ഡല്‍ഹിയില്‍ പിടിയിലായ ഐഎസ് ഭീകരന്‍ മുഹമ്മദ് ഷാനവാസ് കേരളത്തിലെത്തിയിരുന്നുവെന്ന ഡല്‍ഹി പൊലീസിന്റെ കണ്ടെത്തലില്‍ അന്വേഷണം ആരംഭിച്ച് കേരളാ പൊലീസ്. ഡല്‍ഹി പൊലീസ് സ്‌പെഷ്യല്‍ സെല്ലില്‍ നിന്നും വിവരങ്ങള്‍ ആവശ്യപ്പെട്ടു.

ഡല്‍ഹിയില്‍ പിടിയിലായ ഐഎസ് ഭീകരന്‍ മുഹമ്മദ് ഷാനവാസ് കേരളത്തിലുമെത്തിയിരുന്നതായി ഡല്‍ഹി പൊലീസ് നേരത്തെ കണ്ടെത്തിയതിന്റെ അടിസ്ഥാനത്തിലാണ് കേരളാ പൊലീസിന്റെ അന്വേഷണം. വനമേഖലയില്‍ താമസിച്ചതായും ഐഎസ് പതാക വെച്ച് ചിത്രങ്ങള്‍ എടുത്തതായും ഈ ചിത്രങ്ങള്‍ കണ്ടുകിട്ടിയതായും ഡല്‍ഹി സ്‌പെഷ്യല്‍ സെല്‍ വ്യക്തമാക്കിയിരുന്നു. കേരളാ ഇന്റലിജിന്‍സ് മേധാവി എഡിജിപി മനോജ് എബ്രഹാം നേരിട്ടാണ് കേസ് അന്വേഷിക്കുന്നത്.

ഇവര്‍ ദക്ഷിണേന്ത്യയില്‍ വിവിധയിടങ്ങളില്‍ സ്‌ഫോടനത്തിന് പദ്ധതിയിട്ടതായും പൊലീസ് വ്യക്തമാക്കി. അറസ്റ്റിലായ മൂന്നുപേരും എന്‍ജിനീയറിങ് ബിരുദധാരികളാണ്. ഇവര്‍ ചെറു സംഘങ്ങളായി ഐഎസ് മൊഡ്യൂളുകള്‍ രൂപീകരിച്ച് രാജ്യത്തിന്റെ വിവിധ ഭാഗങ്ങളില്‍ സ്‌ഫോടനം നടത്താനായിരുന്നു പദ്ധതി.

ആളൊഴിഞ്ഞ കൃഷിഭൂമി, വനപ്രദേശം എന്നിവിടങ്ങളില്‍ കുക്കര്‍, ഗ്യാസ് സിലിണ്ടര്‍, ഐഇഡി എന്നിവ ഉപയോഗിച്ച് സ്‌ഫോടനം നടത്തി പരിശീലനം നടത്തിയതായും ഡല്‍ഹി പൊലീസ് സ്‌പെഷല്‍ സെല്‍ വൃത്തങ്ങള്‍ അറിയിച്ചു.

ആലപ്പുഴ, കോട്ടയം ജില്ലകളിലെ വിവിധ താലൂക്കുകളില്‍ വിദ്യാഭ്യാസ സ്ഥാപനങ്ങള്‍ക്ക് നാളെ അവധി പ്രഖ്യാപിച്ചു. ആലപ്പുഴ ജില്ലയില്‍ ദുരിതാശ്വാസ ക്യാമ്പുകള്‍ പ്രവര്‍ത്തിക്കുന്ന ചേര്‍ത്തല, ചെങ്ങന്നൂര്‍ താലൂക്കുകളിലെ വിദ്യാഭ്യാസസ്ഥാപനങ്ങള്‍ക്കാണ് അവധി.

കോട്ടയം താലൂക്കിലെ ഹയര്‍സെക്കന്‍ഡറി തലം വരെയുള്ള വിദ്യാഭ്യാസ സ്ഥാപനങ്ങള്‍ക്കും അങ്കണവാടികള്‍ക്കും അവധിയായിരിക്കും. ചങ്ങനാശേരി, വൈക്കം താലൂക്കുകളിലെ ക്യാമ്പുകള്‍ പ്രവര്‍ത്തിക്കുന്ന സ്‌കൂളുകള്‍ക്കും നാളെ അവധിയായിരിക്കും.

മദ്രസയില്‍ കയറി സാമൂഹിക വിരുദ്ധര്‍ ഭക്ഷ്യവസ്തുക്കള്‍ നശിപ്പിച്ചു. തിരൂര്‍ കൂട്ടായി അരയന്‍ കടപ്പുറം സിറാജുല്‍ ഉലൂം മദ്രസയിലാണ് ഭക്ഷ്യവസ്തുക്കള്‍ നശിപ്പിച്ചും മോഷണം നടത്തിയും സാമൂഹിക വിരുദ്ധര്‍ പ്രശ്‌നമുണ്ടാക്കിയത്. നബിദിന പരിപാടിയുടെ ഭാഗമായി സംഘടിപ്പിച്ചു വച്ചിരുന്ന മുളകുപൊടി, നെയ്യ്, ബിസ്‌കറ്റ്, ശീതള പാനീയങ്ങള്‍ എന്നിവ കവര്‍ പൊട്ടിച്ച് നിലത്തു വിതറിയിട്ടുണ്ട്.

കൂടാതെ ഭക്ഷ്യവസ്തുക്കള്‍ ഇവിടെ നിന്ന് മോഷണം പോയിട്ടുമുണ്ട്. നബിദിനാഘോഷത്തിന്റെ ഭാഗമായി അടച്ച മദ്രസ രാവിലെ തുറന്ന അധ്യാപകരാണ് ഇത് കണ്ടത്. തുടര്‍ന്ന് മഹല്ല് കമ്മിറ്റി ഭാരവാഹികള്‍ പൊലീസിനെ വിവരമറിയിച്ചു. സംഭവത്തില്‍ അന്വേഷണം തുടങ്ങി. നൂറിലധികം കുട്ടികള്‍ പഠിക്കുന്ന മദ്രസയാണിത്. നിലത്ത് മുളകുപൊടി അടക്കം വിതറിയതിനാല്‍ ക്ലാസ് മുടങ്ങി.