗരെത് സൗത്ത്‌ഗേറ്റ് 3-1-4-2 എന്ന സുരക്ഷിത സമവാക്യം തന്നെ പുലര്‍ത്തി.

മധ്യനിരയില്‍ സ്വാതന്ത്ര്യമുള്ള ഒരു മിഡ്ഫീല്‍ഡ് ജനറലായി വര്‍ത്തിക്കുമ്പോള്‍ നന്നായി കളിക്കാറുള്ള ഹുവാന്‍ഫര്‍ ക്വിന്റേറോയെ നമ്പര്‍ 10 റോള്‍ ഏല്‍പ്പിച്ചത്, അതും ഹൈബോളുകളും ഗ്രൗണ്ട് ബോളുകളും ഒരേപോലെ കളിക്കാന്‍ കഴിയുന്ന ഇംഗ്ലണ്ടിനെതിരെ അത്ര നല്ലതായി തോന്നിയില്ല. ക്വഡ്രാഡോ-ഫാല്‍ക്കാവോ ഡബിള്‍ അറ്റാക്കിന് പന്തെത്തിക്കുകയായിരുന്നു ക്വിന്റേറോയുടെ ചുമതലയെങ്കിലും സ്ഥാനംവിട്ടു കയറാത്ത ഇംഗ്ലീഷ് ഡിഫന്‍സ് ആ പദ്ധതിയുടെ മുന തുടക്കത്തിലേ ഒടിച്ചു. ഫലം ക്വിന്റേറോക്ക് പതിവുപോലെ ഡീപ്പിലേക്ക് ഇറങ്ങേണ്ടി വരികയും ആക്രമണത്തിന്റെ ബലം കുറയുകയും ചെയ്തു. സ്‌പേസ് എടുത്ത് കളിക്കുന്ന ക്വഡ്രാഡോയുടെ ചടുലതയെക്കൂടി പെക്കര്‍മാന്റെ ഈ നീക്കം ബാധിച്ചു. ഫാല്‍ക്കാവോക്കാവട്ടെ സ്ഥാനം വിട്ടുകയറാത്ത എതിര്‍ ഡിഫന്‍സ് സ്വാതന്ത്ര്യം ലഭിച്ചതേയില്ല.

ഹാരി കെയ്ന്‍ – സ്റ്റെര്‍ലിങ് – ലിംഗാര്‍ഡ് ത്രയം തുടക്കം മുതല്‍ക്കുതന്നെ ഇംഗ്ലണ്ടിന് പന്തിന്മേല്‍ ആധിപത്യം നല്‍കി. പക്ഷേ, പെക്കര്‍മാന്‍ ഉദ്ദേശിച്ചതു പോലെ കൊളംബിയയുടെ വിത്ഡ്രവിങ് മിഡ്ഫീല്‍ഡര്‍മാര്‍ അവരുടെ ജോലി ഏറെക്കുറെ ഭംഗിയായി നിറവേറ്റി. ഹാരി കെയ്‌നിനെ ബോക്‌സില്‍ കണ്ടെത്തുന്ന ക്രോസുകള്‍ കൊളംബിയന്‍ ബോക്‌സില്‍ അപകടമുണ്ടാക്കുകയും കോര്‍ണറുകള്‍ ലഭിക്കുകയും ചെയ്‌തെങ്കിലും ഇംഗ്ലണ്ട് പിന്നീട് ആ ശൈലി തുടരാന്‍ ശ്രമിക്കാത്തത് അത്ഭുതപ്പെടുത്തി. അതേസമയം, കയറിക്കളിക്കുന്ന വിങ്ബാക്കുകളായിരുന്നു കൊളംബിയന്‍ ആക്രമണത്തിലെ പ്രധാന ഘടകം. പ്രത്യേകിച്ചും ഇടതുഭാഗത്തു നിന്ന് ഓടിക്കയറുന്ന യൊഹാന്‍ മൊഹിക്ക. മൊഹിക്ക പന്തുമായി മുന്നോട്ടു കയറുമ്പോള്‍ ഹോള്‍ഡിങ് ഹാഫ് ആയ ലെര്‍മ അയാളുടെ പൊസിഷന്‍ കവര്‍ ചെയ്യുന്നത് കാണാമായിരുന്നു.

ആദ്യപകുതിയില്‍ ഇരുടീമുകളും വളരെ സൂക്ഷിച്ചാണ് കളിച്ചത്. ഗോളടിക്കുന്നതിനേക്കാള്‍ അടിക്കാന്‍ അനുവദിക്കാതിരിക്കുക എന്നതായിരുന്നു കൊളംബിയന്‍ നയം. ഇംഗ്ലണ്ടാകട്ടെ, അനാവശ്യ റിസ്‌കെടുത്ത് ഗോളടിക്കാന്‍ പോകേണ്ടെന്ന് തീരുമാനിക്കുകയും ചെയ്തു. ഇംഗ്ലീഷ് സെന്റര്‍ ബാക്കുകളും ഹോള്‍ഡറായ ഹെന്റേഴ്‌സണും ഫാല്‍ക്കാവോ-ക്രിന്റേറോ-ക്വഡ്രാഡോ ത്രയത്തെ തങ്ങളുടെ ഏരിയയിലേക്ക് അടുപ്പിച്ചതേ ഇല്ല. മൊഹിക്കയും നേരെ എതിര്‍വശത്തു നിന്ന് അരിയാസും കയറിവരുമ്പോഴാണ് കൊളംബിയ ഭീഷണി ഉയര്‍ത്തിയത്.

കളി കാണുന്നവര്‍ക്ക് തീരെ ദഹിക്കാത്ത രീതിയില്‍ അമേരിക്കക്കാരനായ റഫറി മാര്‍ക്ക് ഗീഗര്‍ ഇംഗ്ലണ്ടിന് പെനാല്‍ട്ടി അനുവദിച്ചതോടെയാണ് കളിയുടെ താളവും ഒഴുക്കും നഷ്ടപ്പെട്ടത്. കോര്‍ണര്‍ കിക്കിനിടെ തന്നെ മാര്‍ക്ക് ചെയ്ത കാര്‍ലോസ് സാഞ്ചസിനു നേരെ ഹാരി കെയ്ന്‍ കയ്യാങ്കളി നടത്തിയത് റഫറി കണ്ടില്ല. അതേസമയം, പന്ത് ബോക്‌സിലെത്തിയപ്പോള്‍ കെയ്ന്‍ നിലത്തുവീഴുന്നതും സാഞ്ചസ് സംശയാസ്പദമായ പൊസിഷനിലുള്ളതും അയാള്‍ കണ്ടു. ആലോചനക്കോ കൂടിയാലോചനക്കോ നില്‍ക്കാതെ അയാള്‍ സ്‌പോട്ടിലേക്ക് വിരല്‍ചൂണ്ടി. റീപ്ലേയില്‍, കെയ്ന്‍ നിഷ്‌കളങ്കനല്ലെന്ന് വ്യക്തമായിട്ടും വീഡിയോ റഫറി പെനാല്‍ട്ടി റദ്ദാക്കാത്തത് അത്ഭുതപ്പെടുത്തി.

ഇത്തരം ഹൈവോള്‍ട്ടേജ് മത്സരങ്ങള്‍ ഒരു പെനാല്‍ട്ടി കിക്ക് വിധിനിര്‍ണായകമാകുന്നത് വിഷമകരമാണ്; പ്രത്യേകിച്ചും ആ പെനാല്‍ട്ടി അവാര്‍ഡ് കുറ്റമറ്റതല്ലെങ്കില്‍. പക്ഷേ, എന്തോ ഭാഗ്യത്തിന് അതു കാണേണ്ടി വന്നില്ല.

ആ ഗോളില്‍ കടിച്ചുതൂങ്ങുക എന്നതായിരുന്നു പിന്നീട് ഇംഗ്ലണ്ടിന്റെ പദ്ധതി. വൈവിധ്യമാര്‍ന്ന ആക്രമണപദ്ധതിയില്ലാത്ത ലാറ്റിനമേരിക്കക്കാര്‍ക്കെതിരെ അത് ഏറെക്കുറെ എളുപ്പവുമായിരുന്നു. ക്വിന്റേറോയെ അവര്‍ കൃത്യമായി നോട്ടമിടുകയും അയാളും ഫോര്‍വേഡുകളും തമ്മിലുള്ള ബന്ധം വിഛേദിക്കുകയും ചെയ്തു. ഫാല്‍ക്കാവോക്കാകട്ടെ ബോക്‌സിലേക്കു വരുന്ന ക്രോസുകളില്‍ മിഡാസ് ടച്ചിനു കഴിഞ്ഞില്ല. അവസാന ഘട്ടത്തില്‍ ഇംഗ്ലീഷ് ഡിഫന്‍സിന്റെ വന്‍വീഴ്ചയില്‍ നിന്ന് ലഭിച്ച സുവര്‍ണാവസരം ക്വഡ്രാഡോ പാഴാക്കിയപ്പോള്‍ കൊളംബിയ തോറ്റെന്നുറപ്പിച്ചു. പക്ഷേ, 93-ാം മിനുട്ടില്‍ എല്ലായ്‌പോഴുമെന്ന പോലെ യെറി മിന ഹെഡ്ഡര്‍ ഗോളിലൂടെ കൊളംബിയയുടെ ആയുസ്സ് നീട്ടി. ആ കോര്‍ണറിലേക്കു നയിച്ച മുറിയലിന്റെ ലോങ് ഷോട്ടും അത് തട്ടിമാറ്റിയ പിക്ക്‌ഫോര്‍ഡിന്റെ സേവും മനോഹരമായിരുന്നു.

90 മിനുട്ട് മത്സരം പ്ലാന്‍ചെയ്ത ഇംഗ്ലണ്ടിന് അവസാന നിമിഷം കിട്ടിയ ആ അടി വലിയ ആഘാതമായിരുന്നു. എക്‌സ്ട്രാ ടൈമില്‍ കൊളംബിയ വ്യക്തമായ ആധിപത്യം പുലര്‍ത്തി. എന്നാല്‍, ശക്തമായ സമ്മര്‍ദം ചെലുത്തി പോസ്റ്റ് ലക്ഷ്യംവെക്കാനോ കൊളംബിയ തയ്യാറാകാതിരുന്നത് അവര്‍ ഷൂട്ടൗട്ട് ലക്ഷ്യമിട്ടാണ് കളിക്കുന്നത് എന്നതിന്റെ തെളിവായിരുന്നു. ഓസ്പിന്യ ഒരു കിക്ക് അസാമാന്യ മികവോടെ തട്ടിമാറ്റിയിട്ടും അവസാന രണ്ട് കിക്കുകള്‍ വലയിലാക്കാന്‍ കഴിയാതെ കൊളംബിയ പുറത്തേക്കു നടന്നു.

ഹോസെ പെക്കര്‍മാനെ ഇഷ്ടപ്പെടുന്ന നിരവധി പേരെ സോഷ്യല്‍ മീഡിയയില്‍ കണ്ടിട്ടുണ്ട്. 2006-ലെ അദ്ദേഹത്തിന്റെ ‘റിക്വല്‍മി അബദ്ധം’ ചരിത്രപ്രസിദ്ധവുമാണല്ലോ. ഇത്തവണയും അദ്ദേഹത്തിന്റെ ടീം കളിച്ച ടാക്ടിക്കല്‍ ഫുട്‌ബോള്‍ മനോഹരവും പ്രായോഗികവുമായിരുന്നു. എന്നാല്‍, മൈതാനത്ത് ആധിപത്യം പുലര്‍ത്തുമ്പോഴും ഫീല്‍ഡ് ഗെയിമിലൂടെ പന്ത് വലയിലെത്തിക്കാനുള്ള ഒരു പദ്ധതി അദ്ദേഹത്തിന് ഇല്ലാത്തത് നിരാശപ്പെടുത്തുന്നതായിരുന്നു. യഥാര്‍ത്ഥത്തില്‍ കൊളംബിയയുടെ പതനത്തില്‍ അതിന് വലിയ പ്രാധാന്യമുണ്ടു താനും. ഈ ലോകകപ്പില്‍ കൊളംബിയ നേടിയ ആറു ഗോളുകളില്‍ നാലും സെറ്റ്പീസുകളില്‍ നിന്നാണ് വന്നത്. മൂന്നെണ്ണം നേടിയത് കോര്‍ണര്‍ കിക്കില്‍ നിന്ന് യെറി മിനയും ഒന്ന് ഫ്രീകിക്കില്‍ നിന്ന് ക്വിന്റേറോയും. മൈതാനത്ത് വിത്തിറക്കുമ്പോള്‍ അവിടെ നിന്നു തന്നെ കൊയ്യാനുള്ള വ്യക്തമായ ഒരു പദ്ധതി കൊളംബിയക്കുണ്ടായില്ല. ഫാല്‍ക്കാവോ എന്ന സൂപ്പര്‍ താരത്തില്‍ അമിതമായി വിശ്വസിച്ചതു കൊണ്ടാകാം; അല്ലെങ്കില്‍ ഡിഫന്‍സീവ് മിഡ്ഡിന് പെക്കര്‍മാന്‍ അതീവ പ്രാധാന്യം നല്‍കിയതിനാലാവാം. ഹാമിസിനെ പോലെ ഒരു സൂപ്പര്‍താരം പരിക്കുകാരണം കളിക്കാതിരിക്കുമ്പോള്‍, കേളീശൈലി തന്നെ മാറ്റേണ്ടിവരുന്നു എന്നത് കൊളംബിയന്‍ ടീമിന്റെ വിഭവശേഷിക്കുറവാണ് കാണിക്കുന്നത്. അതില്‍ പെക്കര്‍മാനെ കുറ്റം പറയുന്നതില്‍ അര്‍ത്ഥമില്ല.

#WCReviewShafi

സമാറ: വമ്പന്‍മാര്‍ക്ക് കൂട്ടത്തോടെ കാലിടറുന്ന റഷ്യന്‍ ലോകകപ്പില്‍ മഞ്ഞപ്പടയുടെ കുതിപ്പിന് തടയിടാന്‍ മെക്‌സിക്കോയ്ക്കുമായില്ല. മെക്‌സിക്കന്‍ വെല്ലുവിളി അതിജീവിച്ച ബ്രസീല്‍ ഏകപക്ഷീയമായ രണ്ടു ഗോളുകള്‍ക്ക് വിജയം കണ്ടു. സൂപ്പര്‍ താരം നെയ്മര്‍, ഫിര്‍മീഞ്ഞോ എന്നിവരാണ് ബ്രസീലിന് വേണ്ടി ഗോളുകള്‍ നേടിയത്. തുടര്‍ച്ചയായ ഏഴാം തവണയാണ് ബ്രസീല്‍ ലോകകപ്പിന്റെ ക്വാര്‍ട്ടറില്‍ ഇടം നേടുന്നത്. മെക്‌സിക്കോയുടെ മുന്നേറ്റത്തോടെ ആരംഭിച്ച മത്സരത്തില്‍ ഗോള്‍ പിറക്കാന്‍ 51 മിനിറ്റ് കാത്തിരിക്കേണ്ടി വന്നു. ഗോള്‍ രഹിതമായ ആദ്യ പകുതിക്കു ശേഷം നെയ്മറിലൂടെയാണ് ബ്രസീല്‍ ഗോള്‍ പട്ടിക തുറന്നത്. വില്യന്റെ മനോഹരമായ ക്രോസ് ഗോള്‍കീപ്പറേയും പ്രതിരോധ നിരക്കാരേയും കീഴടക്കിയപ്പോള്‍ പന്തിനായി ജീസസും നെയ്മറും ചാടിവീണു. ജീസസിന് കണക്ട് ചെയ്യാന്‍ കഴിയാതിരുന്ന പന്ത് നെയ്മര്‍ അനായാസം വലയിലാക്കി.
ബ്രസീല്‍ 1 മെക്‌സിക്കോ 0. ഗോള്‍ നേടിയതോടെ മത്സരത്തിന്റെ നിയന്ത്രണവും ബ്രസീല്‍ ഏറ്റെടുത്തു. ഗില്ലര്‍മോ ഒച്ചാവോയുടെ മിന്നല്‍ നീക്കങ്ങളാണ് പലപ്പോഴും ബ്രസീലിന്റെ ഗോള്‍ ദാഹത്തിന് തടയിട്ടത്. കൃത്യമായ ഇടവേളകളില്‍ ബ്രസീലിയന്‍ ഗോള്‍ മുഖത്ത് പന്തെത്തിക്കാന്‍ മെക്‌സിക്കോയ്ക്ക് കഴിഞ്ഞെങ്കിലും ഫിനിഷിങിലെ അപാകത ഗോള്‍ വഴിമാറ്റി. പന്തടക്കത്തിലും പാസിലും ബ്രസീലിനൊപ്പമെത്താന്‍ മെക്‌സിക്കോയ്ക്കായെങ്കിലും ഗോള്‍ നേടാനായില്ല.

മികവും ഭാഗ്യവും മൈതാനത്തെ ഇരട്ടകളാണ്. മികവിനൊപ്പം ഭാഗ്യവുമുണ്ടെങ്കിലേ വിജയശ്രീലാളിതരാവാന്‍ കഴിയു എന്ന സത്യത്തിന് കാലപ്പഴക്കമുണ്ട്. ലോക ഫുട്‌ബോളിനെ ഭരിച്ച എത്രയോ മികച്ച താരങ്ങളുണ്ടായിരുന്നു. അവരില്‍ പലര്‍ക്കും ലോകകപ്പ് എന്നത് കിട്ടാക്കനിയാവാന്‍ കാരണം അവരോ, അവരുടെ ടീമോ നിര്‍ണായക വേളകളില്‍ നിര്‍ഭാഗ്യവാന്മാരായത് കൊണ്ടായിരുന്നു. ഹംഗറിയുടെ ഫ്രാങ്ക് പുഷ്‌ക്കാസ്, ഹോളണ്ടിന്റെ യോഹാന്‍ ക്രൈഫ് തുടങ്ങിയവരുടെ പേരിലൊന്നും ലോകകപ്പില്ല. അവരുടെ കാലഘട്ടത്തിലെ അതികായന്മരായിട്ടും നിര്‍ഭാഗ്യ വഴിയില്‍ അവരെല്ലാം വലിയ വേദിയില്‍ നിന്നും നിഷ്‌കാസിതരാവുകയായിരുന്നു. ഇന്നലെ ഇറാനെ നോക്കു-പോര്‍ച്ചുഗലിനെതിരെ അവര്‍ വിജയം അര്‍ഹിച്ചിരുന്നു. സ്‌പെയിനിനെതിരെ ഞെട്ടിക്കുന്ന പ്രകടനമല്ലേ മൊറോക്കോ നടത്തിയത്. രണ്ട് പേരും സമനിലയായിരുന്നില്ല അര്‍ഹിച്ചത്-വിജയം തന്നെയായിരുന്നു. പക്ഷേ ഭാഗ്യവഴിയില്‍ അവരില്ലായിരുന്നു.

പോര്‍ച്ചുഗലിനെയു ഇറാനെയും ഒരു തരത്തിലും താരതമ്യം ചെയ്യാന്‍ കഴിയില്ല. കൃസ്റ്റിയാനോ റൊണാള്‍ഡോയുടെ ടീം യൂറോപ്പിലെ ചാമ്പ്യന്മാരാണ്. സി.ആര്‍-7 ലോകത്തിലെ ഏറ്റവും മികച്ച ഫുട്‌ബോളര്‍മാരില്‍ ഒരാള്‍. ഫിഫ റാങ്കിംഗും ഫുട്‌ബോള്‍ പാരമ്പര്യവുമെല്ലാം പരിശോധിച്ചാല്‍ രണ്ട് പേരും തമ്മില്‍ ആനയും ഉറുമ്പും തമ്മിലുളള അന്തരമുണ്ട് പക്ഷേ കളിക്കളത്തില്‍ ഇറാന്‍ അക്ഷരാര്‍ത്ഥത്തില്‍ മിന്നുന്ന പ്രകടനമാണ് നടത്തിയത്. ചെറിയ ടീമുകള്‍ക്കെല്ലാം പതിവായി സംഭവിക്കുന്ന പിഴവ് അവരെയും ബാധിച്ചു-എതിര്‍ പെനാല്‍ട്ടി ബോക്‌സില്‍ വരെ മിന്നലോട്ടം നടത്തി അവിടെ കുരുങ്ങി നില്‍ക്കുന്നു. പോര്‍ച്ചുഗീസ് താരങ്ങളുടെ സമീപനത്തിലെ നെഗറ്റീവിസം തന്നെ ഇറാന്റെ കരുത്തായിരുന്നു. കൃസ്റ്റിയാനോ പോലും വേണ്ടാത്ത നീക്കങ്ങള്‍ക്ക്് മുതിര്‍ന്നു. അദ്ദേഹം ചുവപ്പ് അര്‍ഹിച്ച പാതകമാണ് ചെയ്തത്. ഒരു വേള ടെലിവിഷന്‍ റഫറിയിലേക്ക്് കാര്യങ്ങള്‍ പോയപ്പോള്‍ അദ്ദേഹമത് ഭയപ്പെടുകയും ചെയതിരുന്നു. പക്ഷേ കഴിഞ്ഞ മല്‍സരങ്ങളില്ലെല്ലാം മാന്യനായി കളിച്ച സീനിയര്‍ താരം എന്ന നിലയിലാവാം അത് മഞ്ഞയില്‍ നിയന്ത്രിക്കപ്പെട്ടത്. കൃസ്റ്റിയാനോക്ക് ചുവപ്പായിരുന്നു ലഭിച്ചതെങ്കിലോ-പോര്‍ച്ചുഗല്‍ ടീമിന്റെ ഭാവിയും ഇരുളടയുമായിരുന്നു. പെനാല്‍ട്ടിയെന്നത് ഭാഗ്യമാണെന്ന സത്യം കൃസ്റ്റിയാനോ തന്നെ തെളിയിച്ചില്ലേ….. വെറുതെ മെസിയെ കുറ്റപ്പെടുത്തുന്നവര്‍ ഓര്‍ക്കുക-ഈ സ്‌പോട്ട് കിക്കുകള്‍ ഭാഗ്യമാണ്. ഇതേ കൃസ്റ്റിയാനോ സ്‌പെയിനിനെതിരായ മല്‍സരത്തില്‍ പായിച്ച അവസാന മിനുട്ടിലെ ആ ഫ്രീകിക്ക് ഓര്‍ക്കുക-ഡേവിഡ് ഡി ഗിയ എന്ന സ്പാനിഷ് ഗോള്‍ക്കീപ്പറെ നിശ്ചലനാക്കി, സെര്‍ജിയോ റാമോസും സംഘവും തീര്‍ത്ത പ്രതിരോധ മതിലും തകര്‍ത്താണ് ആ ബോള്‍ വലയില്‍ എത്തിയത്. അതേ താരത്തിന് പക്ഷേ ഇറാനിയന്‍ ഗോള്‍ക്കീപ്പര്‍ മാത്രം മുന്നില്‍ നില്‍ക്കെ പിഴച്ചതിന് കാരണം സമ്മര്‍ദ്ദം തന്നെയാണ്. കൃസ്റ്റിയാനോ നാല് ഗോളുകളുമായി മുന്നേറുന്ന സമയമാണ്. ആ പെനാല്‍ട്ടി ഗോളാക്കിയിരുന്നെങ്കില്‍ അദ്ദേഹത്തിന് ഹാരി കെയിനൊപ്പം അഞ്ചില്‍ എത്താമായിരുന്നു. പക്ഷേ അദ്ദേഹത്തിന്റെ കിക്ക് ഇറാനിയന്‍ ഗോള്‍ക്കീപ്പര്‍ ചാടിയ അതേ ആങ്കിളിലായി. അവിടെ ഗോള്‍ക്കീപ്പര്‍ ഭാഗ്യവാനും ഷോട്ട് പായിച്ച താരം നിര്‍ഭാഗ്യവാനുമായി. ഓര്‍ക്കേണ്ട മറ്റൊരു കാര്യം ആ ഗോള്‍ക്കീപ്പര്‍ ഒരു അനാഥ ബാല്യമാണ്. ഇല്ലായ്മകളില്‍ നിന്നും വന്ന താരം. അവനാണ് ലോകത്തിലെ മികച്ച ഫുട്‌ബോളറെ സ്തംബ്ധനാക്കിയത്.

വേഗമുണ്ട് ഇറാന്, തന്ത്രമുണ്ട് ഇറാന്-ലക്ഷ്യബോധമാണ് കുറഞ്ഞത്. അതുണ്ടെങ്കില്‍ ഈ ടീം വരും നാളുകളില്‍ ശക്തരായി മുന്നേറും. സ്‌പെയിന്‍ ടീം നിരയെടുക്കുക-എല്ലാവരും ലോകോത്തരക്കാര്‍. എല്ലാവരും യൂറോപ്പിലെ വന്‍കിട ക്ലബുകള്‍ക്കായി കളിക്കുന്നവര്‍. എല്ലാവരും രാജ്യാന്തര ഫുട്‌ബോളില്‍ അമ്പതിലധികം മല്‍സരം കളിച്ചവര്‍. പലരും മൂന്നാമത്തെ ലോകകപ്പ് കളിക്കുന്നവര്‍. എന്നിട്ടും മൊറോക്കോയെ പോലെ ഒരു ടീമിനെതിരെ അവര്‍ വിറച്ചുനിന്നു. മൊറോക്കോ ചാമ്പ്യന്‍ഷിപ്പിലെ ഏറ്റവും വലിയ നിര്‍ഭാഗ്യവാന്മാരാണ്. ആദ്യ മല്‍സരത്തില്‍ നന്നായി കളിച്ചിട്ടും ഇറാനോട് അവസാന മിനുട്ടിലെ സെല്‍ഫ് ഗോളില്‍ പരാജയപ്പെട്ടു. രണ്ടാം മല്‍സരത്തില്‍ പോര്‍ച്ചുഗലിനെ വിറപ്പിച്ചു വിട്ടു, അവസാന മല്‍സരത്തില്‍ സ്‌പെയിനുമായി 2-2 സമനില. ഒരു ഘട്ടത്തില്‍ അവര്‍ വിജയത്തിന് അരികില്‍ പോലുമെത്തിയിരുന്നു. മുന്‍ ലോക ചാമ്പ്യന്മാര്‍ക്കെതിരെ ഒരു ആഫ്രിക്കന്‍ ടീം ഇത്തരത്തില്‍ പ്രകടിപ്പിക്കുന്ന മികവിനെ എത്ര അഭിനന്ദിച്ചാലും അധികമാവില്ല. സ്‌പെയിനും പോര്‍ച്ചുഗലും സ്വന്തം ഗ്രൂപ്പില്‍ നിന്ന് യോഗ്യത നേടിയെങ്കിലും അവരത് അര്‍ഹിച്ചിരുന്നോ എന്ന ചോദ്യത്തിന് പ്രസക്തിയുണ്ട്. കളിച്ച മൂന്ന് മല്‍സരങ്ങളിലും ഇവരുടെ നിലവാരം പകുതിയായിരുന്നു. ആദ്യ മല്‍സരത്തില്‍ സ്‌പെയിനും പോര്‍ച്ചുഗലും മുഖാമുഖം വന്നപ്പോള്‍ പോലും ആറ് ഗോളിലും (3-3) മല്‍സരം ശരാശരി മാത്രമായിരുന്നു.

റഷ്യയുടെ തോല്‍വി അവര്‍ക്കുള്ള ഷോക്കാണ്. ലോകകപ്പ് ആരംഭിക്കുന്നതിന് മുമ്പ് ഇതായിരുന്നു റഷ്യ-അലസമായി കളിച്ചവര്‍. പക്ഷേ ലോകകപ്പിലെ ആദ്യ രണ്ട് മല്‍സരങ്ങളില്‍ മിന്നിയപ്പോള്‍ എട്ട് ഗോളുകള്‍ സ്‌ക്കോര്‍ ചെയ്തു. ഉറുഗ്വേക്കെതിരെ ഇന്നലെ കളിച്ചപ്പോഴാവട്ടെ പഴയ റഷ്യക്കാരായി. എന്തായാലും പ്രി ക്വാര്‍ട്ടറില്‍ സ്‌പെയിനുമായി കളിക്കുമ്പോള്‍ മെച്ചപ്പെടാത്തപക്ഷം പണി പാളും. സഊദിക്കാര്‍ മാനം കാത്തു. ആദ്യ മല്‍സരത്തില്‍ അഞ്ച് ഗോള്‍ വാങ്ങിയവര്‍ അവസാന മല്‍സരത്തില്‍ വലിയ വിജയവുമായാണ് മടങ്ങിയിരിക്കുന്നത്. അവിടെ ഒരു വേദനയായി മുഹമ്മദ് സലാഹ്. ഇംഗ്ലീഷ് പ്രീമിയര്‍ ലീഗിലും യുവേഫ ചാമ്പ്യന്‍സ് ലീഗിലും ലിവര്‍പൂളിന് വേണ്ടി മിന്നിയ മുന്‍നിരക്കാരന്‍. കീവിലെ ആ ഫൈനലില്‍ സെര്‍ജിയോ റാമോസിന്റെ ഫൗള്‍ കെണിയില്‍ അകപ്പെട്ട് പരുക്കില്‍ തളര്‍ന്ന സലാഹ്….. റാമോസിന് ആര്് മാപ്പ് നല്‍കിയാലും ഈജിപ്ഷ്യന്‍ ജനത മാപ്പ് നല്‍കില്ല. കാരണം അത്രമാത്രം പ്രതീക്ഷകള്‍ അവര്‍ക്ക് സലാഹിലുണ്ടായിരുന്നു. ആ താരമാണ് വേദനയില്‍ മങ്ങി തലയും താഴ്ത്തി മടങ്ങിയത്. എങ്കിലും ഇസാം ഹദാരിയെന്നെ 45 കാരനായ ഗോള്‍ക്കീപ്പര്‍ ഈജിപ്തിന്റെ അടയാളമാണ്….. ആ പ്രായത്തിലും ലോകകപ്പ് കളിച്ചുവെന്ന് മാത്രമല്ല ഒരു പെനാല്‍ട്ടി തടഞ്ഞിടുകയും ചെയ്തല്ലോ….

ഇന്ന് അര്‍ജന്റീന…. കഴിഞ്ഞ രണ്ട് കളികളാണ് സാക്ഷിയെങ്കില്‍ ഇന്ന് ലയണല്‍ മെസിയുടെ സംഘത്തിന് കാര്യങ്ങള്‍ കടുപ്പമാവും. പക്ഷേ മെസിയിലെ പ്രതിഭക്ക് ലോക വേദിയില്‍ പലതും തെളിയിക്കാനുണ്ട്. അവിടെയാണ് അര്‍ജന്റീനയുടെ പ്രതീക്ഷയും.