zoo – Chandrika Daily

ബംഗളൂരു ബന്നര്‍ഘട്ട പാര്‍ക്കില്‍ സഫാരിക്കിടെ 13കാരനെ പുലി ആക്രമിച്ചു

webdesk14 — Sat, 16 Aug 2025 09:59:38 +0000

ബംഗളൂരു ബെന്നാര്‍ഘട്ട നാഷണല്‍ പാര്‍ക്കില്‍ പുലിയുടെ ആക്രമണത്തില്‍ പെട്ട് 13 വയസുക്കാരന് പരിക്കേറ്റു. വെള്ളിയാഴ്ച വൈകീട്ട് പാര്‍ക്കിനുള്ളില്‍ വനം വകുപ്പിന്റെ ജീപ്പില്‍ സഫാരി നടത്തുന്നതിനിടയിലാണ് പുലി ഓടി വന്ന് ജീപ്പിനുള്ളില്‍ ഉണ്ടായിരുന്ന കുട്ടിയെ ആക്രമിച്ചത്. ആക്രമണത്തില്‍ കുട്ടിയുടെ കൈക്ക് പരിക്കേറ്റു. വാഹനത്തിന്റെ സൈഡ് സീറ്റിലിരുന്ന കുട്ടിയാണ് ആക്രമണത്തിന് വിധേയമായത്. കുട്ടിക്ക് സാരമായ പരിക്കുകള്‍ പറ്റിയിരുന്നു. കുട്ടിക്ക് പ്രാഥമിക ചികിത്സ നല്‍കിയെന്ന് അധികൃതര്‍ അറിയിച്ചു.

ബൊമ്മസാന്ദ്ര നിവാസിയായ സുഹാസിന്റെ കൈയില്‍ ആഴത്തിലുള്ള മുറിവുണ്ടായിട്ടുണ്ട്. അദ്ദേഹത്തെ ചികിത്സയ്ക്കായി സ്വകാര്യ ആശുപത്രിയില്‍ പ്രവേശിപ്പിച്ചു. മാതാപിതാക്കളോടൊപ്പമാണ് സുഹാസ് നാഷണല്‍ പാര്‍ക്കിലെത്തിയത്. സംഭവത്തിന്റെ വീഡിയോ സോഷ്യല്‍ മീഡിയയില്‍ വൈറലായിട്ടുണ്ട്. തൊട്ടുപിറകിലുണ്ടായിരുന്ന വാഹനത്തിലെ മറ്റെരു സഞ്ചാരിയാണ് ഈ ദ്യശ്യങ്ങള്‍ പകര്‍ത്തിയത്. ജീപ്പിന് പിന്നാലെ പുലി ഓടുന്നതും, സീറ്റിലിരിക്കുന്ന കുട്ടിയെ ആക്രമിക്കുന്നതും വിഡിയോയില്‍ കാണാം.

അപകടത്തിനു പിന്നാലെ പാര്‍ക്കിലെ സുരക്ഷാനടപടികള്‍ ശക്തിപ്പെടുത്തുമെന്നും എല്ലാ സഫാരി വാഹനങ്ങളുടെയും വിന്‍ഡോ സീറ്റുകള്‍ ഗ്രില്ലുകള്‍ വെച്ച് മറക്കുകയും കാമറകള്‍ സ്ഥാപിക്കുമെന്നും അധികൃതര്‍ അറിയിച്ചു. എസി ഇല്ലാത്ത സഫാരി വാഹനങ്ങളുടെ ഡ്രൈവര്‍മാര്‍ക്കും അതീവ ജാഗ്രത പാലിക്കാന്‍ നിര്‍ദ്ദേശം നല്‍കിയിട്ടുണ്ട്. ബംഗളൂരുവിലെ ഏറ്റവും പ്രശസ്തമായ വിനോദസഞ്ചാര കേന്ദ്രങ്ങളില്‍ ഒന്നാണ് ബന്നാര്‍ഘട്ട സുവോളജിക്കല്‍ പാര്‍ക്കും നാഷണല്‍ പാര്‍ക്കും. എല്ലാ ആഴ്ചയും ആയിരക്കണക്കിന് സന്ദര്‍ശകരാണ് ഇവിടെ എത്തുന്നത്.

തിരുവനന്തപുരത്ത് ചത്ത മ്ലാവിന് പേവിഷബാധ; മൃഗശാലയിലെ ജീവനക്കാര്‍ക്ക് വാക്‌സിന്‍

webdesk17 — Tue, 11 Mar 2025 02:42:35 +0000

തിരുവനന്തപുരം മൃഗശാലയില്‍ കഴിഞ്ഞ ദിവസം ചത്ത മ്ലാവിനു പേവിഷബാധ സ്ഥിരീകരിച്ചു. ഞായറാഴ്ചയാണ് മ്ലാവ് വര്‍ഗത്തില്‍പ്പെട്ട സാമ്പാര്‍ ഡിയര്‍ ചത്തത്. കഴിഞ്ഞ ദിവസം നടത്തിയ പോസ്റ്റുമോര്‍ട്ടം പരിശോധനക്കു ശേഷം പാലോട് സ്റ്റേറ്റ് ഇന്‍സ്റ്റിറ്റ്യൂട്ട് ഫോര്‍ ആനിമല്‍ ഡിസീസില്‍ നടത്തിയ വിശദ പരിശോധനയിലാണ് പേവിഷബാധ സ്ഥിരീകരിച്ചത്. പേവിഷബാധയുടെ ഉറവിടം കണ്ടെത്താനായിട്ടില്ല.

ഈ സാഹചര്യത്തില്‍ മ്ലാവുമായി അടുത്തു ഇടപഴകിയ ജീവനക്കാര്‍ക്കെല്ലാം പോസ്റ്റ് ഏസ്‌പോഷര്‍ ആന്റി റാബീസ് വാക്‌സിന്‍ നല്‍കാന്‍ തീരുമാനിച്ചു. മ്ലാവിനെ പാര്‍പ്പിച്ചിരുന്ന കൂടിനുള്ളിലെ മുഴുവന്‍ മൃഗങ്ങള്‍ക്കും അടിയന്തരമായി ആന്റി റാബീസ് വാക്‌സിന്‍ നല്‍കാനും തീരുമാനിച്ചു. ഇതിനായി വെറ്ററിനറി സര്‍ജന്‍ ഡോ. നികേഷ് കിരണിന്റെ നേതൃത്വത്തില്‍ ടീമിനേയും രൂപവല്‍കരിച്ചു. മൃഗങ്ങള്‍ക്കുള്ള വാക്‌സിനേഷന്‍ ഇന്നാരംഭിക്കും.

രണ്ട് ഹനുമാന്‍ കുരങ്ങുകള്‍ തിരിച്ചെത്തി; ഒരാള്‍ മരത്തില്‍

webdesk17 — Tue, 01 Oct 2024 15:13:52 +0000

തിരുവനന്തപുരം മൃഗശാലയില്‍ നിന്ന് ചാടിപ്പോയ രണ്ട് ഹനുമാന്‍ കുരങ്ങുകളെ കൂട്ടിലേക്ക് തിരികെ എത്തിച്ചു. മൃഗശാല വളപ്പിനുള്ളിലെ മരത്തില്‍ നിന്നാണ് രണ്ടു പേരെയും തിരികെ എത്തിച്ചത്. ഒരു കുരങ്ങ് മരത്തില്‍ തന്നെ തുടരുകയാണ്. അല്‍പസമയം മുമ്പാണ് രണ്ട് കുരങ്ങുകളെയും കൂട്ടിലേക്ക തിരികെയെത്തിച്ചത്.

കുരങ്ങുകള്‍ തിരിച്ചു വരാതിരുന്ന സാഹചര്യത്തില്‍ നാളെയും മൃഗശാലയില്‍ സന്ദര്‍ശകരെ അനുവദിക്കില്ലെന്ന് അറിയിച്ചിരുന്നു.

അതേസമയം കുരുങ്ങു കെണി നല്‍കണമെന്ന് വനം വകുപ്പിനോട് ആവശ്യപ്പെട്ടിരുന്നെന്ന് മൃഗശാല അധികൃതര്‍ പറഞ്ഞു. രാത്രിയോടെ കുരങ്ങുകെണി സജ്ജമാക്കുമെന്ന് മൃഗശാല അധികൃതര്‍ പറയുന്നു. ഇന്ന് മൃഗശാലയിലേക്ക് സന്ദര്‍ശകരെ അനുവദിച്ചിരുന്നില്ല.

പവനും പോയി; കുനോ ദേശീയോദ്യാനത്തിലെ ചീറ്റ ചത്തു

webdesk14 — Tue, 27 Aug 2024 15:54:19 +0000

ന്യൂഡൽഹി: മധ്യപ്രദേശിലെ കുനോ നാഷണൽ പാർക്കിലെ ഒരു നമീബിയൻ ചീറ്റ കൂടി ചത്തു. ‘പവൻ’ എന്ന ചീറ്റ ചത്തതായി അധികൃതർ അറിയിച്ചു. അഞ്ച്മാസം പ്രായമുള്ള ഗമിനി എന്ന ചീറ്റ ചത്തതിന് പിന്നാലെയാണ് കുനോയിൽ വീണ്ടും ചീറ്റയുടെ മരണം. അഡീഷണൽ പ്രിൻസിപ്പൽ ചീഫ് കൺസർവേഷൻ ഓഫ് ഫോറസ്റ്റ് (എപിസിസിഎഫ്) ഓഫീസും ലയൺ പ്രൊജക്റ്റ് ഡയറക്ടറുമായ ഉത്തം ശർമ്മയാണ് ചീറ്റയെ മരിച്ച നിലയിൽ കണ്ടെത്തിയത്. കുനോ നാഷണൽ പാർക്കിലെ ആൺ ചീറ്റയാണ് പവൻ.

ചൊവ്വാഴ്ച രാവിലെ 10:30 ഓടെ കുറ്റിക്കാടുകൾക്കിടയിൽ അനക്കമില്ലാതെ കിടക്കുന്ന നിലയിലാണ് ചീറ്റയെ കണ്ടതെന്ന് പുറത്തിറക്കിയ പ്രസ്താവനയിൽ അധികൃതർ അറിയിച്ചു. മൃഗഡോക്ടർ വിശദമായി പരിശോധിച്ചപ്പോൾ ചീറ്റയുടെ ശരീരത്തിൻ്റെ മുൻഭാഗവും തലയുൾപ്പെടെയുള്ള ഭാഗം വെള്ളത്തിൽ മുങ്ങിയിരുന്നതായി കണ്ടെത്തി. മൃതദേഹത്തിൽ മുറിവുകളൊന്നും കണ്ടെത്തിയില്ല. വെള്ളത്തിൽ മുങ്ങിയതാണ് മരണകാരണമെന്നാണ് പ്രാഥമിക നിഗമനം. എന്നാൽ പോസ്റ്റ്‌മോർട്ടം റിപ്പോർട്ട് ലഭിച്ചതിന് ശേഷമേ മരണ കാരണം വ്യക്തമാകൂ.

മൃഗശാലയിൽ നിന്ന് ചാടിപ്പോയിട്ട് പതിനൊന്ന് ദിവസം ; അധികൃതരെ മരം ചുറ്റിച്ച് ഹനുമാൻ കുരങ്ങ്

webdesk15 — Sun, 25 Jun 2023 03:14:54 +0000

തിരുവനന്തപുരം മൃഗശാല അധികൃതരെ മരം ചുറ്റിച്ച് ചാടിപ്പോയ ഹനുമാൻ കുരങ്ങ്. പതിനൊന്ന് ദിവസം കഴിഞ്ഞിട്ടും ഇതുവരെ കുരങ്ങിനെ കൂട്ടിലാക്കാൻ കഴിഞ്ഞിട്ടില്ല. കുരങ്ങിനെ പിടിക്കാൻ മരങ്ങൾ നോക്കി നടക്കുകയാണ് അധികൃതർ. ബെയ്ൻസ് കോമ്പൗണ്ട്, മസ്കറ്റ് ഹോട്ടൽ വളപ്പ്, പബ്ലിക് ലൈബ്രറി എന്നിവിടങ്ങളിലെ മരങ്ങളിലായി ചുറ്റിക്കറങ്ങുകയാണ് ഹനുമാൻ കുരങ്ങ്.പെൺകുരങ്ങാണ് കൂട്ടിൽ നിന്ന് ചാടിപ്പോയത്. ഇണയെ വിട്ടു പോകാത്ത ഇനമായ ഹനുമാൻ കുരങ്ങ് ഇപ്പോൾ ഇണയെ തിരിഞ്ഞുപോലും നോക്കാത്ത അവസ്ഥയിലാണ്.കഴിഞ്ഞ ജൂൺ 13 നാണ് തിരുവനന്തപുരം മൃഗശാലയിൽ നിന്ന് ഹനുമാൻ കുരങ്ങ് ചാടിപ്പോയത്.

മരത്തിൽ നിന്ന് ഇറങ്ങാതെ ചാടിപ്പോയ ഹനുമാൻ കുരങ്ങ് ; പുതിയ സിംഹങ്ങളെ മൃഗശാലയിലെ കൂട്ടിൽ തുറന്നു വിട്ടു

webdesk15 — Thu, 15 Jun 2023 09:42:08 +0000

തിരുവനന്തപുരം മൃഗശാലയിലെ നിന്നും ചാടിപ്പോയ ഹനുമാൻ കുരങ്ങിനെ ഇതുവരെ കൂട്ടിൽ കയറ്റാനായില്ല. താഴെയിറങ്ങാൻ കൂട്ടാക്കാതെ മൃഗശാലയിലെ മരത്തിന് മുകളിൽ തന്നെ ഇരിക്കുകയാണ് കുരങ്ങ്. അതിനിടെ, മൃഗശാലയിലെത്തിയ പുതിയ സിംഹങ്ങളെ കൂട്ടില്‍ തുറന്നുവിട്ടു.ആൺ സിംഹത്തിന് ലിയോ എന്നും പെൺസിംഹത്തിന് നൈല എന്നും പേരിട്ടു.തിരുപ്പതിയിൽ നിന്നും കൊണ്ട് വന്ന മൂന്ന് വയസ്സുള്ള പെൺകുരങ്ങ് ഇന്നലെ മുതൽ, മരത്തിന് മുകളിൽ തുടരുകയാണ്. ഇഷ്ടഭക്ഷണം കാണിച്ചിട്ടും ഇരയെ കാണിച്ചിട്ടും, താഴേക്ക് ഇറങ്ങാൻ കൂട്ടാക്കിയിട്ടില്ല.

മൃഗശാലയിൽ നിന്ന് ചാടിപ്പോയ ഹനുമാൻ കുരങ്ങിനെ കണ്ടെത്തി ; പിടികൂടാനുള്ള ശ്രമം ആരംഭിച്ചു

webdesk15 — Wed, 14 Jun 2023 07:16:08 +0000

തിരുവനന്തപുരം മൃഗശാലയിൽ നിന്ന് പുറത്തു ചാടിയ ഹനുമാൻ കുരങ്ങിനെ കണ്ടെത്തി. പിടികൂടാനുള്ള ശ്രമങ്ങൾ ആരംഭിച്ചു. മൃഗശാലയിലെ തന്നെ ഒരു മരത്തിന്റെ ചില്ലയിലാണ് ഇപ്പോൾ കുരങ്ങുള്ളത്. കുരങ്ങ് അക്രമ സ്വഭാവമുള്ളതിനാൽ പ്രദേശത്ത് ജാഗ്രതാ നിർദ്ദേശം നൽകി. പുതിയതായെത്തിച്ച ഹനുമാൻ കുരങ്ങാണ് ഇന്നലെ കൂടിന് പുറത്ത് ചാടിയത്. കൂട് തുറന്ന് പരീക്ഷണം നടത്തിയപ്പോഴാണ് കുരങ്ങ് ചാടിപ്പോയത്. തിരുപ്പതിയിൽ നിന്നാണ് തിരുവനന്തപുരം മൃഗശാലയിലേക്ക് ഹനുമാൻ കുരങ്ങിനെ എത്തിച്ചത്.