കൊയിലാണ്ടി മണകുളങ്ങര ക്ഷേത്രോത്സവത്തിനിടെ ഇടഞ്ഞ ആനയുടെ ചവിട്ടേറ്റുമരിച്ച കുറുവങ്ങാട് തട്ടാങ്കണ്ടി ലീല അണിഞ്ഞിരുന്ന സ്വര്ണാഭരണങ്ങള് നഷ്ടപ്പെട്ടതായി കുടുംബത്തിന്റെ പരാതി. രണ്ടര പവന്റെ മാലയും രണ്ടു കമ്മലും നഷ്ടപ്പെട്ടതായി ബന്ധുക്കള് പറയുന്നു. സംഭവത്തെക്കുറിച്ച് അടിയന്തര അന്വേഷണം നടത്തണമെന്ന് കുടുംബം ആവശ്യപ്പെട്ടു. അതേസമയം ഇവരുടെ കൈകളിലിട്ടിരുന്ന മൂന്ന് വള ആശുപത്രി അധികൃതര് ബന്ധുക്കള്ക്ക് തിരിച്ചുനല്കിയിരുന്നു.
അപകടത്തിനു പിന്നാലെ ലീലയെ ആശുപത്രിയിലെത്തിച്ചത് മകന് ലിഗേഷും ബന്ധുക്കളുമായിരുന്നു. ആ സമയം ശരീരത്തില് ആഭരണങ്ങളുണ്ടായിരുന്നതായാണ് ലീലയുടെ സഹോദരന് ശിവദാസന് അവകാശഫഅഫെടുന്നത്. അതേസമയം മെഡിക്കല് കോളേജിലെ മോര്ച്ചറിയിലേക്ക് മൃതദേഹം മാറ്റുന്നതിനിടയില് ആഭരണം നഷ്ടപ്പെട്ടതായാണ് കുടുംബം സംശയിക്കുന്നത്.
ഇക്കഴിഞ്ഞ വ്യാഴാഴ്ച വൈകിട്ടായിരുന്നു കൊയിലാണ്ടിയിലെ മണക്കുളങ്ങര ക്ഷേത്രോത്സവത്തിനിടെ രണ്ടാനകള് ഇടഞ്ഞത്. ആനകള് പരസ്പരം കൊമ്പുകോര്ത്തതോടെ ആളുകള് പരിഭ്രാന്തരാവുകയും ആനകളുടെ ആക്രമണത്തില് ക്ഷേത്ര ഓഫീസ് തകര്ന്നു വീഴുകും ചെയ്തു. ഇതിനിടയില്പ്പെട്ട് രണ്ട് പേര് മരിച്ചിരുന്നു. ആനയുടെ ചവിട്ടേറ്റാണ് ലീല മരിച്ചത്.