ശസ്ത്രക്രിയയ്ക്കിടെ വയറ്റില് കത്രിക കുടുങ്ങിയതിനെ തുടര്ന്ന് നീണ്ട ഒന്പത് വര്ഷക്കാലം ദുരിതമനുഭവിച്ച ഹര്ഷിന ഇന്ന് കോഴിക്കോട് മെഡിക്കല് കോളേജില് ജോലിയില് പ്രവേശിച്ചു. ഓഫീസ് അറ്റന്ഡറായാണ് ഹര്ഷിന ചുമതലയേറ്റത്. പുതിയ യുഡിഎഫ് സര്ക്കാര് അധികാരമേറ്റതിന് തൊട്ടുപിന്നാലെ ഹര്ഷിനയ്ക്ക് അതേ മെഡിക്കല് കോളേജില് തന്നെ സ്ഥിരം ജോലി നല്കാന് സര്ക്കാര് തീരുമാനിക്കുകയായിരുന്നു. ആരോഗ്യവകുപ്പ് മന്ത്രി കെ. മുരളീധരന് ഇന്നലെയാണ് നിയമന ഉത്തരവ് കൈമാറിയത്.
‘കൂടെയുണ്ടെന്ന് പറഞ്ഞ് അവഗണിച്ച് പുച്ഛിച്ച് തള്ളിയവര്ക്കുള്ള മറുപടി. യുഡിഎഫ് സര്ക്കാര് ഒപ്പം നിന്നു’, ഇന്ന് ജോലിയില് പ്രവേശിക്കാനായി സമരസമിതി നേതാക്കള്ക്കും ബന്ധുക്കള്ക്കുമൊപ്പം മെഡിക്കല് കോളേജിലെത്തിയ ഹര്ഷിന വികാരാധീനയായാണ് മാധ്യമങ്ങളോട് പ്രതികരിച്ചത്. കൂടെയുണ്ടെന്ന് പറഞ്ഞ ഉറപ്പ് മുഖ്യമന്ത്രി പാലിച്ചെന്നും ആരോഗ്യമന്ത്രി കൂടെയുണ്ടെന്ന് ഇപ്പോള് തോന്നിയെന്നും അവര് പറഞ്ഞു.
2017ല് കോഴിക്കോട് മെഡിക്കല് കോളേജില് നടന്ന പ്രസവ ശസ്ത്രക്രിയയ്ക്കിടെയാണ് ഹര്ഷിനയുടെ വയറ്റില് കത്രിക കുടുങ്ങുന്നത്. തുടര്ന്ന് 2022-ല് മറ്റൊരു ശസ്ത്രക്രിയയിലൂടെയാണ് ഇത് പുറത്തെടുത്തത്. മതിയായ നഷ്ടപരിഹാരവും നീതിയും ആവശ്യപ്പെട്ട് ഹര്ഷിന നടത്തിയ നീണ്ട നിയമ-സമര പോരാട്ടങ്ങള്ക്കൊടുവിലാണ് ഇപ്പോള് പുതിയ സര്ക്കാര് ഹര്ഷിനയ്ക്ക് സ്ഥിരം ജോലി നല്കിയത്.