കേരളം സ്‌കൂള്‍ കലോത്സവത്തിന്റെ രജിസ്‌ട്രേഷന്‍ തിങ്കളാഴ്ച (ജനുവരി 2) ആരംഭിക്കും. കോഴിക്കോട് ഗവ. മോഡല്‍ ഹയര്‍സെക്കന്ററി സ്‌കൂളില്‍ തിങ്കളാഴ്ച രാവിലെ 11 മണിയ്ക്ക് വിദ്യാഭ്യാസമന്ത്രി വി. ശിവന്‍കുട്ടി രജിസ്‌ട്രേഷന്‍ ഉദ്ഘാടനം ചെയ്യും. റജിസ്‌ട്രേഷന്‍ കമ്മിറ്റി ചെയര്‍മാന്‍ ലിന്റോജോസഫ് എം.എല്‍.എ അധ്യക്ഷത വഹിക്കും.
ചടങ്ങില്‍ കലോത്സവത്തിന്റെ ഡി.ജി.ഇ. കെ ജീവന്‍ബാബു, ജനറല്‍ കണ്‍വീനര്‍ സി.എ.സന്തോഷ്, ഡോ.അനില്‍ പി.എം, ആര്‍.ഡി.ഡി.കോഴിക്കോട് മനോജ്കുമാര്‍.സി , ഡി.ഡി.ഇ. കോഴിക്കോട് തുടങ്ങിയവര്‍ പങ്കെടുക്കും.
കലോത്സവത്തിനായി കോഴിക്കോട് എത്തുന്ന ആദ്യ ജില്ലാ ടീമിന് 9 മണിക്ക് റെയില്‍വേ സ്റ്റേഷനില്‍ റിസപ്ഷന്‍ കമ്മിറ്റിയുടെ ആഭിമുഖ്യത്തില്‍ സ്വീകരണം നല്‍കും. 10.10 ന് പബ്ലിസിറ്റി കമ്മിറ്റിയുടെ അഭിമുഖ്യത്തില്‍ ‘ഡോക്യൂ ഫിക്ഷന്‍ ‘ റിലീസ് ചെയ്യും. ഫറൂഖ് എച്ച്എസില്‍ കലോത്സവ തീം വീഡിയോ പ്രകാശനം മന്ത്രി പി എ മുഹമ്മദ് റിയാസ് നിര്‍വഹിക്കും.
രാവിലെ 10:30ന് മാനാഞ്ചിറയില്‍ കലോത്സവ വണ്ടി എന്നപേരില്‍ അലങ്കരിച്ച 30 ബസ്സുകളും നിരക്ക് കുറച്ച് ഓടുന്ന ഓട്ടോകളും അണിനിരത്തി റോഡ് ഷോ നടക്കും. 11മണിക്ക് വെല്‍ഫെയര്‍ കമ്മിറ്റിയുടെ ആഭിമുഖ്യത്തില്‍ ലഹരി വിരുദ്ധ ബോധവല്‍ക്കരണ പ്രവര്‍ത്തനങ്ങളുടെ ഭാഗമായി ഫ്‌ലാഷ്‌മോബ് മാനാഞ്ചിറയില്‍ സംഘടിപ്പിക്കും.
ഉച്ചയ്ക്ക് 12 മണിക്ക് അക്കോമഡേഷന്‍ കമ്മിറ്റിയുടെ ആഭിമുഖ്യത്തില്‍ നടക്കാവ് സ്‌കൂള്‍, കുട്ടികള്‍ക്ക് താമസ സൗകര്യത്തിനായി തുറന്നുകൊടുക്കും. പൊതുവിദ്യാഭ്യാസ, പൊതുമരാമത്ത് മന്ത്രിമാര്‍ പങ്കെടുക്കും.
ഉച്ചയ്ക്ക് ഒരുമണിക്ക് കലോത്സവ സ്വര്‍ണ്ണക്കപ്പ് ജില്ലാ അതിര്‍ത്തിയായ രാമനാട്ടുകരയില്‍ ഏറ്റുവാങ്ങും. 10 കേന്ദ്രങ്ങളിലൂടെ സഞ്ചരിച്ചെത്തുന്ന സ്വര്‍ണക്കപ്പ് ഘോഷയാത്രയെ മുതലക്കുളം മൈതാനിയില്‍ മന്ത്രിമാരായ വി ശിവന്‍കുട്ടിയും പി എ മുഹമ്മദ് റിയാസും വരവേല്‍ക്കും. തുടര്‍ന്ന് രണ്ടു മണിക്കൂര്‍ നേരത്തേക്ക് സ്വര്‍ണ്ണക്കപ്പ് മാനാഞ്ചിറ സ്‌ക്വയറില്‍ പ്രദര്‍ശനത്തിന് വയ്ക്കും.
വൈകുന്നേരം മൂന്ന് മണിക്ക് ഗ്രീന്‍ പ്രോട്ടോക്കോള്‍ കമ്മിറ്റിയുടെ ആഭിമുഖ്യത്തില്‍ ശുചിത്വമിഷന്‍ പ്രോജക്ടിന്റെ ഭാഗമായുള്ള സന്ദേശയാത്ര സെന്റ് മൈക്കിള്‍സ് സ്‌കൂളില്‍ നിന്ന് ആരംഭിച്ച് വിക്രം മൈതാനിയില്‍ അവസാനിക്കും. അതിനുശേഷം വോളണ്ടിയര്‍മാര്‍ വിക്രം മൈതാനി ശുചീകരിച്ച് വേസ്റ്റ് ബിന്‍ സ്ഥാപിക്കും.വൈകിട്ട് 3.30 ന് പബ്ലിസിറ്റി കമ്മിറ്റിയുടെ ആഭിമുഖ്യത്തില്‍ വിളംബര ജാഥ മുതലക്കുളത്ത് നിന്ന് ആരംഭിച്ച് ബി ഇ എം സ്‌കൂളില്‍ അവസാനിക്കും. വൈകിട്ട് 4 ന് ഭക്ഷണ കമ്മിറ്റിയുടെ ആഭിമുഖ്യത്തില്‍ മലബാര്‍ ക്രിസ്ത്യന്‍ കോളേജ് ക്യാമ്പസില്‍ പായസം പാകം ചെയ്ത് അടുക്കളയുടെ ഉദ്ഘാടനം നിര്‍വഹിക്കും.
4.30 ന് മീഡിയ കമ്മിറ്റിയുടെ ആഭിമുഖ്യത്തില്‍ മീഡിയ പവലിയന്റെ ഉദ്ഘാടനം മന്ത്രി പി എ മുഹമ്മദ് റിയാസിന്റെ സാന്നിധ്യത്തില്‍ മന്ത്രി വി ശിവന്‍കുട്ടി നടത്തും. വൈകുന്നേരം 6 മണിക്ക് പബ്ലിസിറ്റി കമ്മിറ്റിയുടെ ആഭിമുഖ്യത്തില്‍ കോഴിക്കോട് ജില്ലയെ കുറിച്ചുള്ള വിവരണം ക്രോഡീകരിച്ചുള്ള ബുക്ക്‌ലെറ്റ് സംഘാടകസമിതി ഓഫീസില്‍ വച്ച് പ്രകാശനം ചെയ്യും.