ഡല്‍ഹി: തെക്ക് കിഴക്കന്‍ ഡല്‍ഹിയിലെ മദന്‍പൂരില്‍ കെട്ടിടം പൊളിക്കുന്നത് തടഞ്ഞ ആംആദ്മി പാര്‍ട്ടി എംഎല്‍എ അമാനത്തുള്ള ഖാനെ കസ്റ്റഡിയിലെടുത്ത് പൊലീസ്. കെട്ടിടം പൊളിക്കലിനെതിരെ പ്രതിഷേധിച്ചതിനെതിരെയാണ് പൊലീസിന്റെ നടപടി. ശക്തമായ പോലീസ് കാവലിലാണ് മദന്‍പൂരില്‍ കെട്ടിടം പൊളിക്കുന്നത്.
‘ പാവപ്പെട്ടവരുടെ വീട് സംരക്ഷിക്കുമെങ്കില്‍ ഞാന്‍ ജയിലില്‍ പോകാന്‍ തയ്യാറാണ്. ഇവിടെ കയേറ്റം നടന്നിട്ടില്ല. ഉണ്ടെങ്കില്‍ അതിനെ പിന്തുണക്കില്ല’, അദ്ദേഹം പറഞ്ഞു.
പ്രതിഷേധം നടത്തുന്നവരെ സംഭവസ്ഥലത്ത് നിന്ന് പൊലീസ് മാറ്റുന്നുണ്ട്. അമാനത്തുള്ള ഖാന്‍ സൗത്ത് ഡല്‍ഹി കോര്‍പറേഷന്റെ നടപടികള്‍ക്കെതിരെ പൊലീസിന് പരാതി നല്‍കിയിരുന്നു. ഓഖ്‌ല മേഖലയിലെ കയ്യേറ്റം ഒഴിപ്പിക്കല്‍, സ്ഥലം എം.എല്‍.എയായ തന്നെയോ പൊതുമരാമത്ത് വകുപ്പിനെയോ അറിയിക്കാതെ നടക്കുന്നുവെന്നാണ് അമാനത്തുള്ളയുടെ പരാതി.