പാനൂര്‍: പാര്‍ക്കോ ഗ്രൂപ്പ് ചെയര്‍മാനും കല്ലിക്കണ്ടി എന്‍.എ.എം കോളേജ് പ്രസിഡന്റുമായ കടവത്തൂരിലെ പി.എ റഹ്മാന്‍ സാഹിബ് നിര്യാതനായി. അര്‍ബുദ സംബന്ധമായ രോഗം ബാധിച്ചു കഴിഞ്ഞ കുറെ മാസങ്ങളായി ചികിത്സയിലായിരുന്നു. സാധാരണ കുടുംബത്തില്‍ ജനിച്ചു തന്റെ കഠിനാധ്വാനം കൊണ്ട് ബിസിനസ്സ് രംഗത്ത് ഉയരങ്ങള്‍ കീഴടക്കിയ പി.എ റഹ്മാന്‍ സാഹിബ് നിരവധി ബിസിനസ് സംരംഭങ്ങളുടെ അമരക്കാരനാണ്. ജീവ കാരുണ്യ മേഖലയിലും വേറിട്ട അടയാളപ്പെടുത്തലുകള്‍ നടത്തിയ റഹ്മാന്‍ സാഹിബ് അടിയുറച്ച മുസ്ലിം ലീഗുകാരനായിരുന്നു.
പ്രസ്ഥാനത്തിന് ഉണ്ടായ നിരവധി പ്രതിസന്ധി ഘട്ടങ്ങളില്‍ പാര്‍ട്ടിക്ക് തുണയായി മുന്നില്‍ ഉണ്ടാകുമായിരുന്നു റഹ്മാന്‍ സാഹിബ്.
മുസ്ലിം ലീഗിന്റെ സംസ്ഥാന കൗണ്‍സില്‍ അംഗമായും ദുബായ് മിഡിലീസ്റ്റ് ചന്ദ്രിക യുടെ ഡയറക്ടറായും പ്രവര്‍ത്തിച്ചിട്ടുണ്ട്. തികഞ്ഞ ദീനി സേവകനായ റഹ്മാന്‍ സാഹിബ് നിരവധി പള്ളികള്‍ സ്വന്തമായി പണികഴിപ്പിച്ചിട്ടുണ്ട്. എല്ലാ മത സംഘടനകള്‍ക്കും, രാഷ്ട്രീയ പാര്‍ട്ടികള്‍ക്കും ഒരേ പോലെ സ്വീകാര്യനായ റഹ്മാന്‍ സാഹിബ് സംസ്ഥാന തലത്തിലെ മുഴുവന്‍ നേതാക്കളുമായും അടുത്ത സൗഹൃദം കാത്തു സൂക്ഷിക്കുന്ന വ്യക്തിത്വമാണ്. സേവന ജീവകാരുണ്യ രംഗങ്ങളില്‍ സജീവമായിരുന്ന റഹ്മാന്‍ സാഹിബിന്റെ നിര്യാണം നാടിന് ഒന്നാകെ തീരാനഷ്ടമാണ്.