ന്യൂഡല്ഹി: കേന്ദ്ര സര്ക്കാരിന്റെ നയങ്ങള്ക്കെതിരെ രാജ്യവ്യാപകമായി തൊഴിലാളികളും കര്ഷകരും നടത്തുന്ന പണിമുടക്കിന് പൂര്ണ്ണ പിന്തുണ പ്രഖ്യാപിച്ച് പ്രതിപക്ഷ നേതാവ് രാഹുല് ഗാന്ധി. കര്ഷകരുടെയും തൊഴിലാളിവര്ഗത്തിന്റെയും ശബ്ദം ദീര്ഘകാലമായി അവഗണിക്കപ്പെടുകയാണെന്നും രാഹുല് ഗാന്ധി വിമര്ശിച്ചു.
പുതിയ നാല് ലേബര് കോഡുകള് തൊഴിലാളികളുടെ അവകാശങ്ങളെ ഇല്ലാതാക്കുമെന്നും അവര്ക്ക് തൊഴില് സുരക്ഷ ഉറപ്പാക്കില്ലെന്നും രാഹുല് ആരോപിച്ചു. ഇന്ത്യ-യുഎസ് വ്യാപാര കരാറുകള് കര്ഷകരുടെ ഉപജീവനത്തിന് വലിയ തിരിച്ചടിയാകുമെന്നുമെന്നും അദ്ദേഹം പറഞ്ഞു. ഗ്രാമീണ മേഖലയുടെ കരുത്തായ തൊഴിലുറപ്പ് പദ്ധതിയെ സര്ക്കാര് ദുര്ബലപ്പെടുത്തുകയാണെന്നും രാഹുല് ഗാന്ധി കൂട്ടിച്ചേര്ത്തു.
‘അവരുടെ ഭാവി നിശ്ചയിക്കുന്ന തീരുമാനങ്ങളില് നിന്ന് അവരെ പൂര്ണ്ണമായും ഒഴിവാക്കി. മോദി ജി ഇനി എങ്കിലും കേള്ക്കുമോ? അതോ അദ്ദേഹത്തിന് മേലുള്ള സമ്മര്ദ്ദം അത്രയ്ക്ക് ശക്തമാണോ?’ എന്ന് രാഹുല് ഗാന്ധി ചോദിച്ചു.
പത്ത് കേന്ദ്ര ട്രേഡ് യൂണിയനുകളും സംയുക്ത കിസാന് മോര്ച്ചയും (SKM) സംയുക്തമായാണ് ഇന്ന് പണിമുടക്ക് ആഹ്വാനം ചെയ്തത്. നാല് ലേബര് കോഡുകള് പിന്വലിക്കുക, വൈദ്യുതി ഭേദഗതി ബില് 2025 ഉപേക്ഷിക്കുക, കര്ഷക വിരുദ്ധമായ വ്യാപാര കരാറുകളില് നിന്ന് പിന്മാറുക, തൊഴിലുറപ്പ് പദ്ധതിയുടെ പേര് മാറ്റിയതും ബജറ്റ് വെട്ടിക്കുറച്ചതും പുനഃപരിശോധിക്കുക എന്നിവയാണ് പ്രധാനമായും യൂണിയന് ഉന്നയിക്കുന്ന ആവശ്യങ്ങള്.