ന്യൂഡല്ഹി: ദേശീയ ടീമില് ഇടം ഉറപ്പാക്കാന് ആഭ്യന്തര ക്രിക്കറ്റ് നിര്ബന്ധമാക്കിയ ബിസിസിഐയുടെ നിര്ദേശത്തിന് വഴങ്ങി വിരാട് കോഹ്ലി വിജയ് ഹസാരെ ട്രോഫിയില് കളിക്കാന് തയ്യാറായി. ഡല്ഹി ക്രിക്കറ്റ് അസോസിയേഷന് പ്രസിഡന്റ് രോഹന് ജെയ്റ്റ്ലിയാണ് കോഹ്ലി പങ്കെടുക്കുന്നുവെന്ന വിവരം സ്ഥിരീകരിച്ചത്.
മുമ്പ് ടൂര്ണമെന്റില് പങ്കെടുക്കാന് കോഹ്ലി താല്പര്യമില്ലെന്ന റിപ്പോര്ട്ടുകള് ഉണ്ടായിരുന്നു. എന്നാല് ഇതോടെ 15 വര്ഷത്തിന് ശേഷം കോഹ്ലി ആഭ്യന്തര ഏകദിന മത്സരരംഗത്തേക്ക് തിരിച്ചെത്തുകയാണ്.
ടെസ്റ്റും ട്വന്റി20യും വിടവാങ്ങിയ കോഹ്ലിയും രോഹിതും ഇപ്പോള് ഏകദിന ഫോര്മാറ്റിലാണ് ഇന്ത്യക്കായി കളിക്കുന്നത്. ദക്ഷിണാഫ്രിക്കക്കെതിരായ പരമ്പരയ്ക്ക് ശേഷം കോഹ്ലി ലണ്ടനിലെ കുടുംബത്തെ സന്ദര്ശിച്ച് തുടര്ന്ന് വിജയ് ഹസാരെ ട്രോഫിക്കായി നാട്ടിലെത്തും.
വിശാലമായ മത്സരങ്ങളായ ഏകദിന ലോകകപ്പ് ഉള്പ്പെടെ ചാമ്പ്യന്ഷിപ്പുകള് മുന്നിലിരിക്കുന്ന സാഹചര്യത്തില് ആഭ്യന്തര ക്രിക്കറ്റ് കളിക്കണമെന്ന ബോര്ഡിന്റെയും സെലക്ടര്മാരുടെയും നിര്ദ്ദേശം തന്നെയാണ് കോഹ്ലിയെ ഈ തീരുമാനത്തിലേക്ക് നയിച്ചത്.
കായികക്ഷമതയും മല്സരപരിചയവും നിലനിര്ത്താനായി ആഭ്യന്തര ക്രിക്കറ്റ് ആവശ്യമാണ് എന്ന നിലപാടിലാണ് ബിസിസിഐ. ഏകദിന ടീമിലേക്ക് തിരിച്ചുവിളിക്കണമെങ്കില് ആഭ്യന്തര മത്സരങ്ങളില് പങ്കാളികളാകണമെന്ന് കോഹ്ലിയോടും രോഹിത്തിനോടും നേരത്തെ തന്നെ ബോര്ഡ് അറിയിച്ചിരുന്നു. ഓസ്ട്രേലിയക്കെതിരായ ബോര്ഡര്ഗാവസ്കര് ട്രോഫി പരമ്പര തോല്വിക്ക് പിന്നാലെയാണ് ബിസിസിഐ നടപടി കടുപ്പിച്ചത്.