കണ്ണൂരില് വനംവകുപ്പ് ജനവാസമേഖലയില് കടുവയുടെ സാന്നിധ്യം കണ്ടെത്താന് സ്ഥാപിച്ച മൂന്ന് ക്യാമറകള് മോഷണം പോയി. വാണിയപ്പാറയിലെ പുല്ലന്പാറ തട്ട് മേഖലയില് സ്ഥാപിച്ച ക്യാമറകള് ആണ് മോഷണം പോയത്.
പുല്ലന്പാറ തട്ട് ഭാഗത്തുള്ള സമ്പത്ത് ക്രഷറിന് സമീപമുള്ള പഴയ പാറമടയ്ക്ക് സമീപം സ്ഥാപിച്ച 25,000 രൂപ വിലയുള്ള മൂന്ന് ക്യാമറ ട്രാപ്പുകളാണ് കളവുപോയത്. ഇതുമായി ബന്ധപ്പെട്ട് വനംവകുപ്പ് കരിക്കോട്ടക്കരി പോലീസ് സ്റ്റേഷനില് പരാതി നല്കി. രണ്ടാഴ്ച മുന്പ് മേഖലയില് വളര്ത്തുപശുവിന്റെ പാതി ഭക്ഷിച്ചഭാഗം കണ്ടെത്തിയിരുന്നു. ഇതിന് പിന്നാലെ വളര്ത്തുപട്ടിയെയും അജ്ഞാത ജീവി പിടിച്ചിരുന്നു. കടുവ മേഖലയിലുണ്ടെന്ന് നാട്ടുകാര് പലതവണ പരാതിപ്പെട്ടിരുന്നു.
കൊട്ടിയൂര് റെയ്ഞ്ച് ഇരിട്ടി സെക്ഷന് പരിധിയില് വരുന്ന പാറക്കാമല ഭാഗത്ത് കടുവയുടെ സാന്നിധ്യമുണ്ടെന്ന് പ്രദേശവാസികള് നല്കിയ പരാതിയെത്തുടര്ന്നാണ് വാണിയപ്പാറ പുല്ലമ്പാറതട്ട് ഭാഗത്ത് വനംവകുപ്പ് ക്യാമറ സ്ഥാപിച്ചത്.