ലക്നൗ: പുലിയെ പിടികൂടാന് വെച്ച കുടയില് കുടുങ്ങിയത് കള്ളനെന്ന അസാധാരണവും രസകരവുമായി ഒരു സംഭവമാണ് ഉത്തര്പ്രദേശിലെ ബഹ്റൈച്ചില് നടന്നത്. നാട്ടുകാരെ ഭീതിയിലാഴ്ത്തിയ പുള്ളിപ്പുലിയെ പിടിക്കാനായി വനംവകുപ്പ് സ്ഥാപിച്ച കെണിയില് ആടിനെ മോഷ്ടിക്കാന് എത്തിയ കള്ളന് തന്നെയാണ് കുടുങ്ങിയത്.
ഉംറി ഗ്രാമത്തിലെ ഫഖര്പൂര് പോലീസ് സ്റ്റേഷന് പരിധിയിലാണ് സംഭവം. പുലിക്കെണിയില് വെച്ചിരുന്ന ആടിനെ മോഷ്ടിക്കാനായി രാത്രിയില് പ്രദീപ് കുമാര് കൂട്ടിനകത്ത് കയറുകയായിരുന്നു. അപ്പോഴേ തന്നെ കൂടിന്റെ ഓട്ടോമാറ്റിക് വാതില് അടഞ്ഞു, പുറത്തേക്ക് രക്ഷപ്പെടാനായില്ല. നിരവധി ശ്രമങ്ങള് പരാജയപ്പെട്ടതിനെ തുടര്ന്ന് പ്രദീപ് മൊബൈല് ഉപയോഗിച്ച് പരിചിതരെ വിളിച്ച് വിവരം അറിയിച്ചു.
നാട്ടുകാര് വനംവകുപ്പിനെ അറിയിച്ചതോടെ ഉദ്യോഗസ്ഥര് പുലര്ച്ചെയോടെ സ്ഥലത്തെത്തി വാതില് തുറന്ന് ഇയാളെ പുറത്തെടുത്തു. സംഭവത്തെക്കുറിച്ച് ചോദിച്ചപ്പോള് ”കൂട് ശരിയായി പ്രവര്ത്തിക്കുന്നുണ്ടോ എന്നും ആട് സുരക്ഷിതമാണോ എന്നും പരിശോധിക്കാനാണ് കയറിയത്” എന്നായിരുന്നു പ്രദീപിന്റെ വ്യാജ വിശദീകരണം.
അടുത്തിടെ, ഗ്രാമത്തിലെ 55 കാരിയായ ശാന്തി ദേവി പുള്ളിപ്പുലിയുടെ ആക്രമണത്തില് മരിച്ച പശ്ചാത്തലത്തിലാണ് പ്രദീപിന്റെ വീട്ടില് നിന്ന് 500 മീറ്റര് അകലെയായി കെണി സ്ഥാപിച്ചിരുന്നത്.
പുലിക്കെണികളില് കയറുന്നത് ഏറെ അപകടകാരിയാണെന്ന് ഡി.എഫ്.ഒ രാം സിംഗ് യാദവ് മുന്നറിയിപ്പു നല്കി. ”വാതില് ദേഹത്ത് പതിച്ചിരുന്നെങ്കില് ഗുരുതരമായ പരിക്ക് ഉണ്ടായേനേ, പിന്നെ പുള്ളിപ്പുലി സമീപത്തുണ്ടായിരുന്നെങ്കില് അതിലും വലിയ അപകടം സംഭവിക്കുമായിരുന്നുവെന്നും” അദ്ദേഹം പറഞ്ഞു. പ്രദേശവാസികള് കെണികളില് നിന്ന് മാറിനില്ക്കണമെന്ന് വനംവകുപ്പ് അഭ്യര്ഥിച്ചു.