കോഴിക്കോട്: കരിപ്പൂര്‍ വിമാനാപകടം സിനിമയാവുന്നു. ‘കാലിക്കറ്റ് എക്‌സ്പ്രസ്’ എന്ന പേരില്‍ മായയാണ് ചിത്രം സംവിധാനം ചെയ്യുന്നത്. മജീദ് മാറഞ്ചേരിയാണ് ചിത്രത്തിന് തിരക്കഥയൊരുക്കുന്നത്. മലയാളത്തിലെ പ്രമുഖ താരങ്ങളെ അണിനിരത്തി ഒരുക്കുന്ന ചിത്രം നൂറില്‍ പരം പുതുമുഖങ്ങളേയും അവതരിപ്പിക്കുമെന്നാണ് അണിയറ പ്രവര്‍ത്തകര്‍ പറയുന്നത്.
നൂതന സാങ്കേതിക വിദ്യയുടെ സഹായത്തോടെയായിരിക്കും ചിത്രം ഒരുക്കുക. 2021 ജനുവരിയിലായിരിക്കും സിനിമയുടെ ചിത്രീകരണം ആരംഭിക്കുക. ഓഗസ്‌റ്റോടെ റിലീസ് ചെയ്യാനാണ് തീരുമാനം.
കരിപ്പൂരില്‍ ആഗസ്റ്റ് ഏഴിനാണ് വിമാനാപകടമുണ്ടാവുന്നത്. രാത്രി ഏഴേമുക്കാലോടെയാണ് വിമാനം ലാന്റിംഗ് തകരാര്‍ മൂലം അപകടത്തില്‍ പെടുന്നത്. 19 പേരാണ് അപകടത്തില്‍ മരിച്ചത്. കോവിഡ് നിയന്ത്രണങ്ങള്‍ നിലനില്‍ക്കുമ്പോഴും രക്ഷാപ്രവര്‍ത്തനത്തില്‍ നാട്ടുകാര്‍ ഇടപെട്ടതാണ് അപകടത്തിന്റെ വ്യാപ്തി കുറച്ചത്.