പാലക്കാട് മുണ്ടൂരില് കാട്ടാന ആക്രമണത്തില് കൊല്ലപ്പെട്ട കുമാരന്റെ പോസ്റ്റ്മോര്ട്ടം പൂര്ത്തിയായി. പാലക്കാട് ജില്ലാ ആശുപത്രി മോര്ച്ചറിയില് വെച്ചായിരുന്നു പോസ്റ്റ്മോര്ട്ടം നടപടികള് പൂര്ത്തിയായത്. കാട്ടാന ആക്രമണത്തില് കുമാരന്റെ വാരിയെല്ലിനും, നട്ടെല്ലിനും, കഴുത്തെല്ലിനും പൊട്ടലുണ്ടായി. ആന്തരിക രക്തസ്രാവമാണ് മരണകാരണമെന്ന് പോസ്റ്റ്മോര്ട്ടം റിപ്പോര്ട്ടില് പറയുന്നു.
പോസ്റ്റ്മോര്ട്ടം നടപടികള് പൂര്ത്തിയാക്കിയ ശേഷം മൃതദേഹം ബന്ധുകള്ക്ക് വിട്ടുനല്കി.
ഇന്ന് പുലര്ച്ചെ 3.30 ന് മൂത്രമൊഴിക്കാന് വിട്ടുമുറ്റത്തേക്ക് ഇറങ്ങിയ കുമാരനെ കാട്ടാന ആക്രമിക്കുകയായിരുന്നു. സംഭവ സ്ഥലത്ത് വെച്ചു തന്നെ കുമാരന് മരിക്കുകയായിരുന്നു. മൃതദേഹം ആശുപത്രിയിലേക്ക് മാറ്റാതെ ബന്ധുക്കളും നാട്ടുകാരും പ്രതിഷേധിച്ചു. തുടര്ന്ന് വനംമന്ത്രി വിഷയത്തില് ഇടപെടുകയായിരുന്നു.