കരുവാരകുണ്ടില്‍ ലോട്ടറിക്കടയില്‍ ഫലം പരിശോധിച്ചു നിരാശനായി മടങ്ങുമ്പോള്‍ അതിഥിത്തൊഴിലാളിക്കു റോഡില്‍നിന്നു വീണുകിട്ടിയത് 37,400 രൂപ. ഒരു മടിയും കൂടാതെ ഉടമയെ തേടിപ്പിടിച്ചു തുക കൈമാറി മാതൃക കാട്ടിയിരിക്കുകയാണ് ചെമ്പന്‍കുന്ന് കോളനിയില്‍ താമസിക്കുന്ന ചന്ദ്രമോഹന്‍. കഴിഞ്ഞ ദിവസം വൈകിട്ട് 6.30 ന് പുന്നക്കാട് പുല്‍വെട്ട റോഡിനു സമീപത്തെ ലോട്ടറിക്കടയ്ക്ക് അടുത്തുവച്ചാണ് പണം വീണുകിട്ടിയത്.
നോമ്പുതുറ സമയമായതിനാല്‍ റോഡ് വിജനമായിരുന്നു. പണം എന്തുചെയ്യണമെന്നറിയാതെ ആദ്യം തുക എണ്ണിനോക്കി. നേരെ വീട്ടിലെത്തി ഭാര്യ സതിയെ വിവരമറിയിച്ചു. ഉടന്‍തന്നെ രണ്ടുപേരും കൂടി പണത്തിന്റെ ഉടമയെ കണ്ടെത്താന്‍ വാര്‍ഡ് അംഗത്തിന്റെ അടുത്തെത്തുകയായിരുന്നു. തുടര്‍ന്ന് സമൂഹമാധ്യമങ്ങള്‍ വഴി വിവരം നല്‍കിയാണ് വ്യാപാരിയുടേതാണ് പണമെന്നു കണ്ടെത്തിയത്.
പിറ്റേ ദിവസം തന്നെ ചന്ദ്രമോഹന്‍ നാട്ടുകാരുടെ സാന്നിദ്ധ്യത്തില്‍ തുക കൈമാറി. 5 വര്‍ഷമായി ചെമ്പന്‍കുന്ന് കോളനിയില്‍ ഭാര്യയും 2 മക്കളുമൊത്ത് വാടകവീട്ടില്‍ താമസിക്കുന്ന ചന്ദ്രമോഹന്‍ തമിഴ്‌നാട് പന്തല്ലൂര്‍ സ്വദേശിയാണ്. കൂലിപ്പണിക്കാരനാണ്.