ഭക്ഷ്യ സുരക്ഷാ വകുപ്പിന്റെ നേതൃത്വത്തില് സംസ്ഥാന വ്യാപകമായി നടന്ന ഓപ്പറേഷന് ഫോസ്കോസ് ലൈസന്സ് െ്രെഡവിന്റെ ഭാഗമായി ഒറ്റ ദിവസം കൊണ്ട് 4463 പരിശോധനകള് നടത്തിയതായി ആരോഗ്യ വകുപ്പ് മന്ത്രി വീണാ ജോര്ജ്. ലൈസന്സ് ഇല്ലാതെ പ്രവര്ത്തിച്ച 929 സ്ഥാപനങ്ങളുടെ പ്രവര്ത്തനം നിര്ത്തിവയ്ക്കാന് ഭക്ഷ്യ സുരക്ഷാ വകുപ്പ് നടപടി സ്വീകരിച്ചു എന്നും മന്ത്രി പറഞ്ഞു.
പരിശോധനയില് 458 സ്ഥാപനങ്ങള് ലൈസന്സിന് പകരം രജിസ്ട്രേഷന് എടുത്ത് പ്രവര്ത്തിക്കുന്നതായി കണ്ടതിനാല് അവര്ക്ക് ലൈസന്സ് എടുക്കുന്നതിനു വേണ്ടി നോട്ടീസ് നല്കി. കൂടാതെ ലൈസന്സ് എടുത്ത് പ്രവര്ത്തിക്കുന്നതിന് 756 സ്ഥാപനങ്ങള്ക്ക് നോട്ടീസ് നല്കി. 112 സ്ക്വാഡുകളാണ് ലൈസന്സ് പരിശോധനയ്ക്ക് സജ്ജമാക്കിയിരിക്കുന്നത്. വരും ദിവസങ്ങളിലും ലൈസന്സ് പരിശോധന തുടരുമെന്നും മന്ത്രി വ്യക്തമാക്കി.
ഭക്ഷണം വില്പ്പന നടത്തുന്ന സ്ഥാപനങ്ങള് ലൈസന്സ് എടുത്തു മാത്രമേ പ്രവര്ത്തനം നടത്താന് പാടുള്ളൂ എന്ന് ഭക്ഷ്യസുരക്ഷാ വകുപ്പ് നിരവധി തവണ വ്യക്തമാക്കിയിരുന്നിട്ടും അതിന് നടപടി സ്വീകരിക്കാത്തതിനെ തുടര്ന്നാണ് പരിശോധനകള് കര്ശനമാക്കാന് തീരുമാനിച്ചത്.