കെഎസ്ആര്ടിസിയില് ഐഎന്ടിയുസി യൂണിയനുകളുടെ കൂട്ടായ്മയായ ടിഡിഎഫ് പണിമുടക്ക് ആരംഭിച്ചു. പണിമുടക്ക് ഒഴിവാക്കുന്നതിന് കെഎസ്ആര്ടിസി സിഎംഡി പ്രമോജ് ശങ്കര് സംഘടന നേതാക്കളുമായി ചര്ച്ച നടത്തിയിരുന്നെങ്കിലും പരാജയപ്പെട്ടതോടെയാണ് 24 മണിക്കൂര് സമരവുമായി മുന്നോട്ടു പോകാന് തീരുമാനിച്ചത്. തിങ്കളാഴ്ച അര്ധരാത്രി മുതല് ഇന്ന് അര്ധരാത്രി വരെയാണ് പണിമുടക്ക്. അതേസമയം ഇതിനെ നേരിടാന് സര്ക്കാര് ഡയസ്നോണ് പ്രഖ്യാപിച്ചു.
12 പ്രധാന ആവശ്യങ്ങള് ഉന്നയിച്ചാണ് സമരം. എല്ലാ മാസവും ഒന്നാം തീയതി ശമ്പളം വിതരണം ചെയ്യണം എന്നുള്ളതാണ് ഇതിലെ പ്രധാന ആവശ്യം. ഡിഎ കുടിശ്ശിക പൂര്ണമായും അനുവദിക്കുക, ശമ്പള പരിഷ്കരണ കരാറിന്റെ സര്ക്കാര് ഉത്തരവ് ഇറക്കുക, ഡ്രൈവര്മാരുടെ സ്പെഷ്യല് അലവന്സ് കൃത്യമായി നല്കുക തുടങ്ങിയവയാണ് മറ്റ് പ്രധാന ആവശ്യങ്ങള്.
അതേസമയം ഡയസ്നോണ് പ്രഖ്യാപിച്ചു പണിമുടക്ക് അട്ടിമറിക്കാനുള്ള നീക്കം വിലപ്പോവില്ലെന്നും പ്രശ്നങ്ങള്ക്കു പരിഹാരം കാണുന്നതുവരെ ശക്തമായ സമരവുമായി മുന്നോട്ടു പോകുമെന്നും ടിഡിഎഫ് അറിയിച്ചു.