കൊച്ചി: ഇലന്തൂര്‍ ഇരട്ട നരബലി കേസിലെ രണ്ടാമത്തെ കുറ്റപത്രം സമര്‍പ്പിച്ചു. കാലടി സ്വദേശി റോസ്‌ലിയെ കൊലപ്പെടുത്തിയ കേസില്‍ കൊലപാതകത്തിന് പുറമെ കൂട്ടബലാത്സംഗം, മൃതദേഹത്തോടുള്ള അനാദരവ്, മോഷണം, തെളിവ് നശിപ്പിക്കല്‍, മനുഷൃ കടത്തല്‍ എന്നീ കുറ്റങ്ങളും ചുമത്തിയാണ് കുറ്റപത്രം സമര്‍പ്പിച്ചിരിക്കുന്നത്.
ഇലന്തൂരിലെ ഭഗവല്‍ സിങ്ങിന്റെ വീട്ടില്‍ റോസ്‌ലിയെ എത്തിച്ച് കൊലപ്പെടുത്തി മൃതദേഹം കഷ്ണങ്ങളാക്കി മുറിച്ച് വേവിച്ച് കഴിച്ചുവെന്നതാണ് കേസ്. 200 ലധികം സാക്ഷി മൊഴികള്‍, 60 ഓളം മഹസറുകള്‍, 130 ലധികം രേഖകള്‍, 50 ഓളം തൊണ്ടി മുതലുകള്‍ എന്നിവയും അന്വേഷണ സംഘം സമര്‍പ്പിച്ചിരുന്നു.
ഇരട്ട നരബലിയില്‍ ആദ്യ കൊലപാതകമായിരുന്നു റോസ്‌ലിയുടേത്. രണ്ടാമത്തെ കൊലപാതകം തമിഴ് സ്ത്രീയായ പത്മയുടെതാണ്. പത്മയെ കാണാതായെന്ന ബന്ധുക്കളുടെ പരാതിയാണ് നരബലിയെ കുറിച്ചുള്ള വാര്‍ത്ത പുറത്തെത്തിത്തിക്കാന്‍ കാരണമായത്. പത്മയെ കൊലപ്പെടുത്തിയതിന്റെ കുറ്റപ്പത്രം ഈ മാസം ആറിന് എറണാകുളം മജിസ്‌ട്രേറ്റ് കോടതിയില്‍ സമര്‍പ്പിച്ചിരുന്നു.