മൊഹാലി: ഇന്ത്യ-ലങ്ക രണ്ടാം ഏകദിനത്തില്‍ കളിയിലെ താരമായ രോഹിത്ത് ശര്‍മ്മ നടന്നു കയറിയത് ചരിത്രത്തിലേക്ക്. രോഹിത്ത് ശര്‍മ്മ അക്ഷരാര്‍ത്ഥത്തില്‍ നിറഞ്ഞാടിയപ്പോള്‍ ലങ്കന്‍ ബൗളര്‍മാര്‍ നിരന്ന് തല്ലുവാങ്ങുകയായിരുന്നു. 153 പന്തില്‍ 13 ഫോറും 12 സിക്‌സും സഹിതമാണ് രോഹിത്തിന്റെ കൊടുങ്കാറ്റ് ഉയര്‍ത്തിയ മൂന്നാം ഡബിള്‍ സെഞ്ച്വറി (208*) റണ്‍സ് സ്വന്തമാക്കിയത്.
മത്സരത്തിന്റെ 43ാം ഓവറില്‍ ലങ്കന്‍ ബൗളര്‍ ലക്മലിനെ രോഹിത്ത് നിര്‍ദാക്ഷിണ്യമാണ് ശിക്ഷിച്ചത്. നാല് സിക്‌സുകളാണ് രോഹിത്ത് ആ ഓവറില്‍ അടിച്ച് സ്വന്തമാക്കിയത്. 115 പന്തിലാണ് രോഹിത്ത് അദ്യ 100റിലെത്തിയത്. പിന്നീട് വെറും 31 പന്തിലായിരുന്നു രോഹിത്ത് 200ല്‍ എത്തിയത്. അവസാന 108 റണ്‍സെടുത്തത് വെറും 38 പന്തിലായിരുന്നു. 135.94 ആയിരുന്നു രോഹിത്തിന്റെ സ്‌െ്രെടക്ക് റൈറ്റ്. മൊഹാലിയില്‍ ഒരു ഇന്ത്യന്‍ താരം നേടുന്ന ഉയര്‍ന്ന സ്‌കോറെന്ന ബഹുമതിയും ഇനി രോഹിതിന്റെ പേരിലാണ്.
കോലിയുടെ 154 ആയിരുന്നു ഇതുവരെ മൊഹാലിയിലെ ഉയര്‍ന്ന സ്‌കോര്‍. 2010ല്‍ ദക്ഷിണാഫ്രിക്കയ്‌ക്കെതിരെ സച്ചിന്‍ ടെണ്ടുല്‍ക്കര്‍ ചരിത്രത്തിലെ ആദ്യ ഇരട്ടസെഞ്ചുറി നേടുന്നതുവരെ, ഏകദിന ഇരട്ടസെഞ്ച്വറിയെന്നത് ബാറ്റ്‌സ്മാന്‍മാരെ സംബന്ധിച്ചിടത്തോളം ഒരു വിദൂര സ്വപ്‌നം മാത്രമായിരുന്നു. സച്ചിന്റെ ആദ്യ ഇരട്ടസെഞ്ചുറിക്കു ശേഷവും അധികം ഇരട്ടസെഞ്ചുറികളൊന്നും ഏകദിനത്തില്‍ പിറന്നിട്ടില്ല. സച്ചിന്റെതുള്‍പ്പെടെ ഇതുവരെ ഏകദിനത്തില്‍ പിറന്ന ഇരട്ടസെഞ്ച്വറി നേട്ടങ്ങള്‍ ഏഴു മാത്രം. ഇതില്‍ മൂന്നെണ്ണവും നേടിയത് സാക്ഷാല്‍ രോഹിത് ശര്‍മ. ക്രിക്കറ്റ് ചരിത്രത്തിലെ മറ്റ് താരങ്ങളെല്ലാം ചേര്‍ന്ന് ആകെ നേടിയതിനേക്കാള്‍ ഒന്നു മാത്രം കുറവ്!. ഏകദിനത്തില്‍ 250 കടക്കാന്‍ ബുദ്ധിമുട്ടുന്ന ടീമുകള്‍ ക്രിക്കറ്റ് ലോകത്തുണ്ടെന്നിരിക്കെ ‘അതുക്കും മേലെ ഏകദിനത്തിലെ ഏറ്റവും ഉയര്‍ന്ന വ്യക്തിഗത സ്‌കോറും രോഹിതിന്റെ പേരിലാണ്. 2014ല്‍ കൊല്‍ക്കത്ത ഈഡന്‍ ഗാര്‍ഡന്‍സില്‍ ലങ്കക്കെതിരെ പുറത്താകാതെ നേടിയ 264 റണ്‍സ്.
അതിനും ഒരു വര്‍ഷം മുന്‍പ്, 2013ല്‍ ബെംഗളൂരു ചിന്നസ്വാമി സ്‌റ്റേഡിയത്തിലായിരുന്നു രോഹിതിന്റെ ആദ്യ ഏകദിന ഇരട്ടസെഞ്ചുറി. സാക്ഷാല്‍ ഓസ്‌ട്രേലിയയ്‌ക്കെതിരെ 209 റണ്‍സാണ് അന്ന് രോഹിത് സ്വന്തമാക്കിയത്. മാര്‍ട്ടിന്‍ ഗപ്റ്റില്‍ (237*), വീരേന്ദര്‍ സേവാഗ് (219), ക്രിസ് ഗെയ്ല്‍ (215), സച്ചിന്‍ ടെണ്ടുല്‍ക്കര്‍ (200*) എന്നിവരാണ് രോഹിതിനു പുറമെ ഏകദിനത്തില്‍ ഇരട്ടസെഞ്ചുറി നേടിയിട്ടുള്ളവര്‍