കണ്ണൂര്‍ : സെന്‍ട്രല്‍ ജയിലില്‍ ഗുണ്ടകള്‍ തമ്മില്‍ വീണ്ടും ഏറ്റുമുട്ടി. ജയില്‍ ദിനാഘോഷത്തിനിടെ വ്യാഴാഴ്ച വൈകിട്ടാണു വീണ്ടും സംഘര്‍ഷമുണ്ടായത്.കാപ (ഗുണ്ടാനിയമം) തടവുകാരന്‍ വിവേകിന്റെ തലയ്ക്കു സാരമായി മുറിവേറ്റു. ജില്ലാ ആശുപത്രിയില്‍ വച്ച്‌, മുറിവില്‍ തുന്നലുകളിട്ട ശേഷം ഇയാളെ വ്യാഴാഴ്ച രാത്രിതന്നെ തിരികെ സെന്‍ട്രല്‍ ജയിലിലെത്തിച്ചു.ഗുണ്ടകളുടെ രണ്ടു സംഘങ്ങള്‍ തമ്മില്‍ സംഘര്‍ഷം ഉണ്ടാവുകയായിരുന്നുവെന്നു പൊലീസ് പറഞ്ഞു.
5 അംഗ സംഘത്തിന്റെ ആക്രമണത്തിലാണു വിവേകിനു പരുക്കേറ്റത്. വിവേകിനൊപ്പവും 3-4 ആളുകളുണ്ടായിരുന്നുവെന്നും ഇവരാണു സംഘര്‍ഷം തുടങ്ങിയതെന്നും ജയില്‍ ഉദ്യോഗസ്ഥര്‍ പറഞ്ഞു. കാപ തടവുകാരെ സെല്ലിനു പുറത്തിറക്കരുതെന്ന് ഉന്നത ഉദ്യോഗസ്ഥര്‍ നിര്‍ദേശിച്ചു. ടൗണ്‍ പൊലീസ് രാത്രി വൈകി കേസ് റജിസ്റ്റര്‍ ചെയ്തു.