കോഴിക്കോട്: ഭാവി കേരളം എങ്ങിനെ ആയിരിക്കണമെന്നതിനെ സംബന്ധിച്ച് മാനിഫെസ്റ്റോ തയ്യാറാക്കുന്നതിൻ്റെ ഭാഗമായി മുസ്ലിം യൂത്ത് ലീഗ് സംസ്ഥാന കമ്മറ്റി സംഘടിപ്പിക്കുന്ന യൂത്ത് സ്കാനിൻ്റെ സംസ്ഥാന തല ഉദ്ഘാടനം നാളെ രാവിലെ 9 മണിക്ക് മലപ്പുറം ഗവ. കോളേജിന് സമീപം മുസ്ലിം യൂത്ത് ലീഗ് സംസ്ഥാന പ്രസിഡണ്ട് പാണക്കാട് സയ്യിദ് മുനവ്വറലി ശിഹാബ് തങ്ങൾ നിർവ്വഹിക്കുമെന്ന് സംസ്ഥാന ജനറൽ സെക്രട്ടറി പി. കെ ഫിറോസ് പറഞ്ഞു.
പൊതുജനങ്ങളിൽ നിന്നും അഭിപ്രായ രൂപീകരണത്തിനാണ് സംസ്ഥാന വ്യാപകമായി യൂത്ത് സ്കാൻ എന്ന പേരിൽ അഭിപ്രായ സ്വരൂപണം നടത്തുന്നത്. സംസ്ഥാന കമ്മറ്റി നൽകുന്ന ക്യൂ. ആർ കോഡ് ഉപയോഗിച്ച് ആളുകളെ സ്കാൻ ചെയ്യിപ്പിച്ച് സർവ്വേ ഫോം പൂരിപ്പിച്ചാണ് അഭിപ്രായം ക്രോഡീകരിക്കുന്നത്. ബസ് സ്റ്റാൻ്റുകൾ, അങ്ങാടികൾ, വിദ്യാഭ്യാസ സ്ഥാപനങ്ങൾ തുടങ്ങി വിദ്യാർത്ഥികളും യുവജനങ്ങളും ഒത്ത് കൂടുന്ന ഇടങ്ങളിലാണ് പ്രധാനമായും കിയോസ്ക്കുകൾ സ്ഥാപിക്കുക. അതോടൊപ്പം ഓരോ പഞ്ചായത്തിലെയും പ്രധാനപ്പെട്ട വ്യക്തികളെ നേരിട്ട് കണ്ട് അഭിപ്രായങ്ങൾ രേഖപ്പെടുത്തുകയും സോഷ്യൽ മീഡിയ വഴി പ്രചരിപ്പിക്കുകയും ചെയ്യും.